Fukuok qanday tuzilgan: plyaj, ko‘ngilochar joylar va ovqatlanish bo‘yicha qo‘llanma

Fukuok ko‘pincha plyaj kurorti sifatida qabul qilinadi, ammo aslida orol murakkabroq va qiziqarliroq tuzilgan. Ertalab bu yerda safari bog‘ida jirafani qo‘lda ovqatlantirish, kunduzi boshqa orollar yoki yovvoyi sharsharalarni o‘rganish, kechqurun esa mahalliy barlarda jonli musiqa ostida shampan vinosi solingan qadah bilan quyosh botishini kutib olish mumkin.

Ushbu maqolada biz Fukuok plyajlari va hududlari qanday tuzilgani, orolda nima bilan shug‘ullanish, qayerda ovqatlanish va qanday harakatlanish, shuningdek, bularning barchasi qancha turishi haqida batafsil ko‘rsatmalarni to‘pladik.

Fukuok plyajlari haqida gid

Fukuokda hamma narsa mavsumga bog‘liq. Noyabrdan aprelgacha g‘arbiy sohil – Long Beach va Ong Langni tanlagan yaxshiroq. Bu paytda bu yerda dengiz eng tinch, deyarli to‘lqinsiz bo‘ladi. Maydan oktyabrgacha ideal sharoitlar orolning sharqiga, birinchi navbatda Sao Bichga ko‘chadi, chunki mavsumiy shamollar yo‘nalishni o‘zgartiradi va g‘arbiy qirg‘oq cho‘milish uchun noqulay bo‘ladi.

Sao Beach

Fukuok — dengiz deyarli har kuni boshqacha ko‘rinadigan kam sonli joylardan biri: bugun u sokin, ertaga esa to‘lqinlari jo‘shqin. Tongda Janubiy Xitoy dengizi sut kabi ko‘rinishi mumkin, kunduzi esa yorqin feruza rangga o‘zgaradi.

Sao Beach — orolning asosiy plyaji. Bu yerdagi qum unni eslatadi, qirg‘oq dengizga ohista cho‘kadi, chuqurlik keskin o‘zgarmaydi. Kunduzi ko‘plab sayyohlar keladi, shuning uchun plyaj hali bo‘m-bo‘sh bo‘lganda – soat 08:00 – 09:00 gacha shu yerda bo‘lgan ma’qul. Kichik layfxak: dengiz tomonga qaraganingizda plyajning chap tomonida tinchroq joy bor. U yerda qayiqlar kamroq va suv toza.

Plyajda 20 ming dongga (9 ming so‘m) pullik dush va hojatxona mavjud, shezlong esa 100-150 ming dongga (45-68 ming so‘m) tushadi. Xarajat qilishni rejalashtirmaganlar uchun palmalar soyasida sochig’ingizni yoyib joylashish qulay bo’ladi.

Maslahat: agar qorningiz och bo‘lsa, gỏi cá trích – xom seld salatini buyurtma qiling. Bu mahalliy taom bo‘lib, ko‘pincha plyaj yaqinidagi qahvaxonada tayyorlanadi.

Long Beach

Plyaj deyarli 20 km ga cho‘zilgan. Qancha janubga borilsa, qirg‘oq shuncha toza va atmosfera shuncha tinch bo‘ladi. Long Beach bo‘ylab dorixonalar, bankomatlar va do‘konlar joylashgan, shuning uchun maishiy mayda-chuydalar uchun uzoqqa borishning hojati yo‘q. Joylashuv suv bo‘yida yashashni va mehmonxonadan dengizga yalangoyoq chiqishni yaxshi ko‘radiganlar uchun mos keladi.

Bu yerda ko‘plab o‘yin-kulgu turlari mavjud, masalan, OCSEN Beach Bar plyaj barida dengiz qirg‘og‘ida yumshoq o‘rindiqlarda yotish mumkin. Kunduzi bu yerda DJ‘lar chiqish qiladi, kechqurun esa jonli musiqa yangraydi va kokteyllar tortiladi.

Agar fil va baliq figuralari bilan birga ajoyib kadrlarni suratga olishni istasangiz, sohildagi san’at majmuasi – Sunset Sanatoga boring. Kirish taxminan 100 ming dong (45 ming so‘m) turadi. Bu yerda Instagram‘dagi taniqli bo‘lgan uzun ustunli figuralar o‘rnatilgan.

Ong Lang 

Ong Lang yolg‘izlikni izlayotganlar uchun mos keladi (agar turistik orolda buning iloji bor deb o’ylasangiz). Bu yerdagi qirg‘oq toshli qoyalar bilan ajratilgan. Ular to‘lqinlar va odamlardan osongina yashirinish mumkin bo‘lgan kichik ko‘rfazlarni hosil qiladi. Suv Long Beachga qaraganda shaffofroq, ayniqsa ochiq ob-havo paytida. Toshlar yonida snorkling bilan shug‘ullanish qulay: bu yerda mayda qisqichbaqalar va baliqlar ko‘rinib turadi.

Plyaj yaqinida ko‘plab restoranlar mavjud va narxlar odatda turistik markazga qaraganda arzonroq. Kechqurun bu yerga tez-tez kechki ovqatga kelishadi. Hudud er-xotinlar va bolali oilalar uchun mos keladi: sokinlikni buzuvchi savdogarlar deyarli yo‘q, atmosfera esa bir maromdagi ritmga ega kichik tropik shaharchani eslatadi.

Dengiz yulduzi plyaji (Starfish Beach)

Orolning shimoli alohida, chekka dunyo. Bu yerdagi sayoz joylarda bir qancha, ba’zan o‘nlab dengiz yulduzlarini ko‘rish mumkin. Ular ko‘pincha quruq mavsumda, noyabrdan aprelgacha bo‘ladi. Qolgan vaqtlarda yulduzchalar sezilarli darajada kam bo‘ladi.

Plyajga ko‘pincha velosipedda boriladi. Yo‘l ba’zi joylarda tuproqli (grunt), lekin yomg‘irdan keyin uni yuvib ketishi mumkin. Ertalab soat 11:00 gacha plyajlarda odatda odamlar kamroq bo‘ladi. Qirg‘oqdan ko‘rinib turadigan suzuvchi restoranlarda tushlik qilish mumkin: ularga uzun ko‘prikchalar olib boradi va mahalliy restoranlarda dengiz mahsulotlari sayyohlik hududlariga qaraganda arzonroq.

Xuddi shu mavzuda ko'proq ma'lumot

Tailand yoki Vyetnam: Janubi-Sharqiy Osiyo bilan tanishishni qayerdan boshlash kerak?

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Fukuokda yana nimalar bilan shug‘ullanish mumkin? Safari, sharsharalar va dengiz dor yo‘li

Fukuok o‘rmonlari, tomosha maydonchalari va rivojlangan sayyohlik infratuzilmasiga ega. Plyaj dasturiga qo‘shilishi kerak bo‘lgan bir nechta joylar haqida ma’lumot beramiz.

Hon Thom dor yo‘li: 360° panorama

• 

   
• 

   

Dor yo‘li bo‘ylab «Ananas oroli» (Hon Thom) ga sayohat – bu dasturning «must-see» (borish shart bo’lgan) punkti. Qariyb 8 km uzunlikdagi yo‘l feruza rangli ko‘rfazlar, baliqchilar qishloqlari va odam yashamaydigan mitti orollar ustidan o‘tadi. Panoramali derazalardan manzara doimo o‘zgarib turadi: goh yorqin ko‘k ufq ochiladi, goh pastda bandargoh yonida qayiqlar paydo bo‘ladi.

Kattalar uchun ikki tomonlama chipta narxi 750 ming dongdan (340 ming so‘m) boshlanadi. Bolalar uchun – 600 ming dong (273 ming so‘m). Narx ichiga Aquatopia akvaparki va Hon Thom orolidagi quruqlikdagi attraksionlarga tashrif buyurish kiradi.

Dor yo‘li ertalab soat 8:30 dan kechki 19:00 gacha ishlaydi. Texnik tanaffus, odatda 12:00 dan 13:30 gacha. Oftobda navbatda turmaslik uchun jadvalni sayt orqali oldindan tekshirib qo‘ygan ma’qul. Agar kechga yaqin qaytishni rejalashtirsangiz, qaytish yo‘nalishiga quyosh botishidan bir soat oldin keling. Kabinadan yo‘lda Quyosh botishi shahri – Sunset Town yaqqol ko‘rinib turadi, u yumshoq kechki yorug‘likda ayniqsa fotogenik ko‘rinadi.

Vinpearl Safari 

• 

   
• 

   
• 

   

Vinpearl Safari — bu deyarli tabiiy muhitda hayvonlarni kuzatish mumkin bo‘lgan katta safari parki. Bu odatiy tushunchadagi hayvonot bog‘i emas, balki tashrif buyuruvchilar uchun ochiq maydonlar va yo‘nalishlarga ega keng ko‘lamli qo‘riqxona.

Ochilish vaqtiga – soat 09:00 ga qarab boring. Ertalab hayvonlar faolroq, soat 10:00 dan 11:00 gacha esa odatda qushlar ishtirokidagi eng qiziqarli shoular bo‘lib o‘tadi. Safari Bus avtobus harakatlanadigan hududda avtobus markaziga yoki haydovchiga yaqinroq joyga o‘tirgan ma’qul. Shunda bir vaqtning o‘zida ikkala tomonga ham nazar tashlanadi. Aynan shu yerda sherlar, jirafalar va zebralar derazadan bir necha metr narida sayr qilishadi. Giraffe Restaurant`ga tashrif buyuring. Bu yerda jirafalarni to‘g‘ridan-to‘g‘ri qo‘lda ovqatlantirish mumkin bo‘lgan sabzi porsiyalari sotiladi.

Narxi: kattalar uchun kirish – 750 ming dong (340 ming so‘m). Bolalar uchun – 560 ming dongga yaqin (255 ming so‘m). Safarining kombo-chiptasini + VinWonders attraksionlar parki uchun chiptani olish manfaatliroq.

Sharsharalarni qayerda ko‘rish mumkin? 

Sharsharalarga yomg‘ir mavsumida, maydan oktyabrgacha yoki uning boshida borgan yaxshiroqdir. Quruq mavsumning eng qizg‘in paytida, fevraldan aprelgacha ularning ko‘pchiligi qurib, ingichka oqimlarga aylanadi.

Suối Tran (Suoy Tran)

Oroldagi borish eng qulay bo’lgan sharshara. Unga ko‘priklar va dekorativ haykallar bilan jihozlangan yo‘l olib boradi, shuning uchun bu joy bolalar bilan sayr qilish uchun mos keladi. Agar siz asosiy sharshara ortidagi yo‘ldan biroz yuqoriroqqa borsangiz, Hang Dơi (ko‘rshapalaklar g‘ori) ni topishingiz mumkin. Ammo g‘orga tashrif buyurishda ehtiyot bo‘ling: ko‘rshapalaklar xavfli kasalliklarni, jumladan, quturish kasalligi tarqatuvchilari hisoblanishadi.

Ta’tildan oldin qanday vaksinalar olish kerakligi haqida esa bizning materialimizda o‘qing. 

Kirish: 10 ming dong.

Suối Đá Bàn yoki toshli plitalar oqimi

Ancha yovvoyi va o’ziga xos sharshara. Zinapoyalar o‘rniga bu yerda katta tekis tosh plitalar mavjud bo‘lib, u o‘z nomini shu plitalardan olgan. Afsonaga ko‘ra, bir vaqtlar bu toshlar ustida dam olish va shaxmat o‘ynash uchun osmondan parilar tushgan. Vyetnamliklar ko‘pincha bu yerga butun oilalari bilan kelib, piknik uyushtirishadi.

Maslahat: sirpanmaydigan tagcharmli qulay poyabzal oling. Suv bo‘yidagi toshlar silliq va sirpanchiq bo‘ladi, ayniqsa yomg‘irdan keyin.

Kirish chiptasi: 10-20 ming dong atrofida.

Xuddi shu mavzuda ko'proq ma'lumot

Nyachang bo‘yicha yo‘lko‘rsatma: o‘zbekistonlik sayohlar uchun plyajlar, viza va layfxak

Dayving va snorkling bilan qayerda shug‘ullanish mumkin?

G‘avvoslik va snorkling uchun eng yaxshi joylar Fukuok janubida — 15 oroldan iborat qo‘riqxona guruhi bo‘lgan An Thoi arxipelagi hududida joylashgan.

Eng yaxshi marjon bog‘lari aynan shu yerda joylashgan. Aholi yashaydigan joylar va portlardan uzoqda bo‘lganligi sababli janubiy orollarning suvi tiniq, shuning uchun tropik baliqlardan iborat tirik riflar va baliqlar to‘dalari chuqur sho‘ng‘imasangiz ham ko‘rinadi.

Sayohatni qanday tashkillashtirish mumkin?

Katta ikki palubali qayiqlarda guruhli sayohatlar 500 dan 800 ming donggacha (228-366 ming so‘m) turadi. Ammo bunday qayiqlar sekin yuradi va ko‘p odamlarni to‘playdi. Agar siz yolg‘iz yoki kichik guruh bilan sayohat qilishni rejalashtirayotgan bo‘lsangiz, xususiy tezyurar qayiqni ijaraga olish qulayroq. Qayiqni ijaraga olish har bir qayiq uchun taxminan 3-4 million dongga (1,3-1,8 million so‘m) tushadi. Siz eng go‘zal riflarga, masalan, Hon May Rut yoki Hon Dam Ngang orollariga boradigan yo‘nalishni tanlashingiz mumkin. Bu yerga, yaxshisi, turistik guruhlardan bir-bir yarim soat oldin keling.

Maslahat: kapitandan May Rut Trong orolida to‘xtashini so‘rang. Bu yer arxipelagning eng fotogenik plyajlaridan biri bo‘lib, «haqiqiy baunti» : palmalar, och rangdagi qumlar va sokin feruza rangli ko‘rfaz.

Ko‘cha ovqatlaridan nimalarni tatib ko‘rish va yana qayerlarga borish mumkin?

• 

   
• 

   
• 

   

Phu Quoc Night Market tungi bozori

Kechqurun Fukuokda odatda ovqatlanish uchun qayergadir borishadi. Mahalliy taomlar bilan tanishish uchun eng yaxshi joy – Phu Quoc Night Market. Dengiz mahsulotlari to‘g‘ridan-to‘g‘ri sizning ko‘z o‘ngingizda tayyorlanadi, atrofda ko‘plab odamlar, gril tutuni va yog‘ning vijillashi.

Bu yerda ko‘pincha Bun Quay (bun quay) – Fukuok noodle lag‘monlari buyurtma qilinadi. Uning tortilishi g‘ayrioddiy: baliq qiyma idishlariga qo’yib chiqiladi va yeyish uchun tortish paytida qaynab turgan sho‘rva quyiladi. Yana bir variant – Pho Bo (fo bo), guruchli ugra, ko‘katlar va shaffof xushbo‘y bulyonli mol go‘shti solingan sho‘rva. Yengil gazaklardan asosan Goi Cuon (goy kuon) ni tanlashadi. Bu sabzavotlar, ko‘katlar va dengiz mahsulotlari bilan to‘ldirilgan guruch qog‘ozidan tayyorlangan barra rollardir. Desertga ko‘pincha kokosli muzqaymoq yoki Kem Cuon (kim kuon) – muzli tovada tayyorlanadigan muzqaymoqli roll tanlanadi.

Dengiz mahsulotlariga buyurtma berishdan oldin, 100 gramm uchun narxni aniqlashtiring. O‘rtacha bir porsiyasi 80 mingdan 200 minggacha (37-92 ming so‘m) turadi.

Bu yerda savdolashish odatiy hol, ayniqsa bir nechta taom turini tanlagan bo‘lsangiz. Bozorda marvarid va timsoh terisidan yasalgan buyumlar sotiladi, lekin sifatiga hech kim kafolat bermaydi. Qimmatbaho buyumlarni maxsus do‘konlardan sotib olgan ma’qul.

Yana nimalarni tatib ko’rish mumkin?

• 

   
• 

   
• 

   
• 

   

Fukuokda ko‘cha taomlari oddiy va to‘yimli, masalan, mening sevimli taomim Banh Xeo – kurkuma qo‘shilgan guruch unidan tayyorlangan qarsildoq quymoq. Uni qo‘lda yeyishadi: bir bo‘lagini uzib olib, ko‘kat solingan salat bargiga o‘rab, nyok-mam qaylasiga botirib olishadi.

Ichimliklardan Bac Xiu, quyultirilgan sutli qahvani tatib ko‘rish kerak, unda qahvaning o‘zidan ko‘ra ko‘proq sut mavjud. Klassik vyetnamcha varianti juda kuchli tuyulgan insonlarga bunisi ko’proq yoqadi. Ays versiyasini ichish uchun Ca Phe Sua Da, deyarli hamma joyda uchraydigan va issiqda yaxshi tetiklashtiradigan quyultirilgan sutli ays-qahva olib ko’ring.

Narxlar bo‘yicha mo‘ljallar quyidagicha: Fo bo odatda 40-60 ming dong (18-28 ming so‘m) turadi. Ca Phe Sua Da (ka fe sua da) 20-30 ming dongga (9-14 ming so‘m) tushadi.

Maslahat: mahalliy aholi ovqatlanadigan joylarni tanlang. Kichkina plastik stulchalar va vyetnamliklarning navbatda turishi deyarli har doim taomning yangi ekanligini va sayyohlarga xos narxlar bo’lmasligini anglatadi.

VinWonders: attraksionlar parki va okeanarium 

VinWonders — Fukuokdagi attraksionlar, akvapark va alohida okeanariumga ega yirik tematik park. World of Water hududi to‘laqonli akvapark bo‘lib, okeanarium ulkan dengiz toshbaqasi shaklidagi alohida binoda joylashgan. Bu parkning eng esda qolarli obyektlaridan biri: shisha tunnel, bosh ustida suzib yuradigan akulalar, skatlar va minglab baliqlari bo‘lgan ulkan akvarium.

Okeanariumga kunduzi, soat 12:00 dan 15:00 gacha borish qulayroq. Ichkari salqin va bu tushki jaziramani o’tkazib olishning yaxshi usuli. Suv parilari shousi asosiy suv havzasida kuniga bir necha marta, odatda soat 11:00 va 14:00 atrofida bo‘lib o‘tadi. 

Kechqurun, soat 19:00 da qal’a oldidagi maydonda favvoralarda turli yorug’liklar va musiqali shou boshlanadi. Qaytishni undan keyin rejalashtirgan ma’qul – odatda ertaroq ketgingiz ham kelmaydi.

Chipta narxi kattalar uchun — 950 ming dong (430 ming so‘m), bolalar uchun — 710 ming dong (323 ming so‘m). Park orolning shimolida joylashgan. Agar Vinpearl mehmonxonalarida yashasangiz, kirish yashash narxi ichiga kiritilishi yoki chegirma bilan taqdim etilishi mumkin. Shahar markazidan va Long Beach`dan bepul VinGroup shattllarida borish eng oson yo‘l.

Foto-setlar uchun eng yaxshi joylar

Fukuokda kechqurun suratga tushish qulayroq. Bu vaqtda havo salqinlashadi, yorug‘lik yumshoqroq bo‘ladi, plyajlar va tomosha maydonchalari kunduzgiga qaraganda tinchroq ko‘rinadi. Quyida quyosh botishi ayniqsa muvaffaqiyatli va murakkab tayyorgarliksiz yaxshi ko‘rinadigan bir nechta joylar keltirilgan.

• Eng oddiy va arzon variant – Dinh Cau burni, port yaqinidagi qoyalar ustidagi kichik ibodatxona. Bu yerga quyosh botishi va qisqa sayr uchun kelishadi, kirish bepul.
• Balandlikdan tinchroq kadrlarni olish uchun Chuon Chuon Bistro – shahar va dengizga qaraydigan tepalikdagi kafega borishadi. Tashrif buyurish uchun ichimlik buyurtma berish kifoya.
• Agar siz kurort muhitini xohlasangiz, Sailing Club – dengiz bo‘yidagi basseyn va kechki olovli shou bo’lib o’tadigan plyaj klubi mos keladi. Odatda shezlong uchun depozit talab qilinadi.

Fukuokda qayerda tunash mumkin?

FAQ: parvoz, valyuta ayirboshlash, aloqa va transport

• 

  Shaharlararo avtobus
• 

  Orolda velosipedda harakatlanish eng qulay
• 

   

O‘zbekistondan qanday borsa bo‘ladi?

O‘zbekistondan Vyetnamga parvoz qilish va shu yerning o‘zida mahalliy reyslar orqali yetib olish eng qulay hisoblanadi. Mamlakat ichidagi parvozlar Vietnam Airlines, VietJet va Bamboo Airways tomonidan amalga oshiriladi. Chipta narxi odatda 700 mingdan 1,2 million donggacha (320-550 ming so‘m) bo‘ladi.

Ichki chiptalarni kamida ikki hafta oldin sotib olgan ma’qul: jo‘nab ketish kunida narxlar ko‘pincha bir necha baravar ko‘tariladi.

Mavsumda MDH davlatlaridan to‘g‘ridan-to‘g‘ri charter reyslar ham paydo bo‘ladi. Bunday variantlarni Aviasales.uz saytida kuzatish qulayroq, ayniqsa, hamyonbop chiptalarni «tutib olishni» rejalashtirgan bo‘lsangiz.

Sayohat qilish uchun eng yaxshi vaqt noyabrdan aprelgacha. Yomg‘irli mavsumda dengiz loyqa bo‘lishi mumkin, ammo orol yashil va go‘zal bo‘lib qoladi va sayyohlar sezilarli darajada kam bo‘ladi.

Viza rasmiylashtirish kerakmi?

Fukuok — maxsus iqtisodiy zona, shuning uchun bu yerga kirish qoidalari materikdagi Vyetnamdan farq qiladi. Xorijiy sayyohlar, shu jumladan MDH fuqarolari uchun 30 kunlik vizasiz rejim amal qiladi. Shartlarni hisobga olish muhim: kelish to‘g‘ridan-to‘g‘ri xalqaro reys yoki tranzit hududidan chiqmasdan Hoshimin yoki Xanoy orqali tranzit bo‘lishi kerak.

Orolda qanday harakatlanish mumkin?

Bayk: ijara narxi kuniga 150-250 ming dong (80-130 ming so‘m). Rasmiy ravishda A toifali guvohnoma kerak. Jarimalar kamdan-kam hollarda yoziladi, ammo guvohnomasiz YTHlarda sug‘urta ishlamaydi.

Taksi va moto-taksi: «Grab» ilovasidan foydalanish eng qulay yo’l. Narx oldindan belgilanadi, shuning uchun ortiqcha pul to‘lash xavfi yo‘q. Mashinaga ham, mototaksiga ham (darvoqe, u ikki baravar arzon) buyurtma berish mumkin.

VinBus: orolda yashil rangdagi bepul elektr avtobuslar harakatlanadi. Ular jadval bo‘yicha harakatlanadi, asosiy yo‘nalishlar – V1, V2 va V4. Bu orol markazidan shimolga sayohat qilish uchun qulay variant.

Aloqada bo‘lish uchun qanday sim karta sotib olsam bo‘ladi?

Sim-kartani darhol aeroportda sotib olmagan ma’qul: u yerda ko‘pincha cheklovlarga ega «turistik» tariflarni taklif qilishadi. Aeroportdan chiqish joyidagi peshtaxtalarga boring – u yerda tanlov ko‘proq, sharoitlar esa tushunarliroq. Operatorlar orasida Viettel eng ishonchli: u tog‘larda va uzoq plyajlarda barqaror aloqa sharoitiga ega.

Agar telefon eSIM‘ni qo‘llab-quvvatlasa, Airalo kabi ilova orqali uni oldindan sotib olish qulayroq. Internet samolyot qo‘ngandan so‘ng darhol paydo bo‘ladi, salonlar qidirilmaydi va navbatlarda turilmaydi.

Pulni qayerda ayirboshlash mumkin?

Aeroportda faqat kichik summani, taxminan 20-50 dollarni almashtiring, shunda taksi va birinchi xarajatlar uchun yetarli bo‘ladi. Asosiy pullarni shaharda almashtirish foydaliroq. Eng yaxshi kursni odatda Ziyongdong markazidagi zargarlik do‘konlari taklif qiladi. Kirib, «Money exchange?» deb so‘rashning o‘zi kifoya – Fukuok uchun bu odatiy amaliyot. O‘zingiz bilan «ko‘k» deb ataladigan 100 dollarlik yangi kupyuralarni olib yurganingiz ma’qul. 1, 5 yoki 10 dollarlik mayda kupyuralar kursi deyarli har doim yomonroq bo‘ladi.

Fukuok shoshqaloqlik va qat’iy jadvalni talab qilmaydi. Bu yerda kunni nazorat qilishga urinishdan ko‘ra, unga moslashish osonroq. Vaqt o‘tishi bilan bunday dangasa ritmda oddiy narsalarni payqay boshlaysiz: dengizdan chiqqandan keyin mango mazaliroq tuyuladi, tushga yaqin qum tez qiziydi va kechqurun hatto sayyohlik joylarida ham sokin bo‘ladi. Bunday ritm orol muhitiga sho‘ng‘ishga va nihoyat shaharning shovqin-suronidan dam olishga yordam beradi.