Danangda nimalarni tomosha qilish mumkin? Eng yaxshi plyajlar, diqqatga sazovor va qiziqarli joylar

Ko‘pchilik uchun Vyetnam ko‘pincha “Xanoy – Halong ko‘rfazi” yo‘nalishi yoki Nyachangdagi plyajda dam olish bilan cheklangan. Ushbu sxemada Danang ko‘pincha tranzit shahar sifatida sakrab o‘tiladi yoki asossiz ravishda e’tiborsiz qoldiriladi. Ammo bu noto’g’ri.

Bu mamlakatning uchinchi yirik shahri bo‘lib, osmono‘par binolardan iborat megapolis va dam olish maskani o‘rtasidagi muvozanatni saqlab turadi. Bu yerda keng yo‘llar, ko‘priklar va eng uzun qirg‘oqlardan biri mavjud. Bundan tashqari, bu yer orqali markaziy Vyetnamning eng mashhur joylariga yetib olish mumkin.

Zerikarli joylarga vaqtingizni sarflamaslik va darhol eng yaxshi fo bo sho’rvasini topish uchun Danangda nimalarni tomosha qilish kerakligi haqida batafsil qo‘llanma tuzdik.

Danangning asosiy diqqatga sazovor joylari

Marmar tog‘lar

Marmar tog‘lar

Bu shaharning tashrif qog‘ozi bo‘lib, uni qirg‘oqning deyarli har qanday nuqtasidan ko‘rish mumkin. Ohaktosh va marmardan yasalgan beshta tepalik — beshta element: olov, suv, tuproq, yog‘och va metall sharafiga nomlangan.

Marmar tog‘lar shunchaki qoyalar emas, balki tunnellar, ibodatxonalar va g‘orlarning butun bir tizimidir. Masalan, Xuen Kxong g‘ori ichida, yemirilgan shiftdan tushayotgan quyosh nurlari Budda haykalini yoritib turadi. Bu manzara, ayniqsa, xushbo‘y tutatqilar tutuni havoda muallaq turganda, juda ulug‘vor ko‘rinadi.

Narxi: Kirish — 40 ming dong (21 ming so‘m). Lift bor, lekin barcha pagodalarni ko‘rish uchun piyoda tushgan yaxshiroq.

Oltin ko‘prik va Bana Hills

• 

  Bana Hills
• 

  Oltin ko‘prik

Internetdagi o‘sha siz bilgan rasm: ulkan tosh qo‘llar jarlik ustidagi ko‘prikning oltin lentasini ushlab turibdi. Oltin ko‘prik baland tog‘lardagi Sun World Ba Na Hills ko‘ngilochar majmuasida joylashgan.

Bu yerga kelish uchun dunyodagi eng uzun to‘xtovsiz osma yo‘lga chiqish kerak (Ginnesning rekordlar kitobi versiyasi bo‘yicha). Majmuaning o‘zi fransuz qishlog‘i, buddist ibodatxonalari va disneylendning aralashmasidir.

Chipta narxi taxminan 900 ming dong (470 ming so‘m), narx ichiga osma yo‘l va istirohat bog‘idagi attraksionlar kiritilgan.

Aytgancha, qo‘lda olomonsiz holatda suratga tushish uchun ertalab soat 7:00 da ochilish vaqtiga keling.

Ajdar ko‘prigi

Dam olish kunlari Danangga kelgan bo‘lsangiz, Ajdar ko‘prigi – ko’rish shart bo’lgan joylardan. Bu Xan daryosi ustidan o‘tgan, 666 metr uzunlikdagi oltin ajdar shaklida yasalgan po‘lat konstruksiyadir. Kunduzi u shunchaki chiroyli ko‘rinsa, kechqurunlari esa bu manzaraga rangini o‘zgartiradigan yoritgich qo’shiladi.

Ammo eng qizig‘i shanba va yakshanba kunlari soat 21:00 da sodir bo‘ladi. Ajdarho haqiqatan ham olov bilan nafas ola boshlaydi, keyin esa suv purkaydi. Bu shouni ko’rish uchun olomonni to‘planadi, shuning uchun yaxshi ko‘rinishga ega joyni egallash uchun oldindan keling (yaxshisi ajdarning boshi tomondan, lekin suvdan ehtiyot bo‘ling — ustingizni shalabbo qiladi).

Fukuok bo‘yicha qo‘llanma

Nyachang bo‘yicha yo‘lko‘rsatma

Son Tra yarim oroli

Son Tra yarim oroli (yoki Maymun tog‘i) shahar markazidan 10 km uzoqlikda joylashgan. Bu Danang o‘pkasi vazifasini bajaruvchi ulkan yashil massiv. Bu yerga sokinlik, yovvoyi plyajlar va tikka serpantinlar ortidan kelishadi.

Eng ahamiyatli tomoni: bu yerda noyob langurlar (tumshug‘i qizil maymunlar) yashaydi. Ularni ovqatlantirish mumkin emas, lekin kuzatish mumkin. Eng yaxshisi, velosipedni ijaraga olib, yarim orol bo‘ylab to‘liq aylanib chiqish va shahar manzarasi ochiladigan kuzatuv maydonchalarida to‘xtashdir.

Lin Ung pagodasi va Budda xonim ibodatxonasi

• 

  Lin Ung pagodasi 
• 

  Budda xonim ibodatxonasi

Son Tra yarim orolida sayyohlar Budda xonim deb ataydigan Guanin Bodxisatvaning ulkan oq haykali bor. Uning balandligi 67 metr bo‘lib, bu 20 qavatli uyday gap. Haykal dengizga qaragan va mahalliy aholi e’tiqodiga ko‘ra, shaharni tayfunlardan himoya qiladi. Ibodatxona hududiga kirish bepul, to‘xtash joyi uchun ko’nglingizdan chiqarib haq to’laysiz.

Mi Son ziyoratgohi

Agar sizga Kambodjaning Angkor-Vati yoki umuman xarobalari yoqsa, bu yerga albatta keling. Mi Song — IV-XIV asrlarda qurilgan Champ imperiyasining ibodatxona majmuasi qoldiqlari. Garchi urush davrida ko‘p zarar ko‘rgan bo‘lsa-da, yorqin atmosferali joy.

Ziyoratgoh Danangdan bir soatlik masofada joylashgan. Hududga kirish chiptasi 150 ming dong yoki 78 ming so‘m turadi. Yaxshisi, gid bilan borgan ma’qul yoki oldindan tarixi bilan tanishib chiqqan ma’qul, aks holda ko‘rganlaringiz o‘rmondagi g‘isht uyumiga o‘xshab tuyuladi.

Kafedral cherkov

Danangning qoq markazidagi pushti rangli ibodatxona. 1923-yilda fransuzlar tomonidan qurilgan. Rangi tufayli instagram yulduziga aylandi. Shpilda xo‘roz o‘tiradi, shuning uchun mahalliy aholi cherkovni “Kon Ga cherkovi” (Tovuq cherkovi) deb ataydi. Ichkariga faqat xizmat vaqtida kirish mumkin, qolgan vaqtda darvozalar ko‘pincha yopiq bo‘ladi, ammo bu tashqaridan suratga olishga xalaqit bermaydi.

Cham madaniyati muzeyi

Cham sivilizatsiyasi haykallarining dunyodagi eng katta kolleksiyasi to‘plangan kichik, ammo noyob muzey. Agar Mi Songa bormoqchi bo‘lsangiz, iloji boricha ko’proq narsani tushunish uchun avval bu yerga kiring. Chipta narxi 60 ming dong (31 ming so‘m) atrofida.

Phap Lam ibodatxonasi

Shovqinli shahar o‘rtasidagi sokin voha. Bu yerda Buddaning ulkan oltin haykali va bonsai bog‘i bor. Bu yerda sayyohlar kam, shuning uchun bemalol sayr qilish va nafas rostlash mumkin.

Shoncha tog‘i

Bu Son Tra yarimorolining eng baland nuqtasi (deyarli 700 metr). Bu yerga ko‘pincha “Shaxmat taxtasi” — shaxmat o‘ynayotgan donishmandning shakli tushirilgan maydonlar uchun kelishadi. Afsonaga ko‘ra, parilar bu yerga o‘ynash uchun tushishgan. Yuqoriga yo‘l tik, bu yerga velosipedda chiqishga urinmagan kirmagan ma’qul.

Kon bozori

Danang shahrining haqiqiy hayotini ko‘rishni istasangiz, Kon (Cho Con) bozoriga boring. Bu moslashtirilgan sayyohlik bozori emas, balki mahalliy mahsulotlar xarid qilinadigan joy. Hammayoqda kiyim-kechak, idish-tovoq, quritilgan kalmarlar, mevalar uyumi. Ichkarida “o‘zimiznikilar uchun” turkumidagi narxlarda ajoyib fud-kort mavjud. Ehtiyot bo‘ling: hidi “o‘ziga xos”, lekin joyning rang-barangligi ajoyib.

Qanday qilib Tailand chegarada deport bo‘lishimga bir bahya qolgani haqida

Qanday qilib Tailandga ko‘chib ketganim haqida

Tailanddagi seks-turizm haqida nimalarni bilish lozim?

Balidagi Nusa Dua`da nimalarni tomosha qilish mumkin?

Balidagi Ubud bo‘yicha qo‘llanma

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Danangning eng yaxshi plyajlari

Yozda (may-avgust) Danangdagi suv sokin va tiniq bo‘lib, cho‘milish uchun juda mos keladi. Qishda (noyabr-yanvar) shamollar mavsumi boshlanadi: dengizda dovul va to‘lqinlar ko‘tariladi. Bu vaqtda ko‘pincha cho‘milish taqiqlanadi, ammo syorferlar to‘lqinlardan faqat xursand bo‘lishadi.

Mi Kxe

Markazga yaqin bo‘lgan eng mashhur va arzon plyaj. Bu yerda rivojlangan infratuzilma mavjud: shezlonglar, dush xonalari, qutqaruvchilar, barlar. Ertalab bu yerda mahalliy nafaqaxo‘rlar gimnastika bilan shug‘ullanishadi, kunduzi esa sayyohlar quyoshda toblanishadi. Agar mustaqil va xavfsiz cho‘milish uchun joy qidirayotgan bo‘lsangiz, bu yerga keling.

Non Nuok

Marmar tog‘lari etagida joylashgan. Bu yerda qimmatbaho besh yulduzli mehmonxonalar joylashgan, shuning uchun plyaj ko‘proq xilvat va toza. Odamlar kamroq, qum oqroq.

Nam O

Shaharning shimolidagi, mahalliy xalq "Rif" deb ataydigan plyaj. Bu yerda yashil mox bilan qoplangan toshlar ko‘p. Cho‘milish qiyin, lekin fotosessiya uchun albatta borish kerak.

Bak May An

Mi Kxe plyajining davomi, lekin qimmatroq dam olish maskanlariga ega. Bu yerda ko‘pincha ekspatlar va mehmonxona xizmatlarini qadrlaydiganlar dam olishadi.

Xuddi shu mavzuda ko'proq ma'lumot

Sayohatni qanday mustaqil rejalashtirish va aqldan ozib qolmaslik mumkin?

Danangda nima bilan shug‘ullanish mumkin? O‘yin-kulgi va tungi hayot

“Danangning diqqatga sazovor joylari” ro‘yxatini yakunlaganda shunday savol tug‘iladi: keyin nima qilish kerak? Variantlar juda ko’p.

Spa va massaj

Vyetnamcha massaj qo’polroq, ammo samarali. Danangda yuzlab salonlar mavjud: laksheri-spadan tortib, plastik stullar o‘rnatilgan ko‘cha muassasalarigacha. Narxlar oyoq massaji uchun 150 ming dongdan (78 ming so‘m) boshlanadi. Oyoq massaji yoki tana massaji belgilarini qidiring. Issiq toshlar yoki o‘tli vannalarda massaj olish maslahat beramiz.

Dengiz sayohatlari

Danangda qayiqni ijaraga olib, Ku Lao Cham (Cu Lao Cham) orollariga borish mumkin. Bu YUNESKOning biosfera qo‘riqxonasi va snorkling uchun ajoyib joy: suv juda toza va marjonlar ko‘rinib turibdi. Suv osti dunyosini tomosha qilish taxminan 500-700 ming dong yoki tushlik bilan sayohat uchun 26-365 ming so‘m turadi.

Asia Park (Sun World Danang Wonders)

Bu shahar markazidagi ulkan attraksionlar parki. Asosiy jihati — bu yerda dunyodagi eng baland (115 metr) manzara charxpalaklaridan biri bo‘lgan Sun Wheel joylashgan. Yuqoridan butun shahar ko‘rinib turadi. Biletning narxi Bana Hillsga qaraganda arzonroq, kechqurun esa odamlar kamroq bo‘ladi. Bolalar bilan tashrif buyurish uchun ajoyib joy.

Faol dam olish uchun: syorfing, SUP, suv sporti

Qish mavsumida (noyabrdan martgacha) Danang plyajlarida yaxshi to‘lqinlar bo‘ladi. Bu syorferlar davri. Mi Kxe plyajida syorfing maktablari mavjud bo‘lib, u yerda siz syorfing doskasi va instruktorni (ko‘pchilik ingliz tilida gapiradi) band qilishingiz mumkin. Yozda, dengiz sokin bo‘lganda, sapbordlar va kayaklar mashhur bo‘ladi. Doskani qirg‘oqning o‘zida ijaraga olish mumkin.

Tungi hayot: bozorlar, barlar va kruizlar

Dragon Bridge yaqinidagi Son Tra Night Market tungi bozori har kecha ishlaydi. Bu yerda arzon narxlarda dengiz mahsulotlarini iste’mol qilish va esdalik sovg‘alarini xarid qilish mumkin. Ziyofat ishqibozlari uchun Xan daryosiga qaragan skay-barlar (masalan, Novotel yoki Hilton mehmonxonalarining tomida) mavjud. Yanada tinchroq variant — Xan daryosi bo‘ylab kechki kruiz. Kemalar har soatda qatnaydi, chipta narxi taxminan 150 ming dong.

Danangga qanday borish mumkin?

O‘zbekistondan Danangga hozircha to‘g‘ridan-to‘g‘ri reyslar yo‘q. Yetib borishning eng qulay usuli — charter parvoz orqali.

1. Seul orqali (Asiana Airlines, Uzbekistan Airways). Qulay, lekin qimmat bo‘lishi mumkin.
2. Kuala-Lumpur orqali (Batik Air). Ko‘pincha yaxshi narxlar bo‘ladi.
3. Hoshimin yoki Xanoy orqali. Vyetnamning yirik shaharlariga, u yerdan esa ichki reys bilan (VietJet, Vietnam Airlines, Bamboo Airways) uching. Mamlakat ichidagi parvoz 30-50 dollar (360-600 ming so‘m) turadi va bir soatdan sal ko‘proq vaqt oladi.

Danangga qachon borgan yaxshiroq?

Eng yaxshi vaqt: fevraldan avgustgacha — bu paytlarda ob-havo quruq, quyoshli va dengiz esa iliq bo‘ladi. Sentyabrdan dekabrgacha (oktyabr-noyabr oylarida avjiga chiqadi) esa yomg‘irlar va tayfunlar mavsumi bo’ladi, bu vaqtda Danangga borish xavfli.

Qayerda tunash mumkin?

Danang Xan daryosi bilan ikki qismga bo‘linadi: "shahar" va "plyaj".

1. Mi Kxe plyaji tumani (Son Tra District). Sayyoh uchun eng yaxshi tanlov. Yo‘lning narigi betida dengiz, dengiz mahsulotlari bor bir talay qahvaxonalar, hamyonbop mehmonxonalar.
2. Shahar markazi (Hai Chau District). Bozorlar, muzeylar va aeroportga yaqinroq. Bu yer arzonroq, lekin plyajgacha 10-15 daqiqada taksida borishga to‘g‘ri keladi.
3. Ngu Xang Song tumani (Marmar tog‘lari yaqinida). Xotirjam, qimmat dam olish maskanlari, tungi bazmlar yiroqda.

Qayerda mazali taom yeyish mumkin?

Vyetnam oshxonasi nafaqat fo bo sho’rvasidan iborat. Markaziy Vyetnam o‘zining gastronomik o’ziga xosliklariga ega.

Nimalarni tatib ko’rish mumkin?

• Mi Quang — Danangning asosiy taomi. Ozgina kuchli bulyon, go‘sht (cho‘chqa go‘shti, tovuq go‘shti, krevetka), ko‘katlar, yeryong‘oq va qarsildoq guruch krekeri solingan guruchli ugra.
• Ban Chang Kep (Banh Trang Kep) — tuxum, pashtet va piyoz bilan ko‘mirda pishirilgan guruch qog‘ozidan tayyorlangan Vyetnam “pitsasi”. Ko‘cha taomlari orasida xit taom.
• Yangi dengiz mahsulotlari: Danangda ular Nyachangga qaraganda arzonroq. Akvariumlardan tanlang, ularni sizning ko‘z oldingizda tayyorlab berishadi.

Ko‘cha taomlari

Plastik stulchalardan qo‘rqmang. Ko‘pchilik mahalliylarni ko‘rsangiz — bemalol o‘tiravering. Bun Cha Ca (baliq kotletli ugra) yoki Com Ga (tovuqli guruch) yozuvlarini qidiring. Bir porsiyasi 30-50 ming dong (15-25 ming so‘m) turadi.

Sayyohlar uchun kafe

Agar konditsioner va burgerlarni sog‘ingan bo‘lsangiz, Mi Kxe plyaji yaqinidagi An Txiong (An Thuong) tumaniga boring. Bu yer "ekspatlar kvartali". Bu yerda italyan, meksikan, hind taomlari va ajoyib qahvani topasiz.

Shaharda nimada harakatlanish mumkin?

Harakatlanishning eng qulay usuli — Grab ilovasi orqali taksi yoki mototsiklga buyurtma berishdir. Shahar bo‘ylab sayohat arzon bo’ladi.

Agar o‘zingizga ishonsangiz, bayk ijaraga oling (A toifadagi haydovchilik guvohnomasi kerak), lekin bu yerda harakat tartibsiz. Bayk ijarasi kuniga 120-150 ming dong (62-78 ming so‘m) turadi. Ammo haydash uchun A toifadagi xalqaro guvohnoma (IDP) bo‘lishi shart. Danangda politsiya ko‘pincha sayyohlarni tintuv qiladi. Jarima — 2 million donggacha (taxminan 1 million so‘m) boradi, bundan tashqari, baykni jarima maydonchasiga olib ketishlari mumkin. Guvohnoma bo‘lmasa – Grab varianti yaxshiroq.

Agar ko‘p piyoda yursangiz, bilingki, yo‘lda bayklar ko‘p, "zebra"da hech kim tormoz bermaydi. Asosiy qoida: sizni o‘tkazib yuborishlarini kutmang. Oqimda to’xtashi bilan — yuring. Xotirjam harakatlaning va yugurmang.

Danangdan esdalik sifatida nima olib kelish mumkin?

• Qahva. Vyetnam — qahva mamlakati. Robusta yoki arabika donalarini oling (Trung Nguyen brendi yoki mahalliy qovurilgan qahvalar). Qahva damlash uchun "fin" — metall filtr sotib olishni unutmang.
• Marmardan yasalgan buyumlar. Haykalchalar, hovonchalar, taqinchoqlar. Marmar tog‘lari etagidan xarid qilgan ma’qul, lekin oxirigacha savdolashing va yuk vazni cheklovlarini unutmang, tosh – og‘ir buyum.
• Quritilgan mevalar va dengiz mahsulotlari. Mango, jekfrut, kalmarlar. Xan va Kon bozorlarida hamma narsani topish mumkin.
• Ipak va kiyimlar. Tasavvur qiling: qo‘shni Xoyanda (Danangdan 30 km uzoqlikda) buyurtma asosida bir sutkada kostyum yoki ko‘ylak tikrirish mumkin.

Xuddi shu mavzuda ko'proq ma'lumot

Xitoydan nimalarni olib kelish mumkin? Ming yillik chinni, o‘yinchoqlar va gazaklar

Viza va pul

O‘zbekiston fuqarolariga E-visa (elektron viza) kerak. Rasmiy saytda 25 dollarga (joriy kurs bo‘yicha 325 ming so‘m atrofida) 3-5 kunda rasmiylashtiriladi. Uchishdan oldin uni chop eting.

Valyutasi — dong (VND). O‘zingiz bilan dollar olib yuring (yangi namunadagi kupyuralar, shtampsiz va shikastlanmagan), ularni zargarlik do‘konlarida arzonroq ayirboshlang (banklarga qaraganda yuqori kurs) yoki bankomatlardan yechib oling (VPBank, TPBank ko‘pincha o‘z foydasiga komissiya olmaydi).

Sayohat narxi qanchaga tushadi?

Danang demokratik joy. Mana taxminiy narxlar:

• Turar joy: dengiz bo‘yidagi 3* mehmonxona — bir kecha uchun 210 ming so‘mdan boshlanadi. Hostel — 52 ming so‘mdan boshlanadi.
• Ovqat: ko‘chada fobo yoki Ban mi — 8-16 ming so‘m. Dengiz mahsulotlaridan iborat kechki ovqat — 105 ming so‘mdan boshlanadi.
• Bayk: bir kunlik ijara — 62-78 ming so‘m.

Sayohatchilarning maslahatlari

Mahalliy SPF sotib oling. Dorixonadan olingan oddiy krem yoki koreys kremi yordam bermasligi mumkin.

Bolalar va kattalar uchun odatiy taomlarni oling. Agar oilaviy parvoz qilsangiz, kimdir mahalliy taomlarga ko‘nikishi qiyin bo‘lishi mumkin, ayniqsa Danangda cho‘chqa go‘shti solinmagan taomlarni topish qiyin.