Termal buloqlar: qishda isinish uchun qayerga borish kerak
Suyaklarni qayerda isitish va mineral suvlar haqida hikoya qilamiz.
Qishda O‘zbekiston aholisining ko‘pchiligi yo bahorni kutadi, yoki quyosh izlab Tailand, Vetnam va boshqa iliq mamlakatlarga uchib ketadi. Ammo g‘ayrioddiy va ayni paytda iliq narsani istasangiz, muqobil variant ham bor - termal buloqlar. Ular yaqin xorijda ham, Yevropada ham mavjud.
Bu shunchaki dengiz bo‘yidagi ta’til emas, balki tana va ruh uchun chinakam zavq: sovuq va issiq suv, osmonga ko‘tarilayotgan bug‘, bu qarama-qarshilikka singib, ham tanangiz, ham ruhingiz bilan dam olasiz..
Bunday qayta tiklanishni amalga oshirish mumkin bo‘lgan joylar ro‘yxatini tuzdik: nafaqat O‘zbekiston yaqinida, balki uzoq xorijda ham.
Qozog‘iston
Chunja: dashtlar qo‘ynidagi termal buloqlar
Termal kurortlar haqida gap ketganda, Qozog‘iston kamdan-kam hollarda tilga olinadi. Olmaota viloyatida ochiq havoda issiq suvda o‘tirib, sovuqdan so‘ng isinadigan joy bor. Bu - qishda barcha olmaotaliklar va yaqin atrofdagi viloyatlar aholisi oqib keladigan Chunja termal buloqlaridir. Ko‘pchilik olmaotaliklar Chunjaga qisqa «termal dam olish» uchun atigi 1-2 kechaga kelishadi.
Bu yerga harorati +45 °C gacha bo‘lgan tabiiy mineral suv uchun kelinadi. Bu yerdagi hovuzlar ochiq bo‘lib, hatto manfiy haroratda ham cho‘milish mumkin.
Mehmon uylari va kichik mehmonxonalar buloqlar yaqinida joylashgan, hovuzlar esa ko‘pincha kechayu kunduz ishlaydi. Shuning uchun yulduzli osmon ostida ham cho‘milish imkoniyati bor.
Narxlar: Kirish narxi 60-120 ming so‘mni tashkil etadi, bir kechalik yashash esa 240-602 ming so‘mdan boshlanadi.
Qanday borish mumkin: Toshkentdan Olmotaga parvoz narxi 903 ming so‘mdan boshlanadi. Olmotadan Chonjigacha 4-5 soatlik yo‘l: avtobusda 60-84 ming so‘mga, taksida esa 361-481 ming so‘mga borish mumkin.
Maslahat: Agar birinchi marta borayotgan bo‘lsangiz, ortiqcha qatnovlardan qochish uchun buloqlar yaqinidagi turar joy bazasini tanlang.
Qishki Gruziya
Gruziya faqat Tbilisi, xinkali va vinodan iborat emas (garchi bularning barchasi bir-biriga mos kelsa-da). Mamlakat o‘zining mineral buloqlari va kurortlari bilan mashhur bo‘lib, u yerda tabiat, spa va faol dam olishni uyg‘unlashtirish mumkin. Qishda, ayniqsa, Borjomi va Bakuriani kombinatsiyasi juda qulay hisoblanadi.
Borjomi: issiq buloqlar va qor
Borjomida shahar bog‘ida qorli tog‘lar manzarasiga qaragan holda issiq oltingugurtli hovuzlarda cho‘milish mumkin. Qishda suvning harorati 32-38 °C ni tashkil etadi. Kurort ovqat hazm qilishga yordam beradigan va organizm tonusini saqlaydigan mineral suvlari bilan mashhur.
Ko‘proq qulaylik izlovchilar tabiat, suzish havzalari va parvarish dasturlarini o‘zida mujassam etgan Borjomi Palace kabi spa-muolajali mehmonxonalarda to‘xtashni afzal ko‘radilar.
Maslahat: Ertalab yoki kechqurun cho‘milish qulayroq, chunki bu vaqtda odamlar kamroq bo‘ladi. Albatta, byuvetga tashrif buyuring va park bo‘ylab sayr qiling.
Bakuriani: tog‘lar, chang‘i va spa
Borjomidan atigi 25 km uzoqlikda joylashgan Bakurianida termal muolajalarni faol dam olish bilan birlashtirish mumkin. Kurort barcha darajadagi chang‘i yo‘llari, bolalar va kattalar uchun snou-park, shuningdek, jakuzi va saunali SPA majmualarini taklif etadi. Chang‘ida uchgandan so‘ng basseynlarda issinish yoki mehmonxonada dam olish juda yoqimli.
Kurort o‘zining yumshoq tog‘ iqlimi bilan mashhur bo‘lib, ko‘pincha dam olish va sog‘liqni tiklash uchun, ayniqsa nafas olish bilan bog‘liq muammolari borlar tomonidan tanlanadi. Atrofdagi tog‘larda Bakuriani ignabargli o‘rmoni deb ataladigan joy bor. Shu sababli bu yerdagi havo fitonsidlar - havoni tozalashga yordam beradigan tabiiy biologik faol moddalar bilan to‘yingan, natijada bu yerda nafas olish ancha yengil.
Narxlar: Borjomidagi termal buloqlarga kirish 70 ming so‘m, spa-mehmonxonalarda tunash esa 1,08-1,4 million so‘mdan boshlanadi.
Qanday borish mumkin: Toshkentdan Tbilisiga borish-kelish 2,4-4,2 million so‘m turadi. Tbilisidan Borjomigacha 2,5-3 soatlik yo‘l: taksida bu 602-963 ming so‘mga tushadi, marshrutkada esa 120-180 ming so‘m. Borjomidan Bakurianigacha yana taxminan 1 soatlik yo‘l bor.
Maslahat: spa muolajalarini mavsumda oldindan band qilgan ma’qul.
Rossiya
Oltoy - bu bir vaqtning o‘zida termal dam olishning ikkita imkoniyatini taklif etadi va tanlovni oldindan amalga oshirish maqsadga muvofiq.
Belokurixa: puxta rejalashtirilgan dam olish
Agar shunchaki uchib kelib, xalat kiyib, bemalol isitinishni istasangiz, Belokurixaga borishingiz mumkin. Bu radonli vannalar, sanatoriyalar va spa-mehmonxonalarga ega kurort shahri. Bu yerda ertalab muolajalar qabul qilinadi, kunduzi sayr yoki chang‘i, kechqurun esa basseynda cho‘milish va kechki ovqat. Hech qanday ekzotika yo‘q, lekin issiq, toza va an’anaviy dam olish.
Belokurixadagi termal buloqlar yil bo‘yi ishlaydi. Suv radon va boshqa mikroelementlar bilan to‘yingan, shuning uchun bu yerdagi ta’sir oddiy sayrdan emas, balki to‘laqonli sog‘lomlashtiruvchi muolajalardan iborat.
Narxlar: Davolanish bilan birga yashash kuniga taxminan 602-722 ming so‘m turadi. Muolajasiz xonani bir kechaga 481-602 ming so‘mga tanlash mumkin. Yuqori darajadagi sanatoriylar - bir necha kecha uchun 3,3-3,6 million so‘mdan boshlanadi.
Qanday borish mumkin: Toshkentdan Barnaul va Biyskka borish uchun Moskva yoki Almati orqali bir marta almashinib uchish eng qulay hisoblanadi. Chiptalar narxi 1,8 mln so‘mdan boshlanadi. Barnaul va Biyskdan Belokurixa kurortiga muntazam ravishda avtobuslar va taksilar qatnaydi, yo‘l kamida to‘rt soat davom etadi.
Krasnodar o‘lkasi: sokin kurortda dam olish
Krasnodar o‘lkasining termal buloqlari qishki dam olishning ommalashgan shaklidir. Ularning ko‘pchiligi Mostovskiy tumanida, Qora dengiz qirg‘og‘idan bir soatlik masofada joylashgan.
Bu yerdagi suv taxminan 2000 metr chuqurlikdagi quduqlardan olinadi va +20-45 °C gacha isitiladi. U brom, yod, kalsiy va boshqa minerallar bilan boyitilgan. Kurort shakli oddiy: 3-4 kun, minimal ekskursiyalar, maksimal iliqlik va dam olish.
Qanday borish mumkin: Krasnodar yoki Mineralniye Vodiga uchish narxi 1,2 million so‘mdan 1,8 million so‘mgacha.
Narxlar: hovuzlarga kirish 84 mingdan 180 ming so‘mgacha; mehmonxonalarda tunash bir kecha uchun 301-722 ming so‘mni tashkil etadi.
Yevropa
Biroq, shubhasiz, Yevropadagi, ayniqsa Karlovi Vari va Budapeshtdagi termal dam olish an’anasiga teng keladigani yo‘q. Bu yerda o‘zingizni XIX asr yozuvchisidek his qilishingiz mumkin: go‘yo issiq buloqlarda g‘am-tashvishlardan xalos bo‘lish va ajoyib me’morchilik muhitidan ilhom olish uchun kelgandek.
To‘g‘ri, O‘zbekistondan yo‘l unchalik oson emas: ko‘pincha almashinuvli parvozlar bilan boriladi, Shengen vizasi talab etiladi. Shu bois, sayohatni oldindan puxta rejalashtirish va kattaroq mablag‘ ajratish kerak bo‘ladi. Ammo olinadigan taassurotlar, odatda, bunga arziydigan darajada bo‘ladi.
Budapesht: an’anaviy Yevropa ta’tili
Qishki Budapesht - har bir hammomi o‘z tarixiga ega bo‘lgan termal cho‘milish shahri. Mashhur Secheni cho‘milish maskani Budapesht va Yevropaning eng yirik hammom majmuasi hisoblanadi. Uning ochiq hovuzlari cho‘milishni haqiqiy kinematografik marosimga aylantiradi: suv ustida bug‘ suzadi, sovuq havo tetiklantiradi, nigoh esa qorli gumbazlar tomon yo‘naladi. Boshqa bir terma - Gellertda esa o‘zingizni qadimiy roman qahramonidek his qilasiz: marmar devorlar, qadimiy plitkalar, suvning ohangdor tovushi xuddi Ues Anderson filmlaridagidek o‘zgacha kayfiyat uyg‘otadi.
Ikkala termaning suvi kalsiy, magniy va sulfatlarga boy bo‘lib, bu yerga nafaqat davolanish, balki hordiq chiqarish uchun ham kelishadi.
Narxlar: kirish 204 mingdan 325 ming so‘mgacha; mehmonxonalarda tunash bir kecha uchun 698 ming - 1,4 million so‘mni tashkil etadi.
Qanday borish mumkin: Toshkentdan Budapeshtga Istanbul va Frankfurt orqali almashinuvchi reyslar mavjud. Yo‘l taxminan 10-13 soat davom etadi va Shengen vizasi talab etiladi. Borish-kelish chiptalarining narxi taxminan 4,8-6,6 million so‘mni tashkil qiladi.
Karlovi Vari: issiq buloqlar shahri
Karlovi Vari — katta jozibaga ega ixcham qishki kurortdir. Shahar o‘zining kolonnadalar, me’morchiligi, shifobaxsh mineral suvi va mahalliy maxsulotlari — Bexerovka (o‘tli likyor) va oplatkalari (yupqa, nachinkali yupqa vaflilar) bilan mashhur. Shahar markazida to‘g‘ridan-to‘g‘ri ichish mumkin bo‘lgan o‘nlab issiq suv buloqlari mavjud. Asosiysi, me’yorni saqlash: chunki haddan tashqari ko‘p ichish ich ketishini keltirib chiqarishi mumkin.
Shaharda jami 130 ga yaqin buloq mavjud, ammo ulardan faqat 12 tasi yaqqol davolash xususiyatlariga ega. Suvning harorati +30 dan +73 °C gacha bo‘lib, u an’anaviy tarzda bo‘g‘imlar, ovqat hazm qilish va asab tizimini qo‘llab-quvvatlash uchun qo‘llaniladi.
Tepla daryosi bo‘ylab sayr qilish, ayniqsa qishda ajoyib: qadimiy binolar, sokin ko‘chalar va mineralli suvning yengil hidi vaqt sekinlashgandek his tug‘diradi. Ertalab odamlar deyarli bo‘lmaydi, issiq suv bug‘i esa shahar uzra yoyilib turadi — aynan mana shu lahzalar uchun bu yerga tashrif buyurishadi.
Maslahat: ham termal suvlarda cho‘milishga, ham eski shahar bo‘ylab sayr qilishga va Pragaga tashrif buyurishga ulgurishingiz uchun 2-3 kunlik dam olishni rejalashtiring. Odatda ish kunlari tinchroq bo‘ladi, Pragadan yoki Pragagacha bo‘lgan yo‘l esa taxminan 2-3 soat davom etadi.
Narxlar: buloqlarga kirish narxi 120-325 ming so‘mdan boshlanadi. SPA-mehmonxonalarda tunash narxi 963 ming so‘mdan 1,6 million so‘mgacha.
Toshkentdan qanday borish mumkin: Pragaga Istanbul, Dubay va Frankfurtda bir marta almashinib. Aeroportdan Praga markazigacha 30-40 daqiqa, Karlovi Vargacha esa yana 2-3 soat yo‘l. Borish-kelish chiptalarining narxi taxminan 5,4-7,2 million so‘mni tashkil etadi.
Buloqlar yonida dam oluvchilarga maslahatlar
Termal buloqlarga qachon borgan ma’qul?
Issiq buloqlar yil bo‘yi ishlaydi, ammo qishda ularning ta’siri eng kuchli bo‘ladi. Sovuq havo va issiq suvning qarama-qarshiligi bu yerga kelishdan ko‘zlangan «yangilanish» tuyg‘usini beradi.
O‘zim bilan nimalarni olishim kerak?
Sochiq, basseyn uchun rezina shippak va cho‘milish kiyimi - asosiy narsalar. Binolar orasida o‘tish uchun issiq xalat yoki uzun kurtka ham asqotadi. Cho‘milgandan so‘ng teri ko‘pincha quriydi, shuning uchun krem yoki losyon foyda beradi.
Termal vannalardan qanday to‘g‘ri foydalanish kerak?
Bir kirishda buloqda 15-20 daqiqadan ortiq o‘tirmang. Yaxshisi, tanaffuslar bilan bir necha marta qisqa vaqt cho‘milgan ma’qul. Agar surunkali kasalliklaringiz, ayniqsa yurak-qon tomir kasalliklari bo‘lsa, albatta oldindan shifokor bilan maslahatlashing.
Cho‘milgandan so‘ng tana faol ravishda suyuqlik yo‘qotadi. Oddiy suv iching, spirtli ichimliklarni esa ichishga shoshilmang - ular qon tomirlariga zo‘riqishni kuchaytiradi.
Cho‘milishdan tashqari yana nima qilsa bo‘ladi?
Termal dam olish deyarli har doim boshqa faoliyatlar bilan osonlikcha uyg‘unlashadi: piyoda sayr, rafting, chang‘i, snoubord, ekskursiyalar, taom tatib ko‘rish yoki shunchaki sayr qilish. Shunday qilib, sayohat yanada mazmunli bo‘ladi va faqat «suvda yotish»dan iborat bo‘lib qolmaydi.
Foydali maslahat: eng tinch vaqtlar - erta tong va kechki payt. Kunduzi, ayniqsa dam olish kunlari odatda odamlar ko‘proq bo‘ladi.
Termal buloqlar plyajda dam olishga yaxshi alternativ hisoblanadi. Formatni har qanday ehtiyojga moslash mumkin: Chunjeda qisqa dam olish, Belokurixadagi osoyishta sanatoriyda bo‘lish yoki tarix va me’morchilik bilan boyitilgan Yevropaga uzoqroq sayohat.
Eng muhimi, ko‘p joylarni aylanish va muolajalar sonini oshirishga intilmaslik kerak. Ba’zida ochiq havoda issiq suvga tushish, sovuq havoda nafas olish va bir-ikki kunlik bo‘sh vaqt qishning uzoq tuyulmasligiga yetarli bo‘ladi.
