Toshkentda metrodan foydalanish: yo‘nalishlar sxemasi, ish tartibi va yo‘l haqi

Ko‘pchilik sayyohlar Toshkentga keliboq, bu yerda taksi arzonligini e’tirof etishadi. Chindan ham shunday. Ammo, shaharda yana bir qulay, va eng qizig‘i, ko‘proq taassurot qoldiradigan harakatlanish vositasi ham bor. Buning uchun yer ostiga tushilsa, bas.

Sizni qasrlar, koinotga o‘tish yo‘li va milliy san’at ko‘rgazmasi zaliga o‘xshash bekatlar kutib oladi. Bularning barchasi — Toshkent metropolitenida. Unga har bir tushishingiz bir finjon qahva pulidan ham arzon kichik ekskursiyadir.

Ana endi qisqagina asosiy mavzu haqida.

Toshkent metrosi qanday ishlaydi?

Toshkent metrosi — bu nafaqat transport tizimi, balki haqiqiy vaqt mashinasi ham. 1977-yilda ishga tushirilgan birinchi bekatlar yaqindagina ochilgan o‘ta zamonaviy bekatlar bilan uyg‘unlashib ketgan.

2025-yilga kelib, Toshkent metrosi shaharning eng asosiy tumanlarini bog‘lovchi to‘rtta yo‘nalish bo‘ylab 50 ta bekatga ega. Kunlik yo‘lovchi tashish qobiliyati esa 741 000 kishini tashkil etadi.

Yo‘nalishlar odatiy tarzda ranglar bilan ajratilgan:

• Chilonzor (qizil). Eng birinchi va ehtimol, eng zo‘r kayfiyat beruvchi yo‘nalish. Noyob dizayndagi 17 ta bekatning har biri go‘yoki o‘z davridan qolgan me’moriy yodgorlik. Unga Sergeli yo‘nalishi — to‘liq yer ustidan o‘tgan 5 ta bekat ulangan. Sxemalarda u qizil yo‘nalishning davomi tarzida ko‘rsatilgan.

• O‘zbekiston (ko‘k). 1984-yilda ochilgan, shaharning ma’muriy markazidan o‘tadi. Uning bekatlari monumentallik va teran go‘zallik ruhida yaratilganligi bilan ajralib turadi.

• Yunusobod (yashil). 2001-yilda ishga tushgan, shahar markazini shimoliy tumanlar bilan bog‘laydi.

• Halqa (sariq, «Mustaqillikning 30-yilligi yo‘nalishi»). Eng yangi, qisman yer ustidan o‘tgan bu yo‘nalish 2020-yilda ochilgan. Muhim ma’lumot: 2025-yil 2-avgustdan «Texnopark»–«Yangiobod» bekatlari oralig‘ida qatnov ta’mir ishlari uchun noma’lum muddatga vaqtincha yopilgan. Hozir bu kesimda «Texnopark–Qipchoq–Texnopark» yo‘nalishida bepul avtobuslar qatnamoqda‎. Shuningdek, Halqa yo‘nalishidan Chilonzor yo‘nalishiga o‘tishda («Qipchoq»/«Chinor») yo‘l haqi qayta to‘lanishini ham hisobga olish lozim.

Toshkent metrosi sxemasi

Yer ostida mo‘ljalni aniq olish uchun metro sxemasini oldindan yuklab olgan yaxshi.

Toshkent metrosi sxemasi

Yaqinda metropoliten ma’muriyati geografik nuqtalar biriktirilgan yangi, yanada tushunarli sxemani taqdim etdi. Unda bekatdan bekatga o‘tish nuqtalari aniq ko‘rsatilgan, bekatlar nomi rus tilida ham qayd etilgan, demak, navigatsiya borasida muammo bo‘lmaydi.

Toshkent metrosining ish tartibi

Jadval

To‘liq jadval, dolzarb yangiliklar, yo‘nalishlar va sxema Metropolitenning rasmiy saytida va ATTO ilovasida berilgan. Shuningdek, Toshkent Metro ilovasini yuklab olish mumkin (metroning batafsil sxemasi, bekatlarni izlash, o‘tish bekatlari haqida ma’lumot).

Poyezdlarning harakatlanish oralig‘i kunning qaysi payti ekaniga bog‘liq: tig‘iz paytda (7:30–9:30 va 17:00–19:00) poyezdlar har 2-4 daqiqada, qolgan paytda esa — har 8-10 daqiqada yuradi.

Toshkent metrosida yo‘l haqi va uni to‘lash usullari

Yo‘l haqi qancha?

2025-yil 1-yanvardan quyidagi tariflar amal qiladi:

• 3 000 so‘m — QR-chipta uchun kassaga naqd to‘lov.
• 1 700 so‘m — naqd pulsiz to‘lov. Shu jumladan, ATTO transport kartasi, bank kartalari va to‘lov ilovalari orqali to‘lovlar uchun.
• 4 000 so‘m — uch tomoni qo‘shilganda hajmi 200 santimetrdan katta bo‘lgan hajmli yukni olib ketish uchun.

Eng yaxshisi — ATTO kartasidan foydalanish, unda bir soat ichida bekatdan bekatga o‘tishlar uchun chegirma beriladi.

Metroda to‘lov qanday qilinadi?

• Naqd pul: metro kassalarida QR-chipta uchun naqd to‘lov qilinadi.

• ATTO transport kartasi: Bu kartadan foydalansangiz, tarifga ko‘ra bir soat davomida ishlaydigan chegirmalar va bepul o‘tishlar beriladi. Kartani kassalarda, terminallarda, ATTO mobil ilovasi yoki onlayn-banking orqali to‘ldirish mumkin.

• Bank kartalari va to‘lov tizimlari: To‘lov qilishda NFC texnologiyali, jumladan Uzcard, Humo, Visa, Mastercard, UnionPay va MIR kartalari qabul qilinadi. Bundan tashqari, Payme, Click, Uzum va boshqa mobil ilovalar orqali ham to‘lov qilish mumkin.

• Palm pay tizimi: Bu kaftdagi vena tasviri orqali kontaktsiz biometrik to‘lov tizimi. U sinov tartibida Chilonzor yo‘nalishining 12 ta bekatida ishlamoqda. Xorijliklar tizimni yoqishlari uchun O‘zbekistonda ro‘yxatga olingan sim-karta kerak bo‘ladi.

Imtiyozlar

• Besh yoshgacha bo‘lgan bolalar tekinga yuradilar.
• Pensionyerlar 10:00 dan 16:00 gacha guvohnoma ko‘rsatgan holda bepul yurishlari mumkin. 
• Maktab o‘quvchilari va talabalar uchun ATTO kartalarida imtiyozli tariflar ko‘zda tutilgan. 

Toshkent metrosida adashmaslik uchun

Bekatlarda ranglar bilan ajratilgan va o‘tish joylari belgilangan tushunarli sxemalar bor. Vagonlarda — bekat nomlari yozilgan tablolar ilingan, yana ovozli e’lon ham eshittiriladi. Tushadigan bekatingizni aslo o‘tkazib yubormaysiz. Yanada qulaylik uchun ATTO ilovasini yuklab, oflayn-kartani ulab qo‘yish mumkin.

Shunga qaramay, mabodo adashib qolsangiz — metro xodimlariga bemalol murojaat qilishingiz mumkin.

Agar boshqa bekatda tushib qolsangiz, yana to‘lov qilib yoki ATTO transport kartasidagi bekatdan bekatga o‘tish tarifi bilan metroga qaytib tushishingiz mumkin.

Toshkent metrosi haqida eng ko‘p beriladigan savollar

Toshkent metrosida nechta bekat bor? Bugungi kunda Toshkent metropolitenida 50 ta bekat bor.

Yo‘l haqini karta yoki telefondan to‘lasa bo‘ladimi? Ha, bo‘ladi. Turniketlar ATTO transport kartasini, NFC’li bank kartalarini (Visa, Mastercard, «Mir») va Payme, Click, Uzum mobil ilovalari orqali to‘lovni qabul qiladi.

Metro tunda ishlaydimi? Yo‘q, metro tunda yopiladi. Ish vaqti — yarim tungacha.

Metroda Wi-Fi bormi? Ha, bekatlarda Wi-Fi bor. Lekin ulanish uchun mahalliy operator sim-kartasi kerak.

Bir yo‘nalishdan boshqasiga qanday o‘tiladi? O‘tish joylari ko‘rsatkichlar bilan belgilangan. Ular sxemalarda ham aniq ko‘rinadi. Shunchaki ko‘rsatkichlarga qarab kerakli platformagacha osongina yetib olsa bo‘ladi.

Aravachalar va velosipedlarni metroda olib yurish mumkinmi?

1. Bolalar va nogironlar aravachalarini bepul olib yurish mumkin.
2. Velosiped va boshqa harakatlanish vositalarini olib yurish taqiqlanadi. Yig‘iladigan va bolalar velosipedlari – bundan mustasno.

Adashib qolganda nima qilish kerak? Vahimaga tushmang. Politsiya xodimi yoki bekat bo‘yicha navbatchiga murojaat qiling — sizga albatta yordam berishadi. Bundan tashqari, yo‘l ko‘rsatuvchi sxemalar bor.

Toshkent metrosi — alohida diqqatga sazovor joy! Nima uchun?

Toshkent metropoliteni yer ostidagi muzey deb nom olgani bejiz emas. Mahalliy aholi uchun u manzilga yetish vositasi xolos, sayohatchilar uchun esa — haqiqiy ekskursiya.

Har bir bekat — alohida tarix. «Paxtakor»da — oq oltinga bag‘ishlangan mozaika pannosi, «Kosmonavtlar»da — Gagarin va Tereshkova portretlari aks etgan koinotga chinakam portal bor, «Alisher Navoiy» bekati esa buyuk shoir asarlari mavzusida bezatilgan.

Ko‘pgina bekatlardagi o‘ziga xoslik — bezaklarda. Ularda marmar va granit toshlarning noyob turlari ishlatilgan bo‘lib, yorug‘lik qay tarafdan tushsa ham, ular tubidan nur taralayotganga o‘xshaydi. Odam o‘zini metroda emas, teatr foyesida turgandek his qiladi.

Xullas, metroga tushsangiz, yuqoriga chiqishga shoshilmang. Toshkent merosida bir-ikki bekat ko‘proq yurish — bu vaqt yo‘qotish emas, aksincha, unutilmas va noyob taassurotga ega bo‘lishdir.