Ubud bo‘yicha qo‘llanma: qachon borish, qayerga borish va birinchi marta borayotgan bo‘lsangiz, nimalarga tayyor bo‘lish kerak?

Baliga sayohatni shaxsiy maqsadim sifatida 2025-yilga rejalashtirgandim — bu men uchun moliyaviy chegarani buzish demakdir. Va hammasi bir vaqtga to‘g‘ri keldi: iyun oyida Toshkentdan Denpasarga birinchi to‘g‘ridan-to‘g‘ri reyslar paydo bo‘ldi. Men buni ishora sifatida qabul qildim va darhol erimni ko’ndirishga kirishdim. Natijada biz 10 kunga Baliga ketdik va bu yilning eng yaxshi sayohati bo‘ldi!

Maqolada Ubudda qayerda to‘xtash yaxshiroqligi, sayyohlik tuzoqlaridan qanday qochish mumkinligi, qaysi joylar haqiqatan ham vaqtingizga arziydi va qaysilari arzimasligi haqida so‘zlab beraman. Bundan tashqari, haqiqiy narxlar, layfxaklar, sevimli joylar va orolda bizni hayratga solgan, quvontirgan va hatto biroz gangitib qo’ygan narsalar bilan o‘rtoqlashaman.

Nega men Balini tanladim?

O‘tgan qishda, kouch bilan mashg‘ulot o‘tkazganimda, men undan Bali haqida — orol unga quvvatini butunlay qayta tiklab olishiga qanday yordam berayotgani haqida tez-tez eshitganman. Qiziqib qoldim, ko‘proq o‘qishni va tomosha qilishni boshladim va asta-sekin Bali mening xayolimda go‘zal, sokin va boylarga xos bo‘lgan joyga aylandi.

Orol haqiqatan ham shunday bo‘lib chiqdi: rivojlangan infratuzilma, plyajlar, syorfing, sharsharalar, madaniy markazlar. Tinch dam olish va ruhiy mashg‘ulotlar uchun eng yaxshi hudud esa Ubuddir. Bu yerda o‘rmonlar, ibodatxonalar, sholi terrasalari va qirg‘oqdan uzoqda to‘liq relaks kayfiyati mavjud.

Eng yaxshisi, aprel-oktyabr oylarida borgan ma’qul — bu vaqtda Balida quruq mavsum bo‘ladi va deyarli yomg‘ir yog‘maydi. Noyabr-mart oylarida qisqa yomg‘irlar mavsumi boshlanadi, ammo tabiat ayniqsa yorqin va musaffo. Yil davomida harorat +30 °C atrofida bo‘ladi.

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Ubudda qayerda to‘xtadik?

• 

   
• 

   

Balidagi har bir hududning o‘ziga xos tabiati bor, lekin biz sayohatni o‘rmonga to‘liq sho‘ng‘ishdan boshlamoqchi edik: yashillik, sokinlik va tabiat tovushlaridan bahramand bo‘lishni xohladik. Shuning uchun birinchi punkt Ubud bo‘ldi. Biz Champlung Sari Hotel & Spa — uch yulduzli mehmonxonasida to‘xtadik. Yashash kuniga taxminan 40-50 dollarga (478-597 ming so‘m) tushdi. Mehmonxona Maymunlar o‘rmonidan ikki daqiqalik piyoda masofada joylashgan. Ko‘plab o‘simliklar, ikkita basseyn, palma daraxtlariga qaragan restoran, SPA va eskirgan, ammo toza xonalar.

Plyus: joylashuv. Okrugda har qanday didga mos o‘nlab kafe va restoranlar, kiyim-kechak, suvenir va oziq-ovqat do‘konlari mavjud. Bu yerda deyarli to‘liq piyoda rejimda yashash mumkin.

Minus: mehmonxona allaqachon yengil bo’lsa ham ta’mirlashga muhtoj bo’lib qolgan, yana maymunlar ham bor. Agar balkon eshigini ochiq qoldirsangiz, xonada barcha iste’mol qilinadigan va yaltiroq narsalarni juda yaxshi ko‘radigan o‘rmon delegatsiyasini topishingiz mumkin. Mening, masalan, ryukzakda yotgan bir pachka qurutimni olib ketishdi, mayli, osh bo‘lsin.

Balida qanday harakatlanish mumkin?

Mehmonxonadan tashqarida Ubud o‘zining tartibsiz ritmini saqlab qoladi va hech ham tinchlanmaydi — hamma joyda tirbandlik va ko‘plab bayklar. Ajablanarlisi shundaki, aynan mana shu jonli tartibsizlik oroldagi muhitni yaratadi, bu yerda hamma narsa doimo harakatda, lekin hech kim hech qayerga shoshilmaydi.

Bali bo‘ylab sayohat qilishning o‘zi sarguzasht. Xususiy taksichilar mehmonxonalar oldida navbatchilik qilishadi va sayyohlarni ko‘rganlarida (oftobda qoraymagan sayyohlar ayniqsa qadrlanadi) ularga yashin tezligida yopishib olishadi: «Qancha vaqtga keldingiz? Menda hammanikidan arzon, opajon/akajon». Savdolashing, narxlar har doim yuqori, shuning uchun bu yerda savdolashish masthev hisoblanadi, narxni 30%-40% ga bemalol tushirish mumkin.

Transport: taksi bayklari

Bayk – bu hudud uchun eng qulay transport vositasidir. Tuman va mavsumga qarab, ijara kuniga 8-15 dollarga (95-179 ming so‘m) tushadi. A toifadagi xalqaro haydovchilik guvohnomasi bo‘lishi shart. Haydovchilik guvohnomasisiz yurganlik uchun jarima politsiyaning kayfiyati va vaziyatga qarab 45-70 dollar (537-836 ming so‘m) atrofida bo‘ladi.

• Benzin: litri 1-1,2 dollar (11-14 ming so‘m).
• Avtomobil ijarasi: kuniga 25-35 dollar (290-410 ming so‘m).

Taksilarni quyidagi ilovalar orqali buyurtma qildik:

• Blue Bird (hisoblagich bo‘yicha rasmiy taksi): taxminan 10 km uchun 5-7 dollar (59-83 ming so‘m) — Ubud va Balidagi eng tushunarli taksi.
• Grab yoki Gojek: 10 km uchun 2-4 dollar (23-47 ming so‘m), ba’zan undan ham arzon — trafik va kun vaqtiga bog‘liq.

Ubudda qayerga borish va nimalarni tomosha qilish mumkin?

Hudud va uning energetikasini his qilish uchun biz bir nechta mastvizit-lokatsiyalarni rejalashtirdik.

«Ubud Monkey Forest» maymunlar o‘rmoni

• 

   
• 

   
• 

   
• 

   

O‘rmon yaqin bo‘lgani uchun birinchi manzil bo‘ldi. Mohiyatan, bu qadimiy ibodatxonalar, soylar va aql bovar qilmaydigan tabiatga ega muqaddas hududdir. Kirish narxi kattalar uchun taxminan 5 dollar (59 ming so‘m), bolalar uchun esa 3,5 dollar (42 ming so‘m) atrofida. To‘lov karta yoki naqd pulda qabul qilinadi. Ichkarida, agar tashrif buyuruvchilar bo‘lmasa, deyarli ideal hayot kechiradigan mingdan ortiq maymunlar bor. 

Ha, qimmatbaho buyumlarni yashirgan ma’qul, buni biz mehmonxonadagi bir quti qurut voqeasidan bilamiz.

Tegallalang sholi terrasalari

• 

   
• 

   
• 

   

Keyin biz Terrace River Pool Swing`ga — jarlik ustida arg‘imchoqda mashhur suratlar olinadigan joyga bordik. Arg‘imchoq, uya, ko‘rish maydonchasi, shamolda chiroyli xilpiraydigan ko‘ylak va telefonda suratga olish ishlari — barchasi 15 dollarlik (179 ming so‘m) paketga kiradi. 

Tegallalangning o‘zi odatiy Ubudga xos joy: yashil zinapoyalar amfiteatr kabi pastga tushadi, suv kanallar bo‘ylab sokin oqadi, daryolar orasidagi so‘qmoqlar aylanib o‘tadi, dehqonlarning jonli siluetlari ko‘zga tashlanadi, ular mohirona ishlashadi va bu yashil makonni mukammal holatda saqlashadi. Kuzatuv maydonchasida turib, blogerlardan tortib introvert mushohadachilargacha bu yerga nima uchun kelishlarini tushunasiz. Nima uchun? Yengil nafas olish, miyadagi sukunatni saqlab turish va «o‘z dzenini topish» ko‘rinishidagi kadrni storisga muhrlash uchun. 

Hududga kirish taxminan 1-1,7 dollar (11-20 ming so‘m) turadi.

Ubudning qaysi ibodatxonalariga borish kerak?

• 

   
• 

   
• 

   

Balida, ayniqsa, Ubud hududida ibodatxonalar ko‘p va har birining o‘z muhiti bor, ammo qoidalar hamma joyda bir xil: yelkalar va tizzalar yopiq bo‘lishi kerak. Sarong (belga yoki ko‘krakka taqiladigan mato bo‘lagi) va kamar hatto erkaklar uchun ham majburiydir. Agar siz ochiqroq kiyimda kelgan bo‘lsangiz, kiraverishda sarong berishadi.

Ibodatxona hududida va umuman Bali ko‘chalarida siz doimiy ravishda «canang sari» – palma barglaridan yasalgan kichik savatchalarni uchratasiz. Ichida odatda gullar, guruch, gulbarglar, ba’zan pechenye va tanga bo’ladi. Baliliklar uchun bu har kunlik minnatdorchilik marosimi, shuning uchun ularni bosib olmaslik va hurmat bilan aylanib o‘tish muhim — bu yerda bunga juda hurmat bilan munosabatda bo‘lishadi.

Pura Tirta Empul — oroldagi eng ko‘p tashrif buyuriladigan ibodatxonalardan biri. Ubuddan ungacha qirq daqiqalik yo‘l. Nomi «Muqaddas buloq» deb tarjima qilinadi, bu yerda yer ostidan tosh hovuzlarni to‘ldiradigan qudratli buloq otilib chiqadi. Ovqatlanuvchilar va sayyohlar bu yerda poklanish marosimini o‘tkazishadi — suvga tushishadi, har bir oqim ostida turishadi va ramziy ma’noda charchoq, salbiylik va barcha ortiqcha narsalarni yuvib tashlashadi.

Kirish taxminan 3 dollar (35 ming so‘m) turadi.

Batur vulqoniga qaragan Toya Devasya issiq buloqlari

• 

   
• 

   

Issiq buloqlar hududida 10 ga yaqin yoqimli iliq suvdan «qaynatilgan krevetka effekti»gacha bo‘lgan basseynlar, shezlongli dam olish zonalari, Osiyo taomlari va fastfud qahvaxonalari mavjud. Toya Devasya Geopark Resort & Villasdagi suv to‘g‘ridan-to‘g‘ri geotermal manbalardan — Balidagi eng hurmatli va faol vulqonlardan biri bo‘lgan Batur vulqoni etagidagi yer osti oqimlaridan keladi.

Basseynga sho‘ng‘iganingizda o’zingizni tabiiy spa-kapsulaga tushgandek his qilasiz: tana «eriydi», miyangiz o’y-xayollardan uziladi. Agar hovuz chetiga suyanib, vulqonga va Batur ko‘liga qarasangiz, uchinchi ko‘z shu ondayoq ochilishiga ishonish qiyin emas.

Bunday lazzatning narxi taxminan — 9 dollar (107 ming so‘m) turadi.

Changalzordagi farishtalarda ega Dedari parki

• 

   
• 

   
• 

   
• 

   
• 

   
• 

   

Taman Dedari san’at bog‘i ochiq osmon ostida joylashgan bo‘lib, u yerda junglilar orasida o‘nlab farishtalarning tosh haykallari mavjud. Ularni birinchi marta ko‘rganimda, biroz qotib qoldim: ular xuddi parallel koinotga kirish darvozasini qo‘riqlayotgandek edi. Har bir tosh yaltiraguncha sayqallangan, quyoshda esa qanotlar go‘yo ichkaridan o‘rnatilgan chiroq kabi ilohiy nur sochayotgandek. 

Ichkarida ellikka yaqin haykal bor: bolalar qiyofasidagi kichkina farishtalar, tumandan to‘qilgandek tosh «libos» kiygan nozik figuralar, uch qavatli uydek keladigan ulkan haykallar vodiy uzra sassiz parvoz etmoqda.

Park go’yoki hamma narsani qorishtiradi. Siz undagi narsalarni tanangiz bilan his qilasiz. Kirish bepul. Kafe bor, lekin taomlari standart: olish mumkin, lekin «wow» effekti bo‘lmaydi, bu yerda uning keragi ham yo‘q, chunki bu yerga farishtalar uchun kelishadi.

Layfxak: qabulxonada 3 dollar (35 ming so‘m) qoldiring va xodim sizga ajoyib rilsni suratga olib beradi, shuningdek, mukammal rakurslardan o‘nlab fotosuratlar qilib beradi.

Lyuvak qahvasini va boshqa Bali qahva turlarini tatib ko‘rish

• 

   
• 

   
• 

   
• 

   
• 

   
• 

   
• 

   
• 

   

Men qahva ishqibozi emasman, lekin Balida to‘satdan mahalliy manzaralarni o‘rganishni xohlab qoldim. Bu yerda u yumshoq, yong‘oq rangida, yengil nordon ta’mga ega; ba’zan u to‘g‘ridan-to‘g‘ri tag qismidagi quyqasi bilan tortiladi. Bir kuni yo‘lda haydovchi qahva plantatsiyasiga kirishni taklif qildi. Biz bu joy «sayyohlar uchun» ekanligini tushunardik, ammo ertalab dasturxon atrofida Bali safarini eslatuvchi biror narsa olib kelish istagi ustun keldi. Shunday qilib, biz Pemulan Bali Coffee Plantation`ga kelib qoldik.

Bizga 14 ta mini-chashkada qahva degustatsiya qilishni taklif qilishdi: avokado, kokos, sitrus, jenshen va Bali ro‘yxati bo‘yicha yurli xillaridan. Hammasidan ko‘proq avokadolisi yoqdi. U yumshoq va qaymoq rangida bo‘lib, o‘ziga xos ta’mga ega. Uning 100 grammi 5 dollardan (59 ming so‘m) boshlanadi va albatta, aynan uni keyin chamadonga ehtiyotkorlik bilan joylab, o‘ljalardan biri sifatida uyga olib ketdim.

Xuddi shu plantatsiyada biz «Kopi Luwak» qahvasini tatib ko‘rdik, bu qahva sivet nomli jonivorning ovqat hazm qilish tizimidan o‘tgan. Ta’m menga ta’sir qilmadi, lekin tajriba qiziqarli edi. Ikki piyola «eksperimental-ekskremental» qahva uchun 10 dollar (119 ming so‘m) to’ladik.

Ubudda qayerda ovqatlanish mumkin? Varunglar, kafelar va taomlar

Balida hamma narsa guruch, ugra, ziravorlar, yong‘oq va ziravorlar atrofida aylanadi. Har bir varung – ya’ni, kichik oilaviy qahvaxona, klassikani o‘ziga xos tarzda tayyorlaydi, shuning uchun bu yerda ikkita bir xil “nasi goreng”ni topa olmaysiz.

Ubudning eng yaxshi taomlari:

• Nasi goreng — tuxum va sabzavotlar bilan qovurilgan guruch;
• Mi goreng — qovurilgan ugra;
• Satay — quyuq yeryong‘oq sousi qo‘shilgan sixdagi go‘sht;
• Bebek betutu — ziravorlar bilan pishirilgan o‘rdak;
• Baxo — kunning istalgan vaqtida jonga oro kiruvchi frikadelkali sho‘rva.

Mening shaxsiy gastro kashfiyotim esa — rendang bo’ldi. Kokos suti, ziravorlar va laymda dimlangan yumshoq mol go‘shti. Men uni har kuni ko‘chadagi varunglarda ham, manzarali restoranlarda ham sinab ko‘rardim — rendang har doim o‘z darajasida edi. Faqat porsiyalarning o‘lchamlari, dasturxonga tortilishi va har bir oshpaz taomga qo‘shadigan ranglar o‘zgardi.

Ubudda ovqatlanish narxlari yemakxona darajasiga bog‘liq. Agar mashhur pozitsiyalarni (guruch/ugra + tovuq/baliq) asos qilib olsak, taqsimot quyidagicha bo‘ladi:

• Markazda joylashgan varungda — taom uchun 1,5-3 dollar (17-35 ming so‘m);
• O‘rta darajadagi kafelarda — 4-6 dollar (47-71 ming so‘m);
• Terrasali va turli yashilliklar manzarasiga ega restoranlar — 7 dollardan (83 ming so‘m) boshlanadi va undan yuqori. Alkogolsiz, ikki kishi uchun o‘rtacha chek — taxminan 20 dollar (239 ming so‘m).

Agar sizga Bali taomlari yoqmasa yoki joningizga tegsa, dunyoning mashhur oshxonalarini osongina topishingiz mumkin.

Menga yoqqan joylar

• 

   
• 

   
• 

   
• 

   
• 

   

Gula Bali — yo‘l-yo‘lakay kirib o‘tadigan o‘sha ko‘rimsiz varung. Biz ikkita grilda pishgan tovuq va ichimliklar setini oldik – taxminan 8 dollarga (95 ming so‘m) tushdi. Yog‘och uy balandligidagi ko‘ngilochar muhit va qishloq manzarasi o‘z ta’sirini ko‘rsatdi va biz o‘ylab o’tirmasdan biroz ko‘proq pul qoldirdik.

Merlin's Secret Immersive Theater & Dining Experience — kechki ovqatni «wow» effekti bilan o‘tkazishni yaxshi ko‘radiganlar uchun joy. Interyer — ezoterik kabinet, sehrli do‘kon va teatr aralashmasi. Asosiy xususiyati — kartalar bilan o‘tkaziladigan marosim. Sizga bir dasta karta berishadi va uchta kartani tanlashni taklif qilishadi. Ofitsiant ularni o‘tmish, hozirgi kun va kelajak sifatida talqin qiladi. Har bir kartaga ma’lum bir taom biriktirilgan.

Erimga «asliyatga qaytish» degan ma’noga ega karta tushdi va unga borsh, qaymoq, non va sarimsoq berishdi. Uch kun spaysi-bali taomidan so‘ng, u uni xudolar taomi sifatida yedi va bu uning hayotidagi eng yaxshi borsh ekanligini aytdi.

Bizga stolni ikki kun oldin band qilish nasib etdi, lekin bir-ikki hafta oldin band qilganingiz ma’qul. Ikki kishilik kechki ovqat (sho‘rva, asosiy taom, desert va karta bo’yicha ichimliklar) uchun taxminan 100 dollar (1,1 million so‘m) to’ladik.

Ubudda massaj va SPA — eng yaxshi salonlar va narxlar

• 

   
• 

   
• 

   

Ubudda massaj har qadamda — oddiy ko‘cha studiyalaridan tortib, haqiqiy dam olish ibodatxonalarigacha mavjud. Ko‘chada ketayotib, xushboy yog‘larning iforini sezasiz va kiraverishdagi tabassum qilayotgan qizlarning «massaz, massaz, pliz»deb chaqirayotganini eshitasiz — bu Janubi-Sharqiy Osiyo uchun klassik sahna.

SPA narxlari

• Barcha va har bir kishi uchun salonlar — bir seans uchun 9-16 dollar (107-191 ming so‘m). Oddiy Bali massaji — bu uzaytirilgan kreslo, xushmuomala massajchi va har ikki tomondagi «vaqtinchalik qo‘shnilar» demakdir. Siz ularning o‘tli choy ichib, dzenni holati bo’lishga urinayotganini ko’rasiz.
• Premium spa — 25 dollardan (298 ming so‘m) boshlanadi va undan yuqori. Bu gulli vannalar, moy tanlash imkoniyati, shaxsiy xonalar va to‘liq relaks muhiti bilan bog‘liq butun bir marosimlardir.

Agar siz qandaydir o’zgacha taassurot olishni xohlasangiz, Karsa SPA`ga tashrif buyurishingiz kerak. Ochiq bungalolar, yashil sholi terrasalarining ko‘rinishi va hayotning to‘liq shoshilmasligi sizga taskin beradi. Bu yerda massaj uzoq va sekin bo‘ladi – shundan so‘ng tana go‘yo molekulalarga ajratiladi, tozalanadi va qaytadan yig‘iladi.

Eng mashhur marosim — body scrub + flower bath (tanani skrablash va gulli vanna qabul qilish) bo‘lib, taxminan 16 dollarga (191 ming so‘m) tushadi. Avval sizni xushbo‘y skrab bilan ishqalashadi, keyin gulbarglar va xushbo‘y suvga to‘la vannaga taklif qilishadi.

Ubudda nimalarni xarid qilish mumkin? Do‘konlar, supermarketlar, dorixonalar

Ubudda, butun Balida bo‘lgani kabi, mini-marketlar – chinakam najotdir. “Circle K” va “Indomaret”ga yo‘l-yo‘lakay kirib, kerakli narsalarni tezda xarid qilish va ortiqcha to‘lov qilmaslik qulay. 

Supermarketlarda nimalarni xarid qilish mumkin?

• quyosh toblanish uchun va quyoshdan keyingi kosmetika – mahalliy brendlar a’lo darajada ishlaydi;
• antiseptiklar va nam salfetkalar – yo‘lda va plyajda qo‘l keladi;
• chivinlarga qarshi vositalar – mahalliy «Autan» brendining spreylari import qilinganlaridan yaxshiroq ish beradi;
• dengizda ko’ngil aynishiga qarshi «Antimo» tabletkalari – suvda va tog‘larda sayohat qilish uchun foydali (vosita biroz uyqu chaqirishi mumkin);
• sneklar va ichimliklar – sayohatlarga o‘zingiz bilan olib chiqish qulay.

To‘laqonli xarid qilishni istasangiz, «Coco Supermarket»ga boring. Bu yer sayyohlar odatda uyga olib ketadigan hamma narsani olish uchun qulay: mevalar, qahva, ziravorlar, kokos yog‘i, batik (qo‘lda tikilgan mato) va suvenirlar. Do‘konlarda bularning hammasi qimmatroq turadi.

Ubudda sayohat qilish uchun layfxaklar

• SIM karta. Aeroportda «turistik SIM» xarid qilmang. Buning o‘rniga, orolga borganingizda, «Telkomsel» sim-kartasini oling: Ubud va serpantinlarda eng yaxshi aloqani ta’minlaydi. 30 kunlik cheksiz to‘lov 10-15 dollar (119-179 ming so‘m).
• Naqd pul. Kartalar hamma joyda ham ishlamaydi, shuning uchun doimo yoningizda naqd pul olib yuring. BCA, BNI, Mandiri bankomatlaridan pul yechib oling — ular ishonchliroq. Bankomatning «konvertatsiyasi»dan foydalanmang – kurs yomonroq.
• Valyuta ayirboshlash. Authorized Money Changer peshlavhasini qidiring. «Juda qulay kurs»ga ega bo‘lgan kichik ayirboshlash shoxobchalarida ko‘pincha yo‘q bo‘lib ketadigan kupyuralar tryukidan foydalaniladi. Agar ayirboshlashga qaror qilgan bo‘lsangiz, pulni shu joyning o‘zida sanang.
• Kiyimlar. Ubudda havo nam va zinapoyalar ko‘p, shuning uchun yengil kiyimlar va qulay poyabzallar kerak bo‘ladi.
• Tirbandliklar. Dahshatli haqiqat shundaki, Ubudda yo‘llar tor, yomg‘irdan keyin esa yo‘laklar sirpanchiq bo‘ladi. Shahar muzlab qolishi mumkin. Markazda piyoda yurish osonroq.
• Dorixonalar. «Kimia Farma», «Guardian» va «K24» menimcha eng yaxshilari. Mahalliy aholi va sayyohlar oshqozon muammolaridan tez-tez Norit, Diatabs va Oralit eritmasidan foydalanishadi. Nimadir chaqsa, sizga Loratadin va Hydrocortisone kremi yordam beradi. Repellentlar, plastirlar va antiseptiklarni supermarketlar yoki dorixonalardan sotib olgan ma’qul, u yerda narxlar arzonroq. Ba’zi dorilar uchun konsultatsiya yoki retsept talab qilinishi mumkin, ayniqsa bu oddiy sayyohlar uchun odatiy vosita bo‘lmasa.

Ubuddan xuddi ertaga uchib ketadigandek zavqlaning: qo‘llaringiz bilan ovqatlaning – negadir mazaliroq, tirbandliklarda jilmaying va maymunlar bilan bahslashmang, ular baribir g‘alaba qozonadi. Charchagan oyoqlar Bali massajini qanday qabul qilsa, orol ham sizni shunday iliq qabul qilsin.