Bali bo‘ylab sayohat qo‘llanmasi: Nusa Dua`da nimalarni tomosha qilish mumkin?
Bali va uning atrofidagi joylar: Nusa Dua va Lembongan hamda Gili orollarida nimalarni tomosha qilish mumkin?
Salom, men Oliyaman. Esingizda bo’lsa, Ubud bo‘ylab sayohatim haqida so’zlab bergan edim. Sholipoyalar va changalzorlar oralab to‘rt kun yurgandan keyin biz dengizga yaqinroq joyga – Nusa Dua tumaniga ko‘chib o‘tdik. Bali janubi okean bo‘yida dam olish uchun juda mos keladi va biz Ubudda ko‘rgan-kechirganlarimizdan farq qiladi. Nusa Duada keng plyajlar, rif ko‘rfazlari, to‘lqinlar va ertalabki suv ko‘tarilishlari bor, shuning uchun bu yerda barvaqt turgingiz keladi. Bu yerda kun oson rejalashtiriladi: to‘lqinlar jadvaliga qaraysiz, plyajni tanlaysiz, yo‘l bo‘yidagi kokos do‘konchasi ishlayotganini tekshirasiz va cho‘milishga borasiz.
Ushbu maqolada nafaqat Nusa Dua, balki Lembongan va Gili orollari haqida ham so‘z yuritaman: nima bilan shug‘ullanish, qayerda suzish va qayerda qo‘lda kokteyl bilan quyosh botishini tomosha qilish yaxshiroq ekanligi haqida ma’lumot beraman. Materialning oxirida FAQ bo‘limi bor, unda men qachon suzishga borish ma’qulligi, sim-karta sotib olish kerakmi yoki yo‘qligi va parvozdan oldin dorilar qutisiga nimalarni albatta solish kerakligi haqida aytib o’taman.
Nusa Dua`da qayerda yashash mumkin?
Biz katta yashil hudud, ikkita basseyn, restoran va barga ega Mercure Bali Nusa Dua mehmonxonasiga joylashdik. Ikki kishilik yaxshi jihozlangan xona kuniga 50 dollarga (600 ming so‘m) tushdi, bu esa Nusa Dua uchun juda arzon. Mehmonxona yaqinida restoranlar, varunglar, massajlar, Coco Supermarket va hayot uchun zarur bo‘lgan barcha narsalar mavjud.
Mehmonxonaning orolda o‘z plyaji bor. Kun davomida u yerga shattl boradi — dam oluvchilarni yotoq va soyabonli zonaga olib keladi va olib ketadi. Eshitilishi jihatdan bu ajoyib, ammo his qilish nuqtai nazariga ko‘ra unchalik emas: biz kelgan kuni plyaj iflos edi, suv bo‘yida esa axlat bor edi, shuning uchun cho‘milgimiz kelmadi.
Agar «xonadan chiqib, darhol suvga tushish» formati kerak bo‘lsa, Nusa Dua birinchi liniyasidagi yoki Geger plyajiga yaqinroq joydagi mehmonxonalarni ko‘rib chiqish mantiqan to‘g‘ri bo‘ladi. Ular haqida keyinroq gaplashamiz.
Nusa Dua plyajlari: qayerda cho‘milish va quyoshda toblanish mumkin?
Nusa Dua tumani, ehtimol, Balining eng «tartibli» va hashamatli qismidir. Biroq, okean hamma joyda o‘z qoidalarini o‘rnatadi va hatto bu jannatmakon burchakda ham plyajlar bir-biridan farq qiladi. Ba’zi joylarda suv yuzlab metrga chekinib, suv o‘tlarini ochib qo‘yadigan kuchli qaytishlar kutsa, boshqa joylarda esa injiq to‘lqinlar sizni kutib oladi.
Geger plyaji (Geger Beach)
Biz bu yerga sokin ko‘rfazni topish umidida keldik. Nazariy jihatdan, plyaj haqiqatan ham mintaqadagi eng yaxshi cho‘milish joylaridan biri hisoblanadi – rif bilan himoyalangan, sokin suv. Amalda shu kunlarda to‘lqinlar shunday shiddat bilan ko‘tarilardiki, suvda ko‘krakkacha keladigan tarzda turishning iloji yo‘q edi, to‘lqinlar qirg‘oqqa qaytib kelaverardi. Mehmonxona plyajlarida toza qum va bo‘m-bo‘sh yotoqlar bor edi. Jamoat plyajlarida hamma narsa oddiyroq ko‘rinadi, shuning uchun biz u yerda uzoq qolmadik.
Bir payt to‘lqinlar bilan olishish jonimga tegdi va plyajda ishlaydigan taksistdan bizni cho‘milish mumkin bo‘lgan joyga olib borishini so‘radim.
U jilmayib, shunday dedi: «Pandava plyaji — suzish uchun eng yaxshi joyi».
Roosterfish Beach Club
Yarim soatdan so‘ng biz Pandawa Beach`dagi oppoq qum ustida turardik: suv feruza rangda, to‘lqinlar qoyalarga ohista urilardi. Plyajning oxirida biz Roosterfish Beach Club — infiniti-basseynli (bu chegarasi ko‘rinmaydigan va suv vizual ravishda okean bilan «birlashib turadigani» basseyn) klubni topdik. Biz ikki shezlong uchun 60 dollar (719 ming so‘m) berib, shu yerda dam oldik — taomnoma bo‘yicha oziq-ovqat va ichimliklar ham shu summaga kiradi.
Orolda yana nimalar qilish mumkin?
Cho‘milish rejasini bajarganingizdan keyin ham orolda qiladigan yumush topiladi.
Peninsula-Aylend oroliga boring
Peninsula yarim oroliga (Peninsula Island) aksariyat mehmonxonalardan piyoda yoki taksida borish mumkin. Yarim orolda suv bo‘yidagi kamqatnov so‘qmoqlarda sayr qilish yoki shunchaki soyada o‘tirib, syorferlarni tomosha qilish mumkin.
Agar uzoqroq yurishni istasangiz, Benoa bo‘ylab marshrutni tanlang. Sohil bo‘ylab varunglar (mahalliy kafelar) mavjud bo‘lib, u yerda sovutilgan kokos yong‘og‘ini olish mumkin.
Gastro-ko‘chada tamaddi qiling
Kechga qarab, issiq pasayganda, tumanning asosiy gastro-ko‘chasi jonlanadi. Restoranlarga borish uchun esdalik sovg‘alari va kiyim-kechaklar sotiladigan rastalardan o‘tish kerak. Bu klassik kurort yo‘nalishi bo‘lib, unda gavjum muhit faqat ishtahani ochadi.
Jimbaranda dengiz mahsulotlari bilan ovqatlaning
Eng yoqimli kechki ovqat uchun qo‘shni Jimbaran tumaniga borish kerak. Bu yerga quyosh botayotganda, shundoqqina qirg‘oqda yangi dengiz mahsulotlari bilan ovqatlanishga kelishadi. Grildan chiqayotgan tutun uzoqdan ko‘rinadi, tamaddixonalar esa ko‘p. Biz tavsiyaga ko‘ra «Intan Sari Cafe»ni tanladik va afsuslanmadik. Eng yangi dengiz mahsulotlaridan iborat setlar 360 ming so‘m va undan qimmatroqqa tushadi (taxminan 30 dollar).
Nusa Dua janubiy Bali bo‘ylab sayohat bazasi sifatida
Hududning asosiy afzalligi shundaki, bu yerga kelib orolning janubini o‘rganish qulay. Kutagacha — 30-40 daqiqa tirbandliksiz yetib olish mumkin: bu tungi hayot markazi, serfing maktablari va uzun shahar plyaji. Jimbarangacha taxminan 20-30 daqiqa yo’l — bu yerga odatda dengiz mahsulotlari va suv bo‘yida quyosh botishi bilan plyaj restoranlari uchun boriladi. Uluvatuga yetib olish uchun esa taxminan 40-50 daqiqa vaqt ketadi. Bu hudud baland qoyalar, jarliklardagi ibodatxonalar va Hind okeaniga ochiq ko‘rinishga ega bo‘lgan plyajlar bilan mashhur.
Sayohatlar uchun «Grab» yoki «Gojek» mahalliy ilovalaridan foydalanish qulay — taksi tez yetib keladi, narxi esa oldindan ma’lum.
Nima bilan shug‘ullanish mumkin: kunlik ssenariy oddiy: tushlikkacha – Kutada plyaj yoki syorfing. U yerda syorfing maktablari har 50 metrda joylashgan bo‘lib, instruktorni bir soatga band qilish 120-180 ming so‘mga tushadi (bu taxminan 10-15 dollar degani). Kechga yaqin Uluvatu yoki Jimbaran shahriga borib quyosh botishini tomosha qiling.
Balida quyosh botishini qanday o‘tkazish mumkin?
Bu oddiygina «haaa, quyosh botdi» emas, balki butun boshli voqea. Kechqurun soat besh-oltida hamma qirg‘oqqa yopiriladi: kimdir qumga gilam to‘shaydi, kimdir sohildagi bar yoki restoranlardan joy oladi.
Ichimlik buyurtma qiling: yangi siqilgan sharbat yoki qahva taxminan 45-60 ming so‘mga tushadi va osmonning pushti yoki to‘q sariq rangga kirishini kuzating.
Lembongan: sukunat va musaffo suv
Agar muhitni o‘zgartirmoqchi bo‘lsangiz, Bali atrofida bir nechta ajoyib joylar mavjud.
Lembongan oroliga Sanur porti orqali borish mumkin. Taksi portgacha taxminan 156-195 ming so‘mga eltadi, tezyurar qayiq chiptasi esa bir tomonga 156-260 ming so‘mga tushadi.
Orolda Ohanas Beach Club plyajini tavsiya qilaman. Bu yerda stollar, yumshoq yostiqlar va karavotlarning bir qismi oppoq qum ustida turibdi. Siz qum ustida oyoqlaringizni uzatib o‘tiribsiz, bir necha metr narida esa okean mavjlanmoqda. Bu yerning suvi juda toza. Siz shunchaki ichkariga kirishingiz, barda yoki ayvonda o‘tirishingiz mumkin, lekin basseyn yoki qum ustida yotishni istasangiz, har bir kishi uchun kamida 130 ming so‘mdan 260 ming so‘mgacha buyurtma berishingiz kerak.
Gili orollari: mushuklar va toshbaqalar qirolligi
Orollarga yetib olish qiyin bo‘lmaydi. Biz mahalliy ekskursiya byurosining transfer xizmatidan foydalandik, bir kishi uchun taxminan 60 dollarga (719 ming so‘m) tushdi. Odatda sxema quyidagicha: sizni mehmonxonadan (Nusa Dua, Kuta, Seminyak — kompaniyaga bog‘liq) transfer xizmati olib keladi, sizni portga olib borishadi, ko‘pincha Padangbai yoki Serangan portiga. Siz parom yoki katerga o‘tirasiz va 1,5-2 soatdan keyin Gilida bo‘lasiz.
Qaysi orolni tanlash kerak:
- Gili Trawangan — shovqinli oqshomlarni yaxshi ko‘radiganlar uchun.
- Gili Air — dam olish va faollik o‘rtasidagi muvozanat.
- Gili Meno — to‘liq sukunat va odamlar kamroq.
Orollarda mashinalar va to‘laqonli transport yo‘q — faqat velosipedlar, otlar ortilgan aravalar va sizning oyoqlaringiz. Bu yerda ham itlarni uchratmaysiz, orol butunlay mushukchalarga tegishli. Bu yerda ham politsiya deyarli yo‘q, vaziyat tinch.
Gili Travangan plyajlari va quyosh botishi
Ertalab qirg‘oqdagi suv feruza rangda yaltiraydi, odamlar deyarli yo‘q - sho‘ng‘ib, orolning kayfiyatini tutib olishning ayni vaqti. Ertalabki soatlarda dengiz yaqinroq keladi va suzish ancha yoqimli.
Kunduzi hayot dengiz, shezlong va smuzi-bar o‘rtasida o‘tadi, u yerda kechqurun «butunlay boshqacha smuzi» tayyorlanadi. Quyosh botishiga yaqin orol bitta katta kinoteatrga aylanadi: suv bo‘yida puflar, musiqa, plyajda kino.
Orolda nima bilan shug‘ullanish mumkin?
Bu yerda klassik nuqtalar bo‘ylab guruhli sayohatlar taklif etiladi: toshbaqalar, marjon bog‘lari va rassom Jeyson Teylor tomonidan yaratilgan 48 ta suv osti haykalidan iborat «Nest» suv osti instalyatsiyasi. Bu joy ko‘pincha meditatsiya uchun suv osti maydoni deb ataladi. Yaqin masofadan installyatsiya juda ta’sirli ko‘rinadi, kuchli his-tuyg‘ular va dofamin «portlashini» taqdim etadi. Bu suzishni uzoq vaqt eslab qolishim aniq.
Instruktor toshbaqalar qayerda yashashini ko‘rsatdi va bir necha daqiqadan so‘ng biz katta toshbaqani ko‘rdik. Ularga qo‘l bilan tegish mumkin emas — teginish himoya qatlamini buzadi va axloqqa zid deb hisoblanadi. Orollarda buni qattiq nazorat qilishadi. Ammo qilish mumkin bo’lgan yagona narsa — o‘z yo‘nalishi bo‘ylab suzib ketayotgan toshbaqaga qisqa muddatga hamroh bo‘lib suzishdir.
Ovqat masalasi-chi?
Orolda Balida mavjud bo‘lgan hamma narsa bor, lekin qayiq logistikasi tufayli biroz qimmatroq:
- orol ichidagi varunglar va mahalliy kafelar — taom uchun 2-4 dollar;
- birinchi qatordagi qahvaxonalar — asosiy taomlar uchun 5-8 dollar.
Ko‘rinish va kokteyllar taklif qilinadigan Instagram`ga mos joylar uchun ikki kishi uchun kamida 15-40 dollar to‘lash kerak bo‘ladi. Alkogol orolga chetdan olib kelinadi, shuning uchun u Baliga qaraganda sezilarli darajada (ayniqsa import qilinadiganlari) qimmatroq.
Turar joy narxi: ikkinchi qatordagi oddiy bungalo va gestxauslar — bir kecha uchun 30-50 dollar (359-600 ming so‘m), birinchi qatordagi mehmonxonalar — bir kecha uchun 70 dollar yoki 839 ming so‘m.
Biz orolda The Beach House Resort mehmonxonasida ikki kun qoldik. Grand deluxe toifasidagi xona narxi kuniga 140 dollar yoki 1,6 million so‘mni tashkil etdi.
FAQ: Nusa Dua va orollar haqida nimalarni bilish muhim?
Plyajga qachon borgan ma’qul?
Nusa-Duada suv ko‘tarilishi va pasayishi juda kuchli. Shaffof suvda va olomonsiz normal suzish uchun ertalab soat 08:00 dan 11:00 gacha cho‘milishni rejalashtiring. Tushlikdan keyin suv qaytishi boshlanadi va suv qirg‘oqdan uzoqqa ketadi.
Maxsus poyabzal kerakmi?
Ha, albatta, o‘zingiz bilan akvashuzalarni (aquashoes) oling. Hatto tozalangan Nusa Dua plyajlarida ham o‘tkir marjonlar va dengiz tipratikanlari uchraydi.
Sohilda snorkling bilan shug’ullanishdan ma’no bormi?
Nusa Dua plyajlari yaqinida snorkling bilan shug’ullanish zerikarli: baliq kam, suv esa ko‘pincha loyqa. Agar qiziqarli narsalarni ko‘rmoqchi bo‘lsangiz, rifga qayiqda sayohat qilganingiz ma’qul.
Bali Kollekshnga borishga arziydimi?
Bali Kollekshn (Bali Collection) — bu ochiq osmon ostidagi odatiy savdo markazi. U yerda oziq-ovqat va suvenirlar bor, lekin narxlar juda yuqori. Bu joyni o‘tkazib yuborish mumkin deb hisoblaymiz.
Orollarda pul va internet masalasi qanday?
Pul: Gili orollaridagi bankomatlar beqaror ishlaydi va ko‘pincha bo‘sh bo‘ladi. Balida oldindan naqd pul yechib oling — u yerda kurs ham, qurilmalar ham manfaatliroq va ishonchli.
Aloqa: «Telkomsel» sim-kartalari ishlaydi, lekin kechqurun tarmoq yuklamasi tufayli internet juda sekin ishlaydi.
Dorilar: orollarda faqat kichik klinikalar bor. O‘zingiz bilan ko’ngil aynishiga (dengiz kasaliga) qarshi tabletkalar (masalan, Antimo), plastirlar va antiseptiklarni olib yuring.
Agar «Ubud-Nusa-Dua-Lembongan-Gili» marshrutini rejalayotgan bo’lsangiz, o‘rmonni ham, kurort formatini ham, mashinalarsiz orollarni ham ko‘rasiz. Uyog’iga hammasi oddiy: qulay va arzon variantini tanlaysiz hamda bir lahzada «bu yerda uzoqroq qolsam-chi?» degan fikr paydo bo’la boshlaydi.
Bu men 11 kun ichida ko‘rishga muvaffaq bo‘lgan Bali edi. Kadr ortida qo‘l yetmagan o‘nlab joylar, so‘qmoqlar va plyajlar qoldi. Ularni bir marshrutga sig‘dirishning iloji yo‘q — lekin har doim qaytish uchun sabab topiladi. Hali xushbo‘y, ziravorli va juda esda qolarli mahalliy taomlar haqida ham alohida so‘zlab beraman. Hozircha Bali bo‘ylab sayohatning boshlanishi — Ubudni o‘qib turishingiz mumkin.
