2026-yilda o‘zbekistonliklar uchun vizasiz mamlakatlar: qayerlarga borish mumkin

Mamlakatlar o‘rtasidagi vizasiz rejimlar nomlanishiga qaramay, bir-biridan farq qiladi. Bir holatda kirish uchun oldindan elektron ruxsatnoma rasmiylashtirish kerak bo‘lsa, ikkinchisida — belgilangan mamlakatga yetib kelgach viza rasmiylashtirish talab etiladi, uchinchisida esa — oldindan yoki aeroportda hech narsa qilish talab etilmaydigan “haqiqiy” vizasiz rejim bo‘lib, o‘zingiz bilan pasport olishingizning o‘zi kifoya.

O‘zbekistonliklar uchun ommabop vizasiz mamlakatlar

O‘zbekistonliklar sayohat uchun ko‘p tanlaydigan mamlakatlar quyidagilar. Ayrim davlatlarni hisobga olmaganda, ularga shunchaki pasport bilan borish mumkin: masalan, Rossiyaga borishda RuID orqali, Qozog‘istonga esa kirish uchun elektron ruxsatnomani to‘ldirgan ma’qul. Quyida kirish uchun nimalar kerakligi, shuningdek, mamlakatda nimalarni ko‘rish mumkinligi haqida so‘z yuritamiz.

Turkiya

Nima kerak: faqat pasport.
Qolish muddati: : 90 kungacha, vizasiz.
Mavsum: bahor va kuz.

Albatta, har bir kishi tarixiy joylarga boy Istanbulni, betakror manzaralari bilan mashhur Kappadokiyani ko‘rishi va plyajda dam olish uchun Antaliya borishi kerak. Xarid qilishni yaxshi ko‘radiganlarga esa Istanbuldagi Grand bozorni tavsiya etamiz. Turkiya kurortlari bo‘yicha tavsiyalarni — bizning alohida to‘plamimizda o’qishingiz mumkin.

Rossiya

Nima kerak: chegarada to‘ldirilgan migratsiya kartasi va RuID ilovasi orqali kirish uchun ariza (parvozdan kamida 72 soat oldin to‘ldirilishi kerak) hamda chegarada ko‘rsatiladigan QR-kod.
Qolish muddati: kalendar yili davomida jami 90 sutka. kalendar yili davomida jami 90 sutka.
Mavsum: yoz va erta kuz.

Moskva va Sankt-Peterburg sayyohlar uchun an’anaviy yo‘nalishlar hisoblanadi. Kreml, Qizil maydon va Ermitajga tashrif buyurishni unutmang. Shuningdek, mashhur «Parvoz qiluvchi ko‘prik»‎ joylashgan Zaryadye bog‘ini ham ziyorat qiling, Arbat bo‘ylab sayr qiling va ko‘rgazma pavilyonlari hamda muzeylari bor VDNXga tashrif buyuring.

Xuddi shu mavzuda ko‘proq ma'lumot

2026-yilda o‘zbekistonliklar uchun Rossiyaga kirish qoidalari

Qozog‘iston

Nima kerak: faqat pasport va QazETA ilovasida ETAni safardan 72 soat oldin rasmiylashtirish.
Qolish muddati: : 30 kungacha, vizasiz.
Mavsum: bahor va kuz.

Agar tabiat qo‘ynida dam olishni shahar sayridan ajratmaslikni istasangiz, bahorgi Olmaotaga boring va ayni paytda Charin kanyoni hamda Katta Olmaota ko‘lini ziyorat eting. Shahar manzaralarini sevuvchilarga esa keng ko‘chalari va zamonaviy me’morchiligi bilan Ostona manzur bo‘ladi. Agar shahardan charchagan bo‘lsangiz, poytaxtdan bir necha soatlik yo‘lda joylashgan Borovoe ko‘liga borishingiz mumkin.

BAA

Nima kerak: faqat pasport.
Qolish muddati: 30 kungacha, vizasiz.
Mavsum: noyabrdan martgacha.

Mana sizga tayyor marshrut: Dubayda, albatta, dunyodagi eng baland bino — Burj Xalifaga, Palm Jumeyra sun’iy orollariga, Atlantis akvaparkiga, shuningdek, ulkan akvariumga ega mashhur Dubai Mall’ga tashrif buyuring. Abu-Dabida esa Shayx Zaydning ulug‘vor masjidini ko‘rish, Kornish sohili bo‘ylab sayr qilish, Ferrari World bog‘i va Warner Bros.World ko‘ngilochar bog‘i joylashgan Yas oroliga tashrif buyurish mumkin. 

Xuddi shu mavzuda ko‘proq ma'lumot

Dubayda nimalarni ko‘rish mumkin? Diqqatga sazovor, g‘ayrioddiy joylar va ikki kunlik marshrut

Gruziya

Nima kerak: butun sayohat muddati davomida amal qiladigan ingliz yoki gruzin tilidagi tibbiy sug‘urta. Sug‘urta qoplamasi ambulator yordam uchun kamida 5 000 USD (taxminan 60 mln UZS), stasionar davolanish va repatriatsiya uchun esa kamida 30 ming USD (taxminan 360 mln UZS)  bo‘lishi kerak. Polisni oldindan sotib olish kerak.
Qolish muddati: 365 kungacha vizasiz.
Mavsum: bahor va kuz.

Mazali oshxona, mehmondo‘st odamlar va ajoyib tog‘ manzaralari – sizga muntazir. Tbilisida eski shahar bo‘ylab sayr qiling, gruzin oshxonasidan mashhur xinkali va xachapurini tatib ko‘ring, Abanotubanidagi oltingugurtli hammomlarga tashrif buyuring. Kaxetiyada vinochilik xo‘jaliklariga tashrif buyuring, degustatsiyalarda ishtirok eting va Alazan vodiysi manzaralaridan bahramand bo‘ling. Agar qishda kelsangiz, tog‘ yonbag‘irlarida sayr qilish uchun Gudauriga borishingiz mumkin. Tbilisi bo‘ylab sayohat uchun yanada ko‘proq tavsiyalar — bizning yo‘l ko‘rsatkichimizda.

Xitoy

Nima kerak: faqat pasport lekin umumiy muddati olti oy davomida 90 kundan oshmasligi kerak. Vizasiz rejim Gonkong va Makaoda tatbiq etilmaydi.
Qolish muddati: 30 kungacha, vizasiz.
Mavsum: bahor, yoz, kuz.

Boy madaniyat va juda qiziqarli taomlarga ega yorqin yo'nalish. Sayohatchilarga “taqiqlangan shahar”ga ega Pekin, futuristik manzarali Shanxay va, masalan, tarixiy Sian yoqishi mumkin. Pandalarni sevuvchi sayohatchilar uchun bu yerga tashrif buyurish shart!

Xuddi shu mavzuda ko‘proq ma'lumot

Shanxayda 3 kunda nimalarni ko‘rish mumkin: mustaqil sayohat uchun yo‘nalish

Pekinda qayerni tomosha qilish kerak: ikki kunlik dastur va diqqatga sazovor joylar

3 kun ichida Guanchjouda nimalarni tomosha qilish mumkin? Diqqatga sazovor joylar, bozorlar va ko‘ngilochar tadbirlar

O‘zbekistonliklar uchun noodatiy vizasiz yo‘nalishlar

Bu mamlakatlarga o‘zbekistonlik sayyohlar nisbatan kamroq boradi: uzoq parvoz, noodatiy logistika va sayohat xarajatlari Istanbul yoki Dubayga sayohatga qaraganda yuqoriroq bo‘lishi mumkin. Qolaversa, jiddiy rejalashtirish talab qilinadi: Filippinda iyundan noyabrgacha tayfunlar bo‘ladi, Maldiv orollarida marshrut paromlar jadvaliga bog‘liq. Keniyada esa eTA uchun to‘lov qilinmagan bo‘lsa, reysga qo‘yishmaydi. Bu yerda vizasiz rejim ham turlicha: Filippin, Maldiv orollari va Iordaniyaga kirishda oldindan viza yoki ruxsatnoma rasmiylashtirish talab etilmasa, Keniya va Seyshel orollariga ruxsatnoma oldindan rasmiylashtiriladi va to‘lov qilinadi.

Keniya

Nima kerak: elektron ruxsatnoma (eTA), ariza uch ish kunigacha ko‘rib chiqiladi, shuning uchun uni oldindan topshirgan ma’qul.
Qolish muddati: 3 oygacha.
Eng qulay mavsum: iyul–oktyabr.

Keniya — Sharqiy Afrikada, Hind okeani sohilida joylashgan mamlakat. Bu yerga fillar, jirafalar va karkidonlarni hayvonot bog‘idagi qafaslarda emas, balki yovvoyi tabiatda ko‘rish maqsadida safari uchun kelishadi. Safari uchun milliy bog‘ni qiziqishlaringizga qarab tanlashingiz mumkin. Maasai Mara qo‘riqxonasida iyuldan oktyabrgacha migratsiya sodir bo‘ladi: gnu va zebralar podalari Tanzaniyadan shu yerga kelishadi. Amboseli milliy bog‘ida Kilimanjaro fonida fillarni uchratish mumkin. Nakuru ko‘li hududida karkidonlarni uchratish mumkin, flamingolar esa u yerda avvalgidan ancha kamayib ketgan. Nayrobi milliy bog‘i poytaxtning chekkasida joylashgan va u yerda jirafalar shahar osmono‘par binolari fonida sayr qilib yurishadi. Bog‘lar bir-biridan uzoqda joylashgan. Masalan, Maasai Maradan Amboseligacha masofa taxminan 500 kmni tashkil etadi. Ular orasida ichki reys bilan uchish mumkin: bog‘larda kichik aerodromlar mavjud va reyslar odatda Nayrobidagi Uilson aeroporti orqali amalga oshiriladi. Mashinada ham borish mumkin, lekin u holda yo‘lga deyarli bir kun sarflashingizga to‘g‘ri keladi.

Filippin

Nima kerak: qo‘shimcha hech narsa talab qilinmaydi, lekin chegarada qaytish chiptasini ko‘rsatishni so‘rashlari mumkin.
Qolish muddati: 30 kungacha.
Eng qulay mavsum: dekabr–aprel.

Filippin yetti mingdan ortiq oroldan iborat, shuning uchun marshrutni dam olish borasidagi rejalaringizga qarab tanlashingiz kerak. Palavan — bu ohaktoshli qoyalar, El-Nido lagunalari va Koron oroli yaqinidagi cho‘kib ketgan kemalar oldiga dayving qilish demakdir. Siargaoga serfing va tungi hayot uchun borishadi. Shokolad tepaliklari va mitti uzuntovonlar yashaydigan Boxol oroli esa tinch oilaviy ta’til uchun juda mos keladi. Orollararo parvozlar arzon, ammo jadval ko‘pincha ogohlantirishsiz o‘zgarib turadi. Bu yerda reyslarning kechikishi odatiy hol: ichki parvoz va xalqaro reys o‘rtasida bir necha soat emas, balki kamida bir sutkalik vaqt zaxirasini qoldirgan ma’qul.

Maldiv orollari

Nima kerak: qo‘shimcha hech narsa talab qilinmaydi, faqat pasport. Chegarada qaytish chiptasi va turar joy bronini ko‘rsatishni so‘rashlari mumkin.
Qolish muddati: 30 kungacha.
Eng qulay mavsum: noyabr–aprel.

Maldiv orollari asal oyi uchun klassik yo‘nalishlardan biridir. Agar siz allaqachon to‘yga pul sarflagan bo‘lsangiz, xafa bo‘lmang, Maldiv orollarida dam olish har doim ham katta xarajat talab qilavermaydi. Maafushi kabi mahalliy orollar pulni tejashga yordam beradi. Sayyohlarning aksariyati Kurumbu yoki Baros kabi kurort orollarga borishadi. U yerda bitta mehmonxona butun boshli orolni egallaydi. Mahalliy orollarda Maldiv aholisi yashaydi, sayyohlar esa kichik mehmon uylariga joylashadilar. Bu yerda turar joy, oziq-ovqat va transport kurortlarga qaraganda arzonroq. Orollar orasida davlat paromlari va xususiy kompaniyalarning tezyurar katerlari qatnaydi. Davlat paromlariga MTCC transport kompaniyasi xizmat ko‘rsatadi. Ko‘pchilik paromlar har kuni emas, haftada bir necha marta qatnaydi, shuning uchun marshrutni tuzishdan oldin MTCC saytidagi jadvalni ko‘rib chiqing. Xususiy kompaniyalar sayyohlarni tezyurar katerlarda tashiydi: bu tezroq va qimmatroq, ammo katerlar juma kunlari ham qatnaydi, shuning uchun agar siz shu kuni uchib kelsangiz, katerni oldindan band qilganingiz ma’qul.

Seyshel orollari

Nima kerak: Travel Authorisation rasmiylashtirish. Turar joy bandlovi, qaytish chiptasi va mablag‘ni tasdiqlash talab etiladi.
Qolish muddati: 90 kungacha.
Eng qulay mavsum: aprel, may, oktyabr va noyabr.

Seyshel orollari Hind okeanining g‘arbiy qismida joylashgan orollar davlatidir. Sayyohlar odatda uchta asosiy oroldan birini tanlashadi: Mae orolida aeroport va poytaxt joylashgan, Praslinga ulkan palma daraxtlari o‘sadigan "Valle-de-Me" tabiat qo‘riqxonasi uchun borishadi La Digue orolida esa avtomobillar juda kam – hamma velosipedda yuradi. Orollar o‘rtasida tezyurar paromlar qatnaydi, yo‘lga bir-bir yarim soat vaqt sarflaysiz. Turar joy masalasi juda oddiy: u kurort mehmonxonalari va mahalliy mehmon uylariga bo‘linadi. Agar tejashni istasangiz, ikkinchisini tanlang – ular sayohat xarajatlarini kamaytirishga yordam beradi.

Iordaniya

Nima kerak: qo‘shimcha hech narsa talab qilinmaydi
Qolish muddati: 30 kungacha.
Eng qulay mavsum: mart–may va sentyabr–noyabr.

Iordaniya — Yaqin Sharqdagi Qizil dengizga chiqish yo‘li bo‘lgan kichik mamlakat. Sayyohlar bu yerga 2000 yildan ko‘proq vaqt oldin qoyalarga o‘yilgan qadimiy shahar — Petrani tomosha qilish uchun kelishadi. Odatda bu marshrutga Vadi-Ram sahrosi va Aqaba ham qo‘shiladi. Petra, Vadi-Ram va Aqaba bir-biridan uncha uzoq emas va ular orasidagi yo‘l mashinada ikki-uch soat davom etadi. Shuning uchun marshrut bir haftaga bemalol sig‘adi. Petraga kamida to‘liq bir kun ajrating. Vadi-Ram sahrosida badaviylar qarorgohida tunashadi, Aqabada esa Qizil dengizda sho‘ng‘ishadi. O‘lik dengizda odatdagidek suzish qiyin, chunki suvning sho‘rligi juda yuqori; odam suv yuzida osonroq qalqib turadi. Kirish chiptalarini tejashda Jordan Pass yordam beradi - bu 40 dan ortiq diqqatga sazovor joylarga, jumladan Petra shahriga kirish uchun yagona chipta. U 70 Iordaniya dinoridan boshlanadi. Chiptani rasmiy saytdan sotib olish mumkin. U xarid qilingan kundan boshlab uch oy amal qiladi, ammo birinchi tashrifdan bir oy o‘tgach muddati tugaydi. Uni chop eting: telefon ekranidagi QR-kodni o‘qiy olmasliklari mumkin.

Qaysi mamlakatlarda oldindan hech narsa rasmiylashtirish shart emas

Ro‘yxatdagi mamlakatlarda hammasi juda oddiy, ammo sanalar bilan ehtiyot bo‘ling: Turkiya, Ukraina va Moldovada vizasiz rejim “istalgan 180 kunlik davr ichida 90 kun” qoidasi bo‘yicha amal qiladi, Rossiyada hisob kalendar yili bo‘yicha boradi, Xitoyda 30 kungacha, yarim yil ichida esa jami 90 kundan oshmagan holda bo‘lish mumkin.

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

O‘zbekistonliklarga qaysi davlatlarda yetib kelgach viza beriladi?

Viza kelish aeroportida rasmiylashtiriladi, lekin baribir oldindan tayyorgarlik ko‘rish kerak. Nepalda viza yig‘imi faqat naqd dollarda va faqat yangi kupyuralarda qabul qilinadi, Indoneziyada ham viza uchun to‘lovni naqd pulda amalga oshirish talab qilinishi mumkin. Agar to‘lashga pulingiz bo‘lmasa, kutib olish zalidan bankomat qidirishingizga to‘g‘ri keladi. Hisobraqamdan ko‘chirma ham so‘rashlari mumkin: Makaoda safar muddatiga qarab 5 000–20 ming MOP (taxminan 7–30 mln UZS)   miqdorida, Mavrikiyda esa har bir kun uchun kamida 100 dollar talab qilinadi.

O‘zbekistonliklar qaysi davlatlarga borish uchun vizani onlayn rasmiylashtirishlari kerak?

Bu davlatlar uchun ruxsatnoma oldindan, davlat portallari orqali rasmiylashtiriladi. Talab qilinadigan hujjatlarning standart ro‘yxati: amaldagi pasport (safar tugaganidan keyin kamida 3 oy amal qilishi kerak), turar joy va chiptalar bandi, to‘lov uchun karta va vaqt zaxirasi.

Arizalarni ko‘rib chiqish 3 kundan 7 ish kunigacha vaqt oladi, tasdiqlangan ruxsatnomasiz reysga qo‘yilmaydi.

Uchishdan oldin nimalarni bilish kerak

1. Pasportning amal qilish muddati. Keng tarqalgan talab – pasportning kirish sanasidan boshlab kamida olti oy amal qilishi. Ammo boradigan mamlakatingiz qoidalarini tekshiring, masalan, Turkiyada bu boshqacha hisoblanadi: pasport ruxsat etilgan qolish muddatidan keyin ham kamida ikki oy davomida amal qilishi kerak.

2. Kunlar qanday hisoblanadi. “90 kun” qoidasi deyarli har doim ketma-ket 90 kunni anglatmaydi. Turkiya, Ukraina, Moldova va Xitoyda “istalgan 180 kunlik davr ichida shuncha kun” qoidasi amal qiladi — tizim kirish sanasidan boshlab olti oy orqaga qaraydi. Yil ichidagi ikkinchi safardan oldin qolgan kunlar sonini qayta hisoblang.

3. Qaytish chiptasi va turar joyni bron qilish. Barbados, Qatar va Seyshel orollari chegarasida qaytish reysini tasdiqlovchi hujjat so‘ralishi mumkin. Bepul bekor qilish imkoniyati mavjud bo‘lgan bron ham ayrim hollarda yetarli bo‘lishi mumkin.

4. Pul. Ba’zi mamlakatlarda sayohat davri uchun yetarli mablag‘ni ko‘rsatishni so‘rashadi. Miqdor odatda aytilmaydi, kuniga 50–100 dollar hisobidan mo‘ljal oling.

5. Sug‘urta. Qaysi davlatlar majburiy sug‘urtani talab qilishini tekshiring, masalan, Gruziyada u majburiy va pasport nazoratida tekshiriladi.

6. Ulanma reyslar (tranzit). Boriladigan mamlakatdagi vizasiz rejim tranzit mamlakatining viza qoidalarini bekor qilmaydi. Istanbul, Dubay yoki Dohada boshqa reysga o‘tish muammo tug‘dirmaydi, ammo Yevropa Ittifoqi mamlakatlari orqali tranzitda ayrim hollarda aeroport tranzit vizasi talab qilinishi mumkin (hatto tranzit zonasidan chiqmasangiz ham).

7. Bolalar. Bola uchun alohida xorijga chiqish pasporti talab qilinadi.

8. Doimiy yangilanishlar. Viza qoidalari ogohlantirishsiz o‘zgarib turadi: masalan, 2026-yilda Tailand vizasiz rejim bo‘yicha qoidalarni o‘zgartirdi. Chiptalarni sotib olishdan oldin tegishli mamlakatning elchixonasi yoki konsulligining rasmiy veb-saytidan tekshiring yoki aviakompaniyaning rasmiy ma’lumot xizmatidan aniqlashtiring — tashuvchi bortga chiqish paytida hujjatlarni tekshiradi va hujjatlar talabga mos kelmasa, yo‘lovchini tashishni rad etishi mumkin.

SashaShura tomonidan chizilgan.