Toshkent tumanlari: sayyohlar uchun qayerda tunash yaxshiroq?

Toshkentda 12 ta tuman bor, qayerda yashashingizga qarab yo‘lga qancha vaqt ketishi va shahar xotirangizda qanday muhrlanishi belgilanadi. Eski shaharda mahallaning tuzilishi bilan tanishish mumkin, Yunusobodda esa teleminora va hayvonot bog‘i yaqin, “Buyuk Ipak yo‘li” bekatidan esa toqqa borish oson. Sayyohlar uchun qaysi tumanlarda to‘xtash qulay, u yerlarga nimalar yaqin va turarjoy qancha turishi haqida so‘z yuritamiz. 

Toshkentda qanday tumanlar bor? 

Toshkentning deyarli barcha tumanlarida tinch-osoyishta, ammo sayyohlar uchun markazda — “Oybek”, “Kosmonavtlar” va “Amir Temur xiyoboni” bekatlari yaqinida yashash qulayroq. Boshqa tumanlardan markazga metro yoki avtobusda yetib olish oson. Transport ertalab soat beshdan yarim tungacha ishlaydi. Yo‘l haqi karta orqali to‘langanda 2,5 ming so‘m, naqd pulda esa 3 ming so‘m turadi.

Toshkentning sayyohlar uchun eng yaxshi tumanlari

Asosiy diqqatga sazovor joylarga istalgan tumandan yetib borish mumkin, asosiy masala — vaqt va qulaylikda. Markazdan, ya’ni “Oybek”, “Kosmonavtlar” va “Amir Temur xiyoboni” bekatlaridan ko‘plab joylarga piyoda borish yoki metroda bir necha bekatda yetib olish mumkin. Quyida sayyohlar uchun yashash eng qulay bo‘lgan oltita tuman keltirilgan. 

Mirobod tumani

Metro: “Toshkent”, “Oybek”, “Kosmonavtlar”, “Ming O‘rik”.
Ijara narxi: sutkasiga 1 million so‘mdan boshlanadi.

Mirobod tumani — markazning janubiy qismi hamda Markaziy (Shimoliy) vokzalga poyezdda kelganlar ko‘radigan birinchi maskandir. Bu yerdan poyezdlar O‘zbekistonning deyarli barcha hududlariga: Samarqand, Buxoro, Farg‘ona vodiysiga qatnaydi. To‘g‘ridan-to‘g‘ri vokzal maydoni ostida “Toshkent” metro bekati joylashgan bo‘lib, u yerdan poytaxtning deyarli barcha tumanlariga borish mumkin.

Kechqurun ko‘plab kafe va barlar joylashgan Taras Shevchenko ko‘chasida sayr qilish mumkin. Tarixiy joylardan bu yerda Mingo‘rik manzilgohi bor — bu nomi “mingta o‘rik” deb tarjima qilinadigan qadimiy qal’a qoldiqlaridir. Muqaddas Uspenskiy kafedral sobori yonida esa Mirobod bozori joylashgan. Bu yerda istalgan narsani topish mumkin, ammo biz koreys taomlarini: pegodya (go‘sht va karam solib bug‘da pishirilgan pirojkilar), salatlar va tuzlamalarni tatib ko‘rishni tavsiya qilamiz.

FerideToshkentning deyarli har bir tumanida yashab chiqqan

Bu, ehtimol, Toshkentning eng yaxshi tumanidir. Bu yer tinch, turli xil maskanlar, barlar ko‘p va qulay veloyo‘laklar bor. Agar velosiped haydashni yoqtirsangiz, shu yerga joylashing.

Shayxontohur tumani

Metro: O‘zbekiston yo‘nalishida “Chorsu”, “G‘afur G‘ulom”, “Alisher Navoiy”, “Tinchlik” va “Beruniy”, Chilonzor yo‘nalishida “Paxtakor”, “Xalqlar do‘stligi” va “Milliy bog‘“.
Ijara narxi: bir kecha-kunduzga 600 ming so‘mdan boshlanadi.

Shayxontohur tumani markazning shimoli-g‘arbida joylashgan. Toshkentliklar uni Eski shahar deb atashadi: bu yerda mahallalar (an’anaviy turar joy mavzelari), masjidlar va bozorlar saqlanib qolgan.

Tumandan ikkita metro liniyasi oʻtadi, ularning biridan ikkinchisiga “Alisher Navoiy” va “Paxtakor” bekatlarida oʻtish mumkin. Sayyohga koʻpincha “Chorsu” kerak boʻladi: yonida Chorsu bozori va Koʻkaldosh madrasasi joylashgan. Qadimiy Qurʼonlardan biri saqlanadigan Hazrati Imom majmuasiga esa Chorsudan taksi yoki avtobusda boriladi. Shu nomdagi savdo markaziga ega Tashkent City ham ushbu tumanda joylashgan boʻlib, Chorsudan unga mashinada taxminan 20 daqiqalik yoʻl.

FerideToshkentning deyarli har bir tumanida yashab chiqqan

Uy-joyni Ganga hududida, “Gʻafur Gʻulom” metro bekati yaqinida ijaraga olgan ma’qul. Bu yerda mashhur “Ganga” muzqaymogʻi sotiladi. Bu joy muzqaymoq sharafiga nomlanganmi yoki avvaldan shunday atalganmi, bilmayman. Bu yerdan “Xalqlar doʻstligi” va “Chorsu” bekatlari uzoq emas, shuning uchun asosiy sayyohlik joylariga 15 daqiqada borish yoki piyoda yetib olish mumkin. 

Yunusobod tumani

Metro: “Yunus Rajabiy”, “Abdulla Qodiriy”, “Minor”, “Bodomzor”, “Shahriston”, “Yunusobod” va “Turkiston”.
Ijara narxi: sutkasiga 500 ming so‘mdan boshlanadi.

Yunusobod tumani Amir Temur xiyobonidan shimolga, halqa avtomobil yoʻligacha choʻzilgan. Markazga yaqinroqda eski mavzelar, shimolda esa yangi va eski uylardan iborat yotoqxona tumanlari joylashgan. Butun tuman boʻylab Yunusobod metro yoʻnalishi oʻtadi.

“Bodomzor” bekati yaqinida kuzatuv maydonchasiga ega, balandligi 375 metr boʻlgan teleminora qad koʻtargan. Shu yerning oʻzida sayr qilish mumkin boʻlgan Yapon bogʻi va OʻzEkspomarkaz joylashgan. Bogʻishamol koʻchasida esa hayvonot bogʻi va botanika bogʻi yonma-yon joylashgan.

FerideToshkentning deyarli har bir tumanida yashab chiqqan

“Minor” yonidagi ko‘prik ostida Minor-somsa sotiladi — uni asosan mahalliy aholi biladi. Yaqin atrofda “Malika” texnika bozori joylashgan bo‘lib, u yerda mobil telefonlardan tortib havo tozalagichlargacha hamma narsa bor. Yonidan sohilbo‘yi obodonlashtirilgan Anhor oqib o‘tadi, kechqurun u yerda sayr qilish juda yoqimli.

Yakkasaroy tumani

Metro: o‘z bekati yo‘q, eng yaqini — “Kosmonavtlar”.
Ijara narxi: sutkasiga 400 ming so‘mdan boshlanadi.

Yakkasaroy — Toshkentning maydoni boʻyicha eng kichik tumani va Toshkent viloyati bilan umumiy chegaraga ega boʻlmagan yagona tumanidir. Bu yerda oʻzining metro bekatlari yoʻq, eng yaqini — Mirobod tumani bilan chegaradagi “Kosmonavtlar” bekati. Ammo bu yerda Janubiy vokzal joylashgan.

Tuman hayoti Bobur va Shota Rustaveli koʻchalari atrofida qaynaydi: ularda koʻplab qahvaxonalar va kichik mehmonxonalar mavjud. Bobur koʻchasida Bobur bogʻi (Doʻstlik bogʻi deb ham ataladi), uning ichida esa “Sietl” bogʻi joylashgan. U 1988-yilda Toshkentning birodarlashgan shahri boʻlmish Amerikaning Sietl shahri aholisi bilan birgalikda barpo etilgan.

Kechki payt Seoul Mun boʻylab — Seul koʻchasi yaqinidagi Boʻrijar kanali sohilida sayr qilish mumkin. Suv boʻyida restoran va barlar joylashgan uch pogʻonali sayr xiyoboni choʻzilib ketgan.

Xuddi shu mavzuda ko‘proq ma'lumot

Toshkentdagi Magic City bog‘i: narxlar, attraksionlar va ish vaqtlari

Mirzo Ulug‘bek tumani

Metro: Chilonzor yo‘nalishidagi “Hamid Olimjon”, “Pushkin” va “Buyuk Ipak yo‘li”.
Ijara narxi: bir sutkaga 500 ming so‘mdan boshlanadi.

Mirzo Ulug‘bek tumani — Toshkentning shimoli-sharqiy qismi. U Mirobod tumani bilan bir qatorda sayyohlar uchun eng asosiy hududlardan biri sanaladi. Chilonzor yo‘nalishining oxirgi bekati — “Buyuk Ipak yo‘li”, mahalliy aholi uni haligacha “Maksimka” deb ham ataydi, chunki ilgari bekat Maksim Gorkiy nomi bilan yuritilgan. Undan Amir Temur xiyobonigacha bor-yo‘g‘i uch bekatlik yo‘l.

Hududda ko‘kalamzorlik ko‘p: bu yerda Akademgorodok, universitetlar va Central Park joylashgan. Yoshi kattaroq mahalliy aholi uni hamon Telman bog‘i deb ataydi. Bu — Toshkentning 1934-yilda ochilgan eng qadimgi bog‘i. Bog‘ qiyalikda joylashgan. Yuqorida — soya-salqin xiyobonlar, pastda esa attraksionlar, fudkortlar hamda karp baliqlari, o‘rdaklar va oqqushlar suzib yurgan hovuz bor. Agar sizga zinapoyalardan yurish qiyinlik qilsa, bog‘ning g‘arbiy tomonidan yuring — u yerdan yo‘l bo‘ylab yuqoriga ko‘tarilish mumkin.

Maksimkadan tog‘ga borish juda qulay: bekat yonida Chirchiq, G‘azalkent, Chorvoq va Amirsoyga qatnaydigan taksi hamda marshrutkalar to‘xtash joylari bor.

Chilonzor tumani

Metro: “Novza”, “Mirzo Ulug‘bek”, “Chilonzor” va “Olmazor”.
Ijara narxi: bir kechaga 300 ming so‘mdan boshlanadi.

Chilonzor tumani — janubi-g‘arbda joylashgan. Shu nomdagi Chilonzor metro yo‘nalishi orqali bu yerdan markazga to‘g‘ridan-to‘g‘ri (boshqa poyezdga o‘tmasdan) yetib olish mumkin.

“Mirzo Ulug‘bek” metro bekati yaqinida “Milliy” stadioni joylashgan. Undan uncha uzoq bo‘lmagan joyda esa hozirda Dream Park deb ataluvchi G‘afur G‘ulom nomidagi madaniyat va istirohat bog‘i bor. 1967-yilda barpo etilgan ushbu bog‘da qayiq va katamaranlar suzib yuradigan ikkita ko‘l, charxpalak hamda kichik hayvonot bog‘i mavjud. Bog‘ yonida esa Musiqali komediya teatri joylashgan.

Agar bolalar bilan kelsangiz, Magic City’ga boring: kirish bepul, “Xalqlar do‘stligi” bekatidan bog‘gacha taxminan 900 metr. Yonida Alisher Navoiy nomidagi Milliy bog‘ va O‘zbekiston adiblarining haykallari o‘rnatilgan Adiblar xiyoboni joylashgan.

Yashash uchun tumanni qanday tanlash kerak?

Toshkentda yashamoqchi bo‘lgan tumanni tanlash uchun oltita jihat haqida o‘ylab ko‘ring:

• Markazga olib boradigan yo‘l. Agar ikki-uch kunga borayotgan bo‘lsangiz, Shayxontohur yoki Mirobod tumanini tanlang: bu yerdan asosiy joylarga piyoda borsa yoki bir necha bekatda yetib olsa bo‘ladi. Chilonzor tumanidan yo‘l ko‘proq vaqt oladi, ammo u yerda turarjoy arzonroq.
• Metro yaqin. Turarjoydan piyoda 10–15 daqiqalik masofada bekat bor-yo‘qligini tekshiring. Yakkasaroy tumanining o‘zida metro bekatlari yo‘q. Yunusobod tumanida metro butun tuman bo‘ylab o‘tadi, ammo undan hayvonot bog‘i va botanika bog‘igacha piyoda yurish yoki avtobusda borishga to‘g‘ri keladi.
• Samolyot yoki poyezd. Agar poyezdda kelsangiz, eng qulayi — Mirobod tumani: Markaziy vokzal shu yerda, vokzal maydoni ostida esa “Toshkent” bekati joylashgan. Agar samolyotda kelsangiz, “Oybek” va “Kosmonavtlar” bekatlari atrofidagi turarjoylarni ko‘rib chiqing: u yerdan aeroportga avtobus qatnaydi.
• Byudjet. Eng qimmat ijara narxi Mirobod, Shayxontohur va Yakkasaroy tumanlarida, eng arzoni esa Chilonzor tumanida.
• Sokinlik yoki deraza tagidagi kafe. Agar yaqin-atrofda turli maskanlar bo‘lishini istasangiz, Mirobod tumani to‘g‘ri keladi. Sokinlik istasangiz — Yunusobod yoki Yakkasaroy tumaniga borgan ma’qul. Agar xonadon katta yo‘l bo‘yida joylashgan bo‘lsa, bron qilish paytida derazalar qaysi tomonga qaraganini aniqlashtirib oling.
• Bolalar bilan sayohat. Yunusobod tumanida hayvonot bog‘i, botanika bog‘i va teleminora bir-biriga yaqin, Chilonzorda esa — Magic City va G‘afur G‘ulom nomidagi bog‘ joylashgan.

Kechki tig‘iz paytda tirbandlikda qolib ketmaslik uchun metro yaqinidan turarjoy tanlagan ma’qul. Quyidagi jadvalda tumanlar haqidagi asosiy ma’lumotlar keltirilgan:

Xuddi shu mavzuda ko‘proq ma'lumot

Toshkentda kechqurun qayerga borish mumkin? barlar, pablar va gastrokoʻchalar

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Tez-tez beriladigan savollar

Toshkentning qaysi tumani markaz hisoblanadi?

Toshkentda rasman “markaziy” tuman yo‘q. Odatda Amir Temur xiyoboni atrofi — Yunusobod, Mirobod, Yakkasaroy va Shayxontohur tumanlari tutashgan hudud markaz deb ataladi.

Toshkentning qaysi hududi sayyohlar uchun yaxshiroq?

Qisqa sayohat uchun — Shayxontohur tumani: eski shahar, Chorsu bozori va ikkita metro yo‘nalishi. Agar yaqin-atrofda kafelar va vokzal bo‘lishi muhim bo‘lsa, Mirobod tumanini tanlang.

Toshkentda bolalar bilan qayerda tunash ma’qul?

Yunusobod tumanida: u yerda hayvonot bog‘i, botanika bog‘i va teleminora bor. Ikkinchi variant — Chilonzor tumani, u yerda bog‘lar ko‘p, kvartiralar esa arzonroq.

Toshkentning qaysi tumanlari metroga yaqin joylashgan?

Eng ko‘p bekat Shayxontohur tumanida — ikki yo‘nalishda sakkizta bekat joylashgan. Yunusobod yo‘nalishi deyarli to‘liq Yunusobod tumaniga to‘g‘ri keladi, Chilonzor tumanidan esa Chilonzor yo‘nalishining beshta bekati o‘tadi. Sergeli tumanida yerusti bekatlari bor.

Toshkentda qayerda uyni arzonroq ijaraga olish mumkin?

Chekka hududlarda — Olmazor, Uchtepa va Bektemir tumanlarida. U yerda ko‘ngilochar maskanlar kamroq va markazgacha borishga ko‘proq vaqt ketadi. Markazga yaqinroq tumanlar orasida esa Chilonzor arzonroq.

Aeroportga yaqin qaysi hududni tanlash kerak?

Aeroport Sergeli tumanida, Amir Temur xiyobonidan taxminan sakkiz kilometr masofada joylashgan. Sayyohlar uchun Mirobod yoki Yakkasaroy tumani qulayroq: u yerdan aeroport yaqin, “Oybek” va “Kosmonavtlar” bekatlari orqali esa 67-sonli avtobus qatnaydi. Batafsil ma’lumot — Toshkent aeroportidan shaharga qanday yetib olish mumkinligi haqidagi maqolamizda.