Qishda qayerlarga borish mumkin: iliq mamlakatlar, vizasiz yo‘nalishlar va qorli joylarda hordiq chiqarish
Agar omadingiz kelsa, o‘sha mamlakatlardagi eng yirik karnavallar va bayramlarni ham ko‘rishingiz mumkin.
Agar qishda boradigan eng uzoq joyingiz — dam olish kunlari toqqa chiqib-kelish bo‘lsa, bu odatni o‘zgartirish payti keldi! Biz qishda borsa bo‘ladigan mamlakatlarning uzun ro‘yxatini tuzdik va ularni uchta toifaga bo‘ldik: dengizni sog‘inganlar uchun plyaj bo‘yida hordiq, gastroturizm ishqibozlariga to‘g‘ri keladigan shaharlar va chang‘i uchishni biladiganlar uchun qorli tog‘lar. Bu ro‘yxatni tuzguncha biz nafaqat chiptalar narxini, balki turli mamlakatlarning qiziqarli jihatlarini ham o‘rgandik.
Qishda shunchaki bir aylanib kelish uchun emas, balki haqiqiy bayramning avj nuqtasiga tushib qolish uchun nima qilish kerakligi aytib beramiz. Aytib qo‘ya qolaylik: aksariyat yo‘nalishlar uchun hatto viza ham kerak bo‘lmaydi.
Qishda qayerlarda dengiz bo‘yida dam olish mumkin?
Boshidan kelishvolamiz: «iliq» degani — keng tushuncha. Qayerdadir kechayu kunduz dengizdan chiqmay cho‘milish mumkin, qayerdadir kech tushishi bilan issiq kiyim kerak bo‘ladi. Biroq, eng muhimi — o‘sha joyda aniq dengiz yoki ummon bor.
Misr
Viza: uchib borgach 25 dollar (320 ming so‘m evaziga) muhr (shtamp) bosiladi. Agar faqat Sharm al-Shayxga uchayotgan bo‘lsangiz va yaqin 15 kun ichida undan tashqariga chiqmasangiz —«Sinai Only» shtampini bepul qo‘yib berishadi.
Ob-havo: kunduzi +23-25 °C, suv harorati +22-24 °C.
Nimalar bor: dayving, ehromlar va sokin ta’til.
O‘lmas klassika. Qishda dengizda dam olish uchun eng hamyonbop manzil. Lekin shamollar mavsumi haqida unutmang: Xurgadada bu shamol odamni sohilda yotgan joyidan uchirib ketishi mumkin, shu bois tinchgina Sharm al-Shayxni tanlang — u yerdagi bo‘g‘ozlarni tog‘lar shamoldan himoya qiladi.
Mavsum voqeasi: Agar qish so‘ngida Misrga yo‘lingiz tushsa, Abu-Simbelada o‘tadigan (22-fevralda) «Quyosh festivali»ni ko‘rishingiz mumkin. Shu kuni quyosh nuri qadimiy ibodatxona ichiga tushadi va fir’avn haykali yuzini yoritadi. Ajoyib sehrli tomosha, ammo odam juda ko‘p bo‘ladi.
BAA
Viza: elektron viza oldindan rasmiylashtiriladi, 80–100 dollar (1 mln so‘mga yaqin) xarajati bor.
Ob-havo: kunduzi +24-26 °C, suv harorati: +22 °C (ko‘pchilik uchun sovuqlik qilishi mumkin).
Nimalar bor: shoping-festivallar, futuristik arxitektura, ko‘ngilochar bog‘lar va qoyilmaqom servis.
Amirliklar qishda — oppoq ko‘pikli to‘lqinlar mavj urgan dengiz emas, quyosh urishidan qo‘rqmasdan maza qilib sohilda sayr qilish imkoniyati. Hamma ham cho‘milolmaydi, ammo sahroga bemalol ekskursiyaga borish mumkin.
Mavsum voqeasi: 2025-yil 5-dekabrdan 2026-yil 11-yanvarigacha bo‘ladigan Dubay shoping-festivali (Dubai Shopping Festival). Bu aql bovar qilmas chegirmalar, sovrin sifatida o‘ynaladigan mashinalar va mushakbozliklar. Agar arzon xaridlar rejangizda bo‘lsa, xuddi shu sanalarga safar belgilang.
Tailand
Viza: 60 kungacha viza shart emas (shtamp uchib kelganda qo‘yiladi).
Ob-havo: kunduzi +30-32 °C, suv harorati +28 °C.
Nimalar bor: tom-yam, jonbaxsh uqalash seanslari, ajoyib plyajlar va juda rang-barang tungi hayot.
Tailandga endi o‘zbekistonliklar ham vizasiz bora oladilar. Pxuket va Pattayada hozir juda ajoyib mavsum. Samuida esa yanvarda ham ulkan to‘lqinlar va yomg‘ir bo‘lib turadi.
Mavsum voqeasi: 2026-yil 17-fevralda Osiyoda Xitoycha Yangi yil nishonlanadi, Tailandda ham hamma yoq bayram og‘ushida bo‘ladi: qizil fonuslar, ajdarlar, paqildoqlar. Bu vaqtda turar-joylar narxi ham osmonga chiqib ketadi, shu bois mehmonxonani oldindan band qilish kerak.
Vyetnam
Viza: vizasiz Fukuok orolida qolish mumkin (30 kungacha). Vyetnamning qolgan joylari uchun 25 dollar (325 ming so‘m) to‘lab onlayn rasmiylashtiriladigan elektron viza kerak bo‘ladi.
Ob-havo: kunduzi +28-30 °C (janubda), suv harorati +26-28 °C.
Nimalar bor: arzon dengiz ne’matlari, VinWonders tomoshalar bog‘i va nihoyatda go‘zal tabiat.
Qahva, mopedlar va fo sho‘rvasi o‘lkasi. Bu yerda sayohat uchun ikki yo‘nalish bor: orollar bo‘ylab yoki qit’a ichida. Qishda Fukuokka uchgan yaxshi — iqlimi quruq va iliq. Nyachangda dekabr-yanvar oylarida dovullar ko‘p bo‘ladi, dengiz suvi juda loyqalandi.
Bilish shart: Vyetnamcha Yangi yil (Tet) 2026-yilda 17-fevralga to‘g‘ri keladi (ta’til 14-fevraldan 22-fevralgacha davom etadi). Bu vaqtda butun mamlakat dam oladi: do‘konlar yopiq, chiptalar sotilgan, hamma narsa ikki karra qimmatlashadi. Safaringizni yo shu bayramgacha, yoki undan keyinga rejalashtiring.
Shri-Lanka
Viza: onlayn tarzda yoki yetib borgach elektron ruxsatnomani (ETA) rasmiylashtirish kerak. Narxi — 50 dollarga yaqin (650 ming so‘m).
Ob-havo: kunduzi +30 °C, suv harorati: +28 °C.
Nimalar bor: syorfing, kitlar, fillar va jungli o‘rmonlari ichida poyezdda sayr.
Shri-Lanka – cheksiz choy plantatsiyalari va plyajlar o‘lkasi. Qishda janubi-g‘arbiy sohil bo‘yini tanlang (Xikkaduva, Unavatuna, Mirissa), chunki mamlakat sharqida bu paytda yomg‘irlar va ulkan to‘lqinlar mavsumi bo‘ladi.
Mavsum voqeasi: Shri-Lanka (Hindiston bilan hamkorlikda) 2026-yil fevral-mart oyida T20 erkaklar o‘rtasida kriket bo‘yicha Jahon chempionati musobaqalarini qabul qiladi. Mahalliy aholi uchun kriket deyarli muqaddas o‘yin, hatto futboldan ham ustunroq. Ishqibozlar yog‘ilib kelishi kutilmoqda, demak, agar siz kriket muxlisi bo‘lmasangiz, bormoqchi bo‘lgan shaharlaringizda matchlar bor-yo‘qligini bilib oling.
Indoneziya (Bali)
Viza: yetib kelgach olinadigan viza (VoA) aeroportda qo‘yiladi va 35 dollar (455 ming so‘mga yaqin) to‘lovi bor.
Ob-havo: kunduzi +29-31 °C, suv harorati +29 °C.
Nimalar bor: syorfing, yoga, g‘aroyib Ubuda jungli o‘rmonlari va o‘zgacha muhit.
Ilohlar, blogerlar va smuzi-boullar oroli yomg‘irlar mavsumini qarshilamoqda. Bu orolda kechayu kunduz tinmay jala quyadi degani emas, lekin namlik yuqori va okean ifloslangan bo‘lishi mumkin (to‘lqin chiqindilarni sohilga to‘playdi), kiyimlar ham uzoq quriydi. Ammo hamma yoq yam-yashil va sayyohlar ham kam.
Mavsum voqeasi: Xitoycha Yangi yilni (17-fevral) bu yerda ham, ayniqsa, xitoy diasporasi yashaydigan tumanlarda keng nishonlashadi. Baliliklar nishonlaydigan «Sukut kuni» (Nyepi) 2026-yilda martga to‘g‘ri keladi, demak, qishda siz mehmonxonada sutkalab chiroqsiz va internetsiz qolib ketmaysiz.
Dominikan
Viza: kerak bo‘ladi (agar multishengen yoki AQSH/Kanada vizasi yo‘q bo‘lsa).
Ob-havo: kunduzi +27-29 °C, suv harorati +26 °C.
Nimalar bor: ichimliklar, sigaralar, g‘aroyib ranglarda tuslanayotgan ummon va karibchasiga tashkil etilgan «hammasi ichida» xizmati.
Agar sizga xuddi o‘sha «karibcha moviy» tusdagi suv va yanada yaxshilangan «hammasi ichida» xizmati kerak bo‘lsa — to‘ppa-to‘g‘ri shu yerga kelavering. Abadiy yoz og‘ushidagi, ichimliklar va raqslarga boy, suvga egilgan palmalari suratda zo‘r chiqadigan va hayot go‘yoki bachata raqsidek jo‘shqin o‘tadigan diyor mana shu bo‘ladi.
Ha aytmoqchi, parvozda qo‘nib o‘tish bilan (ko‘pincha Yevropa yoki AQSH orqali) uchasiz, demak, soat almashganda bo‘ladigan behuzurlikka tayyor turing.
Mavsum voqeasi: butun fevral davomida Dominikan ahli Karnaval (Carnaval Dominicano) tufayli go‘yoki aqldan ozadi (yaxshi ma’noda). Har yakshanba (2026-yilning 1, 8, 15 va 22-fevralida) La-Vegada juda katta ommaviy paradlar bo‘ladi. Uning asosiy qahramonlari — niqob kiygan «cho‘loq iblislar» bo‘lib, ular hammani ho‘kiz qornidan tortilgan pufaklar bilan yolg‘ondakam urib chiqishadi (omad keltirarmish). 27-fevral, Mustaqillik kunida esa bayram butun mamlakatga yoyiladi.
Meksika
Viza: kerak va uni olish oson emas (Tehron yoki Moskvadagi konsullik orqali olinadi). Ammo, agar sizda amaldagi AQSH, Shengen yoki Buyuk Britaniya vizasi bor bo‘lsa — mamlakatga bemalol kiraverasiz.
Ob-havo: kunduzi +25-28 °C, suv harorati +26 °C.
Nimalar bor: senotlar, Chichen-Itsa ehromlari, Tulum plyajlari va ajoyib milliy taomlar.
Qadimiy mayalar, tako va tekila o‘lkasi. To‘g‘risini aytganda: AQSH yoki Shengen vizangiz bo‘lmasa, Meksika vizasini olishga harakat qilish o‘ta erinmagan va qat’iyatli odamga xos ish. Ammo, hujjatlaringiz joyida bo‘lsa, bu diyorga sayohat hayotingizdagi eng g‘aroyib safar bo‘ladi.
Mavsum voqeasi: Meksika ham fevralda raqsga tushadi. 2026-yilning 11–17-fevral kunlari (sanalar katoliklarning Hayit bayramiga ko‘ra tanlanadi) o‘sha mashhur karnavallar bo‘lib o‘tadi. Eng shovqin-suronli va katta karnaval — port shahar Verakrusda, eng chiroyli va sayyohlar ko‘p keladigani — Karib dengizidagi Kosumel orolida bo‘ladi. Bu ulkan shakllar, ehtirosga to‘la salsa raqsi va «yomon kayfiyat» (Mal Humor) qo‘lbola qo‘g‘irchoqlarini yoqishdan iborat hashamatli parad bo‘ladi.
Seyshel orollari
Viza: parvoz oldidan raqamli ruxsatnoma (Travel Authorization) rasmiylashtirish kerak bo‘ladi. Narxi –10 yevro atrofida.
Ob-havo: kunduzi +30 °C, suv harorati: +29 °C.
Nimalar bor: quruqlikda yashovchi va nihoyatda uzoq umr ko‘ruvchi ulkan toshbaqalar va siz suratlarini Windows sahifalarida ko‘p ko‘rgan katta-katta granit toshlar yastanib yotgan plyajlar.
Bu Hind okeanining «lyuks» joyi. Ammo to‘g‘risini aytamiz: Seyshel orollarida hamma narsa —taksidan tortib restorandagi tushlikkacha — juda qimmat. Qishda bu yerda namgarchilik mavsumi, qisqa, ammo juda kuchli jala yog‘adi — lekin shunga yarasha g‘oyatda go‘zal, yashil manzaralar og‘ushida bo‘lasiz.
Mavsum voqeasi: 2026-yil 1-fevralda poytaxt shahar Viktoriyada (Mae oroli) hindiylarning Taypusam Kavadi (Taippoosam Kavadi) festivali bo‘ladi. Ko‘chalarni to‘ldirgan yorqin kiyimlardagi odamlar, ulkan aravalar va trans holatida ilohlarga sadoqat ramzi o‘laroq o‘z terilarini teshib katta to‘g‘nog‘ichlarni taqib borayotgan xudojo‘ylarni (kavadi) tomosha qilasiz va bu tomoshani hech qachon unutmaysiz. Bu ham siz uchun o‘ziga xos tajribadir.
Qishda qayerlarga vizasiz borish mumkin (shahardagi hordiq)?
Agar plyajga borish — siz uchun asosiysi bo‘lmasa va viza bilan ovora bo‘lishni xohlamasangiz, yoqimli sayrlar, taomlar va havo almashtirish uchun ajoyib yo‘nalishlar bor.
Turkiya
Viza: kerakmas (90 kungacha).
Ob-havo: Istambulda +8-12 °C, ora-chora yomg‘ir yog‘ib turadi, Antaliya esa iliqroq, +15-17 °C.
Nimalar bor: Sulton Ahmad masjidi atrofidagi bo‘shab qolgan tor ko‘chalarni yolg‘iz sayr qilish, qaynoqqina salep ichib rohatlanish, qishki chegirmalardan foydalanib shopping qilish va dengiz havosidan to‘yib-to‘yib nafas olish.
Albatta, qishda bu yerda cho‘milolmaysiz, lekin o‘zgacha rohat-farog‘at muhitiga sho‘ng‘iysiz. Muhtasham mehmonxonalarda narxlar (ayniqsa, Antalyyada) 2–3 karra arzonlashadi, demak, hovuzi isitiladigan «beshtalik»da chidasa bo‘ladigan narx evaziga dam olish mumkin.
Mavsum voqeasi: dekabrda (an’anaga ko‘ra, 2025-yilning 7–17-dekabr kunlari) Konyyada so‘fiyona shoir Rumiyga bag‘ishlangan Sheb-i-Arus (Şeb-i Arus) — «Birlashuv tuni» festivali bo‘lib o‘tadi. Unda bir joyda gir aylanib, transga tushuvchi darveshlarni tomosha qilish mumkin. Bu tomosha juda maftunkor va sehrli, uni ko‘rish uchun mamlakat ichkarisiga borib-kelishga arziydi.
Gruziya
Viza: 360 kungacha kerak emas.
Ob-havo: Tbilisida +5-10 °C, hali quyoshli va quruq bo‘lishi mumkin.
Nimalar bor: xinkali, sharob, simobli hammomlar va eski shahar bo‘ylab uzoq va maroqli sayrlar.
Taomlari mazali, ruhiyati bizga yaqin va tushunarli diyor. Dam olish kunlarida havo almashtirib kelish yoki bir oy qolib, hordiq chiqarish uchun qoyilmaqom manzil. Ham shaharni aylanish, ham tog‘larga chiqib kelish mumkin. Yoki Batumiga borib, qishki dengizni ko‘rib kelsa bo‘ladi.
Mavsum voqeasi: Tbilisidagi rojdestvo yarmarkasi (ayniqsa, Orbeliani maydonidagi) dekabr oxirida ochiladi va yanvar o‘rtasigacha ishlaydi. Gruziya Rojdestvo bayramini 7-yanvarda nishonlaydi va shu kuni Rustaveli ko‘chasi juda chiroyli, kostyumlashtirilgan «Alilo» paradiga chiqqan minglab odamlarga to‘lib-toshadi.
Malayziya
Viza: 30 kungacha kerak emas.
Ob-havo: issiq (+30 °C), lekin nam — tropik iqlim o‘zi ishini qiladi, albatta.
Nimalar bor: Kuala-Lumpurdagi Petronas minoralarini ko‘rish, ko‘cha taomlarini tatib ko‘rish (bu yerda Osiyodagi eng yaxshi ko‘cha taomlari tayyorlanadi) va, agar shahardan charchasangiz, Langkavi oroliga survorish mumkin.
Kuala Lumpur — haqiqiy beton «junglilari» bor Osiyoning yirik megapolisi. Unda futuristik osmono‘par binolar qadimiy ibodatxonalar bilan yonma-yon joylashgan, ko‘cha taomlarini esa alohida ilhom manbai deyish mumkin.
Mavsum voqeasi: 2026-yil 1-fevralda bu diyorda hindiy bayram Taypusam (xuddi Seyshel orollaridagi kabi) nishonlanadi. Asosiy marosim Kuala-Lumpur yaqinidagi Batu (Batu Caves) g‘orlarida bo‘lib o‘tadi. Yorqin kiyimlardagi minglab ziyoratchilar va teriga to‘g‘nog‘ich taqish marosimlari — bu asabi chatoqlarga to‘g‘ri kelmaydigan o‘ta kuchli madaniy taassurot bo‘ladi.
Ozarbayjon
Viza: 90 kungacha kerak emas, agar 15 kundan ortiq muddatga qolmoqchi bo‘lsangiz, joylashgan yeringizda ro‘yxatdan o‘tishingiz kerak.
Ob-havo: +6-10 °C, qishda kuchli shamollar bo‘ladi.
Nimalar bor: Haydar Aliyev markazini tomosha qilish, sohilda sayr, kaboblar va shohona palovlarga to‘yish uchun gastrotur uyushtirish.
Bizga ruhan yaqin, tushunarli va juda go‘zal qardosh o‘lka.Unda «Yonar minoralar»deb nomlangan futuristik osmono‘par binolar «Brilliant qo‘l»filmi suratga olingan o‘sha mashhur jinko‘chalar bilan uyg‘unlashib ketgan. Baku to‘g‘risidagi bizning yo‘lko‘rsatmani albatta o‘qing.
Mavsum voqeasi: dekabr boshidan 2026-yil yanvar oyi o‘rtasigacha Favvoralar maydonida mashhur «Sovuq qo‘llar, qaynoq yurak» (Soyuq Əllər, İsti Ürək) xayriya yarmarkasi bo‘lib o‘tadi. Butun markaz yorqin chiroqlar yoqilgan yog‘och uylarga to‘ladi: ularda suvenirlar sotiladi, glintveynlar tortiladi va ko‘pincha qorsiz bo‘lsa-da, o‘sha qadrdon Yangi yil shukuhi uyg‘onadi.
Qozog‘iston
Viza: 30 kungacha kerak emas.
Ob-havo: Olmaotada -5…+5 °C.
Nimalar bor: shaharning qoq markazidan go‘zal tog‘ manzarasini ko‘rish va maroqli gastroturizm.
Dam olish kunlarida bemalol borib-kelish mumkin bo‘lgan qo‘shni o‘lka. Olmaota qishda — bu ajoyib nonushtalar, tog‘larda sayr va oxirgi urfda kiyingan odamlar.
Mavsum voqeasi: Tog‘ tepasidagi «Medeu» kompleksi— eng asosiy qishki ko‘ngilochar manzil. 2025–2026-yilgi mavsum ham gavjum o‘tadi. Dengiz sathidan 191 metr balandlikda yaxlagan tepalikdan chang‘ida uchib tushish — har bir inson hayotida bir marta bo‘lsa ham his qilishi kerak bo‘lgan hissiyot.
Qishdagi qorli hordiq: chang‘i va snoubord ishqibozlari qayerga borishlari mumkin?
Qish — qorli, hordiq esa — faol bo‘lishi shart, deb hisoblovchilar uchun.
Gruziya (Gudauri)
Viza: 360 kungacha kerak emas.
Mavsum: odatda dekabr oxirida ochiladi (taxminan 20–25-sanada).
Bu yerni keng trassalar, frirayd uchun bepoyon maydonlar va dong‘i ketgan gruzincha mehmondo‘stlikni qadrlovchilar yaxshi ko‘rishadi. Chang‘i uchib charchagach, 20 yevrolik burgerni emas, qaynoq xachapurini yeb, sharob ichishga nima yetsin! Bu yerdagi ski-passlar narxi yanada yoqimli (ayniqsa Alp o‘lkasiga solishtirganda). Bir kun uchun: 75 lari (365 ming so‘m), 3 kunga esa – 220 lari (1,1 mln so‘mga yaqin).
Qozog‘iston («Shimbuloq»)
Viza: kerakmas. Xorijga chiqish pasporti yoki ID-karta bilan borish mumkin (agar samolyotda uchsangiz).
Mavsum: noyabr oxiridan aprel oxirigacha. Qor ko‘p yog‘adigan vaqt — fevral va mart oylari.
Bu joy toshkentliklar uchun har jihatdan eng «lyuks» manzil. Olmaota markazidan kanat yo‘lgacha 20 daqiqalik yo‘l. Shimbuloq — juda yaxshi infrastruktura, tunda uchish (trassani projektorlar yoritib turadi, tungi shahar manzarasi hayratga soladi) 3 200 metr tepaga, quloqlar bitib, havo chinnidek jaranglaydigan balandlikkacha chiqish imkoniyati.
«Shimbuloq»‘ni bejizga «Qozog‘iston Kursheveli» deyishmaydi — tog‘ tepasidagi tamaddixona narxi yurakni yengil o‘ynatishi mumkin. Bitta burger va choy Toshkentdagi to‘laqonli kechki ovqatdan qimmatga tushadi, o‘zingizni shunga ruhan tayyorlang. Kunduzgi ski-pass narxi begim kunlari — deyarli 12 ming tenge (280 ming so‘m). Tungi hordiq arzonroq va ko‘ngilliroq bo‘ladi, narxi — 6 500 tenge (150 ming so‘m).
Qirg‘iziston (Qoraqo‘l)
Viza: kerak emas.
Mavsum: noyabr oxiridan aprelning boshigacha.
Qorako‘l — frirayderlar uchun misli jannat. Agar trassada uchish sizni qiziqtirmasa va o‘rmonni aylanishni xohlasangiz (yo‘lboshchi bilan, albatta!), bemalol kelavering. Yana bu yerda Issiq-ko‘l shunchalik chiroyli ko‘rinadiki, pastga tushayotgan to‘xtab o‘tishni xohlab qolasiz.
Bishkekdan mashinada 5–6 soatlik yo‘l (deyarli 400 km). Yo‘ldagi manzara go‘zal, lekin charchatadi. Qorako‘l o‘zimizning bazalarga nisbatan qimmat, ammo Yevropadagidan arzon. Kunduzgi abonement 1 400 – 1 600 som atrofida (bu taxminan 215– 245 ming so‘m).
Yevropa (Shveysariya, Avstriya, Fransiya)
Viza: Shengen. Uni olish qiyin, lekin eplasa bo‘ladi.
Mavsum: dekabrdan aprelgacha.
Avstriya va Shveysariyaning abadiy muzliklarida yil-o‘n ikki oy uchish mumkin, lekin asosiy mavsum — baribir qish.
Bu «oliy liga». Bu yerga shunchaki chang‘i uchish uchun emas, balki dunyodagi eng qoyilmaqom chang‘i uchish komplekslari qanday bo‘lishini ko‘rish uchun ham kelishadi: yuzlab chaqirim trassalar bir tarmoqqa biriktirilgan, tepalikka olib chiquvchi ko‘tarmalar esa xuddi kosmik kemalarga o‘xshaydi.
Bularning farqi va tanlovdan adashmaslik
1. Fransiya (Kurshevel, Uch vodiy, Shamoni). Boyvachcha oligarxlar va ming yevro turadigan shampan vinosi haqidagi gaplarni unuting (shunaqasi ham yo‘q emas, albatta). Fransiya — birinchi navbatda, ulkan chang‘i uchish zonalari. Undagi o‘ziga chaqiruvchi jihat — ski-in/ski-out tartibi. Bu yerda ko‘plab mehmonxonalar shunday qurilgan-ki, siz shundoqqina ostonada chang‘ini kiyasiz va yana xuddi shu yerga qaytasiz.
2. Avstriya (Ishgl, Mayrxofen, Zelden). Bu yerda ko‘ngilliroq. Avstriya — bu uchish-uchish va xursandchilik o‘rtasidagi ajoyib mutanosiblik. Trassalar sip-silliq (avstriyacha «yo‘l-yo‘l» — bu etalon). Avstriyadagi o‘ziga xoslik – apre-ski (après-ski). Bu chang‘i uchishdan keyin hordiq chiqarish madaniyati: odamlar chang‘ibop poyabzallarini yechmasdan ham barlarga shoshiladilar, stol ustida raqsga tushib, nemischa shlyagerlarni birgalikda kuylashadi. Xursandchilik, shovqin va «ko‘pikli» hordiq.
3. Shveysariya (Sermatt, Sankt-Moris). Eng qimmat va sokin manzil. Bu yerda hamma narsa soatdek aniq ishlaydi (chinakamiga). Ayrim kurortlargacha (masalan, Sermattgacha) mashinada borib bo‘lmaydi, faqat poyezd yuradi. Bu alohida sokin va ekologik sof muhitni yaratadi.
Alp tog‘laridagi narx-navoni Chimyon yoki Gudauri narxlari bilan solishtirib bo‘lmaydi. O‘rta hisobda bir kunlik hordiq 70–90 yevro/frankka tushadi. Bizning pulga bu 950 ming so‘mdan 1,4 mln so‘mgacha deganidir.
Sayohatchilarga tavsiyalar
Qishki ta’til — «qaynoq» mavsum, unga oldindan tayyorgarlik lozim.
- Chiptalarni oldindan sotib oling. «Parvoz sanasi qancha yaqin bo‘lsa, chipta shuncha qimmat bo‘ladi, degan qoida qishda 100% ishlaydi.
- Ommalashmagan yo‘nalishlarni tanlang. Abu-Dabi, Istambul yoki Quvayt orqali kesishuvlarga e’tibor qarating — ba’zan shu tariqa xarajatlarni 30% qisqartirish mumkin.
- Sug‘urta — bu juda muhim. Ayniqsa, agar chang‘i uchish yoki Osiyoning ekzotik taomlaridan bahramand bo‘lish uchun ketayotgan bo‘lsangiz. Xorijda tibbiy xizmatlar ancha qimmat.
- Pasportingizning amal qilish muddatini tekshiring. Ko‘plab mamlakatlar (Tailand, Vyetnam, BAA) uchun sayyohning pasporti safar sanasidan boshlab yana olti oy amalda bo‘lishi shart.
- Kesh yoki karta? Ko‘plab mamlakatlarda o‘zbek banklarining Visa/Mastercard kartalari ishlaydi. Ammo, doimo cho‘ntagingizda naqd dollar ham bo‘lsin (iloji boricha, yangi rusumdagi «ko‘k» ranglisi, hech qanday belgi va muhrlarsiz) — Osiyodagi pul ayirboshlash shoxobchalari eski banknotalarni ko‘pincha qabul qilmaydi.
Qish — uyda qamalib o‘tirish degani emas. Aksincha, jomadonni hozirlab, o‘zingiz uchun yozni uzaytirish yoki dunyodagi eng go‘zal qorli tog‘ni kashf qilish uchun yaxshi imkoniyat. Ko‘nglingizga yog‘gan yo‘nalishni tanlang va yangi taassurotlar sari yo‘lga tushing!
