Islandiyaga o‘zimiz boramiz: tayyor yo‘nalish, byudjet va sayyohlar uchun maslahatlar

2025-yilning bahorida do‘stlarimiz bilan tavakkal sarguzashtga — Islandiya bo‘ylab butkul mustaqil sayohat qilishga qaror qildik. To‘g‘risini aytsam, qiyin ob-havo tufayli  bu yerda erta bahor sayohat vaqti emas. Ammo biz ikki narsa umidida: shimol yog‘dusini ko‘rish va sayyohlar yog‘ilgan mavsumga tushib qolmaslik uchun ongli ravishda shu tavakkalga ahd qildik. Oldindan aytib qo‘ya qolay, bizning bu sho‘xligimiz ish berdi.

Biz bir haftada maksimum-dasturni uddaladik: Moviy lagunada boshdan-oyoq shalabbo bo‘ldik, ikki qit’a kesishgan nuqtada turdik, ulkan geyzerlar, sharsharalar, muzliklarni va muzlagan Atlantikadagi o‘sha mashhur qora plyajni ko‘rdik.

Orzuimizdagi sayohat qanchaga tushganini bilish uchun ushbu maqola oxirida hamma xarajatlarimizni: samolyot chiptasi, mashina ijarasidan tortib, yeb-ichganimizgacha hammasini birma-bir yozib chiqdim. Bu sizga ham xarajatlarni to‘g‘ri chamalab, eng yaxshi yo‘nalishni tanlashga yordam beradi.

Islandiya haqida nimalarni bilish lozim?

Islandiya darhaqiqat o‘zgacha bir olamdek tuyuladi. Bu bor-yo‘g‘i 400 529 ta inson yashaydigan mamlakat. Bu yerda tabiatni asrash to‘g‘risidagi qonunlar maishiy hayotni: uylar qurilishidan tortib, qayerda yashil po‘panakni bosish mumkinligigacha chinakamiga yo‘lga soladi. Yana bu davlatning armiyasi yo‘q va u jinoyatlar soni Yevropa bo‘yicha eng past ko‘rsatkichga ega. Islandiyaga borish uchun eng qulay vaqt iyul-avgust oylari hisoblanadi. Aynan shu oylarda ob-havo mo‘tadil, kunlar uzun bo‘ladi, demak, ko‘proq joylarni aylanishga ulgurish mumkin. Yo‘lda ketar ekanmiz, atrof manzarasi daqiqa sayin o‘zgarib borardi: sharsharalar, qora qoyalar, muzliklar, yam-yashil po‘panak dalalar, kichik qishloqlar va ummon sohilidagi baland qirg‘oq. Hammasi kameraga muhrlandi, lekin bu kengliklar shukuhini u baribir to‘la-to‘kis yetkazib berolmaydi. 

Bu yerlik odamlar og‘ir-bosiq, xushmuomala va yugur-yugurni yoqtirishmaydi. Safarimiz davomida biron marta bo‘lsin yomon yoki qo‘pol gap eshitmadik. Go‘yoki, bu yerga odamlar tabiat manzaralarini tomosha qilishga kelishadiyu, ortga esa shunchaki tomosha taassurotidan ko‘ra muhimroq bo‘lgan — ichki xotirjamlik va osoyishtalik hissi bilan qaytishadi.

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Safar uchun kerak bo‘ladi: viza, chiptalar va pul

Men Rimda yashayman, shu bois menga safar uchun qo‘shimcha hujjatlar kerak bo‘lmadi. Islandiyaga sayohat qiluvchi o‘zbekistonliklarga S toifali oddiy turistik shengen vizasi kerak bo‘ladi. O‘zbekistonda Islandiya vakolatxonasi yo‘qligi sababli viza uchun ariza Fransuz elchixonasi orqali topshiriladi. Buning uchun quyidagi hujjatlar kerak: 

• to‘ldirilgan shengen vizasi shakli;
• amaldagi xorijga chiqish uchun pasport;
• ikkita rangli fotosurat;
• mehmonxona band qilinganini yoki safar yo‘nalishini tasdiqlash; 
• tibbiy sug‘urta;
• pulingiz borligi haqida bank ma’lumotnomasi;
• qaytish chiptasi. 

Viza qanday olinadi:

1. France-Visas portalida ro‘yxatdan o‘tasiz. Tizim sizga barcha bosqichlardan o‘tish va arizani to‘g‘ri to‘ldirishga yordam beradi.
2. Anketani to‘ldirgach, Toshkentdagi viza markaziga shaxsan borib uchraysiz.
3. Arizangiz ko‘rib chiqilayotganini onlayn kuzating. Shunday qilsangiz, pasportingiz tayyormi-yo‘qmi, uni olish tartibidan xabardor bo‘lasiz. Odatda viza berish-bermaslik haqidagi qaror kerakli hujjatlar to‘liq topshirilgan sanadan boshlab 15 ish kunida chiqishi kerak, biroq tig‘iz mavsumda bu muddat 30-45 kunga cho‘zilishi mumkin. 

Toshkentdan Islandiya poytaxti – Reykyavikka to‘g‘ri uchadigan reyslar yo‘q. Odatda sayyohlar Istambul, Riga yoki boshqa yirik xablar orqali uchishadi. Chipta narxi reyslar yo‘nalishi va ulanishiga bog‘liq bo‘ladi, shuning uchun oldindan bir nechta reyslarni solishtirib chiqish kerak.

Pul masalasiga kelsak, xalqaro tizim kartalari (Visa, Mastercard) Islandiyaning hamma yerida ishlaydi. Masalan, bizga naqd pul umuman kerak bo‘lmadi, faqat karta ishlatdik. Safar oldidan bank ilovasida karta sozlamalarini tekshirib oling: kartadan xorijda foydalanish, onlayn-to‘lov va 3D Secure xizmati yoqilganiga, internetda xaridlar va amaliyotlar uchun limit yuqori ekaniga ishonch hosil qiling. Shuningdek, karta hududlar bo‘yicha geoblokka tushgan-tushmaganligini ham tekshiring.

Islandiyada mashina qanday ijaraga olinadi?

Islandiyada manzillar o‘rtasidagi oraliq masofalar katta bo‘lib, ko‘plab qiziqarli joylar esa shaharlardan ancha uzoqda joylashgan. Shu bois bu yerda mashina eng qulay transport vositasi.

O‘zbekistonda berilgan haydovchilik guvohnomasi Islandiyada cheklovlarsiz amal qiladi, demak, xalqaro guvohnoma rasmiylashtirish shart emas. Mashinani bir nechta agregatorlardan biri (masalan, Europcar Car Rental, Localrent, DiscoverCars) orqali oldindan band qilsa bo‘ladi.

Biz mashinani Blue Car Rental orqali ijaraga oldik va Islandiyaning o‘zgaruvchan ob-havosida haydashga qulay bo‘lgani uchun Kia Sorento‘ni tanladik. Yetti kun uchun ijara haqi sug‘urta bilan birga 875 yevro (12,4 mln so‘m) bo‘ldi. Biz faqat bazaviy sug‘urtani emas, balki qo‘shimcha sug‘urta xizmatini ham olgandik. Parkovka uchun hammasi bo‘lib 30 yevro (426 ming so‘m) ishlatdik, bundan tashqari bir marta avtoturargoh to‘lovini unutganimiz uchun 20 yevro (284 min so’m) jarimaga ham tushdik. Yoqilg‘i sarfi esa naq 313 yevroga (4,4 mln so’m) tushdi.

Avtomobillarni ijaraga beruvchi kompaniyalar aeroportga yaqin joylashgan bo‘larkan. Biz ijaraga olgan joy ham piyoda borsa bo‘ladigan masofada edi. Bir necha daqiqada ofisga yetdik, hujjatlarni rasmiylashtirdik, mashina kalitini oldig-u, yo‘lga tushdik.

Bahorda qanday kiyim-kechak olish kerak? 

Bir haftalik safar uchun bizga bitta yo‘lxalta yetarli bo‘ldi. Kiyimlarimiz ko‘p emasdi, lekin Islandiya marti uchun asosiysi – suv o‘tkazmas issiq va qulay kiyimlar. Mana shu narsalar sizga chindan juda asqatadi:

• termo xususiyatli ichkiyim;
• qishlik kurtka;
• suv o‘tkazmas qishlik ishton;
• xayking uchun mos keladigan suv o‘tkazmas poyabzal;
• issiq qalpoq;
• yo‘lxalta (ryukzak);
• Moviy ko‘rfaz uchun cho‘milish kiyimi;
• bir nechta paypoq;
• kichik doriquti;
• termos.

Yana pauerbank ham oling. Umuman olganda, safar davomida sizga qulay bo‘lishi uchun shu narsalarning o‘zi yetadi.

Safarga hozirlik va yo‘nalishni belgilash

Biz avval boshdanoq bu sayohatni butkul mustaqil o‘tkazishga kelishib olgandik. Biz uchun uni odatdagi tayyor yo‘nalish bo‘yicha emas, boshdan-oxirigacha faqat o‘z rejamiz asosida o‘tkazish muhim edi. Tayyorgarlikni biz taxminan to‘rt oy oldin, ya’ni noyabrda boshladik.

Oldin o‘zimiz borishni istagan joylar ro‘yxatini tuzdik. Bu oson bo‘lmadi, chunki Islandiyada qiziqarli manzillar juda ko‘p, bizda esa bor-yo‘g‘i bir hafta vaqt bor edi.

Bizning yo‘nalishimiz quyidagi manzillarni o‘z ichiga oldi:

• Tingvetlir (Þingvellir) Milliy bog‘i – ikki qit’aning qoq o‘rtasida yurish mumkin bo‘lgan tom ma’nodagi noyob joy. Bu yerda ikkita — Yevrosiyo va Shimoliy Amerika tektonik plitalarining ulkan sinig‘i ko‘rinib turadi. Yana bu joy Islandiyaning tarixiy markazi hisoblanadi. Aynan shu yerda 930-yilda vikinglarning birinchi parlamenti (Alting) tuzilgan, ehtimol unda Ragnar Lodbrok bilan Byorn Temiryonbosh ham bo‘lishgandir (agar gap kimlar haqida ketayotganini anglamagan bo‘lsangiz, «Viking» serialini ko‘ring, bu film hatto qayta ko‘rishga ham arziydi).
• Gyudlfoss (Gullfoss) sharsharasi – ikkita juda kuchli oqim shaklida kanyonga shovqin solib otiluvchi o‘sha mashhur «Oltin sharshara». 
• Geyzer Strokkur (Strokkur) – o‘z qo‘shnisi «uyqudagi» Geysirdan farqli ravishda Strokkur mamlakatdagi eng ishonchli geyzer sanaladi, chunki u barqaror ravishda har 5–10 daqiqada 30 metr balandlikka qaynoq suv otib turadi. Kamerangiz shay tursin: ajoyib manzara sizni uzoq kuttirmaydi.
• Dirxolaey (Dyrhólaey) burni – Islandiyaning quruqlikdagi eng janubiy nuqtasi. Bu yerda ummon va muzliklarga xos ajoyib manzara namoyon bo‘ladi. Bu joyning asosiy inshooti — poydevori suv ostigacha kirib ketgan toshli arka. Ehtiyot bo‘ling: bu joyda yil bo‘yi shamol nihoyatda kuchli.
• Skogafoss va Selyalandsfoss sharsharalari – janubiy sohilning ikki ramzi. Skogafoss — bu nihoyatda qalin suv devori go‘yo (suratda zo‘r chiqadi). Selyalandsfoss esa sharshara ichiga kirib, dunyoga suv pardasi ortidan nazar solishga imkon berishi bilan noyob hisoblanadi. Boshdan-oyoq shalabbo bo‘lasizu, lekin taassurotingiz shunga arziydi.
• Sináyfedlsyyokyudl (Snæfellsjökull) muzligi – orol g‘arbidagi sehrli joy.  Bu muz qalpog‘i bor vulqondir. Aynan shu yerda Jyul Vernning «Yer qa’riga sayohat» asari qahramonlari yer markaziga kirish yo‘lini topishgan. 
• Yokyulsaurloun (Jökulsárlón) – muzli laguna bo‘lib, unda muzloqdan uzilgan ulkan moviy aysberglar suzib yuradi. Agar omadingiz chopsa, muzlar orasida suzib yurgan dengiz mushuklarini ham ko‘rishingiz mumkin.
• Diamond Beach plyaji – Yokyulsaurloun qo‘ltig‘i yonidan o‘tgan yo‘lning narigi betida joylashgan. Qora rangli vulqon qumi ustida okean chiqarib tashlagan yaltiroq muz bo‘laklari sochilib yotadi.  Ular quyosh nurida chinakam olmoslardek yaltiraydi — Diamond Beach deb nomlanishi ham shundan.
• Reynisfyara (Reynisfjara)qora plyaji – qora qumli va organ soziga o‘xshash g‘aroyib bazalt ustunlari bor eng mashhur plyaj.

Turar-joy

Biz qaysi kuni qayerga borishimizni belgilab oldik va yashash joyimizni ham keyingi manzilga otlanish oson bo‘ladigan joylardan tanladik. Tunlarni shunday taqsimladik: ikki kecha Reykyavikda, bir kechadan — Vik va Xyobnda. Booking orqali band qilingan mehmonxona va gestxauslar uchun jami 262 yevro yoki 3,7 mln so‘m to‘lov qildik.

Kun ketidan kun keldi: qayerlarga bordik, nimalarni ko‘rdik?

1-kun: Reykyavik bilan tanishuv

Islandiyadagi ilk kunimiz deyarli bo‘sh edi. Reykyavikka qo‘ndik, mashinani oldik, mehmonxonaga joylashdik va qisqa sayrga chiqdik. Reykyavik — mo‘jazgina sokin poytaxt shahar, unda hamma yog‘ga piyoda borish mumkin: yorqin rangli uychalar, sohil, qahvaxonalar va juda musaffo havo. Biz birinchi kun uchun bundan ortiq hech nima reja qilmagandik, shunchaki parvozdan keyin dam olish va ertasiga sayohatda davom etishga kuch to‘plash uchun vaqtliroq yotib uxladik.

2-kun: Tingvetlir Milliy bog‘i, Strokkyur geyzeri va Gyudlfoss sharsharasi

Keyingi kun Vik qishlog‘i sari yo‘lga tushdik. Reykyavikdan Vikkacha deyarli 190 km bo‘lib, yo‘l bo‘yi bir necha bor to‘xtaganimiz sababli manzilga yetishga deyarli bir kunimiz ketdi. Bu «Oltin halqa»ning an’anaviy qismi va u Islandiyadagi ilk kunni to‘liq o‘tkazishga juda mos keladi. 

Birinchi to‘xtash joyimiz Tingvetlir milliy bog‘i bo‘ldi. Bog‘ga kirishdanoq Oksararfoss sharsharasiga eltuvchi so‘qmoq yo‘l boshlanadi. Sharsharadan keyin Yevrosiyo va Shimoliy Amerikani ajratib turuvchi o‘sha afsonaviy kesishuv nuqtasiga chiqdik — Tingvetlirda ikki qit’aga tegishli tektonik plitalar o‘rtasiga tushgan so‘qmoqdan yursa bo‘ladi.

Keyin geyzerlar vodiysiga yo‘l oldik. Asosiy geyzer — Strokkyur, har 5–10 daqiqada tepaga qaynoq suv otadi.  Avval suv kattaroq pufak shaklida paydo bo‘ladi va birdan yuqoriga otiladi. Atrof suv bug‘iga to‘la va butun vodiy o‘zga sayyora ko‘rinishiga kirgan.

Kunni Gyudlfoss sharsharasi tomoshasi bilan tugatdik. U ikkiga bo‘linib oqadi, suvi chuqur kanyonga tushadi. Bir nechta tomosha maydonchalari bor, har biridan o‘zgacha manzarani ko‘rasiz. Suvning shiddati juda kuchli, shovqini ancha uzoqdan eshitilib turadi. 

3-kun: Reynisfyar plyajida sayr va Shimol yog‘dusini izlash

• 

  Skogafoss sharsharasi
• 

   Reynisfyar qora plyaj

Tunda biz Vik qishlog‘iga yetib oldik va mehmonxonaga joylashdik. Vik janubiy sohildagi joylashish uchun eng qulay manzillardan biri: u ixchamgina, osuda va Atlantika ummoni hamda Reynisfyarning qora plyajidan bir necha daqiqalik masofada joylashgan.

Reynisfyar – Islandiyadagi eng mashhur plyajlardan biri. Uning qumi maydalangan vulqon lavasidan iboratligi uchun qora rangda. Sohil o‘zgacha ko‘rinishda: qora qum, baland bazalt ustunlar va ummonning quruqlikka juda yaqin kelib mavjlanadigan kuchli va baland to‘lqinlari. Tongda biz uyg‘oniboq ummon tomon bordik. Nihoyatda go‘zal manzara, lekin xavfli: bu yerda odamni to‘satdan ummonga tortib ketadigan ayyor «qotil to‘lqinlar» bor. Shu bois suvga yaqinlashmagan ma’qul.

Sayrdan keyin Vikdagi yagona Cave & Lava savdo markazida nonushta qilib, yo‘limizda davom etdik.

Buyog‘iga Dirxolaey burniga ketdik. U plyaj yaqinida joylashgan va chiroyli arkli, yillar davomida ummon suvlari tarashlagan baland qoyadan iborat. Bu joydan qora plyajlarning uzun sohillari, ummon va qoyalar ko‘rinib turadi.

Keyingi bekatimiz — Skogafoss sharsharasi edi. Bu Islandiyaning eng mashhur sharsharalaridan biri: uning suvi 60 metr balandlikdan tushadi. Oqimni hosil qiluvchi quyuq suvli tuman tufayli quyoshli kunda sharshara bo‘sag‘asida kamalaklar paydo bo‘ladi. Sharsharaga juda yaqin borsa bo‘ladi, ammo boshdan-oyoq ho‘l bo‘lishingiz ham aniq.

Shu kungi so‘nggi manzilimiz Selyalandsfoss sharsharasi bo‘ldi. Uni mashhur qilgan xususiyati bor: sharshara atrofida so‘qmoq bo‘lib, undan chiqib borib sharshara ichiga kirish mumkin. Sharshara balandligi 60 metrga yaqin. So‘qmoq esa ayniqsa mart oyida ancha sirpanchiq, shu bois suv o‘tkazmas kiyim va tagi tishli poyabzal kiygan ma’qul.

Endi Shimol yog‘dusini qanday «tutganimiz» haqida

• 

   
• 

   

Sayohatimizning uchinchi kuni shahar tashqarisiga chiqib, Shimol yog‘dusini ko‘rishga qaror qildik. Shimol yog‘dusini uchratish uchun ma’lum shart-sharoit: qorong‘i va bulutsiz osmon hamda shahardan uzoqroq joy kerak. Ob-havodan tashqari, Quyosh faolligi ham muhim.

Shimol yog‘dusi quyosh chaqinlari samoga zaryadlangan zarralarni sachratganda paydo bo‘ladi. Bu zarralar Yergacha yetib kelib, uning magnit maydoni bilan to‘qnashadi va osmonga yashil va pushti to‘lqinli yog‘dularni «sochib yuboradi». Shu sabab, quyosh faolligi qanchalik kuchli bo‘lsa, yorqin yog‘dularni ko‘rish imkoni shuncha ortadi.

Ba’zida, hamma sharoit to‘g‘ri kelishi va yog‘du paydo bo‘lishini bir necha kunlab kutish kerak. Biz har kuni yog‘du paydo bo‘lish ehtimoli bor va kimlardir yog‘duni ko‘rgan joylarni ko‘rsatadigan Hello Aurora ilovasini kuzatib turdik.  

Belgilangan joyga yetib kelganimizda, atrof qop-qorong‘i edi. Lekin biroz vaqt o‘tib, osmonda sezilar-sezilmas yashil tutun ko‘rindi. Biz yo‘l chetiga o‘tdik, yog‘du esa asta kuchayib bordi. Albatta, u suratlarda ko‘rganimizdek juda yorqin emasdi, lekin har holda kamerasiz ham ko‘rinib turardi. Yog‘du nuri asta sirpanar, shaklini o‘zgartirar, ba’zan pushti rangga kirardi. Bu manzara odamni rom etuvchi ajoyib raqsga o‘xshardi.

Yo‘lga chiqishdan oldin siz kutayotgan manzara bo‘lmay qolishiga o‘zingizni ruhan tayyorlang. Chunki hayotda yog‘du internetdagi suratlardagidan xiraroq bo‘ladi. Biroq, u paydo bo‘lgan o‘sha lahza odamda o‘chmas taassurot qoldiradi.

4-kun: Olmos plyaj va Yokyulsaurloun qo‘ltig‘i

• 

  Yokyulsaurloun lagunasi
• 

  Diamond Beach

Tongda Vikdan Xyobn shahri tomon yo‘lga tushdik. Bu butun yo‘nalishimizdagi eng uzoq yo‘l edi. Yo‘limizda esa janubiy sohildagi ikkita tomoshabop manzil bor edi: Yokyulsaurloun muzli qo‘ltig‘i va Olmos plyaj.

Yokyulsaurloun qo‘ltig‘i Yevropada eng yirik hisoblangan Vatnayyokyudl muzligidan oqib tushgan suvdan paydo bo‘lgan. Suvda turli rang va kattalikdagi aysberglar suzib yuradi, ular muzlikdan asra ajralib, ummon tarafga oqib ketadi.

Yo‘lning narigi betida to‘lqinlar lagunadan uloqtirgan muz bo‘laklariga to‘la qora plyaj — Diamond Beach joylashgan. Muz bo‘laklari go‘yo qora qum ustida yotgan katta-katta «kristallarga» o‘xshaydi. Muzlar shaffof, ba’zan biroz moviy tusda, ummon esa ularni tinmay yuvadi va siljitaveradi, shu bois manzara doimo o‘zgarib turadi.

Oqshomga Xyobnga yetib oldik va kichik mehmonxonaga joylashdik. Uychamiz ochiq dala o‘rtasida, yon-verida hech qanday bino yo‘q edi. Bunday tanholik odamda o‘zgacha bir kayfiyat uyg‘otar ekan. Atrofda shahar chiroqlari yo‘qligi bois, bu yerda tunda yulduzlar yaxshi ko‘rinarkan.

5-kun: Snayfedlsyyokyudl muzligi va Myulaglyufur kanyoni

• 

  Snayfedlsyyokyudl muzligi
• 

   Myulaglyufur kanyoni
• 

  Snayfedlsyyokyudl muzligi

Beshinchi kuni biz Reykyavikka qaytdik, ammo yo‘l-yo‘lakay bir nechta joylarni ko‘rib o‘tdik. Ko‘proq piyoda yurishni istab, tomosha qilish uchun yaqin manzillarni tanladik. Birinchi borgan joyimiz Snayfedlsyyokyudl muzligi bo‘ldi. Uning atrofida qisqa so‘qmoqlar bor ekan, ular bo‘ylab sayr qilish va muz dalani har xil rakursdan tomosha qilish mumkin.

Shundan keyin biz Myulaglyufur kanyoniga bordik. So‘qmoq yo‘ldan yurish oson, atrofda esa biri-biridan go‘zal manzaralar, tepadan dara, daryo va baland sharshara juda chiroyli ko‘rinadi. 

Qaytishda Reynisfyar plyajida yana bir bor to‘xtadik, bu joy bizga juda yoqib qolgandi. Qorong‘i tusha boshlagan edi, lekin biz kunbotar paytdagi eng go‘zal shafaqni ko‘rishga ulgurdik. Qarshimizda och pushti va binafsharang tusga kirgan osmon, qora sohil va ulkan to‘lqinlari mavjlanib turgan moviy ummon namoyon bo‘lgandi.

6-kun: Moviy lagunada dam olish

• 

  Moviy laguna
• 

   

Oltinchi kuni yana bir mashhur joyga — Moviy lagunaga bordik. Bu geotermal kompleks bo‘lib, shundoqqina aeroport yaqinidagi lava dalalarida joylashgan. Bu yerga suv shu yaqin oradagi geotermal stansiya tizimidan oqib keladi, shuning uchun u doimo iliq bo‘ladi. Suvning doimiy o‘rtacha harorati 37–39°C. Tarkibidagi kremniy va boshqa mineral moddalar unga moviy tus beradi.  

Suvga tushganda odamga u juda quyuq va yumshoq tuyuladi. Harorat va mineralli tarkibiga ko‘ra, bu suv odamni bir necha daqiqadayoq tinchlantiradi. Sayyohlar eng ko‘p keladigan joy bo‘lsa-da, bu yerdagi muhit sokin va osuda ekan.

Standart chipta lagunaga tushish, yuz uchun niqob, bitta ichimlik, shuningdek sochiq va hammom xalati olish imkonini beradi. Hududda dam olish joylari, dushlar va qahvaxonalar bor, demak, bu yerda bemalol bir necha soat shoshilmasdan, ko‘ngilli hordiq chiqarish mumkin.

Safarimizning oxirgi kuni Reykyavikni biroz aylandik, suvenirlar xarid qildik, shahar markaziga bordik.

Safarimiz necha pulga tushdi?

Bir haftalik sayohat menga 1215 yevroga (17,3 mln so’m). tushdi. Biz olti kishilik guruh bo‘lib sayohat qildik, barcha yirik xarajatlar o‘rtada bo‘lingani uchun kishi boshiga xarajatimiz katta bo‘lmadi.

Men Rimdan uchib borgandim, borish-qaytish chiptasi 292 yevro (4,1 mln so’m) bo‘ldi. To‘g‘ridan-to‘g‘ri reyslar bo‘lmagani uchun men manzilga qo‘nib o‘tishlar va loukosterlar bilan yetib oldim. O‘zbekistondan uchadiganlarga chipta narxi qimmatroq bo‘ladi, ammo xarajat talab qiladigan joyi bir xil.

bo‘ldi. Biz yo‘nalishimizga mos bo‘lgan to‘rtta joyda tunadik: Reykyavikda, Vikda va Xyobn yaqinida. Birinchi tunni uch yulduzli mehmonxonada o‘tkazdik. Olti kishi uchun uchta ikki kishilik xona oldik va 405 yevro (5,7 mln so’m) to‘ladik, bu kishi boshiga 67,5 yevrodan (959 ming so’m) tushdi. Vikda gestxausni band qildik va unda ikki kecha tunadik. Bu yerda uch kishilik ikkita xonani olgandik, umumiy hisob 578 yevro (8,2 mln so’m), har birimizdan esa 96,33 yevro (1,3 mln so’m) xarajat bo‘ldi. Xyobnda kichik oilaviy mehmonxonaning har biri uch kishiga mo‘ljallangan ikkita xonasiga joylashdik. Bir kecha uchun 304 yevro (4,3 mln so’m), kishi boshiga 50,67 yevrodan (720 ming so’m) to‘ladik. So‘nggi ikki kechani Reykyavikdagi xostelda o‘tkazdik. U yerda alohida oltita yotoq joylashgan katta xonani band qildik va hammasi bo‘lib 290 yevro (4,1 mln so’m) — bir kishi uchun esa 48,3 (686 ming so’m) yevrodan pul berdik.

Avtomobil — asosiy xarajatlardan biri bo‘ldi. To‘liq sug‘urtasi bilan bir haftalik ijara haqi har birimizga 149 yevrodan (2,1 mln so’mdan), benzin xarajati esa 57 yevrodan (810 ming so’m)  tushdi. Yana avtoturargoh uchun 5 yevrodan (71 ming so’mdan) to‘ladik.

Biz borgan joylar orasida pul to‘lab kiriladigani Moviy laguna bo‘ldi — chipta bir kishi uchun 104 yevro (1,4 mln so’m). Ovqatlanish, qahva, tamaddilar va suvenirlar uchun xarajatlar mening hisobimda 350 yevro (4,9 mln so’m) bo‘ldi. Buyog‘i endi har kimning o‘ziga bog‘liq, agar tushliklarni o‘zingiz tayyorlasangiz, faqat ko‘chada ovqatlangandan arzon tushadi albatta. Yakuniy hisob-kitobga ko‘ra, Islandiya bo‘ylab bir haftalik mutlaqo mustaqil sayohat nafaqat uddalasa bo‘ladigan ish, balki u yerdagi yuqori narx-navoni hisobga olganda ham hamyonni charchatmaydigan ko‘ngilli sarguzasht bo‘lishi ma’lum bo‘ldi.

Yakuniy smetamiz quyidagicha:

Islandiya — o‘zining bokira va bo‘ysunmas tabiati og‘ushida odamga ajoyib va kamyob osudalik baxsh etuvchi mamlakat.  Shimol yog‘dusini ko‘rish, qit’alar kesishuvida yurish va o‘zingizni shu osuda dunyoning bir qismi o‘laroq his etish — bularning hammasi barcha xarajatlarimizni yuvib ketdi va sayohatimizdan ajoyib taassurot bo‘lib qoldi.