Xurram saroyidan «Chuqur»-dagi choyxonagacha: turk seriallari suratga olingan joylarga sayohat
Barcha manzillar, narxlar va yo‘nalishlar bitta matnda.
Turk seriallari millionlab odamlarni ekranga mixlashdan tashqari, suratga olish joylarini sayyohlarning sevimli manziliga aylantirdi. Tasavvur qiling: «Chuqur»-dagi eski choyxonada Idris Ko‘chovali bilan choyxo‘rlik qilyapsiz, yoki Nihon va Kamol o‘z ismlarini o‘yib yozgan tamaddixonada tushlik yeyapsiz yohud Sayron va Feritni zavqlantirgan sohil bo‘ylab sayr qilmoqdasiz.
Agar rejangiz pishgan bo‘lsa, jomadonni taxlang, Aviasales.uz’dan chipta topingu, har bir burchagi sevimli seriallaringizni eslatuvchi Istambulga ravona bo‘ling. Keling, siz bilan Topkapi saroyining haram qismiga kiramiz va Xurram yurgan yo‘laklardan yuramiz.
Muhteşem Yüzyıl («Muhtasham yuz yil»)
Ushbu tarixiy serial nafaqat Turkiyada, balki butun dunyoda katta shov-shuv uyg‘otdi. Aytish mumkinki, bu serial Turkiyaning eksport mahsulotiga aylandi — uni dunyoning 70 dan ortiq mamlakati sotib oldi va 500 milliondan ortiq odam tomosha qildi. Serialda asosan XVI-asrdagi usmonlilar saroyi hayoti ko‘rsatilgani bois, suratga olish ishlari maxsus qurilgan pavilyonlarda kechgan. Sulton Sulaymon va Xurram yashagan haqiqiy saroy — To‘pkapa esa qadimiy Istambulning markazida joylashgan. To‘pkapa saroyi 1470-yillardan boshlab qariyb 400-yil davomida Usmoniy podshohlarning bosh qarorgohi bo‘lib kelgan.
Hozirda bu saroy — Turkiyaning eng yirik muzeylaridan biri. Har kuni uni ko‘rgani minglab sayyohlar kelishadi. Siz sulton Sulaymon va Xurram yashagan saroy majmuasini, jumladan taxtiravon turgan podshohlar zalini, xufya kengashlar xonasini, shohona bezatilgan Haram qismini tomosha qilishingiz mumkin. Xorijlik sayyohlar uchun To‘pkapaga kirish chiptasi 1 700 lira (660 ming so‘mga yaqin) turadi.
To‘pkapa joylashgan Sulton Ahmad maydoni esa — tirik tarixning o‘zginasi. Bu yerda Ayo Sofiya masjidi (asosiy qismiga kirish bepul, yuqori qavatga ko‘tarilish — 388 ming so‘m), Kulliya masjidi (kirish bepul), Bazilika sisternasi (Yerosti suv ombori) (kirish kunduzi — 660 ming so‘m, tunda — 1 mln so‘m) joylashgan. Shu bois serial muhitini chinakamiga his etish uchun bir kun vaqt ajratib, butun mavzeni aylanib chiqish kerak.
Saroy ayollari yashagan Haramga alohida yo‘l orqali kiriladi. U yerda Xurram va boshqa sultonlarning onalari yashagan xonalar — xobgohlar bor. Kirish chiptasi 445 ming so‘mga yaqin. Har bir xobgohda qimmatbaho ekspozitsiyalar: tilla qoplamali taxtlar, Qur’onning qadimiy qo‘lyozmalari, kashtali liboslar va zeb-ziynatlar hamda qurollar yasatib qo‘yilgan. Bu ashyolarning ko‘pchiligidan serialni tasvirga olishda foydalanilgan.
To‘pkapa saroyini topish qiyin emas. Uni alohida tur olmasdan ham tomosha qilish mumkin, lekin saroyning ichida, xohlasangiz, professional gid (quloqchin orqali ishlaydigan audiogid yoki guruh bilan ishlovchi gid) xizmatidan foydalanishingiz mumkin.
Yalı Çapkını («Qo‘rg‘on sirlari»)
Bosfor ko'rfazi
Yalı Çapkını — 2023-yilning eng mashhur melodramalaridan biri (o‘zbek tomoshabiniga «Qo‘rg‘on sirlari» nomi bilan tanish). Bosh rollarni Afra Sarachoglu (Seyran) va Mert Ramazon Demir (Ferit) ijro etishgan. «Yalı Çapkını» seriali nomi turkchada «Suv bo‘yidagi hovli sohibi» yoki «Suv bo‘yidagi hovlida yashovchi bevafo» deganidir.
Ferit taniqli Ko‘rxon oilasi vakili bo‘lib, Istambuldagi ajdodlardan meros qolgan, suv bo‘yida joylashgan muhtasham katta ko‘shkda yashaydi. Ushbu ajoyib yog‘och uy Sohib Sabanji deb ataladi. U Beylarbeyi tumanida, Bosfor ko‘rfazining Osiyo sohilida joylashgan. 1880-yillarda yog‘ochdan bunyod etilgan Sabanji oilasiga tegishli bu oq rangli uy mamlakatdagi eng qimmat ko‘chmas mulklardan biri hisoblanadi.
Sohib Sabanji ko‘shkiga milliy madaniy yodgorlik maqomi berilgan va shu bois uni faqat tashqaridan tomosha qilish mumkin. Ichkarida muzey ochilmagan, zero undan xususiy qarorgoh sifatida foydalaniladi. Tasvirga olish guruhi bu uyni ijaraga olgan edi. Hozirgi kunda bu uyni tashqaridan bo‘lsa ham tomosha qilish va uning yonida suratga tushish uchun ko‘plab sayyohlar kelishadi.
Serialdagi ayrim voqelar Gaziantep shahrida bo‘lib o‘tadi. Seyran — an’analarga sodiq oilaning qizi, Feritning bobosi kelinni aynan Antepdan olishni istaydi. Serialda Seyranning Gaziantepdagi uyi ko‘rsatilgan kadrlar Millet Xan nomli tarixiy karvonsaroyda olingan. Hozir u yerda restoran ishlamoqda. Bugungi kunda restoranga serialning ko‘plab muxlislari kelishadi va u yerdan xursand holda ketishadi.
Beylarbeyi mavzesiga borish uchun shaharning Yevropa qismidan Uzkyudar yoki Chengelkyoy’ga boradigan paromga o‘tirib, u yog‘iga taksi olish kerak bo‘ladi. Istambuldan Gaziantepgacha samolyotda uchish yoki shaharlararo qatnovchi avtobusda ketish kerak. Ikki shahar orasidagi masofa — ming chaqirimga yaqin. Shu tariqa, «Yalı Çapkını» serialidagi boy oilaning hashamatli hovlisi va Gaziantepdagi oddiy uyga sayohat qilib, ikki xil dunyo qiyofasini ko‘rish mumkin.
Sen Çal Kapımı («Qalbim eshigini chert»)
Ayfer xonimning gul do‘koni
Sen Çal Kapımı — romantik komediya janridagi bu turk seriali 2020–2021-yillarda chiqqan. Bosh rollarni Xande Erchel (Eda) va Kerem Byursin (Serkan) o‘ynashgan va ular hayotda ham juftlikka aylanishgani tufayli serial yanada mashhur bo‘lib ketgan. Serial namoyishi tugashi bilanoq butun dunyodan uning muxlislari Istambulga oqib kela boshladi.
Serkan Bolat omadli ishbilarmon bo‘lib, serialda uning ota-onasi yashagan uy shahar tashqarisida ekanligi ko‘rsatilgan. Aslida, Serkan yashagan villa Istanbulning Yevropa qismidagi ishbilarmonlar yashaydigan tumanida joylashgan. Serkanning uyi — shaxsiy mulk bo‘lgani bois uning ichiga kira olmasangiz kerak, lekin u joylashgan ko‘chaga borib, faqat tashqaridan uyni ko‘rsangiz bo‘ladi — uyning baland devorlari va qo‘riqchilari bor. Serialda Serkan ota-onasining uyi sifatida ko‘rsatilgan uy mutlaqo boshqa joyda — shahar chekkasidagi yashil tuman Zekeriyakyoy’da joylashgan. U yerga taksida yoki ijaraga olingan mashinada borish mumkin.
Serkan boshqaruvida bo‘lgan Art Life me’moriy kompaniyasi ofisi — serialdagi yana bir muhim manzil. Ofisdagi sahnalar Istambulning shimoliy qismidagi Maslak ishbilarmonlar tumanida joylashgan osmono‘par binoda olingan. Qizig‘i shundaki, serial namoyishi boshlangach, bu bino yonida Serkan Bolatni ko‘rish ishtiyoqida bo‘lgan muxlislar to‘plana boshlagan. Ichkariga kirishga ruxsat etilmasa-da, esdalik uchun Art Life peshtoq yozuvi fonida suratga tushsa bo‘ladi.
Serial bosh qahramoni Eda Yildiz shahar chekkasida yashagan. Uni katta qilgan Ayfer xonimning kichik gul do‘koni bo‘lgan. Bu do‘kon serialdagi eng yoqimli joylardan biridir. Va ushbu gul do‘koni haqiqatdan ham mavjud! Kuzgyunjuk tarixiy mavzesi qadimiy yog‘och uylar va sokin muhiti bilan mashhur. Bu mavzeda ko‘plab turk seriallari suratga olingan.
Kara Sevda («Sevgi iztirobi»)
Galata minorasi hududi
Nihan oilasining uzoqdan ko'rinadigan villasi
Yaqinroqdan o'q uzish
Otantik Café
Bosfor
Kara Sevda (turkchadagi ma’nosi «Cheksiz muhabbat» yoki «Qora sevgi») seriali tanishtiruvga muhtoj emas. 2015–2017 yillarda namoyish etilgan bu serialda bosh rollarni Burak Ozchivit (Kamol) va Neslixon Otagul (Nihon) talqin etishgan.
Serial voqealari Istambulning turli joylarida kechadi. Nihon oilasiga tegishli villa Bosfor sohilidagi Yenikyoy tumanida. Muxlislar bu hashamatli uy yonida sohil bo‘yida sayr qilishlari mumkin. Kamolning oilasi yashagan oddiy uy esa Istambulning tarixiy mahallalaridan biri Kuzgyunjuk’da жойлашган. Kamolning otasiga tegishli kichik sartaroshxona ham serial namoyishidan so‘ng mavzedagi eng mashhur joyga aylandi.
Serialda Vefa mavzesi ko‘chalari ham ko‘rinadi — ularda Kamol va Nihon ishtirokidagi ayrim sahnalar suratga olingan. Vefa — mashhur bo‘za (tariq yoki bulgurni achitib tayyorlanadigan quyuq ichimlik) sotiladigan qadimiy mavze; syujet bo‘yicha sevishganlar uchrashgan eski qahvaxonalar hali-hamon ishlamoqda (siz ham bu yerga tashrif buyurib, bo‘za ichib ko‘rishingiz mumkin).
Nihon va Kamolning Galata qal’asi yonidagi mo‘jaz qahvaxona stoliga ismlarining bosh harflarini o‘yib yozadigan ta’sirchan sahna Otantik Café restoranida olingan. Bugungi kunda sevishgan yoshlar xuddi o‘sha stolga o‘z ismlarini muhrlash uchun bu yerga kelishadi. Ayrim sayyohlarning ta’kidlashicha, qahvaxona ma’muriyati bu yerda faqat suratga tushib, ketib qoluvchilarni unchalik xushlamaydi. Bu restoranda narxlar anchayin qimmatligini ham unutmaslik kerak.
Kamol Nihonga Solihning qayig‘ida izhori dil aytadigan yana bir ajoyib sahna, aytishlaricha, Istambulning Tarabya yoki Beykoz sohilbo‘yi mavzesida olingan ekan. Serial muhitini to‘lig‘icha his etishni istasangiz, o‘sha tomonlarga boring.
Kara Sevda serialida ko‘rinadigan mashhur joylarning ko‘piga avtobusda borsa bo‘ladi. Galata qal’asigacha tramvay va metro yuradi. Agar maxsus tur olishni istasangiz, «Kara Sevda bo‘yicha tur» taklif qiluvchi gidlar ham bor. 6 soatlik maxsus ekskursiya dasturi doirasida sizni mashinada Galatadagi qahvaxonadan to Leylaning Bebekdagi uyigacha, Zimrinderlarning Yenikyoydagi villasidan Vefadagi sartaroshxonagacha olib borishadi. Bundan tashqari, 3,4 mln so‘mlik (deyarli 8 800 lira) turlar ham borki, ularda biryo‘la bir nechta seriallar bo‘yicha esda qolgan manzillarni aylanib chiqasiz.
«Çukur» («Chuqur»)
Balat tumani
«Çukur» («O‘ra») — kriminal drama. Bu serial nafaqat Turkiyada, balki Yaqin Sharq va Bolqon orollari mamlakatlarida ham juda iliq qarshi olingan. Syujet bo‘yicha serial voqealari Istambulda aslida mavjud bo‘lmagan Chuqur mavzesida bo‘lib o‘tadi, suratga olish ishlari uchun esa tarixiy Balat (Fatix tumani) mavzesi tanlangan. Balat — jin ko‘chalar, rang-barang eski uylar saqlanib qolgan, o‘zgacha muhitga ega bo‘lgan tarixiy mavze. Serial mashhur bo‘lgach, mahalliy aholi bu joyni «Chuqur yuragi» deb ham atay boshlagan.
Balatada xuddi serialdagi Idris Ko‘choval choyxonasi kabi mashhur bo‘lib ketgan kichik qahvaxona bor. Uning asli nomi Dostlar Kahvesi (Do‘stlar choyxonasi), serial chiqqach, bu yer serial muxlislariga to‘lib ketgan. Idris-bobo mana shu choyxonada mehmonlarni kutib olgan sahna yodingizda bo‘lsa kerak. Endi esa sayyohlar ham shu yerga kelib choyxo‘rlik qilib, serial mavzusidagi suvenirlarni sotib olishlari mumkin. Qahvaxonaga kirish 150 lira (deyarli 58 ming so‘m) turadi. Yana Balata ko‘chalarida serial qahramonlari izidan sayr qilish mumkin — masalan, Muhiddinning sartaroshxonasi joylashgan ko‘cha ham shu yaqin orada.
Balatgacha jamoat transporti yuradi. Istambul markazidan shu tarafga avtobuslar, metro va parom qatnaydi. Agar bir o‘zingiz borishni xohlamasangiz, maxsus turlar ham bor. Masalan, ayrim mahalliy gidlar yarim kunlik «Chuqur tur» ekskursiyasi doirasida serial suratga olingan ko‘chalarga olib borishadi. Vaqti va qulayligiga qarab turlarning narxi 1150–3 000 lira (445 000–1 160 000 so‘m) atrofida bo‘ladi.
Kiralık Aşk («Omonat sevgi»)
Nişantashi tumani
Kiralık Aşk — melodrama, 2015–2017 yillarda ekanga chiqqan. Unda sodda va chaqqon qiz Dafna va badavlat, sovuqqon yigit Omer o‘rtasida kutilmagan kelishuvdan boshlangan sevgi qissasi hikoya qilinadi. Dayashi (ofitsiantka) Dafna Istambulning chekka mavzesida o‘z oilasi bilan istiqomat qiladi. Uning uyi — syujetdagi muhim nuqta, hatto, Omer bilan o‘rtadagi kelishuvdan keyin ham Dafna o‘zining oddiy uyidan ko‘ngil uzolmaydi. Aslida bu uy Istambul shimolidagi Buyukdere mavzesida, shaharning eng yam-yashil joylaridan biri — Sariyerda joylashgan. Odatda, nochor oila bunday bahavo joyda yashamaydi-ku, deyish ham mumkin, lekin serial ijodkorlari bu sokin va ko‘m-ko‘k ko‘chani atayin tanlashgan. Ko‘p muxlislar uy yonida suratga tushish uchun kelishadi, shu bois uy sohiblaridan xijolat qilmasangiz ham bo‘ladi, aytishlaricha, ular bunga allaqachon ko‘nikib bo‘lishgan.
Omer Iplikchi — badavlat ishbilarmon, poyabzal brendi sohibi. Uning keng ko‘shki alohida uslubda ko‘rsatilgan: atrofi bog‘ga burkangan, ulkan oynalari bor zamonaviy villa. Aslida bu uy Istambulning Yevropa qismidagi Beshiktash mavzesida joylashgan. Turk matbuotida yozilishicha, suratga olish ishlari uchun aynan «Beshiktash» futbol klubi bazasi yaqinidagi mana shu villa tanlangan. Seriyalda Istambulning bir nechta mashhur mavzelari kadrda ko‘rinadi. Masalan, Nishantashi’da juda ko‘p butiklar bor, u yerga borib katta shoping qilsangiz bo‘ladi.
Sen Anlat Karadeniz («So‘yla, Qora dengiz»)
Ayder platosi
Xuser platosi
Sumela monastiri
Sen Anlat Karadeniz («So‘yla, Qora dengiz») — 2018–2019-yillarda chiqqan dramatik serial. Bu loyiha Qora dengiz mintaqasining tabiati va madaniyatini yaxshi ochib bergan. Serial voqealari Turkiyaning shimoli-sharqida — sohil bo‘yida joylashgan Trabzon shahri chekkasida bo‘lib o‘tadi.
Bosh qahramonlar — taqdirning qattiq zarbasiga uchragan va zo‘ravonlikdan qochib qutulmoqchi bo‘lgan Nafas hamda uni o‘z himoyasiga olgan Tohir. Ularning mashaqqatlarga to‘la yo‘li go‘zal tabiat manzaralari uyg‘unligida ajoyib tasvirlangan. Serial namoyishidan so‘ng ekranda aks etgan tabiat go‘zalligini o‘z ko‘zi bilan ko‘rishga ahd qilgan sayyohlarga Qora dengiz tomonga oshiqdilar.
Trabzon — Istambuldan 1,5 soatlik parvoz uzoqligida joylashgan yirik shahar. Shaharga yetib kelgach, suratga olish joylariga mahalliy turfirmalar yordamida oson yetib olish mumkin. Masalan, Trabzonda sizni Sumela ibodatxonasi va platoga olib boradigan gidni topsa bo‘ladi.
Serialning katta qismi Trabzon viloyatida, ayrim qismlari esa — qo‘shni Ordu viloyatida olingan. Asosiy suratga olish maydoni — Trabzondagi Vaqfikebir bo‘lgan. U yerda, shahardan olisdagi Siganli va Soguksu qishloqlarida maxsus dekoratsiyalar yasalib, go‘yoki qahramonlar yashagan qishloqlar yaratilgan.
Tohirning oilasi yashagan uy — Kaleli, — ana o‘sha dekoratsiyalarda qurilgan. Shunday bo‘lsa-da, serialda Qora dengizning haqiqiy qishloq uylari ham ko‘rsatilgan: Asu qishlog‘idagi (Syurmene taraflar) 130-yillik qadimiy Dağdeviren Konağı ko‘shki Kaleli katta hovlisi sifatida suratga olingan. Agar Tohirning uyini ko‘rishni istasangiz, Trabzondan taxminan 40 chaqirim yo‘ldagi Syurmene posyolkasiga borib, Memish og‘a qo‘nog‘iga kiring. Mazkur yog‘och uy — bu joylarda mashhur tarixiy yodgorlik bo‘lib, serialdan keyin sayyohlarni o‘ziga ohanrabodek tortadigan bo‘ldi.
Serialni tomosha qilgan odam, shubhasiz Qora dengizning o‘zgacha tabiatiga maftun bo‘ladi. Suratga olish guruhi juda go‘zal manzillarni tanlagan. Ulardan biri — Lapazan platosi. U Trabzonning Machka tumanidan 27 chaqirim uzoqda, dengiz sathidan 2 200 metr balandda joylashgan. Tohir va Nafas birmuncha vaqt yashirinib yurgan sahnalar shu yerda olingan — osmonga tutashgan yashil o‘tloqlar va bulutlar orasiga yashiringudek uychalar ajoyib manzara kasb etadi. Serialda Qora dengizning narigi tarafi ham e’tibordan chetda qolmagan. Ayrim epizodlarda voqealar rivoji qo‘shni davlat hisoblangan Gruziyada, Batumi shahrida davom etadi. Serialda Batumidagi mashhur Ali va Nino haykali ham ko‘rinadi. Bu epizodni ko‘rganlar Batumiga yo‘l olishlari mumkin, Trabzondan Batumiga mashinada 3 soatda yetasiz.
Rüzgâra Bırak («Shamollarga uchir buni»)
Alachati
Rüzgâra Bırak — 2025-yilda chiqqan to‘liq metrajli turk filmi. Biz bu filmni unda Xande Erchel va Barish Arduch kabi kino yulduzlari suratga tushganligi uchun ro‘yxatga kiritdik, chunki bu san’atkorlarning dovrug‘i tobora ortib bormoqda, film suratga olingan joylar esa chindan ham ko‘rishga arzigulik. Film Asla ismli katta shaharda o‘sgan, shaddod qizning va hayotini dengizsiz tasavvur qilolmaydigan serfer yigit Egening sevgi hikoyasidir.
Dastlabki sahnalar Istambulda boshlansa-da, asosiy syujet voqeliklari sohil bo‘yiga ko‘chadi. Xususan, suratga olish ishlarining katta qismi Turkiyaning mashhur yozgi kurortlaridan biri, Izmir viloyatidagi Chashme shahridagi sohilda amalga oshirilgan. Shahardagi Alachati nomli kichik posyolka esa filmga asosiy fon sifatida tanlangan.
Alachati — o‘zining qadimiy tosh uylari, uzun tor ko‘chalari va turfa ranglarga bo‘yalgan qahvaxonalari bilan mashhur bo‘lib, ayniqsa, vindsyorfing markazi sifatida dovruq solgan. Filmning katta qismi aynan Alachati muhitida kechadi: Asla va Egening yaxshi saqlangan eski tosh uylar qatorlashgan ko‘chalardagi sayrlari, tabiiylikka urg‘u berilgan rustik uslubdagi qahvaxonalardagi suhbatlari — bularning hammasi Alachatining haqiqiy qiyofasiga mos.
Tiniq dengiz suvi va tillarang qumli sohil ko‘rinishi odamni o‘zga maftun etadi. Bunday manzarali kadrlarning barchasi Chashma yarim orolidagi Ilidja plyajida olingan. Mintaqadagi eng go‘zal bu plyaj qaynoq buloqlari va oppoq qumli sohili bilan mashhur.
Film sharofati bilan Alachatiga bo‘lgan qiziqish yanada ortdi. Bugun, uning ko‘chalarini kezgan odam o‘zini xuddi film qahramonidek sezishi mumkin. Ayniqsa oqshom payti, ko‘cha fonuslari yoqilib, jonli musiqa yangrayotgan qahvaxonada Asla va Egening suhbatlarini yaqqol tasavvur qilish mumkin. Alachati markazidagi Hoji Memish va Kemalpasha ko‘chalari ham ko‘rishga arziydi. Grekcha uslubdagi qadimiy tosh uylar, yorqin qizil va yashil rangga bo‘yalgan eshiklar, deraza peshtoqlarini bezatgan gultuvaklar —juda suratbop ko‘rinadi.
Alachati va Chashma Izmirdan taxminan 90 chaqirim g‘arbda joylashgan. Izmirdan Chashmaga avtobuslar yoki minivenlar ko‘p qatnaydi (1,5 soatga yaqin yo‘l yuriladi). Izmir aeroportidan ham to‘g‘ri Chashmaga boradigan mikroavtobuslar bor. Chashma shahriga yetib olsangiz, Alachatiga taksida 15 daqiqada borasiz. Alachati posyolkasi ixchamgina, shu bois hamma joyiga piyoda borish mumkin. Sokin hayot, dengiz isi va undan esgan mayin shabada — barchasi bir bo‘lib, g‘am-tashvishlarni «shamollarga uchirvorishga» yordam beradi.
Yana nimalarni ko‘rsa bo‘ladi?
Butun Turkiya — bitta ulkan suratga olish maydoni. Ko‘rishga arziydigan joylar ro‘yxatini uzoq davom ettirish mumkin: ko‘pincha seriallar suratga olinadigan joylar — kirish taqiqlangan villalar emas, balki ochiq manzillar bo‘lib, har bir sayyoh u yerga erkin bora oladi.
Masalan, «Beqaror» (Hercai) serialidagi shov-shuvli Shadoglu saroyi — aslida Midyat Konuk Evi nomli muzey-mehmonxona edi. «Qizilcha sharbati» (Kızılcık Şerbeti) seriali qahramonlari kechki tushlik qilgan joylar esa Istambulning mashhur restoranlardir. Ulardan biri O‘rtakyoy mavzesidagi Bosforga qaragan — Ruby restorani. Bu restoranda Fatix va Doaning hal qiluvchi uchrashuvi sahnasi suratga olingan.
«Qalbim eshigini chert» («Sen Çal Kapımı») serialidagi Eda yashagan Kuzgyunjuk ko‘chalari esa boshqa loyihalarda ham, ayniqsa, «To‘rg‘ay qush» («Erkenci Kuş») serialida ko‘p uchraydi.
Shu sababli, Turkiyada sayohat qilar ekansiz, atrofingizga diqqat bilan nazar soling: katta ehtimol bilan ayni damda qaysidir sevimli serialingiz suratga olingan joyda ketayotgan bo‘lishingiz mumkin.
