Xitoyga kirish deklaratsiyasini qanday to‘ldirish kerak: bosqichma-bosqich qo‘llanma

Xitoyga kirish deklaratsiyasini (Arrival Card) deyarli barcha chet elliklar, hatto vizasiz kirayotganlar ham to‘ldirishi shart. Bu immigratsiya nazoratidan o‘tish uchun mo‘ljallangan qisqa anketa. Unda kimligingiz, nima maqsadda kelayotganingiz va qayerda yashashingiz ko‘rsatiladi. Deklaratsiyani to‘ldirish mutlaqo bepul. Jarayonni onlayn yoki Xitoyga yetib kelgan aeroportda amalga oshirish mumkin. Parvozdan so‘ng navbatda turib qolmaslik uchun kirish deklaratsiyasini uydanoq to‘ldirganingiz ma’qul: tizim siz uchun QR-kod yaratadi va uni bevosita nazorat punktida ko‘rsatasiz.

Har bir maydonga nimalarni yozish kerakligi, kirish deklaratsiyasini qachon to‘ldirish lozimligi va rasmiy saytni bepul xizmat uchun pul undiradigan soxta nusxalaridan qanday ajratish haqida ma’lumot beramiz.

Xitoyga kirish uchun kirish deklaratsiyasi kerakmi?

Ha, vizasi bor yoki yo‘qligidan qat’i nazar, deyarli barcha xorijliklar uchun kerak. Kirish deklaratsiyasini 2025-yil 20-noyabrdan boshlab onlayn to‘ldirish mumkin. Quyidagi hollarda esa kirish deklaratsiyasini to‘ldirish talab etilmaydi:

• Xitoyda doimiy yashash huquqini beruvchi chet elliklar guvohnomasiga (Foreign Permanent Resident ID Card) ega bo‘lsangiz;
• Xitoy fuqaroligiga ega bo‘lmagan, lekin materik Xitoyga kirish ruxsatnomasi bor Gonkong yoki Makao rezidenti bo‘lsangiz;
• guruh vizasi yoki guruh bo‘lib vizasiz kirish rejimi asosida sayyohlik guruhi bilan ketayotgan bo‘lsangiz;
• 24 soatgacha tranzit bilan uchayotgan bo‘lsangiz va aeroportning tranzit zonasidan chiqmasangiz;
• bir kruiz laynerida kirib, o‘sha laynerda chiqib ketayotgan bo‘lsangiz;
• chegarani elektron yo‘lak (E-Channel) orqali kesib o‘tsangiz;
• xalqaro transport xizmat ko‘rsatish xodimi (ekipaj a’zosi) bo‘lsangiz.

Qolgan barcha holatlarda kirish deklaratsiyasini to‘ldirish shart.

Kirish deklaratsiyasini qayerda to‘ldirish mumkin?

Elektron kirish deklaratsiyasini faqat XXR Milliy immigratsiya ma’muriyati (NIA) qabul qiladi. Buning to‘rtta rasmiy usuli mavjud:

• NIA rasmiy sayti (kompyuter va mobil brauzer uchun);
• NIA 12367 ilovasi (ilova do‘konlarida — 移民局12367);
• WeChatdagi NIA 12367 mini-ilovasi;
• Alipaydagi NIA 12367 mini-ilovasi.

Kirish deklaratsiyasi barcha platformalarda bir xil. WeChat yoki Alipay bo‘lishi shart emas: oddiy brauzer ham yetarli.

Agar kirish deklaratsiyasini oldindan to‘ldirishga ulgurmagan bo‘lsangiz, buni yetib borgan aeroportingizda ham qilishingiz mumkin. Maxsus peshtaxtadagi QR-kodni skanerlang, o‘z-o‘ziga xizmat ko‘rsatish terminalida shaklni to‘ldiring yoki qog‘oz blankasini oling. Ammo parvozdan charchab chiqqach, navbatda turishga to‘g‘ri keladi, shuning uchun shaklni uydan turib to‘ldirib yuborish ancha qulay.

Kirish deklaratsiyasini qancha vaqt oldin to‘ldirish kerak?

Tizim kirish deklaratsiyasini Xitoyga yetib kelishdan ko‘pi bilan 72 soat oldin qabul qiladi. Agar uni undan oldinroq jo‘natsangiz, tizim qabul qilmaydi. Kirish deklaratsiyasini eng yaxshisi uchish arafasida to‘ldirgan ma’qul. Kirish deklaratsiyasi faqat bitta kirish uchun amal qiladi. U reys raqamiga va yetib kelish sanasiga biriktirilgan bo‘ladi. Yuborilgan kirish deklaratsiyasini qayta o‘zgartirib bo‘lmaydi. Shu sababli reys va mehmonxona aniq tasdiqlanishini kuting.

Kirish deklaratsiyasini to‘ldirish uchun nimalar kerak bo‘ladi?

Barchasini oldindan tayyorlab qo‘ysangiz, to‘ldirish uchun bor-yo‘g‘i 5–10 daqiqa vaqt ketadi:

• xorijga chiqish pasporti va uning shaxsiy ma’lumotlar sahifasining JPG yoki PNG formatidagi fotosurati;
• reys raqami va yetib kelish sanasi;
• kirib boriladigan shahar va aeroport;
• Xitoyda yashash manzili: mehmonxona nomi va to‘liq manzili (xitoy tilida bo‘lgani ma’qul);
• shaxsiy telefon raqamingiz va elektron pochtangiz;
• Xitoydagi aloqa telefon raqami;
• borishni rejalashtirgan shaharlaringiz ro‘yxati;
• vizangiz bo‘lsa, uning raqami;
• kirish deklaratsiyasini butun oila uchun to‘ldirayotgan bo‘lsangiz, birga ketayotgan hamrohlaringizning pasport ma’lumotlari.

Xuddi shu mavzuda ko‘proq ma'lumot

Xitoyda sayohat qilish uchun ilovalar: VPN, WeChat, onlayn xaridlar va taksi

O‘zbekiston → Xitoy: yangi vizasiz yo‘nalishni ochmoqdamiz

Kirish deklaratsiyasini qanday to‘ldirish kerak: bosqichma-bosqich qo‘llanma

Quyida NIA sayti orqali to‘ldirish tartibi keltirilgan. Ilovadagi maydonlar ham aynan bir xil. Deklaratsiyaning o‘zi besh sahifadan iborat, lekin hech narsani o‘tkazib yubormasligingiz uchun biz uni to‘qqiz bosqichga ajratdik.

1-bosqich. Rasmiy saytni oching

• 
• 

Kompyuterdan s.nia.gov.cn/ArrivalCardFillingPC yoki telefondan s.nia.gov.cn/ArrivalCardFillingPhone havolasiga o‘ting. Qidiruv qatoriga e’tibor bering: domen nomi nia.gov.cn bilan tugashi shart. Interfeys tilini tanlang va Entry Declaration («Kirish deklaratsiyasi») tugmasini bosing.

2-bosqich. Qoidalarga rozilik bildiring va pasport ma’lumotlarini yuklang

Tizim sizga yo‘riqnoma va kirish deklaratsiyasini to‘ldirishi shart bo‘lmagan shaxslar ro‘yxatini ko‘rsatadi. Agar bu ro‘yxatda bo‘lmasangiz, «I AGREE» tugmasini bosing. Hujjat turini tanlang — ko‘pchilik uchun bu xorijga chiqish pasporti (Ordinary passport). Pasportingizdagi fotosuratingiz joylashgan asosiy sahifani rasmga olib yuklang. Barcha harf va raqamlar aniq ko‘rinishi uchun yaxshi yoritilgan joyda va yaltiramasdan rasmga oling. Tizim matnni aniqlaydi va ba’zi maydonlarni avtomatik to‘ldiradi. Fayl hajmi 100 kB dan oshmasligi kerak. Agar telefoningizdagi surat hajmi katta bo‘lsa, uni istalgan fototahrirlovchida kichraytiring.

3-bosqich. Shaxsiy va pasport ma’lumotlarini tekshiring

Tizim avtomatik to‘ldirgan maydonlarni pasportingiz bilan solishtirib chiqing: familiya, ism, pasport raqami va uning amal qilish muddati. Agar hatto bitta harfda xatolik bo‘lsa ham, uni qo‘lda to‘g‘rilang. Ma’lumotlar pasportdagi bilan aynan bir xil bo‘lishi lozim: noto‘g‘ri yoki yashirilgan ma’lumotlar sabab mamlakatga kirish taqiqlanishi mumkin.

Keyingi ekranda quyidagilarni ko‘rsating:

• jinsi;
• tug‘ilgan sanasi;
• fuqaroligi — Uzbekistan;
• tug‘ilgan davlati;
• mamlakat kodi bilan telefon raqami (+998);
• elektron pochta (email).

Xitoycha ism maydonini to‘ldirish shart emas. Agar bunday ismingiz bo‘lmasa, uni bo‘sh qoldiring.

4-bosqich. Viza yoki kirish uchun asos bo‘ladigan ma’lumotlarni ko‘rsating

• 

Deklaratsiyada sizdan viza yoki mamlakatga kirish uchun boshqa ruxsatnoma bor-yo‘qligi so‘raladi. Agar mavjud bo‘lsa, viza turini va pasportdagi viza stikeri raqamini ko‘rsating. So‘ng kirish turini tanlang: oddiy kirish yoki 24 soatlik tranzit. Agar 30 kungacha vizasiz ketayotgan bo‘lsangiz, viza yo‘qligini belgilang va vizasiz kirish variantini tanlang.

5-bosqich. Sayohat va reys haqidagi ma’lumotlarni to‘ldiring

• 

Ro‘yxatdan safar maqsadini tanlang: turizm, do‘stlar yoki qarindoshlarni ziyorat qilish, biznes, ish, o‘qish. Vizasiz kirishda dastlabki uchta variant mos keladi.

So‘ng quyidagilarni ko‘rsating:

• yetib borish sanasi;
• shahar va kirish punkti (aeroport);
• transport turi: samolyot, poyezd yoki kema;
• reys raqami — xuddi chiptadagidek, aviakompaniya kodi va raqamlar.

Agar Xitoy ichida samolyot almashtirib (tranzit bilan) uchayotgan bo‘lsangiz, birinchi kirish aeroportigacha bo‘lgan reysni ko‘rsating. Pasport nazoratidan aynan o‘sha yerda o‘tasiz.

6-bosqich. Xitoyda yashash manzilingizni ko‘rsating

• 
• 

Tashrif buyuradigan shaharlaringizni sanab o‘ting va birinchi tunni o‘tkazadigan manzilingizni ko‘rsating. Mehmonxona nomini lotin yozuvida kiriting, manzilni esa imkon qadar xitoy tilida kiritgan ma’qul. Odatda uni bandlov tasdiqnomasidan yoki mehmonxona saytidan nusxalab olish mumkin.

Shu yerning o‘zida shakl Xitoydagi telefon raqamini ham so‘raydi.

7-bosqich. Marshrut va qaytish reysi haqidagi ma’lumotlarni to‘ldiring

Xitoydan chiqib ketish sanasini ko‘rsating. Agar vizasiz ketayotgan bo‘lsangiz, safaringiz 30 kundan oshib ketmasligiga ishonch hosil qiling.

Shu ekranning o‘zida shaklda ikkita savol beriladi:

• oxirgi ikki yil ichida boshqa davlatlar yoki hududlarda bo‘lganmisiz;
• pasportingizni yo‘qotganmisiz yoki uni o‘g‘irlatganmisiz.

Haqiqiy ma’lumotlarni kiriting: immigratsiya xizmati bu ma’lumotlarni tekshirishi mumkin.

8-bosqich. Hamrohlarni qo‘shing va shaklni yuboring

Deklaratsiyaning oxirgi ekrani — «Hamrohlar». Bu yerga siz bilan birga uchayotgan oila a’zolari qo‘shiladi. Shunda ular uchun alohida kirish deklaratsiyasi yuborish talab etilmaydi. Yuborishdan oldin barcha maydonlarni pasport va bandlov ma’lumotlari bilan yana bir bor solishtirib chiqing. So‘ng deklaratsiyadagi ma’lumotlarni tekshiring. Ularning to‘g‘riligini tasdiqlashingiz va immigratsiya xizmati tomonidan saqlanishiga rozilik bildirishingiz kerak bo‘ladi. Ekrandagi imzo maydoniga imzo qo‘yiladi.

9-bosqich. Tasdiqnoma va QR-kodni saqlab oling

Yuborilgach, tizim QR-kodli tasdiqnomani (Entry Declaration Receipt) taqdim etadi. Uni ikki xil yo‘l bilan saqlab oling: Download to Local tugmasi orqali qurilmaga yuklang va Send to Email tugmasi orqali o‘z pochtangizga yuboring. Shuningdek, QR-kodni skrinshot ham qilib oling. Aeroportdagi Wi-Fi ishlamay qolishi mumkin, kodni esa yetib borgach darhol ko‘rsatish talab etiladi.

Xitoyga kirish deklaratsiyasini to‘ldirish namunasi

• 
• 
• 

Quyida to‘qima ma’lumotlar asosida to‘ldirilgan namuna keltirilgan. Sizning ma’lumotlaringiz boshqacha bo‘ladi, biroq to‘ldirish tartibi bir xil.

Kirish deklaratsiyasida xatoga yo‘l qo‘yilgan bo‘lsa, nima qilish kerak?

Yuborilgan kirish deklaratsiyasini tahrirlashning imkoni yo‘q. Agar xatolikni payqab qolsangiz yoki ma’lumotlar o‘zgargan bo‘lsa, yangi deklaratsiya to‘ldiring. Ko‘pincha reys raqami, kelish sanasi yoki mehmonxona o‘zgaradi. Yangi deklaratsiya ham yetib kelishdan oldingi 72 soat ichida topshiriladi. Nazorat punktida eng oxirgi yuborilgan kirish deklaratsiyasining QR-kodini ko‘rsating. Agar xatolikni samolyotga o‘tirgandan keyin sezib qolsangiz, kirish deklaratsiyasini aeroportdagi terminalda yoki qog‘oz blankada qaytadan to‘ldiring.

Ko‘p beriladigan savollar

Elektron kirish deklaratsiyasini chop etish shartmi

Yo‘q. Telefon ekranidagi QR-kodning o‘zi kifoya. Asosiysi, kod qurilmada saqlangan bo‘lishi va internetsiz ochilishi lozim.

Bolalar uchun ham deklaratsiya to‘ldirish kerakmi?

Ha, kirish deklaratsiyasi har bir chet el fuqarosi uchun talab etiladi. Bolani ota-onaning kirish deklaratsiyasidagi “Hamrohlar” bo‘limiga qo‘shish mumkin. Buning uchun bolaning pasport ma’lumotlari talab qilinadi.

Xitoy orqali tranzit bilan o‘tishda kirish deklaratsiyasini rasmiylashtirish kerakmi?

Agar parvozlar orasidagi tanaffus 24 soatdan kam bo‘lsa va aeroportning tranzit hududidan tashqariga chiqmasangiz, shart emas. Agar aeroportning tranzit zonasidan chiqmoqchi bo‘lsangiz, kirish deklaratsiyasini to‘ldirish va unda tranzit variantini tanlash kerak bo‘ladi.

Kirish deklaratsiyasini rus tilida to‘ldirish mumkinmi?

Shakl interfeysi 13 tilda mavjud. Ma’lumotlarni esa, xuddi pasportdagidek, lotin yozuvida kiriting. Mehmonxona manzilini imkon qadar xitoy tilida ko‘rsatgan ma’qul.