Tailand yoki Vyetnam: Janubi-Sharqiy Osiyo bilan tanishishni qayerdan boshlash kerak?

Siz Janubi-Sharqiy Osiyoga birinchi marta borishga tayyorlanayapsiz, lekin Tailand va Vyetnam o‘rtasida tanlov qilishga qiynalayapsiz, shundaymi? Men ham xuddi shunday vaziyatga tushgandim. Shuning uchun juda berilib ketib, mavsumning eng cho‘qqisida – ya’ni dekabr oyida ikkala mamlakatni ham ko‘rishga qaror qildim. Hammasini – qayer unchalik toza emas, qayer chiroyliroq, qayerda ko’proq yoqimli atmosfera va qulay transport borligi haqida haqqoniy tarzda so’zlab beraman.

Eng shirin joyi ijtimoiy tarmoqda-ku, nega siz hamon obuna bo‘lmadingiz?

Telegram

Instagram

Viza va parvoz: qanday yetib borish mumkin?

Tailand. O‘zbekiston fuqarolari uchun 60 kun muddatga vizasiz rejim amal qiladi. Uzoqroq qolishni istasangiz, vizani shu joyning o‘zida 1900 bat (taxminan 700 ming so‘m) evaziga yana 30 kunga uzaytirishingiz mumkin. Toshkentdan Bangkok yoki Pxuketga qulay 6-6,5 soatlik parvoz.

Vyetnam. Bu yerga Toshkentdan Nyachangga to‘g‘ridan-to‘g‘ri reyslar mavjud (yo‘lda taxminan 7 soat), ammo chastota mavsumga bog‘liq, odatda bu haftasiga 2 ta reys.

Agar siz O‘zbekiston fuqarosi bo‘lsangiz va Vetnamga uchayotgan bo‘lsangiz, viza olishning ikki usuli mavjud: Toshkentdagi elchixona orqali yoki e-visa rasmiylashtirish.  Birinchi holatda siz ariza topshirasiz, pasportingizni qoldirasiz va 4-5 ish kunini kutasiz.

Eng tez va qulay variant — kelganingizda Vietnamvisaembassy.org orqali viza rasmiylashtirishdir. Onlayn shaklni to‘ldirib, xizmat haqini to‘laysiz va 1-2 ish kunida tasdiq xati olasiz. Xatni chop etib, pasport, ikkita fotosurat va aeroportda viza shtampini to‘lash uchun naqd AQSH dollari bilan birga olib ketish kerak. Uchib kelgach, hujjatlar paketini VOA peshtaxtasida topshirasiz va vizani to‘g‘ridan-to‘g‘ri pasportingizga olasiz.

Muhit: “o‘zingnikidek” erkin yoki jangari film qahramonidek

• 

  Pxuketda hammasi turistlar uchun
• 

  Vyetnamda esa chinakam hayot qaynaydi

Tailand — Osiyoning demo versiyasi. Bu yerda hamma narsa mayin, xotirjam va intuitiv ravishda tushunarli. Tailandliklar doim tabassum qilishadi va deyarli hamma joyda ingliz tilida gapirishadi, shuning uchun “tarjima qiyinchiliklari” sizga tahdid solmaydi — sizni darhol “o‘zlarinikidek” qabul qilishadi. Pxuket sayyohlar uchun maksimal qulaylikka moslashtirilgan bo‘lsa, Bangkokda esa shiddatli sur’atga qaramay, u yerdagi sokin bog‘larda yoki daryo bo‘ylarida osongina yashirinish mumkin. Bu yer mintaqa bilan birinchi marta tanishish uchun eng maqbul variant.

Vyetnam — chinakam hayot va xaos haqidagi alohida hikoya. Bu yerda inglizcha yozuvlar kamroq va harakat ko‘proq. Nyachang tong otguncha musiqa va savdo-sotiq bilan jo‘sh ursa, Dalatda esa sizni salqinlik, qahva plantatsiyalari va sharsharalar kutib turadi. Shovqin-surondan charchab qolsangiz, Fukuokaning baliqchilar qishloqlariga qochishingiz mumkin, agar jonli hayot kerak bo‘lsa, Xoshiminga yo‘l oling. U yerdagi bayklar hasharotlar galasi kabi bir vaqtning o‘zida har tomonga uchib harakatlanadi — ko‘rinishi qo‘rqinchli, lekin bu xaos negadir o‘z samarasini beradi.

Xuddi shu mavzuda ko'proq ma'lumot

Nyachang bo‘yicha yo‘lko‘rsatma: o‘zbekistonlik sayohlar uchun plyajlar, viza va layfxak

Plyajlar va tabiat

Agar siz ish kompyuteringiz ekranidagi kabi manzaralarni qidirayotgan bo‘lsangiz, Tailandga borishingiz mumkin. Men Pxuketda (Patong, Kata, Karon plyajlarida) bo‘ldim. U yer chiroyli, lekin juda shovqinli. Agar tinchlikni xohlasangiz, tajribali sayohatchilar uzoqroqqa ketishni maslahat berishadi:

• Ko Lipe — aytishlaricha, bu oq qumli yerni “Maldiv orollarining mini versiyasi” deyishadi.
• Similan orollari — snorkling va dayving uchun eng yaxshi joy, lekin odamlar ham yetarli darajada.
• Ko Pangan — bu yerda ertalabgacha davom etadigan bazmlar ham, hech kim yo‘q sokin ko‘rfazlar ham bor.

O‘zim Pxi-Pxi, Reyli-bich va Krabi yaqinidagi orollarni o‘rgandim. Tasdiqlayman: dekabr oyida suv tiniq va firuza rangda bo‘ladi. Ammo e’tibor bering: yomg‘irli mavsumda (iyun-oktyabr) axlat va suv o‘tlari suzib kelishi mumkin.

Xuddi shu mavzuda ko'proq ma'lumot

Mening ilk bor Tailandda viza-ran qilganim yoki qanday qilib chegarada deport bo‘lishimga bir bahya qolgani haqida

Vyetnamda vaziyat bunchalik oddiy emas. Men asosiy manzillarni tekshirdim:

• Nyachang. Keng plyajlarga ega serg‘ayrat shahar. Ammo bir lekini bor: dengiz ko‘pincha oqim tufayli loyqa bo‘ladi va bo‘rondan keyin qirg‘oqda axlat uyumlarini ko‘rdim. Bunaqa suvda cho‘milging kelmaydi.
• Fukuok. Sokin orol, shinam plyajlar, changalzorlar. Infratuzilmaga ega, ammo doimiy qurilishlar dam olishga halaqit qiladi — orolda faol ravishda mehmonxonalar qurilmoqda.
• Halong ko‘rfazi. Xuddi boshqa sayyoraga o‘xshaydi: zumrad suvning ichidan minglab karst qoyalari chiqib turadi. Cho‘milish uchun bu yer sovuqlik qiladi, lekin tomosha qilish shart.
• Muyne. Bu yerga plyajda dam olish uchun emas, shamol uchun kelishadi. Bu kaytserfingchilar uchun eng yaxshi joy. Shunchaki cho‘milmoqchi bo‘lsangiz, bu yerga bormaganingiz ma’qul, to‘lqinlar sizni yiqitib tashlaydi.

Nimada harakatlanish mumkin?

• 

  Vyetnamdagi yo'l
• 

  Bayk mening favoritim

Tailandda deyarli hamma transportni sinab ko‘rdim va yo‘llar qiroli bayk bo‘lib chiqdi. Ijara narxi kuniga 250-300 bat atrofida (taxminan 95-115 ming so‘m). Tuk-tuklar oddiy transportlarga qaraganda ancha qimmatroq attraksion hisoblanadi, avtobus va minivenlarda esa konditsionerlar maksimal darajada ishlaydi (o‘zingiz bilan qalinroq kiyim oling!). Orollar orasida paromlarda harakatlanish qulayroq, shaharlarda esa “Grab” va “Bolt” taksi ilovalari juda yaxshi ishlaydi.

Vyetnamda trafik zichroq, shuning uchun baykni ijaraga olib ham qiynalasiz — mahalliy ritmga ko‘nikish kerak. Ammo bu yerda mototaksilar juda yaxshi rivojlangan: agar yolg‘iz bo‘lsangiz, “Xe Om” haydovchilarini izlang. Jamoa bo’lib harakatlanish uchun “Grab” va “Gojek” ilovalari qulay — bu tez va arzon yechim. Shaharlararo sayohatlar uchun esa dohiyona ixtiro bor — sleeping bus. Bu yo‘lda uxlash imkonini beradigan, to‘liq yotoq joylari bilan jihozlangan avtobuslardir.

Ovqat: olov va yangi mahsulotlar qarama-qarshiligi

Osiyoga yangi kelgan odamning asosiy qo‘rquvi — och qolish yoki zaharlanish. Spoyler: och qolmaysiz, zaharlanmaslik uchun esa bitta oltin qoida yodda tuting — navbat bor joyda ovqatlaning. Agar odamlar oqimi katta bo‘lsa, mahsulotlar shunchaki buzilishga ulgurmaydi. Suv borasida ham muhim qoida bor: na Tailandda, na Vyetnamda jo‘mrakdan suv ichish mumkin emas. Qadoqlanganini sotib oling, u har bir burchakda sotiladi.

Tailand: nordon, shirin va juda achchiq

Tay oshxonasi — bu ta’mlar konstruktori. Agar siz achchiq taomni yoqtirmasangiz, “no spicy” (ziravorsiz) degan sehrli ibora sizni qismangina qutqaradi — mahalliy me’yorlarga ko‘ra, taom baribir biroz achchiq bo‘ladi.

Nimalarni tatib ko’rish mumkin:

• Tom yam — mamlakatning asosiy sho‘rvasi, nordon-achchiq, krevetka va lemongrass solinadi.
• Pad-tay — tuxum, sous va yong‘oqlar bilan qovurilgan guruchli lapsha (odatda achchiq bo’lmaydi).
• Som Tam — yashil papayadan tayyorlangan salat. Ehtiyot bo‘ling: u ba’zan juda juda achchiq bo‘lishi mumkin.
• Mango stiki rays — yopishqoq guruch, shirin mango va kokos sutidan tayyorlangan desert.

Xuddi shu mavzuda ko'proq ma'lumot

Qanday qilib Toshkentdagi ofisimni tashlab, cho‘ntakda 1000$ bilan Tailandga ko‘chib ketganim haqida

Vyetnam: ko’katlar va qarsildoq taomlar

Bu yerda taomlar yengilroq va barraday (yangi mahsulotlardan tayyorlangan) tuyuladi. Vyetnamliklar limon, yalpiz, rayhon va boshqa ko‘plab xushbo‘y o‘tlarni qo‘shishni juda yoqtirishadi.

Nimalarni tatib ko’rish mumkin:

• Fo-bo — mol go‘shti, guruchli lapsha va bir talay ko‘katlar o‘ramidan iborat afsonaviy sho‘rva.
• Ban Xeo (Banh Xeo) — men eng ko‘p iste’mol qilgan taom — guruch unidan tayyorlangan, ichi to‘ldirilgan, qarsildoq quymoqlar.
• Ban mi — fransuzlarning merosi: pashtet, go‘sht va sabzavotli bagetlar.
• Qahva — ayniqsa tog‘li Dalatdagisi, u yerda qahva quyuq va kuchli shokolad iforiga ega.
• Barra rollar (Goi Cuon) — guruchli qog‘ozga o‘ralgan krevetka, ko‘katlar va cho‘chqa go‘shti. Qovurilmaydi, barra va juda yengil.

Byudjetni solishtiramiz: qayerda arzonroq?

Qisqacha qilib aytsam: ryukzak va kichik byudjet bilan Vyetnamga borish manfaatliroq. U yerda savdolashish osonroq (ba’zida narxni ikki baravarga tushirish mumkin) va turar-joy ham arzonroq. Tailand qimmatroq, ammo u yerda “laksheri” (shohona) dam olishni xohlovchilar uchun ko‘proq tanlov mavjud — villalardan tortib tomida basseyni bo‘lgan mehmonxonalargacha.

Quyida Tailand va Vyetnamdagi o‘rtacha narxlar taqqoslab chiqdik (kurs o‘zgarishi mumkin, lekin raqamlar tartibi quyidagicha):

Xuddi shu mavzuda ko'proq ma'lumot

Sayohatni qanday mustaqil rejalashtirish va aqldan ozib qolmaslik mumkin?

Xulosa: qayerni tanlash kerak?

Tailandga boring, agar:

• Siz Osiyoga birinchi marta uchayotgan bo’lsangiz va madaniy shoksiz, yengil moslashib ketsa bo’ladigan muhitni xohlasangiz;
• Siz uchun xizmat sifati, qulaylik va ingliz tili muhim bo’lsa;
• Maqsad — plyajda ideal darajada dam olish va tiniq suvda suzishni xohlasangiz.

Vyetnamga boring, agar:

• Siz tejashni xohlasangiz: bu yerda turar joy va oziq-ovqat sezilarli darajada arzonroq;
• Sizga shunchaki shezlong emas, balki tog‘lar, xayking, ulkan g‘orlar va sarguzashtlar kerak bo’lsa;
• Siz eng yaxshi quyosh botishi manzarasini izlayotgan bo’lsangiz: quyosh bu yerda to‘g‘ri dengizga botib, osmonni pushti rangga bo‘yaydi.

Osiyo har qanday holatda ham sizni “silkitib”, qayta jonlantiradi. Bir marta ta’mini bilgach, o‘zingizni to‘xtatib turishingiz qiyin bo‘ladi.