Toshkentdagi Magic City bog‘i: narxlar, attraksionlar va ish vaqtlari

Magic City — Toshkentdagi Disneyland uslubida qurilgan ulkan istirohat bog‘i. Agar Markaziy Osiyoda Big Ben, Registon maydoni va Vasiliy Blajenniy sobori fonida suratga tushish uchun joy qidirayotgan bo‘lsangiz, unda bu yer aynan siz uchun.

Qaysi attraksionlarda uchish, nimalarni tatib ko‘rish va ko‘ngilochar mashg‘ulotlarga qancha pul sarflashingiz mumkinligi haqida so‘zlab beramiz.

Magic City bog‘i qayerda joylashgan?

Bog‘ Bobur ko‘chasi, 174/2-uy manzilida joylashgan. Uni o‘tkazib yuborish qiyin: Disney uslubidagi qasr uzoqdan ko‘zga tashlanadi. U yerga taksida yoki metroda (Xalqlar do‘stligi bekati) borish mumkin — bekatdan bog‘ kirishigacha piyoda taxminan 10 daqiqa yuriladi.

Bog‘ mavzuli hududlarga bo‘lingan bo‘lib, har bir ko‘cha dunyoning mashhur shaharlaridan nusxa olgan. Shu sababli, shunchaki bir hududdan boshqasiga o‘tib, bir zumda Parij, London yoki Barselonaga tushgandek bo‘lasiz. Markaziy qismni gullar bilan bezatilgan uychalar va qahvaxonalar qurshovidagi Disney uslubidagi qasr hamda Big Ben nusxasi joylashgan. G‘aroyib fotozonalar izlaydiganlar uchun bu yerda Registon maydoni va Tower Bridge (Tauer ko‘prigi) ham barpo etilgan.

Markaziy ko‘lning o‘zida musiqali favvora bor: har oqshom suv lazer va feyerverklar jo‘rligida musiqa sadolari ostida raqsga tushgandek namoyish etiladi. Suvosti olami ixlosmandlari uchun esa O‘zbekistondagi ilk okeanarium — akula va skatlar yashaydigan Magic Aquarium faoliyat ko‘rsatadi. Uning yonida o‘yin avtomatlari va karusellar joylashgan. Qorningiz ochsa, hududda strit-fuddan tortib milliy taomlar restoranlarigacha bo‘lgan o‘nlab do‘konlar va fud-kortlar (ovqatlanish hududlari) mavjud.

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Parkning ishlash tartibi

Magic City har kuni soat 10:00 dan 22:00 gacha ishlaydi. Ammo kechqurun kelishni maslahat beramiz. Bu paytda chiroqlar yonib, barcha binolar va favvora yanada chiroyli ko‘rinadi. Agar Toshkentga yozda kelgan bo‘lsangiz, kunduzi, ayniqsa chilla payti parkda sayr qilmang — ochiq joylarda daraxtlar kamligi sababli oftob urishi xavfi yuqori.

Magic City’ga kirish qancha turadi?

Park hududiga kirish bepul. Bir so‘m ham sarflamay, shunchaki sayr qilishingiz, shoularni tomosha qilishingiz va selfi qilishingiz mumkin. Attraksionlar, akvarium va boshqa ko‘ngilochar mashg‘ulotlar uchun esa alohida pul to‘lash kerak bo‘ladi.

Magic City’dagi attraksionlar va narxlar

• 

  Аттракционы
• 

  Паравозик

Magic City’da attraksionlar ko‘p — klassik karusellardan tortib, yanada faol ko‘ngilochar turlargacha topiladi. Ko‘ngilochar mashg‘ulotlarning aksariyati bolalarga mo‘ljallangan, shuning uchun bu yerga butun oilangiz bilan bemalol kelishingiz mumkin. Eng kichkintoylar uchun qum maydonchalari va batutlar bor, o‘yin maydonchalari yoniga esa massaj kreslolari ham o‘rnatilgan — bu ota-onalar uchun chinakam qulaylik: bolalar band bo‘lganda, biroz hordiq chiqarib olish mumkin.

Shuningdek, park hududida parovoz uslubida ishlangan bolalar poyezdi yuradi. Bolalar ota-onalari bilan birga sayr qilishlari mumkin — hamrohlik uchun qo‘shimcha to‘lov olinmaydi.

“Baqiroq” favvora

Agar ishlaringiz boshingizdan oshib yotgan bo‘lsa yoki shunchaki bor ovozingiz bilan baqirgingiz kelsa, Magic City’ga kiraverishdagi “Baqiroq” favvoraga boring. Bu hayqiriq va qarsaklaringizni suv shousiga aylantiradigan interaktiv hudud. Eng yoqimli tomoni — bu mutlaqo bepul.

Magic Aquarium

O‘zbekistondan chiqmasdan okean jonivorlarini ko‘rishni istasangiz, albatta shu yerga keling. Okeanariumni topish qiyin emas: bino peshtoqidagi ulkan qizil sakkizoyoq darhol ko‘zga tashlanadi. Akvariumning asosiy o‘ziga xosligi — 20 metrlik suvosti tunneli bo‘lib, u yerda boshingiz ustidan ulkan akulalar, skat va boshqa baliqlar suzib o‘tadi. Hovuzning chuqurligi 3,8 metr, ichkarida esa yuzdan ortiq turdagi jonzot yashaydi: baliq va meduzalardan tortib ilonlar va hasharotlargacha.

Bu yerga butun oilangiz bilan qayta-qayta kelishingiz mumkin — umuman olganda, ularni kuzatish juda maroqli. Narxlar mehmonlarning yoshiga bog‘liq:

• 3 yoshdan 11 yoshgacha bo‘lgan bolalar uchun — 100 000 so‘m;
• 12 yoshdan katta mehmonlar uchun chipta — 120 000 so‘m;
• agar qo‘shimcha ravishda kapibara va qunduzlarni ham ko‘rmoqchi bo‘lsangiz, yana 50 000 so‘m tayyorlab qo‘ying.

Magic Museum 

Agar fizika qonunlari buzilmaydi deb o‘ylasangiz, “Magic Museum”ga bir kirib ko‘ring. Bu telefoningiz galereyasini g‘alati va noodatiy suratlar bilan to‘ldirish uchun ayni muddao. Muzey to‘rtta interaktiv hududni taklif etadi. Bu yerda hamma narsa idrokingizni chalg‘itish uchun yaratilgan:

• Teskari uy. Pol va shift o‘rin almashgan maskan. Bu yerda qandillar ustida yurgandek ko‘rinishingiz va go‘yoki tortishish kuchi sizga ta’sir qilmayotgandek ko‘rinishingiz mumkin;
• Ko‘zgular labirinti. O‘z aksingiz orasida adashib qolish oson bo‘lgan joy. Ehtiyot bo‘ling, o‘z aksingizga urilib ketmang;
• Optik illyuziyalar zonasi. Do‘stingizdan ikki baravar baland bo‘lib qolishingiz yoki devorga shunchaki singib ketishingiz mumkin bo‘lgan zallar.

Bu yerda hammasini birdaniga sinab ko‘rishni istaganlar uchun foydali taklif bor: 190 000 so‘mlik chipta birdaniga to‘rtta joyga (hatto “Magic Aquarium”ga ham) kirish imkonini beradi. Bu — har bir kirishda ortiqcha pul to‘lamay, hammasini birdaniga ko‘rishning eng qulay usuli.

Zip-Line

Bu o‘tkir hissiyotlarni xohlovchilar uchun mo‘ljallangan ko‘ngilochar mashg‘ulot. Siz parkning eng baland binosidan Magic City’ning narigi chekkasigacha uchib o‘tasiz. Uchish narxi — 50 000 so‘m. Agar o‘z his-tuyg‘ularingizni videoga muhrlashni istasangiz, 50 000 so‘m qo‘shimcha to‘lashingiz kerak bo‘ladi.

Magic City’da yana qanday ko‘ngilochar mashg‘ulotlar bor?

Agar karusellar sizga unchalik yoqmasa, bog‘da do‘konma-do‘kon aylanib, xarid qilishingiz mumkin: Li-Ning, LC Waikiki, Miniso va boshqa ko‘plab brend do‘konlari ochiq. Shuningdek, bog‘ hududida kolleksion nashrlar sotiladigan kitob do‘konlari va esdalik sovg‘alarini xarid qilish mumkin bo‘lgan rastalar ham bor. Agar aylanib charchab qolsangiz, kinoga borishingiz mumkin.

Magic Cinema

Bu bog‘ hududidagi katta kinoteatr. Unda standart va bolalar zallaridan tortib, Premier hamda VIP formatlarigacha bo‘lgan oltita zal mavjud. Chiptalar 70 000 so‘mdan 130 000 so‘mgacha turadi. Narxlar vaqtga bog‘liq: kunduzgi seanslarga tushish arzonroq, xuddi shu filmning kechki namoyishi uchun esa 130 000 so‘mgacha to‘lash kerak bo‘ladi. Seanslar jadvalini kinoteatrning rasmiy saytidan tekshirib olgan ma’qul.

Favvoralar shousi

• 
• 

Har oqshom bog‘ markazida, qasr fonida musiqa va lazerlar jo‘rligida favvoralar shousi namoyish etiladi. Bu Magic City’da bepul ko‘rish mumkin bo‘lgan eng hayratomuz tomoshalardan biri.

AYA Project

• 
• 

Agar sayr qilishdan charchagan bo‘lsangiz, AYA Universe art-makoniga yo‘l oling. Bu yorug‘lik va tovush yordamida o‘n ikkita virtual olam yaratilgan ulkan maydondir. Har bir zonaning o‘z mavzusi va o‘zaro ta’sir mexanizmi bor. U yerda o‘simliklari harakatingizga javob beradigan futuristik bog‘larda sayr qilishingiz yoki cheksiz ko‘zgu labirintlarida adashib qolishingiz mumkin.

Magic School

Siz qo‘shni butikda krossovka tanlayotganingizda, farzandingiz Magic School’da o‘zining ilk xaridlari uchun pul ishlab topishi mumkin. Bu miniatyura kasblar shaharchasi bo‘lib, bu yerda hamma narsa kattalarnikidek: ta’lim, ish smenalari va haqiqiy maosh. Bola bugun kim bo‘lishni o‘zi hal qiladi. Bajarilgan vazifalar uchun unga o‘yin valyutasi beriladi — uni mahalliy bankda, supermarketda yoki shirinliklarga sarflashi mumkin.

Magic City’dagi boshqa ko‘ngilochar mashg‘ulotlar narxlari:

• VR-zona yoki 5D attraksionlar — 30 000 so‘m;
• Qo‘rquv xonasi, tir yoki bolalar uchun Zip-Line — 25 000 so‘m;
• Avtodrom va ko‘zgular labirinti — 20 000 so‘m;
• Karusel — 20 000 so‘m.

Istirohat bog‘ida qayerda ovqatlanish mumkin

O‘zingiz bilan yegulik va ichimliklar olib yurishingiz shart emas — bog‘ hududida tamaddi qilish uchun joylar yetarli. Bu yerda koreys, o‘zbek va turk taomlarini tatib ko‘rishingiz mumkin. Agar yangi taomlarni sinab ko‘rishga unchalik qiziqmasangiz, o‘zingizga tanish KFC, Wendy’s, Ramiz, MaxWay yoki EVOS ham bor.

Ko‘p beriladigan savollar

Magic City’dagi favvoralar shousi soat nechada boshlanadi?

Tomoshalar har kuni soat 18:00 dan 22:00 gacha davom etadi. Ammo jadval o‘zgarishi mumkin, shuning uchun uni oldindan rasmiy saytda tekshiring.

Magic City bog‘ida nimalarni ko‘rish shart?

Magic Cinema’ning oltita zalidan birida premyerani tomosha qiling. Oilangiz bilan yoki yakka o‘zingiz attraksionlarni sinab ko‘ring — ular bu yerda juda ko‘p. Butun hudud bo‘ylab albatta sayr qiling: Yevropa uslubidagi mavzuli ko‘chalar va qasr suratga tushish uchun ayni muddao.

Magic Aquarium’ga kirib, baliqlar, ilonlar va meduzalarni tomosha qiling. Kapibara va qunduzlar bilan salomlashishni ham unutmang. Agar biroz adrenalin istasangiz, Zip-Line’da uchib, bog‘ni balandlikdan tomosha qiling.

Magic’da bir kunning o‘zida hamma joyni aylanib chiqsa bo‘ladimi?

Ha, bir kunda Magic City’dagi akvarium, muzey va asosiy attraksionlarni aylanib chiqishga ulgurasiz. Ammo shoshmasdan sayr qilish, butiklarni ko‘zdan kechirish va restoranda vaqt o‘tkazmoqchi bo‘lsangiz, tashrifni ikki kunga bo‘lish yaxshiroq.

Magic City’ga qachon kelgan yaxshi?

Eng yaxshi variant — ish kunlari: odam kamroq, navbatlar qisqaroq bo‘ladi. Dam olish kunlari esa bog‘da igna tashlasangiz, yerga tushmaydi. Kunning vaqtiga kelsak, chiroqlar va favvoralar shousini ko‘rish uchun kechqurun kelganingiz ma’qul.

Magic City’ga borishdan oldin maslahatlar

Qishda Magic City ancha sokin bo‘ladi: ochiq havodagi ko‘plab attraksionlar bahorgacha ta’tilga chiqadi. Biroq Magic City’dagi yopiq hududlar odatdagidek ishlayveradi, shu sababli bu sovuqdan qochish uchun ajoyib imkoniyatdir. Sayr qilish uchun eng qulay fasllar — bahor va kuz. Yozda havo issiq bo‘lsa-da, bog‘ga keluvchilar soni eng yuqori cho‘qqiga chiqadi.

Tashrifdan oldin quyidagilarni bilib oling:

• To‘g‘ri vaqtni tanlang. Dam olish va bayram kunlari navbatlarga tayyor turing, shuning uchun xotirjam hordiq chiqarish uchun ish kunlari kelganingiz yaxshi. Yozda jazirama issiqda qolmaslik uchun ertalab yoki quyosh botgandan keyin sayr qilishni tavsiya etamiz;
• Qulay kiyining. Hudud katta, ko‘p yurishga to‘g‘ri keladi. Yozda yengil kiyim tanlang va quyoshdan himoyalovchi kremni unutmang. Qishda esa vaqtingizning bir qismini baribir tashqarida o‘tkazishingizga to‘g‘ri kelishini yodda tuting;
• Bolalar uchun qoidalarni tekshiring. Ko‘pgina attraksionlarda bo‘y yoki yosh bo‘yicha cheklovlar bor. Farzandingizni kirish joyidayoq xafa qilmaslik uchun ularga oldindan aniqlik kiritib olganingiz ma’qul;
• Qurilmalarni quvvatlash. Bog‘ning hamma joyida Q.watt powerbanklarini ijaraga berish shoxobchalari bor. Quvvatlagichni bir soatga ijaraga olish 10 000 so‘m turadi. Qurilmani bog‘ning bir nuqtasidan olib, boshqa istalgan nuqtasida qaytarishingiz mumkin;

Hojatxonalar haqida layfxak. Hududdagi umumiy hojatxonalarga kirish 5 000 so‘m turadi. Ammo istalgan kafe yoki restorandagi hojatxonadan doim bepul foydalansangiz bo‘ladi.