Toshkentdagi Yapon bog‘i: manzili, ish tartibi, chipta narxlari va qanday borish mumkin

Agar Toshkentning tirbandliklaridan charchagan bo‘lsangiz-u, shahar tashqarisiga chiqishga vaqtingiz bo‘lmasa, shahar shovqinidan biroz uzoqlashib, Yapon bog‘ida hordiq chiqarishni taklif qilamiz. Bu yerda boshqa bog‘lardagidek baland musiqa, stritfud rastalari va shovqinli attraksionlar yo‘q. Buning evaziga suv bo‘yidagi sokin sohillar, qayiqlar, kechki ochiq kinoteatr va uzoq vaqt piknik qilish uchun yashil maysazorlar bor.

Yapon bog‘iga kirish qanchaga tushishi, nima uchun 50 ming so‘mga shu yerdagi pledni ijaraga olish kerakligi va agar o‘zingiz bilan tarvuz olib kelsangiz, qo‘riqchilar nega sizni kirishdayoq ortga qaytarishi haqida so‘zlab beramiz.

Toshkentdagi Yapon bog‘i qayerda joylashgan va unga qanday boriladi?

Bog‘ quyidagi manzilda joylashgan: Toshkent shahri, Yunusobod tumani, Amir Temur ko‘chasi, 107-uy. Eng yaqin metro bekati — Yunusobod yo‘nalishidagi “Bodomzor”. U Amir Temur ko‘chasi bo‘ylab “O‘zekspomarkaz”, “Toshkentlend” bog‘i va AZIMUT Grand Hotel (sobiq International Hotel) yonida joylashgan. Bekat chiqishidan bog‘ning kirish qismigacha piyoda yetti daqiqalik yo‘l. Agar mashinada bormoqchi bo‘lsangiz, bog‘ yonida avtoturargoh mavjud.

Yapon bog‘ining ish tartibi

Bog‘ soat 10:00 dan 22:00 gacha ochiq, kassa esa 10:00 dan 21:00 gacha ishlaydi. Bog‘da bo‘lish vaqti cheklanmagan, to‘lovni esa istalgan usulda amalga oshirish mumkin. Bog‘ har kuni, jumladan, bayram kunlari ham ochiq.

Yapon bog‘iga chipta qancha turadi?

Kirish chiptalari narxlari:

• kattalar uchun — 30 ming so‘m;
• bolalar uchun (3–12 yosh) — 20 ming so‘m;
• pensionerlar uchun — 10 ming so‘m;
• uch yoshgacha bo‘lgan bolalarga — bepul;
• I va II guruh nogironligi bo‘lgan shaxslarga — bepul.

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Yapon bog‘ida nimalarni ko‘rish mumkin?

Yapon bog‘ida sayr qilish va shahar shovqinidan dam olish juda maroqli. Agar uzoqroq qolishni istasangiz, piknik uyushtiring — buning uchun maxsus hudud bor, u yerda do‘stlaringiz yoki oilangiz bilan maysazorda o‘tirishingiz mumkin.

Kirish qismida pled va yostiqlarni ijaraga beradigan do‘koncha ishlaydi. Pled 50 ming so‘m, yostiq esa 10 ming so‘m turadi. Bu juda qulay: tabiat qo‘ynida bir-ikki soat vaqt o‘tkazish uchun uydan turli anjomlarni olib kelish shart emas.

Bog‘da yana nimalar bilan shug‘ullanish mumkin:

Ko‘l, ko‘prikchalar va sayr yo‘laklari

• 
• 

Bog‘dagi hech bir detal tasodifan tanlanmagan. Masalan, an’anaviy yapon qarashlarida kirishdagi yog‘och darvoza makonni tashqi olamdan ajratib turuvchi ramziy chegara sifatida talqin qilinadi. Shu sababli kirishda aynan yog‘och darvoza o‘rnatilgan. Hudud shunday rejalashtirilganki, suv havzalari, tosh kompozitsiyalari va shiyponlar bir-biri bilan uyg‘unlashib, sayr yo‘laklari va yog‘och ko‘prikchalar orqali o‘zaro bog‘langan. O‘simliklar ham ma’no bilan tanlangan: bu yerga sakura, zarang, archa va ignabargli daraxtlar ekilgan. Bu o‘simliklarning barchasi yapon bog‘lari uchun xos va bog‘ni yaratuvchilar tashrif buyuruvchilarda haqiqiy yapon bog‘iga xos muhit taassurotini uyg‘otishni maqsad qilgan.

Eski ko‘l bo‘yida bir muddat to‘xtab hordiq chiqarish uchun qulay sohil bor. Bahorda suv yuzasiga sakura gulbarglari to‘kiladi, suv qirg‘og‘ida giatsintlar bilan suv gulsafsarlari ochiladi, chuqurroqda esa manzarali baliqlar to‘dasi suzib yuradi. Bu bog‘ning mashhur suratga tushish joylaridan biridir. Shuning uchun bu yerda ko‘pincha “love story” va to‘y videolari suratga olinadi.

Bog‘ yil davomida saranjom-sarishta ko‘rinishi uchun doimiy parvarishlanadi: maysazorlar sug‘oriladi, daraxtlar zararkunandalardan himoya qilinadi, mavsumiy gullar ekiladi va shox-shabbalari butab turiladi.

Toshlar bog‘i

• 
• 
• 

“Sekitei” toshlar bog‘i XIV asrda shakllangan dzen-buddizm an’analariga muvofiq yaratilgan. Yaponiyada toshlarni joylashtirish san’ati — “sute-isi” mavjud. Ularning uyg‘unligi tabiatning rang-barangligi hamda In va Yan qarama-qarshiliklarining uyg‘unligini ifodalaydi. Bunday kompozitsiyani mushohada qilish orqali olam tuzilishini anglashga yaqinlashish mumkin, deb hisoblanadi. Bir necha daqiqa shu yerda jim o‘tirib, xotirjamlikdan bahramand bo‘lish mumkin.

Choyxona shiyponi

• 
• 

Agar toshlar kompozitsiyasini tomosha qilib bo‘lgan bo‘lsangiz, demak, choy ichish uchun ayni fursat. “Buden” shiyponi yapon choy marosimi an’analariga ko‘ra qurilgan: idishlar va bezaklar bronza, keramika, yog‘och va bambukdan yasalgan. Uning yonida “Tyozubachi” marosim bulog‘i joylashgan — marosim oldidan unda qo‘llar yuviladi, suv undan manzarali hovuzchaga oqib tushadi. Interyerning muhim unsurlaridan biri — ikebana tamoyillari asosida yaratilgan gul kompozitsiyasi.

Kirish eshigi oldida an’anaviy yapon barabani o‘rnatilgan. E’tiqodga ko‘ra, barabanni aylantirish insonning ilohiy kuch bilan aloqani his qilishiga yordam beradi. Ichkariga kirishda poyabzalni yechish kerak, chunki polga gilamlar to‘shalgan. Ichkarida “tya-no-yu” — ya’ni klassik choy marosimi uchun zarur anjomlar qo‘yilgan stolcha bor.

Shiypondan manzarali karplar va oltin baliqlar suzib yuradigan hovuzga qaragan ochiq ayvonga chiqish mumkin. Bu yerda taxta supacha bor, shuning uchun choy ichgach, o‘tirib, tabiat va jonzotlarni tomosha qilish mumkin.

Manzarali o‘simliklar va tovuslar

Choy pavilyonidan boshlanuvchi yo‘laklar bog‘ning ichkarisiga olib boradi. Bog‘ni barpo etishda ko‘p yillik daraxtlar saqlab qolinib, Yaponiyada gullashini tomosha qilish an’anaga aylangan sakura ham ekilgan. Undan tashqari, bu yerda ignabargli daraxtlar, zarang, archa va boshqa manzarali butalar ham o‘sadi.

Bog‘ hududida turli xil qushlarni uchratish mumkin. Maxsus volyerlarda tovuslar saqlanadi — omadingiz kelsa, ularni dumini yoygan holda ko‘rasiz. Laylaklarni esa hudud bo‘ylab erkin yurib turgan holda uchratish mumkin. Suv havzasida esa o‘rdaklar va oqqushlar suzadi. Qirg‘oqda qushlar uchun maxsus yem 20 ming so‘mdan sotiladi. Qushlarni boqish va sayringizni biroz rang-barang qilish uchun bir porsiya sotib olishni tavsiya qilamiz.

Katamaranlar va yozgi kinoteatr

• 
• 

Hovuz bo‘yida katamaran ijarasi mavjud. Elektr katamaran ish kunlari 200 ming so‘m, dam olish kunlari esa 250 ming so‘m turadi. Suv to‘pponchalari bilan o‘ynashni istaganlar uchun istalgan kuni 200 ming so‘m evaziga “Dengiz jangi” attraksionidan foydalanish mumkin. Kechqurun bog‘da Sakura Cinema ochiq osmon ostidagi kinoteatrida filmlar namoyish etiladi. U yerda odatda har oqshom soat 20:00 va 22:00 da seanslar o‘tkaziladi. Mehmonlarga yumshoq o‘rindiqlar beriladi, shu yerning o‘zida popkorn ham sotiladi. Jadval tez-tez o‘zgarib turgani uchun dolzarb afishani loyihaning Instagram sahifasi — sakura_cinema.uz orqali tekshirib olgan ma’qul.

Yapon bog‘ida suratga olish narxlari

Bog‘ga faqat sayr qilish uchun kelishmaydi. Yashil xiyobonlar, obod hudud va sokin suv havzalari tufayli bu joyni ko‘pincha to‘ylar va ochiq havodagi nikoh marosimlari uchun band qilishadi. Shu sababli, boshqa marosimga yoki suratga olish guruhi vakillariga duch kelsangiz, ajablanmang.

Yapon bog‘ida professional foto va video tasvirga olish uchun haq olinadi. Narxlar quyidagicha.

Yapon bog‘iga tashrif buyurish qoidalari

Biz bog‘ning rasmiy qoidalari bilan tanishib chiqib, eng asosiylarini to‘pladik. Bog‘ hududida quyidagilar taqiqlanadi:

• uy hayvonlari bilan kirish;
• velosiped, rolik, samokat va skeytbordlarda uchish, shuningdek, futbol va boshqa faol o‘yinlar o‘ynash;
• hovuzlarda cho‘milish va quyoshda toblanish;
• alkogolli ichimliklar, petardalar, pirotexnika vositalari, konfetti va yaltiroqli sharlar olib kirish;
• o‘zingiz bilan tarvuz, qovun va pista olib kelish;
• maysazorga suv o‘tkazmaydigan polietilen (klyonka) va qalin ko‘rpachalar to‘shash — ular maysani zararlaydi;
• quloqchinsiz musiqa tinglash;
• ma’muriyat ruxsatisiz professional foto va video tasvirga olish  (bu xizmat pulli).

Bolalar kattalar nazoratida bo‘lishi lozim. Bog‘ hududi videokuzatuv ostida. Piknik uyushtirish mumkin — oziq-ovqat olib kirishga ruxsat berilgan. Biroq maysazorda o‘tirmoqchi bo‘lsangiz, havo o‘tkazadigan to‘shama olib kelishingiz kerak bo‘ladi. Yana bir variant — anjomlarni shu yerning o‘zida ijaraga olish: kirish qismida pled 50 ming so‘m, yostiq esa 10 ming so‘mga ijaraga beriladi.

Ko‘p beriladigan savollar

Yapon bog‘ida kafe bormi?

Bog‘ hududida kafe yo‘q, lekin maysazorda, ko‘l bo‘yida yoki shiyponchalarda ovqatlanish mumkin. Oziq-ovqat va ichimliklarni o‘zingiz bilan olib kelasiz, ammo quyidagi cheklovlarni yodda tuting: alkogolli ichimliklar, tarvuz, qovun va pista olib kirish mumkin emas.

Bog‘ yaqinida avtoturargoh bormi?

Ha, bog‘ yonida avtomobillar uchun avtoturargoh mavjud.

Uy hayvonlari bilan kirishga ruxsat berilganmi?

Yo‘q. “O‘zekspomarkaz” qoidalariga ko‘ra, hududga uy hayvonlari bilan kirish taqiqlanadi.

Bolalar bilan borishga arziydimi?

Ha, bog‘ oilaviy hordiq uchun ayni muddao: ko‘l bo‘ylab piyoda yoki katamaranda sayr qilish, qushlarni boqish va maysazorda piknik uyushtirish mumkin. 3 yoshgacha bo‘lgan bolalarga kirish bepul, 3 yoshdan 12 yoshgacha bo‘lgan bolalar uchun chipta narxi 20 ming so‘m, kattalar uchun esa 30 ming so‘m.

Yapon bog‘i bo‘ylab sayr qilish odatda qancha vaqt oladi?

Bog‘ hududini shoshmasdan aylanib chiqish uchun taxminan ikki soat ketadi. Agar ovqatlanish, katamaranda sayr qilish va ochiq osmon ostidagi kinoteatrga borishni ham rejalashtirsangiz, butun kuningizni ajratganingiz ma’qul.

Yapon bog‘iga yilning qaysi faslida borgan yaxshi?

Bahorda va kuzda. Bahorda bog‘da sakura gullaydi, kuzda esa havo salqinlaydi — bu ochiq havoda uzoq sayr qilish uchun ayniqsa muhim.