Pattayya, ekzotik shou va qonun: Tailanddagi seks-turizm haqida nimalarni bilish lozim?

Tailand — bu cheksiz plyajlar, mazali tom-yam, ulug‘vor ibodatxonalar va... Walking Street. Keling, ochiqchasiga gaplashamiz: bu mamlakat ko‘pchilik sayyohlar, jumladan o‘zbekistonlik sayyohlar uchun ham nafaqat «baunti» diyori, balki kattalar uchun ko‘ngilxushliklar makoniga ham aylangan. Bu tushuncha shu qadar o‘rnashib qolganki, u haqda jim o‘tirgandan ochiq gapirish osonroq.  

Biz Yo‘lovchi sahifasida sizni ayblamoqchi yoki ma’naviyat soati o‘tkazmoqchi emasmiz. Bizning vazifamiz — mavjud holatni rostgo‘ylik bilan odilona tahlil qilish. Xo‘sh, bu gaplar qay daraja haqiqat yoki afsona? Narxi qancha? Va, eng muhimi — Pattayya yoki Bangkokning tungi hayotiga sho‘ng‘imoqchi bo‘lgan sayyoh nimalardan ehtiyot bo‘lishi kerak? Endi bir chetdan hammasini gaplashamiz.

Bu o‘zi qonuniymi?

Tailanddagi asosiy g‘alati holat shundaki, rasman mamlakatda seks-xizmatlar taqiqlangan. 1996-yilda «Fohishabozlikni bartaraf etish va chek qo‘yish to‘g‘risidagi Qonun»  qabul qilingan bo‘lib, bunday faoliyat noqonuniy hisoblanadi.

Ammo amalda qonun ishlamaydi hisob. Turistik manzillarda bunga hamma ko‘z yumadi. Politsiya minglab gou-gou barlar, «massaj salonlari» va ko‘cha qizlari borligini juda yaxshi biladi, lekin reydlar juda kam, bo‘lgani ham xo‘jako‘rsinga o‘tkaziladi.

Shunga qaramay, qonun bor va u — ko‘proq sayyohlarga bosim o‘tkazish vositasi hisoblanadi. Seks-xizmatlar mijozlarini jazolash holatlari juda kam uchrasa-da (odatda masala joyida, pora evaziga hal bo‘ladi), quyidagilarni yodda tutgan ma’qul:

• Mijoz uchun rasman 1000 bat (390 ming so‘m)gacha jarima va hatto bir oygacha qamoq jazosi bor.
• O‘ta og‘ir jinoyat — voyaga yetmaganlar bilan aloqa qilish. Agar qiz 18 yoshga to‘lmagan bo‘lsa, sayyoh rosmana qamoqqa kirishi (1-yildan 6-yilgacha va undan ko‘p muddatga) va jarimaga tortilishi mumkin, bu vaziyatda «kelishib» bo‘lmaydi. Qizlarning yoshini ko‘rinishidan bilish imkonsiz, oqibatda esa sayyohning tarjimayi holiga katta dog‘ tushishi mumkin.

«Ko‘ngilxushliklar» xaritasi: bu ishlar qayerda bo‘ladi?

Bunday xizmatlar ko‘rsatiladigan joylar bir nechta va ular hammaga ma’lum:

Pattayya

Afsonaviy Walking Street — bu neon chiroqlar, baland musiqa, yuzlab gou-gou barlar va odamlarni o‘sha barlarga chorlovchilar bilan to‘lib-toshgan bir chaqirimlik ko‘cha. Bu yerda hammasi ochiq-oshkora va odamni toliqtiruvchi muhit hukmron.

Bangkok

Bu yerda hamma narsa ma’lum joyga jamlangan. Asosiy nuqtalar —Nana Plaza (ulkan uch qavatli barlar majmuasi), Soi Cowboy («Vegasda yigitlar bazmi» filmi aynan shu yerda suratga olingan) va Patpong (tungi bozor va gou-gou barlar joylashgan qadimiy tuman) mavzelari.

Pxuket

Tungi hayot qaynagan markaz — Patong plyajidagi Bangla Road ko‘chasi. Kechqurun u piyodalar yo‘lkasiga va Walking Street’ning kichik nusxasiga aylanadi.

Sayyohlar ko‘p yuradigan ko‘chalarda, ayniqsa, Bangla Road’da, chorlovchilar ping-pong shou deb ataladigan tomoshaga jon-jahdi bilan taklif qilishadi. Bu erkaklar jinsiy a’zolari va ayol tanasining g‘aroyib xususiyatlari namoyishi asosiga qurilgan  kattalarbop maxsus tomoshadir. Bunday tomoshaxonalar ichida suratga va videoga olish qat’iyan taqiqlangan.

Bu xizmat qanday ishlaydi va qancha turadi?

Narxlarni belgilash tizimi oddiy va odatiy, lekin bungacha bu xizmatlarga ishi tushmagan odam uchun tushunarsiz bo‘lishi mumkin. Asosiy terminlar va taxminiy narxlar mana bunday:

Bar Fine (bar-fayn): Bu qiz yoki yigitni olib ketayotganingiz uchun siz barga to‘laydigan «jarima». Bu hali xizmat haqi emas, balki bar ishchisini band qilganingiz uchun tovon puli xolos. Narxi: 800–1500 bat (312–585 ming so‘mga yaqin).

Short Time (Qisqa vaqt): Odatda yaqin oradagi mehmonxonada 1-2 soat vaqt o‘tkazishdan iborat. Narxi: 2000–4000 bat (780 ming–1.6 mln so‘m), bundan tashqari bar-fayn ham to‘lanadi.

Long Time (Uzoq vaqt): Qiz yoki yigit siz bilan tonggacha birga bo‘ladi. Narxi: 4 000–7 000 bat (1.6-2.7 mln so‘m), bar-fayn to‘lovi ham bor.

Bu narxlar taxminiy va ular manzil, xizmat ko‘rsatuvchining tashqi ko‘rinishi va sizning savdolasha olish qobiliyatingizga (aslida bu doim ham ish bermaydi) ko‘ra o‘zgarishi mumkin. Narxni va shart-sharoitni hamisha oldindan aniq kelishib oling, shunda favqulodda holatga tushib qolmaysiz.

Xavfsizlik bo‘yicha ko‘rsatmalar

Ana endi asosiy mavzuga o‘tamiz. Ko‘ngilxushliklar juda tez va juda ayanchli tugashi ham mumkin. Bu shunchaki vahima gap emas, balki sayyohlar duch kelgan haqiqiy vaziyatlardir.

Aldov va o‘g‘rilik. Eng ko‘p uchraydigan xavf. Mehmonxonada, shundoqqina tumba ustiga qo‘yilgan telefon, hamyon — tongda g‘oyib bo‘lishi mumkin. Agar xonangizda qimmatbaho buyumlar, pul va hujjatlar bo‘lsa, u yerga hech kimni keltirmang. Seyfdan foydalaning.

«Lediboylar» (katoylar), ya’ni xonim-yigitlar. Tailandda transgender nusxalar (katoylar) bu sohada juda ko‘p. Bu yaxshi ham emas, yomon ham emas — bu shunchaki fakt, bilib qo‘ysangiz, noqulay vaziyatlar va tushunmovchilikka duch kelmaysiz. Agar bu masala siz uchun muhim bo‘lsa, hushyorroq bo‘ling. Transgenderlarni ba’zan umuman farqlab bo‘lmaydi.

Salomatlik. Bu eski gapdir, lekin bu fakt: venerik kasalliklar, jumladan OIV va gepatit yuqtirish xavfi juda yuqori. Prezervativ ishlatish — shart va lozim. Mutlaqo va qat’iy.

Politsiya va «laqillatish». Ba’zan politsiyaning o‘zi sayyohlardan pul undirish sxemasi ishtirokchisi bo‘ladi. O‘zlari sizni qaltis vaziyatga tushirib, yana o‘zlari kattagina pul evaziga o‘sha vaziyatni «hal etishni» taklif qilishadi. Eng yaxshi taktika — hech kim bilan tortishmaslik va qonunni buzmaslik.

Ruhiy-emotsional qopqonlar. Ko‘p uchraydigan holat: sayyoh uning hamyonini emas, o‘zini sevib qolgan «o‘sha yagonasini» topganiga ishona boshlaydi. Bir-ikki kundan keyin esa: «ukamning o‘qish pulini to‘lashib yubor», «onam betob», «oilamizga tegishli yerni qaytarish uchun pul kerak» degan iltimoslar boshlanadi. Bu siyqasi chiqqan usul va u albatta, parchalangan yurak hamda qurigan cho‘ntak bilan tugaydi.

 Madaniyat va hurmat

• Suratga ola ko‘rmang. Gou-gou barlarda va shoularda suratga olish taqiqlangan, bu qo‘riqchilar bilan jiddiy muammo tug‘dirishi mumkin.

• Obro‘yingizni saqlang. Hech qachon baland va tajovuzkor ohangda gapirmang. Bosiqlik va tabassum baqir-chaqirdan ko‘ra ko‘proq ish beradi. Oltin ibora bu — «may pen ray» (hechqisi yo‘q).

• O‘zaro rozilik. O‘ta muhim qoida: hamma narsa o‘zaro rozilik va insonning shaxsiy chegaralarini hurmat qilish asosida bo‘lishi kerak.

Tanganing ikkinchi tarafi: bu ayollar kim?

Vaziyatni to‘liq tasavvur qilish uchun bilishingiz kerak: aksariyat ayollar uchun bu ish aslo «quvnoq sarguzasht» emas, balki og‘ir mehnatdir.  Ularning ko‘pchiligi mamlakat shimoli-sharqidagi qashshoq viloyatlardan (masalan, Isan tarafdan) kelishadi va shu ish orqasidan oilalarini — ota-onalari, bolalari va uka-singillarini boqishadi. Bu ularni oqlamaydi albatta, lekin bir qarashda tuban tijoratdek ko‘rinadigan mazkur industriya negizida insoniy omillar borligini eslatadi. 

Hordiq chiqarishning boshqa yo‘llari ham bormi?

Albatta. Tailand — katta mamlakat va uning tungi hayoti faqat gou-gou barlardan iborat     emas. Agar maqsadingiz — tanishuv va muloqot bo‘lsa, buning bir nechta yo‘li bor:

• Odatdagi klublar va barlar: Bangkokda va Pxuketda mahalliy aholi va chet elliklar hordiq chiqarish uchun boradigan joylar juda ko‘p.

• Rooftop-barlar: Bangkokda bu alohida madaniy hordiq turi hisoblanadi. Ularda qoyilmaqom manzaralar, yoqimli odamlar va sokin muhitni topasiz.

• Tanishuvlar uchun ilovalar: Tinder va Bumble Tailandda juda yaxshi ishlaydi va xuddi siz izlayotgan sarguzashtni xohlovchi insonlar bilan tanishishga yordam beradi.

Xulosa o‘rnida

Tailand — g‘aroyib mamlakat, uni sevib qolish juda oson. Lekin uning sayyohlar uchun «teskari» tarafi ham bor — aynan seks-turizm tavakkal xavflari bor biznes bo‘lib, sayyoh ko‘pincha unda himoyasiz ahvolda qoladi. Bu borada aqlni ishlatib, mavjud qoidalar va ehtimoliy oqibatlarni yaxshilab o‘ylagan holda ish qilish kerak.  

Bizning maslahatimiz oddiy: maqsadingizni anglagan holda sayohat qiling.  Tabiatdan, mahalliy taomlar va madaniyatdan zavqlaning. Juda sarguzasht istayotgan bo‘lsangiz, shunday qilingki, oqibatda bu sarguzasht tufayli politsiya, shifokorlar yoki bankning qo‘llab-quvvatlash xizmatiga ishingiz tushmasin. Ehtiyotkorlik va aqlni ishlatish — har qanday safarda eng yaxshi hamroh ekanini unutmang.