2026-yilgi Yangi yilda qayerga borish mumkin: eng yaxshi yo‘nalishlar, iliq mamlakatlar va butun oila uchun dam olish
Dubay, Tailand yoki Toshkent – Yangi yil ta’tili uchun shahar tanlaymiz.
O‘zbekistonda Yangi yil odatda an’anaviy ruhda nishonlanadi, tanish palov, manti, norin, olivye taomlari va o‘zgarmas uy marosimlari bilan. Ammo ba’zida bu odatlarni o‘zgartirish istagi paydo bo‘ladi – dengizga sayohat qilish, bayramni boshqa shaharda kutib olish yoki uni g‘ayrioddiy tarzda o‘tkazish.
Siz uchun ijobiy va salbiy tomonlari bo‘lgan dam olish yo‘nalishlarini to‘pladik, shu jumladan, sayohatdan boshlanadigan yangi an’analarni yaratish uchun taxminiy byudjetni hisoblab chiqdik.
Issiqlik izlab: Issiq mamlakatlarda Yangi yil
BAA: Dubay
Ob-havo: kunduzi odatda +20-25°C, kechasi +19°C.
Viza: 30 kungacha vizasiz kirish mumkin.
O‘zbekistonliklar uchun Dubay hamon arzon emas, lekin Aviasales.uz ma’lumotlariga ko‘ra bu shahar eng mashhur qishki yo‘nalishlar uchligiga kiradi. Bu yerga Burj Xalifani ko‘rish, Dubai Aquarium and Underwater Zoo akvariumiga tashrif buyurish, Yangi yil munosabati bilan otiladigan mushakbozliklarni tomosha qilish uchun kelishadi. Oilalar uchun akvaparklar va Ferrari World kabi mavzuli istirohat bog‘lari, juftliklar uchun esa shahar bo‘ylab sayr qilish va dengiz bo‘yida dam olish juda qulay. Dubayning afzalliklari va kamchiliklari haqida muallifimiz alohida maqolada batafsil yozgan.
Xarajatlar: Toshkentdan uchish narxi 600 dollardan (7,2 million so‘m) boshlanadi. Bayram kunlari uch yulduzli mehmonxonada bir kechalik xona narxi 80 dollardan (960 ming so‘m) boshlanadi.
Misr: Sharm ash-Shayx yoki Xurgada
Ob-havo: kunduzi +20-23 °C, kechasi +13 °C atrofida.
Viza: 30 kungacha elektron viza beriladi. Sharm-al-Shayx (SSH) aeroportiga kelganingizda 15 kunlik «Sinay tamg‘asi»ni bepul olishingiz mumkin.
Misr - Yangi yilni dengiz bo‘yida kutib olishni istasangiz, eng arzon variantlardan biri hisoblanadi. Yanvar oyida bu yerda nihoyat bemalol sayohat qilish mumkin, sayyohlar deyarli yo‘q. Qizil dengizda qishda suv harorati +22-24 °C atrofida bo‘ladi. Kunduzi iliq, lekin dim emas, kechqurun yengil kurtka kiyishga to‘g‘ri kelishi mumkin. Misrda bolalar bilan akvaparklarga va animatorlar bilan bolalar klublariga borish mumkin. Do‘stlar davrasida kelganlar uchun suv osti suzishi, snorkling va cho‘l safari jozibali bo‘ladi. Juftliklar esa spa-muolajalar, quyosh botishini tomosha qilish va «hamma narsa kiritilgan» xizmatlardan bahramand bo‘lishlari mumkin.
Xarajatlar: Toshkentdan chiptalar narxi taxminan 240 dollardan (2,9 million so‘m) boshlanadi. Mehmonxonada bir kechalik yashash narxi 50 dollardan (600 ming so‘m) boshlanadi.
Saudiya Arabistoni: Jidda va Ar-Riyod
Ob-havo: Jiddada kunduzi -+24°C va kechasi +18°C atrofida, Ar-Riyodda kunduzi +20°C, kechasi +16°C atrofida bo‘ladi.
Viza: Toshkentdagi elchixonada viza rasmiylashtirish lozim.
Saudiya Arabistoni yaqinda sayyohlar uchun ochilgan bo‘lib, Yaqin Sharqni ko‘rishni istovchilar uchun mos keladi. E’tiborga olish kerakki, bu yerda 31-dekabr bayram sifatida nishonlanmaydi, shuning uchun odatdagi ommaviy Yangi yil tadbirlari bo‘lmaydi. Biroq mamlakatning o‘zi - osmono‘par binolari va bozorlari bilan zamonaviy Ar-Riyod, Jiddadagi Al-Balad tarixiy tumani hamda qoyalarda o‘yilgan qabrlari bo‘lgan qadimiy Madoin-Solih majmuasi diqqatga sazovordir.
2025-yil 10-oktyabrdan 2026-yil martgacha mamlakatda «Riyod mavsumi» festivali o‘tkaziladi: konsertlar, attraksionlar va hatto sahroda qorli bog‘lar tashkil etiladi. Bu yerda spirtli ichimliklar va odatiy «kurort o‘yin-kulgisi» yo‘q, ammo oilaviy sayyohlar uchun bu afzallik - hamma joyda xavfsizlik va osoyishtalik hukm suradi. Bolalar bilan akvaparklar, zamonaviy muzeylar va Boulevard World yoki Via Riyadh kabi futuristik joylarga tashrif buyurish mumkin.
Xarajatlar: Dubayda qo‘nish reyslar narxi taxminan 600 dollardan (7,1 million so‘m) boshlanadi. Jiddadagi mehmonxonada bir kechalik yashash narxi 80 dollardan (960 ming so‘m), Ar-Riyodda esa 150-200 dollar (1,8-2,4 million so‘m) atrofida.
Tailand: Pxuket yoki Pattaya
Ob-havo: Pxuketda kunduzi +30-32°C, kechasi 25-26°C, Pattayada kunduzi +30°C, kechasi +21°C.
Viza: kelgandan so‘ng 60 kunga beriladi.
Tailandda yanvar oyi dam olish uchun eng qulay vaqt: quruq va ochiq havo kuzatiladi. Bu payt plyajda hordiq chiqarish, snorkling bilan shug‘ullanish, orollarga sayohat qilish yoki shunchaki Andaman dengizi suvlarida cho‘milishdan zavqlanish uchun ideal vaqt hisoblanadi.
Tailandda Yangi yil, ayniqsa sayyohlik hududlarida, mushakbozlik va ziyofatlar bilan nishonlanadi. Tailand o‘zining ko‘p qirraliligi tufayli tanlanadi: kompaniyalar tungi hayoti uchun, juftliklar massaj va sokin plyajlari uchun, oilalar esa iliq dengiz, mevalar va ko‘ngilochar bog‘lari uchun bu mamlakatni afzal ko‘rishadi.
Budjet: Pxuketga uchish taxminan 327 AQSH dollariga (3,9 million so‘mga yaqin) tushadi. Mehmonxonalar ijarasi bir kecha uchun 20 dollardan (242 ming so‘m) boshlanadi, plyaj yaqinidagi bungalo uchun esa 150 dollardan (1,8 million so‘m) to‘lashga to‘g‘ri keladi.
Vyetnam: Fukuok va Nyachang
Ob-havo: Fukuokda kunduzi +30 °C, kechasi +22 °C bo‘ladi. Nyachangda kunduzi +25-27 daraja, kechasi +21.
Viza: elektron vizani oldindan Vietnamvisaembassy.org saytida rasmiylashtirish lozim.
Vyetnam shimoldan janubga cho‘zilganligi sababli, qishda turli hududlarda ob-havo sezilarli darajada farq qiladi. Barqaror issiq ob-havo uchun janubga, masalan, Fukuok oroliga borish maqsadga muvofiq. Yumshoq iqlim va butun oila uchun qulaylikni izlayotganlar esa Nyachangni tanlashlari kerak. Bu yerdagi asosiy diqqatga sazovor joy - Vinpearl Land ko‘ngilochar bog‘i, shaharning boshqa qiziqarli joylar ro‘yxatini esa yo‘lko‘rsatgichimizdan topishingiz mumkin.
Vetnamda plyajda dam olishdan tashqari, bir-ikki kunlik qisqa sayohatlar ham mashhur: qadimiy budda ibodatxonalariga, Dalat va Hoy’an kabi fransuz mustamlaka me’morchiligiga ega shaharlarga yoki mashhur Halong ko‘rfaziga (shimolda qishda salqin bo‘lishini hisobga oling). Yorqin tungi hayot izlovchilar ko‘pincha Hoshiminga yo‘l olishadi.
Xarajatlar: Toshkent-Nyachang yo‘nalishi bo‘yicha aviachipta taxminan 400 dollar (4,8 million so‘m) turadi. Mehmonxonalarda tunash narxi 12 dollardan (144 ming so‘m) boshlanadi.
Maldiv orollari
Ob-havo: kunduzi +30-31 °C, kechasi +25 °C atrofida.
Viza: 30 kungacha vizasiz.
Maldiv orollari oddiy "dengiz — xona — yana dengiz" ssenariysi uchun tanlanadi. Kunduzi butun e’tibor okeanga qaratiladi: cho‘milish, snorkling va marjon riflari yonida g‘avvoslik. Kechqurun esa spa muolajalari, quyosh botishida kechki ovqat va suv bo‘ylab sayr qilish vaqti. Bu juftliklar va g‘avvoslar uchun jannat. Bolalar bilan ham borishadi, lekin uzoq parvoz (Toshkentdan taxminan 5,5 soat) va deyarli butun dam olish mehmonxona hududi bilan cheklanganini hisobga olish lozim.
Orollarda Yangi yil kechasi — mahalliy tadbir. Har bir dam olish maskani o‘ziga xos dasturni tayyorlaydi: qirg‘oqdagi konseptual kechki ovqatlar dan tortib, xorijiy yulduzlar ishtirokidagi shovqinli kechalargacha. Asosiy an’ana — yarim tunda okean uzra yorqin mushakbozlik.
Xarajatlar: Malega aviachipta 300 dollardan (3,6 million so‘m), mehmonxona kuniga 50 dollardan (600 ming so‘m) boshlanadi.
Shri-Lanka
Ob-havo: kunduzi +29...+31°C, kechasi +23°C atrofida, dengiz suvi harorati +27-28°C.
Viza: oldindan Sri Lanka e-Viza portalidan olish lozim.
Shri-Lanka plyaj va faol dam olishning ajoyib uyg‘unligi uchun tanlanadi: bu yerda serfing bilan shug‘ullanish, Sigiriya qoyasiga ko‘tarilish, choy plantatsiyalarini ziyorat qilish va qadimiy shaharlarni ko‘rish mumkin. Yoshi kattaroq bolalar bilan okean bo‘yidagi dam olishni sayohatlar bilan qo‘shib olib borish qulay, kichkintoylarga esa Pinnavela fil boqish markazini ko‘rish, shubhasiz, manzur bo‘ladi. Serferlar ko‘pincha orolning janubini tanlashadi, chunki qishda u yerda barqaror to‘lqinlar bo‘ladi. Vetnamga mustaqil sayohat qilishni qanday rejalashtirish haqida alohida maqolada batafsil yozganmiz.
Mahalliy aholi uchun 1-yanvar oddiy kun (bu yerda milliy Yangi yil aprel oyida nishonlanadi), biroq sayyohlar uchun mehmonxonalarda milliy raqslar va mushakbozliklar bilan bayram dasturlari tayyorlanadi.
Xarajatlar: Toshkent-Kolombo yo‘nalishidagi parvoz (qo‘nib o‘tish bilan) 350 dollardan (3,8 million so‘m) boshlanadi. Okean bo‘yidagi mehmon uyida bir kecha tunash - 20 dollar (240 ming so‘m), mehmonxonalarda esa bir kunga 30-120 dollar (360 ming so‘mdan 1,4 million so‘mgacha) turadi.
Hindiston: Goa
Ob-havo: kunduzi +30-32°C, kechqurun +25°C atrofida, dengiz suvi harorati +27-28°C.
Viza: Hindiston elchixonasida rasmiylashtirish kerak.
Goaning qulayligi shundaki, bir shtatning o‘zida dam olishning turli shakllarini tanlash mumkin. Janubiy Goa - keng plyajlar, osoyishtalik va yoga markazlari, Shimoliy Goa esa - ziyofatlar, ochiq havoda musiqa va qizg‘in tungi hayot maskani. Shtat bo‘ylab skuterda harakatlanish qulay: bu Eski Goa kolonial cherkovlari, sharsharalar va ziravor o‘simliklar plantatsiyalariga borishning eng oson yo‘li.
Ovqat masalasida hammasi oddiy: yangi keltirilgan dengiz mahsulotlari to‘g‘ridan-to‘g‘ri suvning bo‘yida tayyorlanadi. Ammo yangi kelganlar mahalliy oshxonaga ehtiyotkorlik bilan yondashishlari kerak: hind taomlari juda achchiq bo‘lishi mumkin, shuning uchun buyurtma berayotganda doimo "no spicy" deb qo‘shib qo‘yish kerak.
Goa norasmiy va erkin muhitni yoqtiradiganlarga mos keladi. Bu yerga bolalar bilan ham kelish mumkin, lekin mahalliy infratuzilma (yo‘llar va yo‘laklar holati) katta oilaviy mehmonxonalar mavjudligiga qaramasdan, qoniqarsiz bo‘lishi mumkinligini hisobga olish kerak. Shtatda nima bilan shug‘ullanish haqida ko‘proq g‘oyalarni Goa bo‘yicha yo‘l ko‘rsatkichimizdan topishingiz mumkin.
Xarajatlar: Dehli orqali uchish - 240 dollardan (2,8 million so‘m) boshlanadi. Bir kechalik gesthausning narxi 40 dollardan (480 ming so‘m), dengiz bo‘yidagi villada bir sutka - 80 dollar (960 ming so‘m), mehmonxonalarda bir kecha uchun 30 dollardan (360 ming so‘m) boshlanadi.
Tejamkor yo‘nalishlar
Agar asosiy maqsadingiz Yangi yilni arzon nishonlash bo‘lsa, O‘zbekistondan borish oson bo‘lgan mamlakatlarga e’tibor qarating. Yaqin xorij va qo‘shni davlatlar parvozlar uchun haddan tashqari ko‘p xarajat qilmasdan ko‘plab taassurotlar beradi.
Armaniston: Yerevan
Ob-havo: Yerevanda taxminan -5 °C.
Viza: 180 kungacha vizasiz kirish.
Armanistonda ham 31-dekabr, ham 6-yanvardagi Rojdestvo nishonlanadi, shuning uchun bayramlar davomida Yerevan alohida qiyofaga kiradi: shahar markazi yorqin yoritilgan, Respublika maydonida bosh archa o‘rnatilgan, ochiq havoda muz maydoni ishlaydi.
Yerevanga sayohatni kabob, do‘lma va mashhur konyak qadahisiz tasavvur qilish qiyin. Ammo ziyofatlar bilangina cheklanib qolmaslik kerak, chunki Armaniston me’morchiligi uning oshxonasi singari hayratlanarli. Masalan, qishda bir kun ichida Gegard yoki Xor Virap monastirlarini ko‘rishga ulgurishingiz mumkin: qorli tog‘lar fonida ular qishda alohida ta’sirchan ko‘rinadi.
Xarajatlar: Yerevanga parvoz qilish taxminan 290 dollar (3,4 million so‘m) turadi. Mehmonxonada bir kecha tunash o‘rtacha 20 dollar (240 ming so‘m), kunlik kvartiralar taxminan 45 dollar (540 ming so‘m), mehmonxonalar esa 25 dollardan (300 ming so‘m) boshlanadi.
Turkiya: Antaliya va Istanbul
Ob-havo: Antaliyada kunduzi +15 °C, Istanbulda +8-10 °C.
Viza: 90 kungacha vizasiz.
Yanvar oyida Istanbul eng gavjum oylarga qaraganda ancha tinchroq: odamlar kamroq, muzeylar va Xurram saroyiga kirish hamda Bosfor bo‘ylab bemalol sayr qilish osonroq. Turkiyada Yangi yil diniy ahamiyatga ega bo‘lmasa-da, uni sevib, keng nishonlashadi: kimdir Taksim maydoniga boradi, kimdir kemada salyutlarni tomosha qilib kechki ovqat yeyishni tanlaydi. Shaharlar chiroqlar va bezatilgan archalar bilan yasatilgan, bolalarni esa mahalliy «Qorbobo» - Noel Baba quvontiradi. Yoqimli qo‘shimcha: aynan shu paytda qishki chegirmalar boshlanadi, shuning uchun sayrlarni xarid qilish bilan osonlikcha uyg‘unlashtirish mumkin.
Oilaviy dam olish uchun Istanbulda ulkan akvariumlar va interaktiv muzeylar mavjud. Agar sokinlik va iliqlikni istasangiz, atigi bir necha soatlik masofada joylashgan Yalova yoki Bursa issiq buloqlariga tashrif buyurishingiz mumkin.
Antaliyada qishda cho‘milish mavsumi yopiq bo‘lsa-da, mehmonxonalar narxlarni pasaytirib, kechki ovqat va jonli musiqa bilan bayramona dasturlar taklif etadi.
Xarajatlar: chiptalar - taxminan 200 dollar (2,4 million so‘m) atrofida. Istanbuldagi mehmonxonalar Yangi yil sanalariga bir kecha uchun 25-30 dollardan (300-360 ming so‘m), Antaliyada esa 30 dollardan boshlanadi.
Serbiya: Belgrad
Ob-havo: kunduzi +2-5, kechasi −2 darajagacha sovuq bo‘ladi.
Viza: Serbiyaning Moskvadagi elchixonasidan viza olish zarur.
Serbiyada Yangi yil biznikiga o‘xshab nishonlanadi: archa bezatish, Mraz bobo (mahalliy Qorbobo) va 31-dekabr kuni ko‘cha sayillari bo‘ladi. O‘zbekiston fuqarolari uchun Serbiya Yevropadagi eng qulay yo‘nalishlardan biridir. Viza talab qilinsa-da, uni olish ancha oson: hujjatlar to‘plami standart (pasport, bron, ish joyidan ma’lumotnoma), butun jarayon deyarli onlayn (faqat pasportni Moskvaga pochta orqali yuborish kerak). Ko‘rib chiqish taxminan 4 hafta davom etishi mumkin.
Belgradda faol tungi hayot mavjud bo‘lib, ko‘chalarda konsertlar va ertalabgacha ochiq klublar bor. Tinchlik izlovchilar Novi-Sadga yo‘l olishsa, qor va chang‘i sporti ixlosmandlari Alp tog‘laridagi kurortlarga nisbatan ancha arzonroq bo‘lgan Kopaonik tog‘ kurortiga borishadi.
Budjet: Istanbulda almashinuv bilan chiptalar 540 dollardan (6,5 million so‘m) boshlanadi. Mehmonxonada bir kecha-kunduz uchun 40 dollardan (480 ming so‘m), mehmon uylari 20 dollardan (240 ming so‘m), kunlik kvartira ijarasi 30 dollardan (360 ming so‘m) boshlanadi.
Yangi yilni O‘zbekistonda qayerda kutib olish mumkin
Yangi yilni nishonlash uchun chet elga chiqish shart emas. O‘zbekistonda bayram kunlari Yangi yil muhiti hukm suradigan ko‘plab joylar mavjud. Quyida mamlakat ichida ta’tilni o‘tkazish mumkin bo‘lgan bir nechta variantlar keltirilgan.
Toshkent
Dekabr oyining oxirida Milliy kutubxona oldida bosh archa yoqiladi, shahar markazidagi binolar chiroqlar bilan bezatiladi, yarmarkalar va bozorlar ochiladi. Kechqurun kafe va barlarga kirib chiqib, sayr qilish juda yoqimli. Shaharning bayramona kayfiyatini klublardagi mavzuli kechalar va qishki tadbirlar to‘ldiradi. Masalan, zamonaviy yopiq muz maydonchalarida, tezlik uchun alohida zonalari bo‘lgan katta Ice City majmuasidan tortib, Riviera savdo markazidagi kichikroq Ice Rink maydonigacha chang‘ida uchish mumkin. Bolali oilalar uchun bu vaqtda teatrlarda, "Istiqlol" saroyida va Magic City bog‘ida bayram tomoshalari va spektakllari namoyish etiladi.
Amirsoy
Agar siz haqiqiy qish, qor va faol dam olishni istasangiz, Amirsoy tog‘ chang‘i kurorti eng yaxshi tanlovdir. Majmua 2300 metr balandlikda joylashgani uchun qishda doimo qor bilan qoplangan bo‘ladi. Chang‘i va snoubordda uchishdan tashqari, mehmonlar chana va «vatrushka»larda uchishadi, shuningdek tog‘ tizmalari manzarasi ochiladigan qahvaxonada issiq choy ichish uchun yuqoriga ko‘tarilishadi. Yangi yil kechasida ma’muriyat mehmonlar uchun jonli musiqa bilan bayram ziyofati uyushtiradi. Bu yerda hatto chang‘i etigi bilan raqsga tushish mumkin. Bayram quvonchni qo‘ldan boy bermaslik uchun oldindan joy band qilishni unutmang.
Samarqand
Samarqandda qishda sayyohlik mavsumiga qaraganda ancha tinch bo‘ladi va bu shahar uchun foydalidir. Sayyohlar kamroq bo‘lgani uchun arxitektura tafsilotlarini bemalol ko‘rib chiqish va tarixiy yodgorliklarga uzun navbatlarsiz kirish mumkin. Asosiy diqqatga sazovor joylar - Registon maydoni, Ulug‘bek madrasasi, Sherdor va Tillakori madrasalari chiroqlar bilan yoritilgan bo‘lib, kechqurun ular kunduzgidan butunlay boshqacha ko‘rinishga ega bo‘ladi.
Yangi yil kechasida yirik restoran va mehmonxonalarda milliy musiqa va bayramona kechki ovqatli dasturlar o‘tkaziladi. 1-2 yanvar kunlari esa shahar bo‘ylab piyoda sayr qilish qulay: Go‘ri Amir maqbarasiga kirish, Shohi Zinda majmuasiga borish yoki yil bo‘yi faoliyat ko‘rsatadigan Siyob bozoriga tashrif buyurish mumkin.
Buxoro
Buxoroga qishda kamida bir marta tashrif buyurish kerak. Shamol va sovuqqa qaramay, bu faslda shahar o‘zining yangi qirrasini namoyon etadi: qadimiy Ark qal’asi oldida bayram archasini boshqa qayerda ko‘rasiz? Bu yerda Yangi yil tinch, ommaviy sayillarsiz nishonlanadi, biroq eski shahar kechki yoritish tufayli o‘zgacha qiyofaga kiradi. Poi Kalon ansambli, Labi-Hovuz va unga tutash ko‘chalar chiroqlar nurida alohida jozibador ko‘rinadi.
Qishki salqin ob-havo sayyohlar gavjum bo‘lmagan paytda diqqatga sazovor joylarni tomosha qilish uchun juda qulay. Somoniylar maqbarasi, Chor Minorni bemalol ko‘zdan kechirish va hunarmandlar hali ham qo‘lda yasalgan buyumlarini sotadigan savdo gumbazlari bo‘ylab yurish mumkin. Sayrdan so‘ng esa XVI asrga oid sharq hammomlariga kirib isinish va hordiq chiqarish ayni muddao bo‘ladi.
Xiva
Yangi yil kunlarida Xiva tarix bilan osoyishta tanishish uchun ayni muddao. Bu yerdagi asosiy joy - Ichan-qal’a. Bu ulkan qadimiy qal’a "shahar ichidagi shahar" bo‘lib, atrofi bahaybat devorlar bilan o‘ralgan. Qal’a juda ixcham: barcha asosiy diqqatga sazovor joylar piyoda yurish masofasida joylashgani bois, marshrutni joyida osongina tuzib olish mumkin. 213 ta naqshinkor yog‘och ustunli Juma masjidi, moviy Kalta Minor minorasi va hashamatli xon saroylarini albatta ko‘rish lozim. Hamma narsa shunchalik yaqin joylashganki, ekskursiya jadvaliga qaramay, qiziqarli joylarda bemalol vaqt o‘tkazish mumkin.
Xivada taom tatish - alohida zavq. Buning uchun eski shahardagi istalgan mahalliy choyxonaga kirib ko‘ring. Asl xorazmcha taomlarni tatib ko‘ring: tuxum barak (tuxumli xorazmcha chuchvara), gumma (mahalliy chebureklar) va mashhur ijjon - go‘shtli tartarning xorazmcha talqini.
Yangi yil sayohatchilari uchun maslahatlar
Sayohatingiz to‘la muvaffaqiyatli bo‘lishi uchun bir nechta oddiy tavsiyalarni inobatga oling:
- Oila bilan sayohat qilayotgan bo‘lsangiz, oshxonali turar joylarni tanlash va oldindan sharhlarni o‘qish ma’qul, ayniqsa shovqin izolyatsiyasi xususida.
- Safarga chiqishdan oldin xorijga chiqish pasportining amal qilish muddatini tekshiring - ko‘plab mamlakatlarda u jo‘nab ketish sanasidan boshlab kamida olti oy amal qilishi shart.
- Kirish qoidalarini elchixona saytida albatta qayta tekshiring: ayrim qoidalar yil boshida o‘zgarishi mumkin. Viza talablarini ham aniqlashtirish foydali: ba’zi mamlakatlarga elektron viza yetarli bo‘lsa, boshqalariga rasmiylashtirishga bir necha hafta ketadi.
- Tibbiy sug‘urta rasmiylashtirishni unutmang. Bu, ayniqsa qishda, shamollash va jarohatlanish xavfi ortadigan paytda, tejash mumkin bo‘lmagan xarajat hisoblanadi. Hatto issiq mamlakatlarga uchayotgan bo‘lsangiz ham, sug‘urta qildirish zarur: samolyotning yopiq muhitida boshqa yo‘lovchilardan kasallik yuqishi mumkin, iqlim o‘zgarishi esa organizmni zaiflashtirib qo‘yishi ehtimoli bor.
- Mahalliy ish jadvalini oldindan o‘rganib chiqing: ba’zi mamlakatlarda ma’lum kunlarda yoki oyning boshida muzeylar, davlat muassasalari va hatto do‘konlar yopiq bo‘lishi mumkin. Agar buni oldindan bilsangiz, bu sizning rejalaringiz uchun muammo bo‘lmaydi.
Kelayotgan Yangi yil nafaqat mushakbozlik, balki sayohatlar bilan ham esda qolsin. Kirib kelayotgan yangi yilingiz bilan!
