Minskda nimalarni koʻrish mumkin? Qiziqarli va diqqatga sazovor joylar

Minsk — kichik tafsilotlar bilan birga namoyon boʻladigan shahar: eski tramvay shovqini, Oktyabr koʻchasidagi yangi damlangan qahva ifori yoki Mustaqillik shohkoʻchasidagi muhtasham binolar soyasi orqali. Bu — koʻp sayr qilishni va shoshilmaslikni xush koʻradiganlar shahri. Belarus poytaxtida qat’iy shoʻro me’morchiligi san’at maskanlariga aylantirilgan sobiq zavodlar va zamonaviy biznes markazlari bilan yonma-yon joylashgan. Minsk har xil boʻlishi mumkin: gohida jiddiy va kulrang, gohida esa shinam va oʻzgacha darajada qadrdon.

Siz uchun minskliklardan shaharda nima qilish, nimalarni tatib koʻrish va sovgʻa sifatida nima olib kelish haqida qoʻllanma toʻpladik.

Aeroportdan shaharga qanday borish mumkin?

• 
• 

Minsk aeroporti shahardan taxminan 30 km uzoqlikda joylashgan. Markazga ikki xil usulda borish mumkin:

• taksida. Safar 35–40 daqiqa davom etadi va taxminan 60 BYN (taxminan 247 474 UZS) tushadi;
• № 300Э avtobusda. Yoʻl taxminan bir soat davom etadi, chipta esa taxminan 4 BYN (taxminan 16 498 UZS) turadi.

Birinchi holatda darhol kerakli lokatsiyaga taksi buyurtma qilish mumkin, ikkinchisida esa — avtobus sizni “Markaziy” avtovokzaliga olib keladi. U temir yoʻl tuguni hamda shaharning ilk diqqatga sazovor joylaridan biri — “Minsk darvozalari” yaqinida joylashgan. Bu stalincha ampir uslubida qurilgan ikkita simmetrik minoradir. Ularning mahobatli koʻrinishiga qaramay, bular hali ham odamlar yashaydigan oddiy turar joy binolaridir. 

Aynan shu minoralaridan Mustaqillik shohkoʻchasi boshlanadi. Shohkoʻcha — bu shaharning asosiy yoʻli boʻlib, u bosh maydonlar, teatrlar va muzeylarni bir-biri bilan bogʻlaydi. Bu yerda poytaxt hayoti jamlangan: universitetlardan tortib hukumat binolarigacha. Agar siz u boʻylab sayr qilishga qaror qilsangiz, oʻtgan asr qurilishlarining butun rang-barangligini koʻrasiz: ellikinchi yillardagi vazmin binolardan tortib 80-yillardagi inshootlargacha.

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Shaharda nimalarni tomosha qilish mumkin? Markaz va qirg‘oq bo‘ylab sayr

Shahar markazi arxitekturasi

• 

  Площадь Независимости
• 

Mustaqillik maydonida siz Qizil kostyolni koʻrasiz — xalq orasida Avliyolar Simeon va Yelena kostyoli shunday ataladi. U 1905–1910-yillarda qizil gʻishtdan neoroman uslubida qurilgan. Hozirda bu amaldagi katolik ibodatxonasi boʶlib, u yerda diniy xizmatlar oʻtkaziladi.

Mustaqillik maydonidan soʻng shu nomdagi shohkoʻcha boʻylab sayr qiling — bu yerda binolarning fasadlarini koʻzdan kechirish lozim. Asosiy magistral koʻlamidan dam olish uchun parallel boʻlgan Karl Marks koʻchasiga buriling. Bu yerda tamaddi qilish uchun koʻplab qahvaxonalar va kichik barlar mavjud.

Ayvazovskiyni izlab

Agar Belarus san’atiga shoʻngʻishni istasangiz, Milliy badiiy muzeyga kirishni taklif qilamiz. Bu yerda soʻnggi 12 asr davomida yaratilgan oʻn minglab asarlar toʻplangan. Mashhur ustalarning asl nusxadagi asarlarini bir joyda koʻrish mumkin, masalan, Ayvazovskiy va uning “Azov dengizidagi boʻron” asari, Shishkin va uning “Sestroretskdagi Buyuk Pyotrning qoʻriqlanadigan emanzori” polotnosi, shuningdek, Apollinariy Goravskiy kabi belarus klassiklari asarlari shular jumlasidandir. 

Muzey quyidagi manzilda joylashgan: Lenin koʻchasi, 20. Mustaqillik shohkoʻchasidan piyoda besh daqiqada yetib borish mumkin. Chipta narxi 20 rublni tashkil etadi, barcha ekspozitsiyalarni koʻzdan kechirish uchun kamida ikki soat vaqt ajrating. 

Shaharda yana nimalarni koʻrish mumkin?

• 
• 

Keyingi yoʻl Yuqori shaharga olib boradi. Ikkinchi jahon urushi paytida tuman qattiq shikastlangan, ammo binolar eski suratlar va chizmalar asosida qayta tiklangan. Shu yerning oʻzida Ozodlik maydoni joylagan boʻlib, u yerda Muqaddas Bibi Maryam kostyoli va shahar oʻzini oʻzi boshqarish ramzi — Minsk ratushasini koʻrish mumkin. Yozgi oqshomlarda bu yerda koʻpincha ochiq osmon ostidagi konsertlar va yarmarkalar boʻlib oʻtadi. Keyingi nuqta — Troitskoye predmestyesi. Bu Svisloch daryosi boʻyidagi pastel rangli uychalardir. Joy juda fotogenik, bu yerda hech qayerga shoshilmasdan sohil boʻyida sayr qilish mumkin. 

Agar boshqacha Minskni koʻrmoqchi boʻlsangiz, Osmolovkaga boring. 40–50-yillarga oid ushbu tumanda odatda yoʻl koʻrsatkichlarda uchramaydigan past boʻyli uylar va sokin hovlilar saqlanib qolgan. Bu yerda uzoq davom etgan sayrdan soʻng dam olish hamda «Маркс» yoki «Осмоловка» qahvaxonalariga kirib oʻtish mumkin. Bir finjon qahva va desert taxminan 15 BYN (taxminan 61 868 UZS) dan boshlanadi. 

Sokin Osmolovkadan soʻng ikki minginchi yillar boshidagi arxitekturani koʻrish uchun Milliy kutubxonaga borish mumkin. Rombokubooktaedr shaklidagi (oxirigacha oʻqimadingiz, shundaymi? bu 26 burchakli shakl) ushbu futuristik bino koʻpincha “bilimlar olmosi” deb ataladi. U haqda koʻp bahslashishadi: ba’zilar uni me’moriy muvaffaqiyatsizlik deb hisoblasa, boshqalar — shaharning muhim ramzi deb biladi.

Tomdagi tomosha maydonchasi har kuni 11:00–23:00 gacha ishlaydi, ammo oxirgi lift 22:30 da chiqib ketadi. Yuqoriga koʻtarilish 5 BYN (taxminan 20 623 UZS) dan 10 BYN (taxminan 41 246 UZS) gacha turadi. Kechki payt bu yerdan shahar chiroqlari yaqqol koʻrinadi. 

Kechqurun nima qilish mumkin? Strit-art va tungi hayot shahri

Kechga yaqin Oktyabrskaya koʻchasiga boring. Sobiq zavod binolarida endilikda galereya va kafelar faoliyat koʻrsatmoqda, devorlar esa ulkan graffitilar bilan bezatilgan. Bu yer — texno-bazmlar oʻtkaziladigan va strit-art ixlosmandlari yigʻiladigan maskan.

Agar koʻchada havo iliq boʻlsa, «Площадь Победы» metro bekati yaqinidagi «Песочница»ga kiring. Bu — eski «Горизонт» zavodi hududidagi koʻcha taomlari maydonchasi. Bu yerda gastronomik setlarni sotib olish, shourumlardan mahalliy dizaynerlarning buyumlarini topish yoki kichik shoularni tomosha qilish mumkin. 

Tunga yaqin hamma «Немига» metrosi yaqinidagi Zibitskaya yoki Revolyutsionnaya koʻchalariga yoʻl oladi. Bu yerlar — shaharning asosiy bar nuqtalari boʻlib, u yerda oʻnlab muassasalar tonggacha ishlaydi. 

Minskda qayerda ichish mumkin? Sinovdan o‘tgan barlar

• Embargo. Menyu yoʻq boʻlgan yashirin bar: barmenlar ichimliklarni sizning xohishingizga qarab tayyorlaydilar. Kokteyl taxminan 20 BYN (taxminan 82 491 UZS)ga tushadi.
• «Салют». Retro uslubidagi shinam ryumochnaya. Bu yerga uyda tayyorlangan nastoykalar va kilkali buterbrodlar kabi oddiy gazaklar uchun kirishga arziydi. Nastoykaning bir porsiyasi taxminan 7 BYN (taxminan 28 872 UZS) turadi.
• Uno Mas. Tekila va meskalning katta tanloviga ega Meksika bari. Agar qorningiz ochsa, tako buyurtma qiling — bir porsiyasi taxminan 10 BYN (taxminan 41 246 UZS) dan boshlanadi.
• «Бессонница». Bu joy deyarli tunu kun ishlaydi, shuning uchun uyga ketishni istamaydiganlar koʻpincha oqshomni shu yerda yakunlaydilar. Menyuda ham toʻlaqonli taomlar, ham kokteyllar bor. Ichimlik bilan toʻyimli gazak taxminan 20 BYN (taxminan 82 491 UZS) boʻladi.
• «Легендар». Kraft pivosi va shovqinli kompaniyalarni sevuvchilar uchun bar. Bu yerdagi muhit oddiy, dabdabasiz. Bir bokal pivo 10 BYN (taxminan 41 246 UZS) dan boshlanadi.
• SFB. Mualliflik kokteyllari va minimalistik interyerga ega zamonaviy bar. Ichimlik uchun oʻrtacha chek 20 BYN (taxminan 82 491 UZS) dan boshlanadi.

Maslahat: koʻpchilik joylarda feyskontrol amal qiladi, shuning uchun yoningizda pasport boʻlgani ma’qul.

Qayerda ovqatlanish mumkin va draniklardan tashqari nimalarni tatib koʻrish kerak?

Belarus oshxonasi bir qarashda koʻringanidan koʻra ancha xilma-xilroq. Albatta tatib koʻring:

• xolodnik — lavlagi, kefir va smetanadan tayyorlangan yorqin pushti rangli sovuq shoʻrva;
• klyotski yoki koldunlar (dranikiga o’xshash, lekin ichida goʻshti bor);
• vereshaka — quymoqlar bilan birga tortiladigan qadimiy goʻshtli taom.

Bularning barchasini non kvasi yoki klyukva morsi bilan ichgan ma’qul. Barcha yoʻlkoʻrsatkichlarda yoziladigan mashhur «Васильки»dagi navbatlarda vaqt sarflamang. Yaxshisi «Литвины»ga boring: bu yerda mazaliroq va arzonroq. 

Agar oziq-ovqat boʻlimiga kirsangiz, «Ми-шу» glazurli siroklariga e’tibor bering. Ular Polotskda tayyorlanadi, qog’ozida panda rasmi bor — bu mahalliy xit. Bitta sirok taxminan 1 BYN (taxminan 4 125 UZS) turadi. 

Yana bir borish shart boʻlgan joy — bosh prospektdagi «Центральный» universami. Bu 50-yillar interyeriga ega joy: ganchkori naqshlar, baland shiftlar va ulkan qandillar. Bu yerda desertlar va afsonaviy «Оскар» qahvasini olish mumkin (e’tiborli boʻling: unga balzam va konyak qoʻshiladi). Uni koʻchadagi yoʻlovchilarni kuzatgan holda, panoramali deraza yonida tik turib ichgan ma’qul. Bir porsiya qahva taxminan 5 BYN (taxminan 20 623 UZS) ga tushadi.

Savol-javob: Belarusga borishdan oldin nimalarni bilish kerak?

Minskka qachon borgan ma’qul?

Shaharda may oyidan sentyabrgacha eng qulay vaqt. Bu vaqtda yozgi terrasalar ishlaydi, festivallar oʻtkaziladi, bogʻlar esa yam-yashil boʻladi. Kuzda oltin barglarni koʻrish uchun kelishga arziydi, ammo havo salqin boʻlishini hisobga oling. Qishda Minskda chiroyli illyuminatsiyalar yoqiladi, biroq yuqori namlik tufayli sovuq Toshkentdagiga qaraganda kuchliroq seziladi.

Minskda qayerda tunash mumkin?

Poytaxtda turar joy variantlari koʻp — tarmoqli mehmonxonalardan tortib shahar markazidagi xostellargacha. Aytgancha, tunash uchun joyni Aviasales.uz saytidagi “Mehmonxonalar” boʻlimidan qidirish mumkin.

• Markaziy qismda Hilton yoki Crowne Plaza kabi xalqaro tarmoqlar bor. Bu yerda bir kecha 90 USD (taxminan 1 095 778 UZS) dan 150 USD (taxminan 1 826 296 UZS) gacha turadi.
• Agar tarixiy muhitni istasangiz, Yuqori shahardagi butik-otellarni tanlashingiz mumkin. Masalan, “Monastirskiy” — bu zamonaviy xonalarga ega sobiq monastir binosi. Oʻrtacha narxi 70 USD (taxminan 852 272 UZS) dan 100 USD (taxminan 1 217 531 UZS) gacha.
• Agar mablagʻni tejashni xohlasangiz, Minsk-Siti Xosteli umumiy xonadagi oʻrinni taxminan 8 USD (taxminan 97 402 UZS) yoki 10 USD (taxminan 121 753 UZS) ga taklif qiladi.

Shahar bo’ylab nimada harakatlanish mumkin?

Eng qulayi — metroda yurish. Hozirda uchta liniya ishlamoqda: Moskovskaya (qizil), Avtozavodskaya (koʻk) va Zelenolujskaya (yashil). Safar narxi 1 rubl, kassadan olingan jeton bilan yoki shunchaki bank kartasini turniketga tekkizib toʻlash mumkin. Poezdlar har ikki–besh daqiqada qatnaydi. Aytgancha, metro bekatlari — bu ham diqqatga sazovor joylardir: ularning koʻplarida sovet mozaikalari va marmar bezaklari saqlanib qolgan.

Minskdan nimalar olib qaytish mumkin? 

Noodatiy buyumlarni qidirayotgan bo‘lsangiz, quyidagi do‘konlarga tashrif buyuring:

• LSTR — mahalliy printli kiyim va aksessuarlar sotiladi. COOLMAN savdo markazida joylashgan;
• «Офистон» — bu yerda belaruslik rassomlar bilan birgalikda yaratilgan bloknotlar, kartholderlar va magnitlarni sotib olish mumkin.

Yeguliklardan «Коммунарка» va «Спартак» fabrikalarining konfetlarini, Bobruysk zefirini, shakarli klyukvani hamda mahalliy goʻsht mahsulotlarini, masalan, «пальцем пиханная» kolbasasini, kumpyak (son goʻshti) yoki polendvitsani (choʻchqaning quritilgan goʻshti) olib kelish mumkin.

Minskda nimalar qilish kerak emas?

Belarusda sizni xursandchilik bilan kutib olishadi, biroq bir nechta qoidalarga rioya qilgan ma’qul:

1. Mamlakatni “Belorussiya” deb atamang. Belarus Respublikasi yoki shunchaki Belarus nomidan foydalaning — bu mahalliy aholi uchun muhim.
2. Kartoshka haqida hazillashmang. Bu eski stereotip. Yaxshisi, shunchaki yaxshi restoranda kolduni yoki draniki tatib koʻring.
3. Minskni boshqa shaharlar bilan solishtirmang. Bu yerda oʻziga xoslik qadrlanadi.
4. Yoʻl harakati qoidalariga rioya qiling. Ufqda mashina koʻrinmasa ham, yoʻlni qizil chiroqda kesib oʻtmang. Minskda buni qat’iy nazorat qilishadi.
5. Bitta samokat — bir kishi. Bitta elektr samokatda ikki kishi uchmang. Buning uchun jarimaga tortilish mumkin.