Nyachang bo‘yicha yo‘lko‘rsatma: o‘zbekistonlik sayohlar uchun plyajlar, viza va layfxak

Agar siz hamma bilgan va borgan sayyohlik manzillaridan zerikkan bo‘lsangiz, Osiyo tomonga, yana ham aniqrog‘i — Vyetnamga bir qiziqib ko‘ring. Nyachang (Fukuok oroli bilan adashtirilmasin) — bu hamyonbop kurort bo‘lib, unga Toshkentda to‘g‘ri uchadigan reyslar bor. Unda nafaqat uzundan uzun qumli sohillar va tarixiy ibodatxonalar, balki restoranlar, tamaddixonalar va tomoshabop bog‘lar shu qadar ko‘p-ki, kun o‘tganini sezmay qolasiz.

Biz sizga vizani rasmiylashtirish, aviachiptalar narxi, borish uchun qulay payt va bor-yo‘g‘i 78 ming so‘mga cho‘g‘da pishgan qisqichbaqaga to‘ysa bo‘ladigan joy haqida ma’lumot beramiz.

Nyachangga qachon borish kerak?

Nyachangda dam olish uchun eng yaxshi payt — fevraldan avgustning o‘rtasigacha. Bu vaqtda Vyetnamda quruq mavsum: yomg‘irlar kam, dengiz sokin va iliq, havo harorati esa 30 darajadan oshmaydi.

Sentabrda ham borish mumkin: dengiz haliyam iliqqina, lekin yomg‘irlar bo‘lib turadi, nam havo tufayli ko‘chada ham ko‘p yurolmaysiz. Noyabrda esa to‘fonlar boshlanadi, dekabr va yanvarda sovuq shamol oqimi avjiga chiqadi.

Chiptalar: Toshkentdan Nyachangga parvoz qanchaga tushadi?

Toshkentdan to‘g‘ri Kamran (Nyachang) aeroportiga parvozlarni UzAirways va Centrum Air aviakompaniyalari bajaradi. Chipta narxi bir tomonga 3,5 mln so‘mdan boshlanadi, parvoz vaqti bir tomonga 7,5 soat.

Yo‘lda uyquga to‘yib olish uchun tungi reyslarni tanlang.

Vyetnamga viza olishning uchta yo‘li

Vizasiz faqat Fukuok oroliga borish mumkin. Vyetnamning Nyachang va boshqa shaharlariga borish uchun viza kerak. Uni olishda qaysi yo‘l bilan borilayotgani ham ahamiyatga ega.

Standart viza (quruqlik va dengiz orqali borish uchun)

Agar siz mamlakatga kema yoki quruqlik transporti orqali bormoqchi bo‘lsangiz, vizani Vyetnam elchixonasida (O‘zbekistondagi yoki boshqa davlatdagi) rasmiylashtirasiz.

Hujjatlar: pasport (asli), to‘ldirilgan anketa, ikkita rangli fotosurat, mehmonxonada band qilingan joy va ish joyingizdan ma’lumotnoma. Elchixona boji: 60 dollar (721 ming so‘m). Boj miqdori siz mamlakatda qancha vaqt bo‘lishingizga bog‘liq.
Ko‘rib chiqish muddati: 1–3 ish kuni.

Samolyotda boradiganlar uchun viza (VOA)

Bunday viza Vyetnamga samolyotda parvoz qiladiganlar uchun kerak. Arizani mustaqil ravishda elchixona sayti yoki turagent orqali (taklifnoma olish uchun) berish mumkin. 

Vyetnamga yetib borgach viza qanday rasmiylashtiriladi?

Qo‘shimcha 120 ming so‘m to‘lov evaziga ariza sakkiz ish soati ichida ko‘rib chiqilishi mumkin. 

Viza tasdiqlangach, elchixonadan kelgan xatni chop etib, 2 ta fotosuratingizni (3,5x4,5 sm) tayyorlab qo‘ying. Manzilga uchib borgach, aeroportdagi kassada 25 dollar viza to‘lovini to‘laysiz (barcha VOA’lar uchun).

Tasdiqlovni kutish: o‘rtacha bir soat.

Nyachangda pul ishlatish va almashtirish

Nyachangda karta orqali to‘lovlar uncha ommalashmagan. Yirik savdo markazlari, mehmonxonalar va do‘konlarda kartadan to‘lov qilish mumkin, qolgan barcha joylarda to‘lov naqd pulda.

Pulni naqdlash va almashtirish

• Deyarli barcha mehmonxonalarda xalqaro kartalardan dong (mahalliy valyuta) yechish uchun bankomatlar bor.
• Hatto ayrim oddiy do‘konlarda ham pulingizni naqdlay olasiz — kassadagi e’lonlarga qarang (e’lonlar odatda, rus, koreys va ingliz tilida bo‘ladi).
• Dollarni aeroportda, samolyotdan tushgan zahoti yoki «Sapfir» tarmoq do‘konlarida almashtirish mumkin. Bu tarmoq do‘konlari nomi rus tilida, yirik harflar bilan yozilgan bo‘ladi, ularni topish oson.

Vyetnam kupyuralari turlicha bo‘ladi: yirik (10 000 dong va undan katta) — polimerdan. Demak, ular namlikka chidamli va yirtilmaydi, bu esa tropik iqlimli joyda juda qulay. Mayda kupyuralar (1000, 2000 va 5000 dong) — qog‘ozdan.

Nyachangda qayerda yashagan yaxshi?

Qaysi mavzeni tanlash sizning kayfiyatingizga bog‘liq: muhtasham sokinlikni xohlaysizmi yoki quvnoq shovqin-suronni, yoxud plyajdagi hordiqnimi? Issiq iqlimli Nyachang ahli tushdan o‘tib, kechga yaqin uyqudan turishadi, shu bois ayrim markaziy ko‘chalar osuda dam olishni xushlaydiganlarga yoqmasligi mumkin.

Хоn Тре (Vinpearl): oilaviy hordiq va gedonistlar uchun

Agar shovqin-surondan uzoqroq bo‘lishni istasangiz Xon Tpe oroli siz uchun, uning ikkinchi nomi — Vinpearl oroli. Bu oilaviy hordiq uchun qoyilmaqom joy. Unda Nha Trang Marriott Resort & Spa, Vinpearl Resort & Spa va  Vinpearl Resort Nha Trang kabi  muhtasham mashhur mehmonxonalar bor. Bu mehmonxonalarning barchasi vyetnamlik birinchi dollar millioneri — Fam Nyat Viongga tegishli, ulardagi xizmat hamisha eng yuqori darajada. Orolda alohida xonalar yoki kichik mehmonxonalar umuman yo‘q, ammo ulkan golf maydoni, VinWonders ko‘ngilochar tomosha bog‘i va kun botishi bilan yopiladigan xususiy yopiq plyajlar bor. Bu mehmonxonalardan birida ikki kishilik xona bir kecha uchun 1,2 mln so‘mga tushadi.

Tran Phu Beach: voqealarning bosh markazi

Agar siz o‘ynab-kulish uchun kelgan bo‘lsangizu, darhol shahar hayotiga sho‘ng‘ishni istasangiz, joylashish uchun Tran Phu Beach nomli sohil bo‘yini tanlang. Ikkinchi aprel maydoni va olti chaqirimlik ajoyib plyajga yondosh bo‘lgan bu joy shaharning yuragi sanaladi. Sohildagi birinchi qator mehmonxonalardagi xonalar narxi bir kecha uchun 500 ming so‘mdan boshlanadi. Lekin bu yerda eshigi to‘ppa-to‘g‘ri yopiq plyajga olib chiqadigan xonalar yo‘q, sohilga tushish uchun — yo‘ldan o‘tishga to‘g‘ri keladi, yana  sohilda qoldiriladigan shaxsiy buyumlarni qorovullash kerak bo‘ladi.

Hon Chong Beach: osuda shimol 

Sayyohlar oz bo‘lgan sokin joyni xohlasangiz, Nyachang shimoliga — Hon Chong Beach tumaniga yoki Shimoliy plyajga boring. U tarafda mehmonxonalar kam va bir kecha uchun 250 ming so‘m to‘lab, joylashishingiz mumkin. Bu nisbatan sokin tuman, ammo shahar markazi va ayrim e’tiborga sazovor joylardan uzoqda joylashgan.

Nyachang plyajlari: quvnoq ziyofatlar o‘chog‘idan tortib, to yovvoyilarigacha

Plyajlar — shunchaki Nyachangdagi o‘zi xoslik emas, ular hamma uchun ochiq va bepul, shunga qaramay, juda ozoda saqlanadi, vaholanki, har kuni ularda minglab odamlar hordiq chiqarishadi.

Tran Phu Beach: kunbotardagi ziyofatlar

Bu markaziy plyaj shahar markaziy ko‘chasining shundoqqina narigi betida joylashgan. U oftobda toblanib, kunbotar paytdanoq ziyofatni boshlab yuboradiganlarga juda mos. Plyajga kirish bepul, faqat yotoq kursi va soyabon uchun 100 ming dong (45 ming so‘m) to‘lash kerak bo‘ladi. Jamoat plyaji kechayu kunduz ochiq, lekin tunda yoritilmaydi.

Bai Dai Beach: oppoq qum va relax 

Agar shahar shovqini toliqtirgan bo‘lsa, Bai Dai  yovvoyi plyajiga boring — u Nyachang sharqida, shahardan bor-yo‘g‘i 30 chaqirim masofada joylashgan. Plyajda sizni sokin muhit, go‘zal tabiat va oppoq qumli sohil qarshi oladi. Kirish bepul, Nyachangdan taksida kelishga 91-114 ming so‘m atrofida xarajat qilasiz. Aytmoqchi, bu yerga ertalabdan kelganingiz yaxshi — shundoqqina suv bo‘yiga joylashish uchun.

Doc Let Beach: shimoliy plyaj

Mazkur pulli plyaj Nyachang shimolida joylashgan, unga ham taksida boriladi. Kirish kattalar uchun 50 ming dong (23 000 so‘m), bolalar uchun 25 ming dong (12 500 so‘m). Plyajda kechgacha ishlaydigan bir nechta tamaddixonalar bor, plyaj kechayu kunduz ochiq, biroq tunash uchun risoladagidek joy topgan yaxshiroq.

Bai Tru Beach: «hammasi ichida»‎

Bai Tru  plyaji Xon Tre orolida joylashgan. Orolda dam olayotganlar uchun plyajga kirish bepul. Qolgan sayyohlar orolga yetib olish uchun 1,1 mln dong (501 ming so‘m atrofida) va plyajga kirish uchun to‘lov qilishlari kerak. Plyajga kirish pulining ichiga «shvedcha dasturxon» yeguliklari va basseynlarda cho‘milish kiradi. Plyaj 18:00 gacha ishlaydi.‎

Nyachangda nimalarni tatib ko‘rish shart?

 

Nyachangda eng yoqimli narsa — bu yeguliklar, ayniqsa, dengiz mahsulotlarining narxi. Mahalliy oshxonalar va restoranlardagi narx-navo Toshkentdagidan arzon. Ikki kishilik tushlik uchun 650–700 ming dong (300 ming so‘m) to‘laysiz.

MEO Kitchen: mahalliy aholi va koreyslarning sevimli joyi 

Xon Tpe oroli sohilidagi (dor yo‘lining chapida) bu oshxona mahalliy aholi va koreyalik sayyohlar orasida juda mashhur. Taomnomada — vyetnamcha fo-bodan tashqari, Avstraliya vagyusi, qisqichbaqa va tovuq go‘shtidan kaboblar, turli sendvichlar hamda xilma-xil ichimliklar bor.

Thanh Sương Vinpearl Harbour: dengiz ne’matlaridan kechki taom

Bu Xon Tpe oroli sohilidagi dengiz ne’matlari tayyorlanadigan eng zo‘r oshxona. Bu yerda cho‘ntakni quritmay ham shohona tushlik qilish mumkin. Masalan, cho‘g‘da pishirilgan qisqichbaqalarning bir likopi 170 ming dong (78 ming so‘m) bo‘ladi. Pishloq qo‘shib pishirilgan bir lagan chig‘anoqlarni esa bor-yo‘g‘i 110 ming dongga (50 ming so‘m) olasiz. 

Madam Phuong: an’anaviy vyetnamcha dasturxon

Mazkur mo‘jazgina shinam restoran Nyachang markazida joylashgan. Madam Phuong dengiz mahsulotlaridan tayyorlangan turfa taomlarni va vyetnam oshxonasiga mansub taomlarni taklif etadi. Alohida tavsiya: turli-tuman mevalar va ulardan shu tobda siqib tayyorlangan sharbatlar.

Ramen Kaji: Byetnamdagi yapon yuragi

Uncha katta bo‘lmagan, lekin ajoyib kayfiyat bag‘ishlovchi ushbu yapon ramyonxonasi Ikkinchi aprel bog‘i yaqinida joylashgan. Bu yerda bir necha turdagi ramyonlar, rollar, an’anaviy yaponcha stritfud kabi yeguliklarni va albatta, barga terib qo‘yilgan ichimliklarni tatib ko‘rish mumkin.

Madaniy va ko‘ngilochar tomoshalar: Nyachangda plyajlardan tashqari yana nima bor?

Nyachang uzoq vaqt shunchaki baliqchilar shahri bo‘lib kelgan, shu bois unda tarixiy yodgorliklar ko‘p emas. Lekin zerikmaysiz: tarix, madaniyat va ko‘ngilochar tomosha ishqibozlari uchun ham mazmunli tadbirlar yetarli!

Muhimi: Nyachangda ko‘plab attraksionlarga bolalar uchun chipta narxi bolaning yoshi emas, bo‘yiga qarab belgilangan. Bo‘yi 100 santimetrdan past bo‘lgan bolalarga attraksionlar tekin.

Champa davriga oid Po Nagar minoralari

Nyachang shimolidagi ushbu kichik tarixiy majmua eramizning VII–XII-asrlariga oid. Minoralar Po Nagar ma’budasiga bag‘ishlab qurilgan katta ibodatxonaning bir qismidir, ma’budaning bir nechta haykallari majmua ichkarisida saqlanib qolgan. Majmuaga kirish pullik — 30 ming dong (14 ming so‘m).

Long Shon budda ibodatxonasi

U Kxanxo viloyatidagi eng asosiy buddaviy ibodatxona bo‘lib, XIX-asr oxirida qurilgan. Uning hududidagi ehromda nilufar gul yaproqlarida o‘tirgan Buddaning betondan yasalgan juda katta haykali bor. Ibodatxonaga kirish bepul, lekin dress-kodga amal qilish lozim: kiyimingiz tizzalaringiz, qo‘l va yelkangizni yopib turishi kerak.

Chamxiong minorasi

 

Nilufar gul shaklidagi bu Minora — Nyachangning bosh timsoli hisoblanadi. U shudoqqina sohil bo‘yida, Ikkinchi aprel maydonida qurilgan va uzoqdan ko‘zga tashlanadi. Bu joy suratga tushish uchun juda zo‘r, ayniqsa, kun tikka kelganda yoki quyosh botib, chiroqlar yoqilganda ajoyib manzara hosil bo‘ladi.

Kirish: bepul.
Ish vaqti: kechayu kunduz.

VinWonders

VinWonders — Xon Tre orolidagi ulkan ko‘ngilochar istirohat bog‘i. Bu yerda hamma narsa bor: zoopark, akvapark, attraksionlar, do‘konlar, qahvaxonalar, elektr chang‘i va turli mavzudagi immersiv tomoshalar.

Qanday boriladi?

• «Materik»dan keluvchi sayyohlar bog‘ga faqat dor yo‘li orqali kirishadi. Bir kunlik chipta narxi kattalar uchun 40 dollardan (480 ming so‘m) boshlanadi. 
• Xon Tre oroli mehmonlari o‘z mehmonxonalaridan bog‘ning orqa eshigigacha baggilarda (kichik elektr aravalar) kelsalar bo‘ldi. Ular uchun chipta arzonroq — 30 dollardan (360 ming so‘m) boshlanadi.

Yana bir qiziqarli manzil: shu atrofda Toshkentdagi Magic City bog‘ining egizagi — Vinpearl Harbour ham bor. Unda restoranlar, do‘konlar va suvenirlar sotiladigan yoyma rastalar juda ko‘p.

Shoh Masih kafedral cherkovi

Muqaddas Bibi Mafyam cherkovi nomi bilan mashhur mazkur neogotika uslubidagi ibodatxona – mustamlaka davridan qolgan meros hisoblanadi. Oynalari vitrajlar bilan bezatilgan, eng diqqatni tortuvchi joyi — Bibi Maryam haykali qo‘yilgan va Injil qahramonlari toshga o‘yib tasvirlangan xiyobondir.

Cherkovga kirish bepul.
Ish vaqti: begim kunlari — 05:00 dan 17:00 gacha, dam olish kunlari — 05:00 dan 07:00 gacha va 11:00 dan 16:30 gacha.

Xon Chong ko‘rfazi va Okeanografiya muzeyi

Nyachang shimolidagi Xon Chong ko‘rfazi o‘zining ulkan harsanglari va tasvirlar o‘yilgan tosh devorlari bilan mashhur. Bu yerda ba’zan open-air konsertlar qo‘yiladi, uning yonida esa Okeanografiya muzyei joylashgan bo‘lib, u har kuni 18:00 gacha ishlaydi. Kirish chiptasi 40 ming dong (18 500 so‘m). 6 yoshdan kichik bolalarga — bepul.

Xon Mun oroli: dayving va snorkling

Bu kichik orol qo‘riqxona maqomida bo‘lib, dengizdagi turli sarguzashtlar: snorkling, dayving, sap-syorfing va hatto yaxtadagi ziyofatlar ishqibozlari uchun qoyilmaqom joydir. Xon Munga borish uchun eng qulay vaqt — dengiz suvi tiniq bo‘lgan quruq mavsum (aprel–iyul). Snorkling narxi 23 dollardan (deyarli 602 ming dong) boshlanadi.

Boshqa xarajatlar: ekoyig‘im — kattalar uchun 1 dollar (12 ming so‘m) va bolalar uchun 0,5 dollar (6 ming so‘m). Cau Da portidan katerda (11 dollar) yoki kanoeda (14 dollar) borsa bo‘ladi.

Maymunlar oroli: 1200 ta jonivor qirolligi

70- yillar oxirida shimoliy Xon Lao oroliga sovet olimlari tajriba tahlillari uchun maymunlar oilasini olib kelishgan. Bugunga kelib orol bo‘ylab tarqalib ketgan maymunlar soni 1200 ga yetgan. Sayyohlar bu yerda maymunlar qatnashgan maxsus tomoshalarni ko‘rishlari, karting yoki snorkling bilan mashg‘ul bo‘lishlari mumkin.

Qanday boriladi: Long-Pxu ko‘rfazidan qayiqqa o‘tiriladi. 
Chipta narxi: Kattalar uchun 7 dollardan (84 000 so‘m) va bo‘yi 100-139 sm bo‘lgan bolalar uchun 4 dollardan (48 000 so‘m) boshlanadi. Chipta narxiga yo‘lkira, orolga kirish chiptasi va sirk tomoshasi xarajati kiritilgan.

Nyachangdan nimalar olib kelish mumkin

Nyachangda har qanday nozik did sohibiga mos sovg‘a topsa bo‘ladi. Yoqimli mevalardan tortib, kamyob duru marvaridlar va o‘sha mashhur «Yulduzcha» malhamigacha‎.

Mevalar

Mevali savatcha yig‘ishdan boshlaymiz. Ayrim mehmonxonalar ketayotgan sayyohlarga mevalar sovg‘a qilishadi, ammo eng yaxshi tanlov — Nyachang bozorlarida. Bozorda turli mevalar saralab solingan savatchalar ham sotiladi — narxi sizning tanlovingizga bog‘liq. Meva olish uchun eng zo‘r joy Som Moy bozori. Bu yerda bir dona mangoni 0,5 dollarga (6 ming so‘m), bir kg marakuyani 1,5 dollarga (18 ming so‘m), bir dona dragonfruktni turiga qarab 1,5-2 dollarga olishingiz mumkin.  

Mevali savatni qo‘l yuki sifatida olib ketsa bo‘ladi. Lekin unutmang: durianni mamlakatdan olib chiqish mumkin emas. Uni sotib olsangiz, o‘sha joyda yeysiz.

Xuddi shu mavzuda ko'proq ma'lumot

Samolyotga mevalar olib chiqish mumkinmi: qo‘l yuki va bagajga nimalarni solsa bo‘ladi?

Marvarid

Nyachangda marvaridni istalgan zargarlik do‘konida yil bo‘yi sotib olish mumkin, ularning narxi turi, rangi va qanday yetishtirilganiga bog‘liq bo‘ladi. Eng qimmati — baroq marvarid. Undan yasalgan zeb-ziynatlar bir necha ming dollar turadi. Xarid payti sotuvchidan albatta sertifikat ham talab qiling, shunda qalbakisini olib qo‘ymaysiz.

Suvenir do‘konlarida chig‘anoq va sadafdan yasalgan buyumlar: bilaguzuklar va marjonlar, shamlar va boshqa mayda-chuyda narsalar sotiladi.

Qahva

Vyetnam — qahva yetishtirish bo‘yicha Braziliyadan keyin dunyoda ikkinchi o‘rinda turadi. Mahalliy aholi o‘tkir ta’mli, lekin arzon bo‘lgan — robustani yoqtirishadi.

Agar qahva olmoqchi bo‘lsangiz, arabika navini oling yoki lyuvak navini olish uchun qahva fermasiga boring. Ushbu ekzotik va qimmat nav mussang (shu yerlarda yashaydigan mayda, yarim yirtqich jonivor) yeb-chiqargan qahva donlaridan tuyiladi.

Foydali mayda-chuydalar va kosmetika

• Baliq qaylasi — vyetnamda mashhur qayla. Uning hidi juda o‘tkir, lekin taomga o‘zgacha ta’m bag‘ishlaydi. Har bir supermarketda sotiladi.
• Choy — ayniqsa, sutli ulun choyi, shuningdek, yasminli va nilufar gulli choylar ham olib ketishga arziydi.
• «Yulduzcha» malhami — chivin chaqishidan tortib, bosh og‘rig‘igacha davo bo‘ladigan sinalgan vosita.
• Artishok sharbati — juda mashhur vosita. Vyetnamliklar uni jigarga quvvat berish va tiklash uchun ishlatishadi (bu o‘simlik safro haydash xususiyatiga ega). Sharbatni suvga qo‘shib yoki yo‘riqnomada ko‘rsatilgan boshqa usulda qabul qilinadi.
• Bambukdan yasalgan idishlar — tayoqchalar, likopchalar yoki taxtakachlar to‘plamini oling.
• Aloe qo‘shib tayyorlangan kosmetika — masalan, tinchlantiruvchi aloe geli — Nyachangga kelgan kuningizdan yoningizda bo‘lsin, ayniqsa, quyoshda ko‘p yurganingizda foyda beradi.

Vyetnamda qanday ilovalar kerak bo‘ladi?

Bu mamlakatda biz uchun odatiy bo‘lgan agregatorlar mavjud emas, shu bois kerakli ilovalarni parvozgacha yuklab oling.

Transport, navigatsiya va yetkazish xizmati

• Grab — yeguliklar va oziq-ovqatlarni yetkazish, taksi yoki motobayk chaqirish. To‘lov naqd pulda, dongda yoki Visa kartasi orqali.
• Xanh SM — taksi chaqirish uchun yana bir mashhur servis. Aeroportda kutib olish va turlarga borish uchun mashina band qilish xizmati ham bor.
• Maxim — Yandex.GO’ga o‘xshsah xalqaro taksi xizmati agregatori.
• Google Maps yoki Maps.me (shahar xaritasi yuklab olinsa, offlayn ham ishlaydi) — notanish joylarda adashib qolmaslik uchun. 

Aloqa va tarjima uchun

• AirAlo — E-SIM rasmiylashtirish uchun servis. Haftalik bazaviy paket (3 Gb) narxi 8,5 dollardan (102 ming so‘m) boshlanadi. Yuklashdan oldin telefoningiz elektron SIM-kartada ishlaydimi-yo‘qmi, tekshiring.
• Google Translate — turli yozuvlarni tarjima qilish va muloqot uchun.
• Zalo — mashhur mahalliy messenjer. Uzoq vaqtga ketayotgan bo‘lsangiz, juda kerak bo‘ladi. 

Qidirish va band qilish

• Agoda — Vyetnamda juda ommalashgan uy-joy band qilish servisi.
• Foody — ishlayotgan restoran, tamaddixona va do‘konchalarni ko‘rsatuvchi fud-servis. Unda mahalliy aholi egulik va taomlar takribi, mazasi va reseptlarini ochiq-oydin yozishadi. 
• GetYourGuide — ekskursiyalar va chiptalar qidirib topish uchun servis. Narxlar turagentlarnikidan arzon, lekin asosan ingliz tilida.
• Tripster — ko‘proq rusiyzabon sayyohlar uchun mo‘ljallangan ekskursiyalar va turlar taklif qiluvchi servis. Oldindan to‘lovni so‘mlik karta yoki valyutali Visa orqali to‘lab, qolganini — naqdda berish mumkin.

Eng ko‘p beriladigan savollarga javoblar

Nyachangga qachon borgan yaxshiroq?

Sayohatni u yerdagi mavsumni hisobga olib rejalashtiring: yomg‘rlar mavsumida borib qolsangiz ta’til mehmonxonada, havo ochilishini kutib o‘tkazasiz. Albatta yomg‘irpo‘sh va suv o‘tkazmaydigan poyabzalingiz bo‘lsin — bu yerda yoshu qari krokslarni yaxshi ko‘rishadi.  

Nyachangda qaysi transportda yurgan yaxshi?

Hammasidan taksida yurgan qulay. Mashinani istalgan joyda tutish mumkin, haydovchi yo‘lkira haqini oldindan aytadi. Shahar ichidagi joylarga borish odatda 5 dollar (60 000 so‘m) atrofida bo‘ladi.

Nyachangda ta’til o‘tkazish qanchaga tushadi?

Nyachang Vyetnamdagi eng hamyonbop shaharlardan biri. Bu yerdagi ta’tilingiz sizga 500 dollardan (6 mln so‘m) 2 500 dollargacha (30 mln so‘m) tushishi mumkin — hammasi o‘z tanlovingizga bog‘liq.

Nyachangda xavfli emasmi?

Vyetnam — xavfsiz mamlakat, bu yerda odamlar bir-biriga kamdan-kam hujum qilashadi. Lekin yo‘l ustida turgan paytingiz sumkangizga ehtiyot bo‘ling: baykda kelib, tortib ketishlari mumkin. Shu bois mahalliy odamlar ko‘proq “bananka” sumkalarni ishlatishadi yoki o‘ta hushyor yurishadi.

Mahalliy odamlar bilan savdolashsa bo‘ladimi?

Bizning bozorlardan farqli o‘laroq, Vyetnam bozorlarida savdolashishni yoqtirishmaydi. Qattiq savdolashsangiz, xafa bo‘lishlari mumkin. Ular shundoq ham sayyohlarni siylashni yoqtirishadi: xaridingizga nimanidir sovg‘a sifatida olasiz yoki yana qayta kelsangiz kattaroq chegirma berishadi (oldingi xaridingiz chekini saqlab qo‘ygan bo‘lsangiz, albatta).

Maqola uchun illyustratsiya muallifi Oleg Borodin.