2025-yilda AQSH grin-kartasiga qanday ega bo‘lish mumkin

Grin-kart (Diversity Visa) lotereyasi — AQSHda yashashni orzu qiladigan o‘zbekistonliklarga bir yilda bir marta beriladigan imkoniyat. Viza olish uchun boshog‘riq yugur-yugursiz, ish beruvchidan taklif va universitetga kirish shartisiz — anketani xatosiz to‘ldirish va, yaqindan boshlab atigi bir dollar (13 000 so‘m) hamda omad kerak xolos. Bu qo‘llanma sizga arizani to‘g‘ri topshirish va yutish imkoniyatingizni oshirishga yordam beradi. 

AQSH grin-kartasi o‘zi nima?

Oddiy so‘z bilan aytganda, Green Card (rasmiy nomi — Permanent Resident Card) — bu sizga Qo‘shma Shtatlarning doimiy rezidenti maqomini beruvchi hujjat.

Grin-karta sizga nima beradi:

• AQSHning istalgan nuqtasida qonuniy yashash va ishlash huquqi.

• Mamlakatga erkin kirib-chiqish.

• Ayrim imtiyozlar va ijtimoiy ta’minotga da’vogarlik.

• Mamlakatda besh yil doimiy istiqomat qilgach, fuqarolik olish uchun hujjat topshirish va AQSH fuqrosiga aylanish imkoniyati.

Grin-karta qancha muddat amal qiladi?

Plastik kartaning o‘zi 10-yilga beriladi, keyin uni cho‘zdirish kerak bo‘ladi. Bunda, agar qonunlarni buzmasangiz va AQSH hududida doimiy yashasangiz, sizda doimiy rezident maqomi saqlanib qoladi.

O‘sha mashhur Green Card mana shunday ko‘rinishda bo‘ladi

AQSH grin-kartasini qanday olish mumkin?

Grin-karta olishning turli usullari bor (nikoh, ish, oila bilan birlashish), ammo eng osoni — bu Diversity Visa (DV) lotereyasida ishtirok etish. Har yili AQSH hukumati O‘zbekiston kabi immigratsiya darajasi past mamlakatlar aholisi o‘rtasida ma’lum miqdordagi vizalar lotereyasini o‘tkazadi. G‘oliblar kompyuter tomonidan tasodifiy tarzda aniqlanadi, shu bois yutish imkoniyati hammada teng bo‘ladi.

Grin-karta lotereyasi qachon boshlanadi?

Arizalarni topshirish muddati

Odatda lotereyada ishtirok etish uchun ariza topshirish oktabr oyining dastlabki sanalarida boshlanib, noyabrning boshida to‘xtaydi. Masalan, o‘tgan yili arizalar 2-oktabrdan 7-noyabrgacha qabul qilingan edi. Bu yil ariza topshirish jarayoni hali ochiq emas.

Natijalar qachon e’lon qilinadi?

Lotereya natijalari odatda kelasi yilning may oyi boshida arizalar qabul qilingan rasmiy saytda e’lon qilinadi.

Grin-karta lotereyasida qatnashish shartlari 

Xohlovchilar uchun lotereyada ishtirok etish shartlari va qoidalari juda oddiy:

Tug‘ilgan joyingiz. Siz lotereyada ishtirok etishga ruxsat berilgan mamlakatda tug‘ilgan bo‘lishingiz kerak, O‘zbekiston bu ro‘yxatda hamisha bor. Bu o‘rinda hozirgi fuqaroligingiz emas, aynan tug‘ilgan joyingiz muhim.

Ma’lumot darajasi yoki ish tajribasi. Sizda yoki to‘liq o‘rta ma’lumot (litsey/kollej yoki 11-sinf), yoxud ish tajribasi bo‘lishi shart — keyingi besh yil ichida ikki yil yuqori malakali mutaxassis sifatida ishlagan bo‘lishingiz kerak.

Qonun bilan muammo va ayrim kasalliklar. Qatnashish uchun bu muammo emas, lekin mabodo lotereyada yutsangiz ham shu holatlar sababli rad javobi olishingiz mumkin. Salomatlik bo‘yicha stop-varaqda masalan, faol bosqichdagi o‘pka sili ko‘rsatilgan. Shuningdek, sizga vaksina olganingiz haqida sertifikat ham kerak bo‘ladi. Bu haqda FAQda batafsil.

Qanday hujjatlar kerak bo‘ladi? 

Ariza topshirish bosqichida hech qanday hujjatlar ilova qilinmaydi — faqat ma’lumotlarni kiritish payti xorijga chiqish uchun amaldagi pasportingiz va yangi olingan fotosurat kerak bo‘ladi. Qolgan barcha hujjatlar (tug‘ilganlik haqida guvohnoma, diplomlar, sudlanmaganlik haqidagi ma’lumotnoma va h. k.) lotereyada yutganingizda kerak bo‘ladi.

Onlayn grin-karta uchun ariza qanday to‘ldiriladi?

Anketani to‘ldirib topshirish mumkin bo‘lgan yagona manba bu dvprogram.state.gov rasmiy sayti. Anketani to‘ldirish uchun yordam taklif qiluvchi vositachi saytlarga ishonmang. Lotereyada qatnashish 1$ boj to‘lovini hisobga olmaganda, — mutlaqo bepul.

Batafsil yo‘riqnoma

1. Fotosuratingizni tayyorlang. Bu o‘ta muhim bosqich. Barcha talablarga javob beradigan tarzda rasmga tushing.
2. Saytga kirib, anketani to‘ldiring. Anketa ingliz tilida, lekin juda sodda tuzilgan. O‘zingiz, turmush o‘rtog‘ingiz va 21 yoshgacha bo‘lgan farzandlaringiz haqida to‘liq ma’lumotni kiriting.
3. To‘lovni to‘lang va telefon raqamingizni kiriting. Anketa to‘ldirilgach, tizim 1$ boj to‘lovini amalga oshiradi. Shundan keyin sizga alohida tasdiqlov kodi (Confirmation Number) beriladi. Uni albatta saqlab qo‘ying — bu kodsiz natijalarni ko‘ra olmaysiz.

Fotosurat bo‘yicha talablar

• Yangi: keyingi 6 oy ichida olingan bo‘lsin.
• Retushsiz va tiniq bo‘lsin: oq fonda, jilmaymasdan, ko‘zoynaksiz va bosh kiyimsiz (yuzni to‘smaydigan diniy bosh kiyimlar bundan mustasno) tushilsin.
• Texnik parametrlar: 600х600 pikseldan boshlab, JPG formatda, 240 KB gacha.

Fotosurat bo‘yicha barcha talablarni Davlat departamenti saytida topish mumkin, yana u yerda suratni to‘g‘ri kesish vositalari ham bor.

Anketani to‘ldirishda ko‘p uchraydigan xatolar 

• Noto‘g‘ri olingan fotosurat. Diskvalifikatsiyaga eng ko‘p sabab bo‘ladigan xato.

• Ma’lumotlardagi xatolar. Ism, familiya yoki tug‘ilish sanasidagi xatolar, hatto lotereya yutib olingan taqdirda ham viza berish rad etilishiga sabab bo‘lishi mumkin.

• Oila haqida noto‘liq ma’lumot. 21 yoshgacha bo‘lgan, oila qurmagan barcha farzandlar, hattoki siz bilan ko‘chib ketish niyatlari bo‘lmasa ham, ko‘rsatilishi shart.

Grin-kartani yutib olish imkoniyatlari

To‘g‘risini aytamiz: grin-karta lotereyasini yutib olish imkoniyati katta emas. Har yili butun dunyo bo‘ylab 55 000 ta viza o‘ynaladi, arizalar soni esa millionlarni tashkil etadi. Masalan, o‘tgan yili lotereyada qatnashganlarning 0,3 foizigina grin-karta yutishdi.

Ammo statistikaga ko‘ra, O‘zbekiston aholisi uchun imkoniyat yetarli: mamlakatimiz bir necha yildan beri grin-karta yutganlar soni bo‘yicha peshqadamlar qatorida. Muhimi — lotereyada qatnashishdan to‘xtamaslik va ajoyib kunlarning birida omad albatta kulib boqadi.

Nimalar grin-kartada yutishga daxl qilmaydi

Yutuq — tasodif ishi. Bunda quyidagi holatlar mutlaqo ahamiyatsiz:

• Ariza topshirilgan sana (birinchi yoki oxirgi kun).

• Oilaviy ahvolingiz yoki farzandlaringiz soni.

• Ko‘rinish (tizim faqat texnik talablarga mutanosiblikni tekshiradi).

Yutuqni qachon va qayerda tekshirish mumkin?

Omadingiz keldimi-yo‘qmi faqatgina xuddi o‘sha dvprogram.state.gov rasmiy saytining Entrant Status Check bo‘limida, kelasi yilning may oyida ko‘rishingiz mumkin. Shaxsiy Confirmation Number kodingizni, familiya va tug‘ilgan sanangizni kiritish kerak bo‘ladi. Davlat departamenti pochta orqali hech qanday xabarlar jo‘natmaydi.

Lotereyada yutish — bu hali grin-karta naqd degani emas

Bu ko‘pchilik e’tibordan qochiradigan muhim jihat. Lotereyada yutish — viza oldi degani emas. Yutuq viza olish huquqini beradi xolos. Eng qiyini yutuqdan keyin boshlanadi.

Yutuq chiqqan har bir arizaga raqam (Case Number) beriladi. U qancha kichik sonli bo‘lsa, sizni intervyuga chaqirishlari ehtimoli shuncha yuqori bo‘ladi. Davlat departamenti mavjud vizalar sonidan ko‘proq kishilarga yutuq ajratadi, chunki keyingi bosqichlarda g‘oliblar saralanadi. Agar sizning Case Number raqamingiz yirik sondan iborat bo‘lsa, katta ehtimol bilan sizgacha navbat yetib ham kelmaydi.

Grin-karta yutgan odam nima qilishi kerak?

Agar siz AQSH gerbi tushirilgan orzungizdagi xatga yetishgan bo‘lsangiz — tabriklaymiz! Lekin bu boshlanishi xolos. Yutuq chiqqach, mana nimalarni qilishingiz kerak:

1. DS-260 shaklli hujjatni toldirish. Bu batafsil immigratsion anketadir.
2. Hujjatlarni yig‘ish. Sizga pasportlar, tug‘ilganlik va nikoh haqidagi guvohnomalar, diplomlar, sudlanmaganlik haqidagi ma’lumotnomalar kerak bo‘ladi.
3. Tibbiy komissiyadan o‘tish. O‘zbekistonda bu ishni faqat bir joyda — akkreditatsiyadan o‘tgan Toshkent xalqaro klinikasi (TIC)-da amalga oshirish mumkin. 
4. Toshkentdagi AQSH elchixonasida suhbatdan o‘tish. Suhbat o‘tadigan kuni viza to‘lovini qilasiz — oilaning har bir a’zosi uchun 330$ (deyarli 4,2 mln so‘m) to‘lanadi. Rad javobi olinganda bu mablag‘ qaytarilmaydi.

Grin-karta lotereyasi haqida eng ko‘p beriladigan savollar

Lotreyada qatnashish qanchaga tushadi?

Yaqindan boshlab 1$ boj to‘lovi olinmoqda. Asosiy xarajatlar yutuq chiqqandan keyin boshlanadi.

Grin-karta yutuq chiqqandan keyin qancha muddat amal qiladi?

Avvalo sizga yarim yillik immigratsion viza beriladi — bu vaqt ichida AQSHga ketishingiz kerak bo‘ladi. Green Card plastik kartasining o‘zi 10-yilgacha amal qiladi.

Bir yo‘la bir nechta ariza topshirish mumkinmi?

Bitta odam — bir yilda bitta ariza topshira oladi. Ammo, agar oilali bo‘lsangiz, ikkita anketa (o‘zingiz va turmush o‘rtog‘ingiz nomidan) topshirishingiz mumkin, albatta bunda yutish imkoniyatingiz ortadi.

Sudlangan odam lotereyada qatnasha oladimi? 

Qatnashish mumkin, lekin og‘ir jinoyatlar uchun sudlanganlik viza olish bosqichida rad javobi berilishiga olib kelishi ehtimoli juda yuqori.

Qanday kasalliklar tufayli lotereyada qatnashib bo‘lmaydi?

Kasalliklar ishtirok etish uchun to‘siq bo‘lolmaydi, biroq yutuq chiqqan taqdirda, viza berilishi rad etilishiga sabab bo‘lishi mumkin. Stop-varaqda gonoreya, zaxm (sifilis) va faol bosqichdagi sil kasalliklari ko‘rsatilgan (to‘liq ro‘yxat bu yerda). Shuningdek, lotereyada yutuq chiqqach, sizga vaksina olganingiz haqida sertifikat kerak bo‘ladi — majburiy emlashlar ro‘yxatida gepatit, poliomiyelit, qoqshol, qizamiq, qizilcha, ko‘k yo‘tal va boshqa kasalliklar bor. Bu ro‘yxat o‘zgarishi mumkin, aniq ma’lumotni saytda ko‘rish mumkin.

Qatnashchi nima uchun diskvalifikatsiya qilinishi mumkin?

Eng ko‘p uchraydigan sabab — talablarga javob bermaydigan fotosurat. Bundan tashqari, ko‘chirma arizalar yoki shaxsiy ma’lumotlardagi xatolar ham diskvalifikatsiyaga olib kelishi mumkin.

Grin-karta o‘ynaganda nimalarni yodda tutish lozim

Hammasini to‘g‘ri bajarishda sizga yordam beradigan bir nechta tavsiyalar:

• Faqat rasmiy saytdan foydalaning. Sayt nomini eslab qoling: dvprogram.state.gov. Qolganlarning hammasi firibgarlar.
• To‘g‘ri tushirilgan fotosurat — yarim omad. Arizani yuborishdan avval fotosurat bo‘yicha barcha talablar va qoidalarni qayta tekshiring. Ko‘pincha shu xatolar diskvalifikatsiyaga sabab bo‘ladi.
• Ariza yuborishni oxirgi kunga qoldirmang. Sayt yuklamasi oshib ketgani bois, anketani belgilangan muddat tugaguncha jo‘natishga ulgurmay qolishingiz mumkin.