O‘qish uchun Venaga qanday ko‘chib o‘tganim haqida: hujjatlar, byurokratiya va narxlar

Mening ismim Murod, yoshim 23 da. Bir yildan beri Venada magistraturada oʻqiyapman. Koʻchib oʻtishdan oldin Toshkentda yashaganman, Plexanov nomidagi Rossiya iqtisodiyot universitetini tamomlaganman va marketing sohasida ishlaganman. Ishim yaxshi, hayotim barqaror edi va ochigʻini aytsam, Oʻzbekistondan ketishga alohida ehtiyoj yoʻq edi.

Ammo menda doim bir gʻoya bor edi chet elda yashash va oʻqish. Oʻzimni sinab koʻrgim kelardi — boshqa davlatda yolgʻiz qolib, hamma narsani noldan qurish qanday boʻlishini bilmoqchi edim. Bu qiyin sinov boʻlishini tushunardim, lekin bunga tayyor edim. Hozir men sizlarga Avstriyaga qanday oʻqishga kirish va bu mamlakatda oʻrnashish haqida soʻzlab beraman.

Nega Yevropani tanladim?

• 

  Parlament
• 
• 
• 

  Opera

AQSh madaniyati menga hech qachon yaqin boʻlmagan — u yerda hamma narsa doimiy poyga va ishga bogʻlangan. Osiyo ham qiziqarli variant boʻlib tuyulgan edi, lekin men aynan Yevropa tajribasini xohlardim: koʻhna shaharlar, hayotning osoyishta maromi, arxitektura va muzeylar. Shuning uchun men Yevropadan universitetlar qidirishni boshladim.

Men bir nechta davlatni koʻrib chiqdim: Niderlandiya, Italiya, Vengriya va Chexiya. Dastlab Niderlandiyaga borishni rejalashtirgandim, lekin u yerda oʻqish taxminan 12 ming yevro turardi, buning ustiga hayotning oʻzi ham ancha qimmat. Budapeshtni yaxshi bilaman, chunki u yerda koʻp marta boʻlganman. Shahar ajoyib, lekin u yerda ish bozori kichik, til esa ancha murakkab. Italiyada ham variantlar bor edi, lekin tanishlarim u yerda yashash guvohnomasini ba’zan yarim yil va undan ham koʻproq kutishlarini aytishgandi.

Yakunda Vena ideal shahar boʻlib tuyuldi: bu yerda qulay transport, yaxshi ish bozori, yuqori turmush darajasi, xavfsizlik va tozalik mavjud. Menimcha, bu aynan koʻpchilik tasavvur qiladigan oʻsha “klassik Yevropa”dir.

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Avstriyaga qanday qilib oʻqishga kirdim?

 Lauder Business School

Butun jarayonni agentliklar orqali amalga oshirdim. Va bu yerda mening asosiy maslahatim: vositachilarni juda diqqat bilan tanlang. Men uchta turli kompaniya bilan ishladim va ba’zida jarayonni oʻzim yaxshiroq tushunayotgandek bo’lardim.

Ayniqsa, bu Oʻzbekiston fuqarolarining hujjatlari bilan bog’liq edi. Masalan, menda sudlanmaganlik toʻgʻrisidagi ma’lumotnoma bilan muammo yuzaga keldi. Ma’lum boʻlishicha, MyGov`dan olingan standart elektron ma’lumotnoma konsullik uchun mos kelmas ekan. Davlat organlari orqali beriladigan va toʻgʻri tasdiqlanishi (apostil qilinishi) kerak boʻlgan maxsus versiya zarur bo’larkan. Bu kichik narsa, lekin u tufayli jarayon juda choʻzilib ketishi mumkin.

Agentlik xizmatlarining narxi paketga bogʻliq. Ba’zi agentliklar 1 000 EUR (taxminan 13 965 388 UZS) dan 3 000 EUR (taxminan 41 896 163 UZS) gacha haq oladi. Men soddaroq variantni tanladim, chunki hujjatlarning bir qismini oʻzim tayyorlagandim. Agentlik koʻproq maslahatchi rolini bajardi: men ularga tayyor hujjatlarni tekshirish uchun yuborardim, ular hammasi toʻgʻri rasmiylashtirilganini koʻrib chiqishardi, ba’zida nimalarni tuzatish kerakligini aytib turishardi va topshirishning rasmiy qismida yordam berishardi. Shuningdek, ular oʻqishga kirish uchun motivatsiya xatlari bilan ham biroz yordam berishdi — matn tuzilishini tekshirishdi, izohlar berishdi va arizada nimaga koʻproq urgʻu berish kerakligini koʻrsatishdi. Yakunda xizmatlar menga taxminan 900 USD (taxminan 10 909 987 UZS) ga tushdi. 

Ochigʻini aytsam, xohish boʻlsa, butun jarayondan toʻliq mustaqil ravishda ham oʻtish mumkin. Internetda ma’lumotlar ancha koʻp, universitetlar esa odatda oʻz saytlarida talablarni batafsil bayon qiladi. Ammo agentlik vaqtni tejashga va ayniqsa, agar siz birinchi marta hujjat topshirayotgan boʻlsangiz va tizim qanday ishlashini yaxshi tushunmayotgan boʻlsangiz, stress darajasini biroz kamaytirishga yordam berishi mumkin.

IELTS kerakmi?

Mening universitetimga kirish uchun ingliz tili bilimini tasdiqlash kerak edi. Men IELTS topshirdim va overall score 7.0 oldim. Avstriyadagi koʻplab dasturlarda boshqa sertifikatlar, masalan, TOEFL yoki Cambridge English ham qabul qilinadi, ammo IELTS eng keng tarqalgan variantlardan biri hisoblanadi. Umuman olganda, talablar odatda universitet va dasturga qarab, taxminan IELTS 6.0–7.0 oraligʻida boʻladi.

Avstriyada oʻqish haqida bilishingiz kerak boʻlgan birinchi narsa — ChatGPT sizga yordamchi emas. Masalan, Avstriya universitetlariga hujjat topshirishda motivatsiya xatlari uchun sun’iy intellekt detektorlaridan faol foydalaniladi. Shuning uchun ba’zan matnni mustaqil yozish yoki hech boʻlmaganda uni jiddiy qayta ishlash ma’qulroq. Yana nimalarni bilish kerakligini quyida bayon qilaman.

Oʻqishga kirish, hujjatlar va koʻchib oʻtish uchun taxminan olti oy vaqt ketdi va bu ancha tez, chunki ba’zilar bir yarim yil oldin tayyorgarlik koʻrishni boshlaydi.

Oxiri qayerga topshirdim?

 Lauder Business School sovg'asi

Dastlab men Lauder Business School`ga (unga “Estée Lauder Companies” kosmetika brendi egasi Este Lauderning oʻgʻli asos solgan) International Management and Leadership dasturiga oʻqishga kirdim. Ammo keyinchalik University of Vienna`ning Applied Economics fakultetiga oʻtishga qaror qildim. Aytgancha, ushbu oliygoh Times Higher Education (THE) sayti talqiniga koʻra top-95 talikka kiradi.

Sababi amaliy edi. Avstriyada oliy ta’lim muassasalarining ikki turi mavjud:

• Fachhochschule — bu yerda amaliyot koʻproq, majburiy davomat va tigʻiz dars jadvali;
• Universitet — bu yerda nazariya, moslashuvchanlik koʻproq va uni ish bilan birga olib borish osonroq.

Men oʻqish bilan parallel ravishda ishlashni xohlagandim, shuning uchun universitet qulayroq boʻlib chiqdi. 

Venaga qanday borish mumkin?

Venaga chiptalar narxi turlicha boʻlishi mumkin — hammasi yoʻnalishga va ularni qanchalik oldindan sotib olishingizga bogʻliq. Mening birinchi parvozim yuk bilan birga taxminan 330 USD (taxminan 4 000 329 UZS) ga tushgan. Men Istanbul orqali uchganman: avval Uzbekistan Airways reysi bilan, keyin esa keyingi Ajet samolyotiga oʻtirganman. Jami yoʻl, tranzit parvozni hisobga olganda, taxminan 10 soat davom etgan. Ammo yaxshi takliflarni vaqtida payqay qolsangiz, ancha arzonga uchish mumkin.

Masalan, ba’zan Chimkentdan Pegasus reyslarida bir tomonga taxminan 120 USD (taxminan 1 454 665 UZS) chiptalar paydo boʻladi, lekin shaxsan men buni tavsiya qilmayman, asabingizni va vaqtingizni asrang. Shaxsan men uchun eng qulay yoʻnalish — Boku orqali (Toshkent – Boku – Vena). Men koʻpincha aynan shu yoʻl bilan uchaman. Chipta odatda bir tomonga taxminan 250 USD (taxminan 3 030 552 UZS)ga tushadi. Menga Boku aeroporti yoqadi: u koʻpgina yirik xablar kabi tirband emas, juda tartibli va qulay. U yerda bemalol navbatdagi reysni kutish yoki hatto tunab qolish mumkin, xodimlar esa, menimcha, juda xushmuomala.

Odatda men faqat ryukzak bilan sayohat qilaman. Uyda kiyimlarim koʻp, lekin safarlarga faqat eng zarur narsalarni olaman. Shunda ham arzonroq, ham ancha qulayroq boʻladi.

Vena aeroportidan shahargacha qanday yetib olish mumkin?

Vena shahriga uchib kelganingizda, kamdan-kam odam gapiradigan bitta jihat bor. Koʻplab turistlar darhol CAT (City Airport Train) tezyurar poyezdiga chipta sotib olishadi. Uning narxi qariyb 15 EUR (taxminan 209 481 UZS)

Ammo aslida arzonroq variant ham bor — oddiy ÖBB poyezdlari (S7 elektrichkalari yoki REX mintaqaviy poyezdlari). Chipta narxi toʻrt yevrodan sal koʻproq, yoʻlga ketadigan vaqt esa deyarli bir xil — farqi bor-yoʻgʻi bir necha daqiqada.

Venadagi birinchi kunim va madaniy shok

• 

  Мой первый завтрак в Австрии
• 
• 

  Венские сосиски
• 

  Парк Бурггартен

Men Venaga birinchi marta uchib kelgan paytimni hech qachon unutmayman. Aeroportdan chiqib, poyezdga oʻtirganimda, atrofda nemischa nutqni eshita boshladim — oʻshanda ilk bor boshqa mamlakatda ekanligimni haqiqatan ham angladim.

Yotoqxonam markazdan ancha uzoqda, 14-tumanda, Vena oʻrmoni yaqinida joylashgan edi. Bekatdan ungacha yetib borish uchun haqiqiy daraxtzorlar orasidan oʻtish kerak edi. Bu oʻzgacha edi. Meni hayratda qoldirgan birinchi narsa — yam-yashillik va toza havo boʻldi. Ayniqsa, oʻsha paytlarda havo ifloslanishi bilan bogʻliq muammolar boʻlgan Toshkentdan keyin.

Xonaga joylashganimda, derazadan dala va eski uyga manzara ochildi — u deyarli kichik qasrdan farq qilmasdi. Ba’zida yotoqxona yaqinida hatto yovvoyi hayvonlarni ham koʻrar edim. Ikki kundan keyin Vena markaziga borganimda, bu alohida bir hayrat boʻldi. Ayniqsa birinchi tuman — Innere Stadt. Ulkan binolar, muzeylar, eski koʻchalar — hammasi juda mahobatli koʻrinadi. Sizlar uchun Venada koʻrishga arziydigan joylar roʻyxatini albatta tayyorlayman!

Turar joy va yotoqxona narxlari haqida

Yotoqxona

Venada talabalar turar joyining bir necha turi mavjud.

1. Klassik talabalar yotoqxonalari — bu eng hamyonbop variant. Odatda bular xonalar yoki kichik studiyalardir. Narxi koʻpincha 400 EUR (taxminan 5 586 155 UZS) dan 700 EUR (taxminan 9 775 771 UZS) gacha.
2. Yangi formatdagi talabalar rezidensiyalari — bu community-life’ga katta urgʻu beriladigan zamonaviyroq majmualardir. U yerda umumiy maydonlar, kovorkinglar, sport zali, oʻyin xonalari, kino-xonalar mavjud hamda yashovchilar uchun tadbirlar tashkil etiladi. Bunday joylarda ijara haqi xonaning oʻlchami va joylashuviga qarab oyiga 700 EUR (taxminan 9 775 771 UZS) dan 1 200 EUR (taxminan 16 758 465 UZS) gacha boʻlishi mumkin.

Men OeJAB Europahaus klassik talabalar yotoqxonasida yashaganman. Mening studiya-xonamning narxi — oyiga 513 yevro edi. Bu taxminan 10 m² boʻlgan kichik studiya edi, lekin uning katta plyusi bor edi: oʻzining oshxonasi, dushi va hojatxonasi bor, ya’ni amalda bu mini-kvartira. Koʻpgina yotoqxonalarning binosida kir yuvishxonasi bor. Odatda bu pullik xizmat. Oʻrtacha narx — bir marta kir yuvish uchun taxminan 3 yevro, ba’zan esa quritish uchun yana 2–3 yevro

Umuman olganda, Venadagi yotoqxonalar koʻpchilik “yotoqxona” soʻzini eshitganda tasavvur qiladigan narsadan juda farq qiladi. Bu odatda yaxshi ta’mirlangan, umumiy maydonlari, oshxonalari, ba’zan terrasalari yoki ichki hovlilari boʻlgan zamonaviy binolardir.

Mening tajribamga koʻra, agentliklar koʻpincha maslahat berganidek, 6 oy oldin yotoqxona qidirish — bu biroz boʻrttirish. Aksariyat yotoqxonalar shunchaki ariza qabul qilishni bunday erta boshlamaydi. Haqiqatan ham qulay muddat — koʻchib oʻtishdan taxminan 3–4 oy oldin. Bu davrda eng koʻp boʻsh xonalar paydo boʻladi.

Madaniy shok haqida

Qiziq tomoni, madaniy shok darrov sezilmadi. U keyinroq, bu yerda odamlar qanchalik boshqacha yashashini tushuna boshlaganimda paydo boʻldi. Oʻzbekistonda koʻpincha poyga hissi bor: muayyan yoshga qadar juda koʻp narsaga ulgurish kerak — karyera qurish, oila qurish, biznes boshlash. Avstriyaliklar butunlay boshqa tempda yashaydilar. Bu yerda odamlar hech qayerga shoshilmaydi. Ular ishlashadi, lekin ishda va hayotda doimiy poyga ichida boʻlishmaydi. Menimcha, men bu holatni bu yerda oʻqiyotganimga taxminan bir yil boʻlgandan keyin oʻzimga yuqtirib oldim.

Yana bir narsa, juda ham koʻzga tashlanadigan jihat — sport kulti. Venaga kelganimda vaznim 92 kg atrofida edi, hozir esa vaznim taxminan 80 kg. Bu yerda sport bilan shugʻullanmaslikning deyarli iloji yoʻq. Yaxshi fitnes-zal oyiga 20 yevrodan boshlanishi mumkin, bir necha soatlik basseyn esa taxminan olti yoki yetti yevro turadi.

Bir kuni Kalenberg (Kahlenberg) — Vena yaqinidagi, markazdan taxminan bir soatlik masofadagi tepalikka sayrga (xaykingga) chiqishga qaror qilganimni hech qachon unutmayman. Tepaga koʻtarilishda ancha tez hansiray boshladim, yonimda esa 79 yoshli bir pensioner xotirjam qadam tashlab borardi, u mendan ancha tetikroq koʻrinardi. Oʻsha lahzada tushundimki, bu yerda sport — bu shunchaki trend emas, balki hayotning bir qismi ekan.

Oʻqish qanday kechmoqda?

University of Vienna bog'i

Men Venaga koʻchib oʻtganimda, avval Lauder Business School`ning “Xalqaro menejment va yetakchilik” (International Management and Leadership) dasturiga oʻqishga kirdim. U yerda oʻqish narxi bir semestr uchun taxminan 1500 yevroni tashkil etardi. Keyinchalik Vena universitetining (University of Vienna) “Amaliy iqtisodiyot” (Applied Economics) dasturiga oʻtishga qaror qildim va hozirda shu yerda tahsil olyapman.

Davlat universitetida YeI tarkibiga kirmaydigan mamlakatlardan kelgan talabalar uchun oʻqish narxi semestriga 750 EUR (taxminan 10 474 041 UZS) atrofida. Bu Avstriyadagi koʻplab davlat universitetlari uchun standart narx hisoblanadi.

Toʻgʻrisini aytsam, bu yerdagi ta’lim tizimi men tasavvur qilganimdan butunlay boshqacha boʻlib chiqdi. Ayniqsa, MDH davlatlaridagi universitetlar bilan solishtirganda. Yevropada akademik halollikka ancha qattiqroq qarashadi.

Bu yerda koʻchirmachilikka juda jiddiy munosabatda boʻlishadi. Universitetlar yozma ishlar uchun plagiatni tekshirish tizimlari va hatto sun’iy intellekt (AI) detektorlaridan faol foydalanadilar. Agar oʻqituvchi qoidabuzarlikni sezsa, bu jiddiy oqibatlarga — imtihon natijasini bekor qilishdan tortib, intizomiy choralargacha olib kelishi mumkin. Shuning uchun koʻpchilik talabalar haqiqatda oʻqishadi va hamma narsani mustaqil bajarishga harakat qilishadi.

Shu bilan birga, oʻqishning oʻzi ancha qiziqarli. Munozaralar, mustaqil ishlar va tahlilga katta e’tibor beriladi. Ba’zan katta esselar yozish, taqdimotlar qilish yoki guruh loyihalarini tayyorlash kerak boʻladi.

Universitetlar oʻrtasida oʻqishni koʻchirish qanday ishlaydi?

Oʻqishni koʻchirishda bu yerda kredit tizimi (ECTS) amal qiladi. Siz shunchaki boshqa universitetda topshirgan fanlaringiz uchun kreditlarni hisobga oldirishingiz mumkin. Universitet kurs dasturini koʻrib chiqadi va uni hisobga olish mumkinligini hal qiladi.

Men aynan shunday qildim. Lauder Business School`dan University of Vienna`ga oʻqishimni koʻchirganimda, fanlarni tan oldirish uchun shunchaki hujjat topshirdim. Aksariyat fanlarim hisobga olindi, shuning uchun vaqt jihatidan deyarli hech narsa yoʻqotmadim. Atigi bir-ikkita kredit yoʻqotdim, xolos, lekin umuman olganda oʻtish jarayoni ancha xotirjam kechdi.

Oʻqishga qancha vaqt ketadi?

Avstriya universitetlarida oʻqish ancha moslashuvchan. Masalan, davlat universitetida magistraturani ancha uzoq davom ettirish mumkin — agar talaba oʻz sur’atida oʻqisa, ba’zan 6–7 yilgacha. Talabalik yashash ruxsatnomasini uzaytirish uchun minimal talabni bajarish kerak — yiliga taxminan 16 ECTS krediti. Bu unchalik koʻp emas. Odatda bu taxminan ikki-uchta fanga teng.

Albatta, agar siz universitetni tezroq tamomlamoqchi boʻlsangiz, yuklama kattaroq boʻladi. Oʻrtacha talabalar darslar, tayyorgarlik va loyihalarga haftasiga 15 dan 30 soatgacha vaqt sarflashadi.

Bu yerda bir yil oʻqiganimdan soʻng, farzandlarim aynan Yevropada tahsil olishini xohlardim degan fikrga keldim. Bu yerda universitet — shunchaki “diplom olish” kerak boʻlgan joy emas. Bu koʻproq mustaqil fikrlashga, ma’lumotlarni tahlil qilishga va gʻoyalar bilan ishlashga oʻrgatadigan muhitdir. Va bu oʻqish, halollik hamda mas’uliyat madaniyati hamma narsada seziladi.

Qizigʻi shundaki, Avstriyada talabalar orasida oʻqishni tashlab ketish koʻrsatkichi (dropout rate) Yevropada eng yuqori koʻrsatkichlardan biri hisoblanadi. Koʻpchilik oʻqishga kiradi, lekin diplomgacha yetib bormaydi. Men buni hatto oʻz tajribamda ham koʻrdim. Tizimni qandaydir yoʻllar bilan aldashga, masalan, imtihonlarda koʻchirishga yoki taqiqlangan materiallardan foydalanishga uringan kursdoshlarim boʻlgan. Ammo bu yerda bunga juda jiddiy qarashadi. Ba’zi hollarda talabalar shunchaki oʻqishdan chetlatiladi, ba’zida esa ushbu dasturga yoki ushbu universitetga qayta hujjat topshirish taqiqlanadi. Shuning uchun tizim ancha adolatli: agar oʻqisangiz va mehnat qilsangiz — hamma narsa koʻngildagidek boʻladi. Agar “ayyorlik” ishlatmoqchi boʻlsangiz, bu odatda tezda yakun topadi.

Qanday qilib yashash guvohnomasini oldim va buning uchun nimalar kerak?

Avstriyada talabalik yashash ruxsatnomasini olish jarayoni koʻplab boshqa mamlakatlardagidan biroz farq qiladi. Bu yerda avval yashash ruxsatnomasi uchun ariza topshiriladi va faqat u ma’qullanganidan keyingina mamlakatga kirish uchun D toifasidagi uzoq muddatli viza rasmiylashtiriladi.

Shuning uchun butun jarayonni oldindan — oʻqish boshlanishidan taxminan 5–6 oy oldin boshlagan ma’qul. Umuman olganda, butun jarayon bir necha oy davom etdi, shuning uchun tayyorgarlikni oldindan boshlash muhimdir.

Yashash ruxsatnomasini olish jarayoni bir necha bosqichdan iborat edi:

• hujjatlarni yigʻish;
• konsullikka topshirish;
• qarorni kutish;
• D vizasini olish;
• Avstriyada yashash guvohnomasi kartasini olish.

Men hujjatlarimni Moskvadagi Avstriya konsulligi orqali topshirdim. Topshirgandan soʻng yashash ruxsatnomasi tasdiqlanishini taxminan bir oy, keyin esa vizani berishlarini yana ikki-uch hafta kutishga toʻgʻri keldi. Tasdiqlangandan keyin siz D toifasidagi vizani olasiz.

Bu olti oy muddatga beriladigan uzoq muddatli viza. Shu vaqt ichida Avstriyaga kelib, yashash ruxsatnomasi kartasining oʻzini rasmiylashtirish kerak. Eng qiziq voqea Venada sodir boʻldi. Hujjatni olib ketish uchun qabulga yozildim, lekin borganimda karta allaqachon tayyor ekanligi ma’lum boʻldi. Uni menga shunchaki oʻsha zahoti berishdi. Aytgancha, kursdoshlarimda tajriba butunlay boshqacha boʻlgan — ayrimlari bir necha hafta kutishgan. Yashash ruxsatnomasini rasmiylashtirish narxi — taxminan 180 EUR (taxminan 2 513 770 UZS).

Talabalik yashash guvohnomasi uchun qanday hujjatlar kerak?

Asosiy hujjatlar toʻplami odatda quyidagicha koʻrinadi:

• xorijga chiqish pasporti;
• universitetga qabul qilinganlik toʻgʻrisida tasdiqnoma;
• moliyaviy mablagʻlar tasdigʻi (yiliga taxminan 11-12 ming, pulni qoʻyib, darhol qaytarib olish mumkin, asosiysi — Avstriya bankidagi hisobraqamda mablagʻ borligi haqida ma’lumotnoma olish)
• Avstriyada uy-joy ijarasi shartnomasi;
• tibbiy sugʻurta;
• fotosuratlar;
• tugʻilganlik haqida guvohnoma;
• bank koʻchirmasi.

Talabalar ishlashi mumkinmi?

Avstriyada klassik stipendiyalar unchalik koʻp emas, lekin qoʻshimcha daromad topish uchun imkoniyatlar talaygina. Talabalar rasman haftasiga 20 soat ishlashlari mumkin. Demak, ingliz tili bilan ham ishlash mumkin, ammo bu haqda biroz keyinroq.

Taxminiy maoshlar hozirda quyidagicha.

• McDonald`sda ishlash — taxminan 850 EUR (taxminan 11 870 579 UZS) dan 1 000 EUR (taxminan 13 965 388 UZS) gacha;
• yarim stavka ofis ishi — taxminan 1 000 EUR (taxminan 13 965 388 UZS);
• toʻliq ish kuni — taxminan 1 800 EUR (taxminan 25 137 698 UZS) dan boshlanadi.

Amaliyotda Venadagi koʻplab talabalar ish va universitetni birga olib boradilar. Masalan, mening tanishlarim Erste Bank’da ishlaydilar va yarim stavkada qoʻlga taxminan 1 000 EUR (taxminan 13 965 388 UZS) olishadi. Universitetni bitirgandan soʻng oʻrtacha ish haqi taxminan 2 400 EUR (taxminan 33 516 930 UZS) tashkil qilishi mumkin.

Mening holatimda ham shunday. Albatta, bu har doim ham ideal darajada amalga oshmaydi, lekin ish beruvchi borasida omadim kelgan — menda yetarlicha moslashuvchan grafik bor. Buning ustiga, Avstriya va Oʻzbekiston oʻrtasidagi vaqt farqi ham yordam beradi.

Yozda farq 3 soatni, qishda esa 4 soatni tashkil qiladi. Shuning uchun mening ish kunim koʻpincha ancha erta boshlanadi. Masalan, Toshkentda ertalabki soat 10–11 boʻlganida, Venada hali ertalabki 7–8 boʻladi. Men odatda ertalab masofadan turib ishlashni boshlayman, universitetdagi darslar esa koʻpincha tushdan keyin boʻladi. Ba’zan, albatta, ertalab ham darslar boʻlib turadi, lekin umuman olganda, grafik hammasini birga olib borishga imkon beradi.

Aslida men deyarli har doim oʻqish bilan parallel ravishda ishlaganman — hali bakalavriatning ikkinchi kursidan boshlab. Menimcha, ishlash hatto universitetda oʻrganiladigan koʻp narsalarni yaxshiroq tushunishga yordam beradi. Ba’zan real vazifalar bilan toʻqnash kelganingda nazariya ancha tushunarli boʻlib qoladi.

Nemis tilini bilish kerakmi?

Rostini aytsam, til bilan bogʻliq menda ancha qiziqarli voqea boʻlgan. Oʻquv dasturim toʻliqligicha ingliz tilida, shuning uchun universitet nuqtayi nazaridan menda hech qachon muammo boʻlmagan. Bundan tashqari, Venada koʻpchilik odamlar, jumladan shifokorlar, xizmat koʻrsatish xodimlari va hatto davlat muassasalari xodimlari ham ingliz tilida haqiqatan ham juda yaxshi gapirishadi.

Birinchi yarim yil davomida, ochigʻini aytsam, nemis tilini ancha faol tarzda eʼtiborsiz qoldirdim. Lekin vaqt oʻtishi bilan tushundimki, agar shaharning hayotiga chin dildan integratsiyalashishni istasangiz, uni oʻrganishni boshlagan maʼqulroq ekan.

Hozirda men nemis tilini allaqachon yaxshi koʻrib qoldim, garchi uni oʻzlashtirish hali ham men uchun ancha qiyin boʻlsa-da. Shuning uchun mening asosiy ish tilim hali ham ingliz tili, ammo nemis tili asta-sekin kundalik hayotning bir qismiga aylanib bormoqda.

Venadagi hayot haqida yana nimalarni bilish kerak? Pul va layfxaklar

• 
• 
• 
• 

Oziq-ovqat, talabalik guvohnomasi va ilovalar 

Venada talabalar uchun bir nechta foydali ma’lumotlar:

• ISIC — chiptalar, muzeylar va hatto kafelar uchun chegirmalar beradigan xalqaro talabalar kartasi;
• Too Good To Go va Neo Taste — restoranlardan chegirma bilan ovqat sotib olish mumkin boʻlgan ilovalar (koʻpincha bular kun davomida ortib qolgan mahsulotlar boʻlib, ular bir necha barobar arzonroq beriladi);
• All you can eat — kursdoshlarim bilan bunday bufetlarga tez-tez boramiz, chunki bu belgilangan narx evaziga koʻp ovqat yeyishning eng hamyonbop usulidir.

Sugʻurta bilan bogʻliq layfxak

Avstriya davlat sugʻurtasi oyiga taxminan 80 EUR (taxminan 1 117 231 UZS) turadi. Bu ajoyib variant, chunki shifokor huzurida deyarli haq toʻlash shart emas — tizim hammasini oʻzi qoplaydi. Ammo oylik toʻlovlarni tejashni istaganlar uchun muqobil variantlar ham mavjud. Masalan, Care Concept sugʻurtasi oyiga taxminan 56 EUR (taxminan 782 062 UZS) ga tushadi.

Arzon variantlarda qoplash tizimi ishlaydi: avval siz shifokorga oʻz choʻntagingizdan toʻlaysiz, soʻngra pul qaytarilishini kutasiz. Bir marta borish uchun hisob-kitoblar 220 EUR (taxminan 3 072 385 UZS) gacha yetishi mumkin. Agar ushbu cheklarni sugʻurta kompaniyasiga yuborsangiz, pullar ikki hafta ichida kartaga qaytariladi.

Venada yashash qancha turadi?

Mana mening taxminiy xarajatlarim:

Yevropa bo‘ylab sayohat

Bu yerda yashashning asosiy afzalliklaridan biri — sayohat qilish imkoniyatidir. Yevropada yashash davomida men 20 dan ortiq mamlakatda, masalan, Islandiya, Italiya, Daniya, Albaniya, Vengriya, Chexiya, Germaniya, Ispaniya, Niderlandiyada boʻldim. Shuningdek, yaqinda Berlinda “Tame Impala” va Parijda “The Neighbourhood” konsertlariga boraman. Keyinchalik Nitssa, Lion va Varshavaga borishni rejalashtiryapman, shuningdek, Avstriya togʻlarida hayking bilan shugʻullanaman.