Dam olish kunlari qayerga borish mumkin: shahardan qochish uchun bahorgi yo‘nalishlar
Bahor kelib, jiyda gullaganda qayerda hordiq chiqarish mumkin.
Bahorgi O‘zbekiston — bu nafaqat yodgorlik shaharlar, balki bir necha haftagina gullab-yashnaydigan tabiat go‘shalarining rang-barang jilvasidir. Xoh u quyosh energiyasi geliokompleksining futuristik ko‘zgulari, xoh Tovoqsoyning shovqinli sharsharalari yoki cheksiz lola dalalari bo‘lsin — bu joylarning har biri shahar hayotida yetishmaydigan ruhiy tetiklikni beradi. Sayohatni kechiktirmang: gullash mavsumi o‘tkinchi, ilk ko‘klam yashilligi va musaffo tog‘ havosi bergan taassurotlar esa butun yil davomida siz bilan qoladi.
Maqolada bir kunlik sayohatga borish yoki butun dam olish kunlariga mo‘ljallangan maskanlar ro‘yxatini tuzdik.
Chechaklar va manzaralar uchun qayerga borish kerak
O‘zbekiston tabiati shiddat bilan o‘zgaradi: bugun oddiy yashil tepalikdek tuyulgan joy bir hafta avval lola dalasi bo‘lgan. Aynan hozir borish yoki yaqin oylar uchun rejalashtirishga arziydigan maskanlar ro‘yxati bilan tanishing.
Lolaqizg‘aldoq dalalari
Mavsum: aprel oxiri — may boshi.
Qanday boriladi: faqat shaxsiy avtomobilda. Ommabop yo‘nalishlar — Krasnogorsk va Parkent tomon.
Lokatsiya: Krasnogorsk.
Yorqin ranglar ixlosmandlari uchun bu davr haqiqiy vizual zavq davri. Och yashil adirlar fonida yastanib yotgan ulkan qizil lolaqizg‘aldoq gilamlari — bahorning asosiy foto maskani. Vaqtni boy bermaslik muhim, chunki gullash atigi bir necha hafta davom etadi. Har yili lolaqizg‘aldoq dalalari yangi joylarda paydo bo‘ladi, shuning uchun bu o‘ziga xos izlanish.
Bo‘ritovning gullagan bog‘lari
Mavsum: mart oxiri.
Qanday boriladi: shaxsiy avtomobilda yoki sayyohlar guruhi tarkibida.
Lokatsiya: Bo‘ritov.
Bo‘ritov — mart oyining oxirida yovvoyi bodom gullariga burkanadigan cheksiz adirlar hududi. Moviy osmon fonidagi nafis oq-pushti bulutlar romantik muhit yaratadi. Yo‘ldan tog‘ga biroz ko‘tarilish kerak bo‘ladi, bog‘larning o‘zida esa dam olish va piknik qilish mumkin. Bu manzilga sayyohlik guruhlari ko‘p keladi, shu bois dam olish kunlari gavjum bo‘lishiga tayyor turing.
Samarqand va Qo‘qon lavanda dalalari
Mavsum: iyun–iyul.
Qanday boriladi: viloyatlargacha poyezdda, u yerdan fermalargacha esa taksida.
Lokatsiya: Qo‘qonda — Doctor Ali salomatlik markazi, Samarqandda — Flora Baumshule.
Endi O‘zbekiston ham o‘zining “Provansi” bilan maqtana oladi. Bu fermalarda gektarlab xushbo‘y lavanda dalalarini ko‘rish mumkin. Gullashning avj pallasi iyun oxiriga to‘g‘ri keladi. May oyining oxiridayoq bu yerda ajoyib muhitdan bahramand bo‘lib, chiroyli suratlar olish mumkin. Fermalarning ish vaqtini oldindan qo‘ng‘iroq qilib aniqlab olish ma’qul.
Tovoqsoy sharsharalari
Mavsum: aprel–may.
Qanday boriladi: Xo‘jikent bekatigacha elektr poyezdida, u yerdan taksida boriladi. Yoki “Buyuk Ipak Yo‘li” metro bekatidan Tovoqsoy qishlog‘igacha taksida borish mumkin.
Lokatsiya: Tovoqsoy kanyoni.
Bahorda Tovoqsoy haqiqiy sharsharalar kaskadiga aylanadi. Unga olib boradigan yo‘l asrlar davomida suv o‘yib yaratgan g‘aroyib shakldagi qoyalarga ega kanyon orqali o‘tadi. Bu bir kunlik, qiyin bo‘lmagan sayohat uchun eng chiroyli fotosuratlar olish mumkin bo‘lgan yo‘nalishlardan biridir. Hudud chegaraga yaqin joylashgani uchun o‘zingiz bilan pasport yoki ID karta oling.
Urung‘och nefrit ko‘li
Mavsum: aprel oxiridan iyun boshigacha.
Qanday boriladi: sayyohlik guruhlari tarkibida. Qo‘riqxona hududida joylashgan, o‘zingiz bilan pasport olishingiz kerak. Yo‘lning so‘nggi soatlari yo‘lsiz hududdan iborat bo‘lib, bu yerdan yo‘ltanlamas mashinalarda o‘tish yoki piyoda ko‘tarilish mumkin.
Lokatsiya: Urung‘och nefrit ko‘li.
Nefrit rangidagi billurdek tiniq suv – bu joyning asosiy ramzi. Bahorda quyi ko‘l qorli tog‘ cho‘qqilarini aks ettirib to‘lib-toshadi. Quyi ko‘lgacha piyoda yoki mashinada borish mumkin, yuqori ko‘lga esa faqat yonbag‘irlab, piyoda chiqiladi. Ko‘tarilishni osonlashtirish uchun o‘zingiz bilan trekking tayoqlarini olgan ma’qul. Ishoning, tepadan ko‘rinadigan manzara shunga arziydi.
Nevich va Qizilsoy
Mavsum: apreldan may oxirigacha.
Qanday boriladi: Parkent tumanidagi Nevich qishlog‘igacha shaxsiy avtomobil yoki taksida.
Lokatsiya: Qizilsoy.
Suv bo‘yida sokin hordiq chiqarishni xush ko‘radiganlar uchun mos yo‘nalish. Shahar shovqin-suronidan qochib, qoyalar soyasida dam olish uchun ajoyib maskan. To‘laqonli sayohatni rejalashtirganlar uchun ham bu joy juda mos keladi – bu yerda sharshara joylashgan. Qiziqarli fakt: bir vaqtlar qishloqda Sovet kosmik dasturining sinov poligoni bo‘lgan. Poligonning ulkan to‘rtburchak shaklidagi karkasi hanuzgacha saqlanib qolgan va uzoqdan ko‘rinib turadi. Omadingiz kelsa, may oyining boshlarida yo‘l-yo‘lakay gullagan lolazorlarni ko‘rishingiz mumkin.
Oqtosh va Qoraqiyasoy
Mavsum: martdan to kech kuzgacha.
Qanday boriladi: G‘azalkent orqali Bo‘stonliq tumani tomon mashinada. Xo‘jikent bekatidan taksida Qoraqiyasoy so‘qmog‘ining boshigacha yetib olish mumkin.
Lokatsiya: Qoraqiyasoy so‘qmog‘i.
Oqtosh o‘zining mo‘tadil mikroiqlimi va salqin o‘rmonlari bilan, Qoraqiyasoy esa sharsharali go‘zal kanyoni bilan mashhur. Bu yengil trekking uchun ajoyib yo‘nalish: daryo bo‘ylab qoyalar va bahorgi rang-barang o‘tlar qurshovidagi so‘qmoq uzoqqa cho‘ziladi. Ayrim so‘qmoqlarda rassomlarga tegishli tashlandiq dala hovlilariga duch kelish mumkin. Shuningdek, bu hududda ko‘plab mehmon uylari va zamonaviy mehmonxonalar joylashgan.
Tuzkon ko‘li va Pistalitog‘
Mavsum: bahorda aprel o‘rtalarigacha gullash davri, yozda esa plyajda dam olish.
Qanday boriladi: shaxsiy avtomobilda yoki sayyohlik guruhlari tarkibida. Toshkentdan bir tomonga yo‘l 5–6 soat davom etadi.
Lokatsiya: Pistalitog‘.
Tuzkon — Jizzaxdagi Arnasoy ko‘llar tizimining bir qismi bo‘lgan ulkan sho‘r ko‘l. Bahorda Pistalitog‘ etaklarida yovvoyi bodom gullaydi. Moviy suv va cho‘l landshaftlari bilan keskin kontrasti tufayli bu joy chinakam yovvoyi va go‘zal maskanga aylanadi. Qirg‘oqlari ko‘zga tashlanmagani uchun bu haqiqatan ham dengizdek taassurot uyg‘otadi. Ko‘lning boshqa bir qismida o‘tov uslubidagi etno-mehmonxona bor, yozda esa bu yerda cho‘milish va quyoshda toblanish mumkin.
Yilning istalgan vaqtida qayerga borish mumkin
Bu manzillar yil davomida o‘z jozibasini yo‘qotmaydi. Bu yerlarga gullash davri yoki mavsumni kutmay, bo‘sh dam olish kunlarida ham borish mumkin (lekin sayohatingiz yanada maroqli o‘tishi uchun eng qulay davrlarni ham ko‘rsatdik).
Quyosh instituti (“Fizika–Quyosh” geliokompleksi)
Mavsum: bahorda martdan aprelgacha va kuzda sentyabrdan noyabrgacha.
Qanday boriladi: Qo‘yliqdan yo‘nalishli taksida Parkent shaharchasigacha, u yerdan esa taksida borish qulay. Yoki to‘g‘ridan-to‘g‘ri Qo‘yliqdan taksida ham borish mumkin. Shuningdek, ekskursiya guruhi tarkibida ham tashrif buyurish mumkin.
Lokatsiya: “Fizika–Quyosh” geliokompleksi.
Bu – dunyoda kamyob majmua. Bunday inshootlar dunyoda atigi ikkita: biri Fransiyada, ikkinchisi O‘zbekistonda. U Parkent yaqinida joylashgan. Hududda minglab ko‘zgulardan iborat ulkan konsentrator mavjud bo‘lib, u quyosh energiyasini bir nuqtaga jamlaydi. Bu nafaqat ilmiy obyekt, balki futuristik suratlar uchun ajoyib maydon hamdir. Yuqoridagi kuzatuv maydonchasidan atrofdagi tepaliklarning manzarasi kaftdek ko‘rinadi. U yerga piyoda yoki liftda chiqish mumkin. Ilmiy institut binosi ichida majmuaning saksoninchi yillardagi faoliyatiga oid eksponatlar va ko‘rgazma stendlari bilan tanishish mumkin. O‘zingiz bilan pasport olishni unutmang — uni nazorat-o‘tkazish punktida so‘rashlari mumkin.
Zomin
Mavsum: bahorda martdan aprelgacha, kuzda sentyabrdan noyabrgacha.
Qanday boriladi: “Afrosiyob” poyezdida Jizzaxgacha borib, u yerdan taksida borish; “SilkAvia” aviakompaniyasi samolyotida yoki Toshkentdagi “Olmazor” metro bekatidan taksida borish mumkin.
Lokatsiya: Zaamin National Park.
Zomin nafaqat sanatoriylari, balki qalin ignabargli o‘rmonlari va poytaxt atrofidagi tabiatdan farq qiladigan o‘simlik olami bilan ham mashhur. Bu joy toza havodan bahra olishni va jazirama issiqda ham yashillikka burkanib turadigan tog‘ manzaralarini ko‘rishni istaganlar uchun ayni muddao. Hozirgi kunda Zomin – mehmonxonalar, faol hordiq turlari va mashhur shisha ko‘prikni o‘z ichiga olgan zamonaviy sayyohlik klasteridir. Hammasini sinab ko‘rishga ulgurish uchun u yerga bir necha kunlik sayohat qilishga arziydi.
So‘qoq
Mavsum: bahorda martdan aprelgacha, kuzda sentyabrdan oktyabrgacha.
Qanday boriladi: eng osoni shaxsiy avtomobilda (Toshkentdan taxminan 50 daqiqa) yoki taksida.
Lokatsiya: So‘qoq qo‘riqxonasi.
So‘qoq – Parkent shaharchasi yaqinidagi ignabargli o‘rmonga ega qo‘riqxona. Bu yerda kun bo‘yi sayr qilish mumkin. Kirish qismidan so‘qmoqlar turli tomonga ketadi: pastga – soyga, tepaga – manzarali maydoncha va meteostansiyaga, to‘g‘riga – “kuylaydigan” g‘orlarga. Mahalliy taomlardan – ko‘katli So‘qoq somsasi va xushbo‘y kabobni albatta tatib ko‘ring.
Oqsoqota
Mavsum: bahorda martdan aprelgacha, kuzda sentyabrdan noyabrgacha.
Qanday boriladi: G‘azalkentdan G‘ijol qishlog‘i tomon shaxsiy avtomobil yoki taksida, shuningdek, sayyohlik guruhlari tarkibida.
Lokatsiya: Oqsoqota.
Toshkent viloyatidagi eng keng va go‘zal daryoli vodiylardan biri. Bahorda bu yerdagi tog‘ yonbag‘irlari zumrad tusga kiradi, daryo esa sersuv bo‘ladi. Bu joy pikniklar va tik nishabliksiz uzoq sayrlar uchun juda mos. Burilishda manzaralar keskin o‘zgaradi: qirg‘oqda dam olish uchun suv bo‘yiga tushish yoki tik qoyalardan vodiy manzarasini tomosha qilish uchun tepaga ko‘tarilish mumkin.
Kiyik fermasi
Mavsum: yil davomida.
Qanday boriladi: shaxsiy avtomobilda yoki “Buyuk Ipak Yo‘li” metro bekatidan taksida.
Lokatsiya: Kiyik fermasi.
Bolalar bilan oilaviy hordiq uchun ajoyib maskan. Bu yerda nafaqat dog‘li kiyiklarni tabiiy sharoitga yaqin muhitda tomosha qilish, balki ularni qo‘l bilan boqish ham mumkin. Bahorda ferma atrofi yanada yam-yashil bo‘ladi.
Lashkarak
Mavsum: bahorda martdan maygacha, kuzda sentyabrdan oktyabrgacha.
Qanday boriladi: avtomobilda Angren shahri tomon, so‘ngra Qurama tizmasidagi Lashkarak qishlog‘igacha boriladi.
Lokatsiya: Lashkarak.
Qadimiy tarixga va ko‘p pog‘onali sharsharaga ega tog‘ qishlog‘i. Bahorda sharshara eng sersuv bo‘lib, yam-yashil ko‘katlarga burkanadi, daradan o‘tuvchi yo‘lning o‘zi esa alohida bir sarguzashtdir. Bu yerning o‘simlik dunyosi butunlay boshqacha: uni haqiqiy o‘rmon deb atash mumkin. Atrofni yaxshi biladigan gid hamrohligida, sayyohlik guruhlari tarkibida borgan ma’qul.
Maqoladagi ayrim suratlar muallif tomonidan olingan, ba’zi tasvirlar esa Shutterstock’dan olingan.
