Italiya Alp togʻlarini qanday aylanib chiqqanim va Pinterest`dagi ertaknamo togʻlarni koʻrganim haqida

2023-yilda Rimga koʻchib oʻtgach, darhol Dolomit Alp togʻlarini borishni xohlagan joylarim roʻyxatiga qoʻshdim. Men haykingni yaxshi koʻraman, hali Toshkentdaligimda ham doʻstlarim bilan tez-tez togʻga chiqardik va oʻshandan beri bu men uchun hordiq chiqarish usuli boʻlib qolgan. Togʻlarda kundalik tashvishlardan uzoqlashish va narsalarga biroz kengroq qarash osonroq. 

Yakunda Dolomit togʻlarida hatto ikki marta boʻlishga muvaffaq boʻldim — bahorning oxiri va kuzning oʻrtasida. Birinchi marta jamoat transportida, ikkinchi safar esa mashinada harakatlandim. 

Ushbu qoʻllanmada har ikki safarim tajribasini jamladim, qanday qilib sayohat qilish qulayroqligi, turli fasllarda nimalarni koʻrish kerakligi, qayerda toʻxtash va eng goʻzal joylarni koʻrish uchun yoʻnalishni qanday rejalashtirish haqida soʻzlab beraman.

Dolomit tog’lari bahorda: mashinasiz qanday sayohat qilish mumkin?

• 
• 

Dolomit Alp togʻlari — Italiya shimolidagi togʻlardir. Agar bizning togʻlarimiz yumshoqroq va tuproqli boʻlsa, Dolomitlar — quyosh botishida pushti rangga (Enrosadira effekti), kunduzi esa kulrang-moviy rangga boʻyaladigan oʻtkir va vertikal qoyalardir. Shuningdek, bu togʻlar qachonlardir qadimgi Tetis okeanining tubi boʻlgan va YUNESKO merosi roʻyxatiga kiritilgan.

Alplarga ilk sayohatim 2025-yil 14-mayda boshlandi. Venalik doʻstim Insbrukka borishni taklif qildi — bu Avstriya Alplarining bir qismidir. Men darhol rozi boʻldim, lokatsiyalar yaqin joylashgan, shuning uchun ularni birlashtirmaslik gunoh edi. Reja tezda pishdi: yoʻnalishni tuzdim, turar joyni band qildim va chiptalarni sotib oldim.

Xuddi shu mavzuda ko‘proq ma'lumot

Islandiyaga o‘zimiz boramiz: tayyor yo‘nalish, byudjet va sayyohlar uchun maslahatlar

Innsbruk: sayohat nimadan boshlangan?

• 
• 
• 

Innsbruk — Alp togʻlaridagi shinam va kichik shaharcha boʻlib, u yerga faol dam olishni va tabiatni sevuvchilar kelishadi. Unga Venadan poyezdda yetib keldim, doʻstimda talabalik bonuslari boʻlgani sababli chipta tekinga tushdi. Venaning oʻzigacha esa Rimdan sevimli Ryanair`da, bir talay kiyimlarni xudi ostiga yashirib, atigi 30 EUR (taxminan 428 624 UZS)ga uchib keldim. Nonushta narx ichiga kiritilgan shinam Marmota xostelida toʻxtadim. Ikki kecha uchun 118 EUR (taxminan 1 685 921 UZS) toʻladim.

Möserer See koʻli: mavsum boshidagi yengil hayking

• 
• 
• 
• 

Men mintaqaning eng mashhur choʻqqilaridan biri — balandligi 2 221 metr boʻlgan Seefelder Spitzega chiqishni juda xohlagan edim. Ammo yoʻl yopiq ekan, Avstriya Alp togʻlarida may oyining boshi hali hayking mavsumi emas ekan. Mahalliy aholi buni oʻrniga kichik Möserer See koʻliga borishni maslahat berishdi. Agar siz oson yoʻnalishlarni va tabiatda xotirjam sayr qilishni yoqtirsangiz, bu variant eng ma’quli boʻladi. Koʻlgacha boʻlgan yoʻl juda goʻzal edi va borib-kelish jami toʻrt soatga yaqin vaqt oldi.

Möserer See koʻliga borish uchun Innsbrukdan Seefeld yoʻnalishidagi ÖBB poyezdiga oʻtirish kerak, yoʻlga ketadigan vaqt taxminan 40–45 daqiqani tashkil etadi. Chiptalar bir tomonga taxminan 10 EUR (taxminan 142 875 UZS) turadi.

Bolsano: Dolomit tog’larining boshlang‘ich nuqtasi

Keyingi manzil Bolsano shahri bo‘lib, u yerga poyezdda bordim. Bolsano — Janubiy Tirolning rang-barang shahri va poytaxti bo‘lib, u yerda mahalliy aholi ikki tilda: italyan va nemis tillarida so‘zlashadi.

Innsbrukdan chipta narxi 12 EUR (taxminan 171 450 UZS) bo‘lib, sayohat ikki soat davom etdi. Agar siz mashina ijaraga olishni rejalashtirmayotgan bo‘lsangiz, Bolsano shahridan Dolomit tog‘lariga jamoat transportida tezda yetib olishingiz mumkin.  Maslahat: bir martalik transport chiptasi 5 EUR (taxminan 71 437 UZS) turadi. Agar faol harakatlanishni rejalashtirgan bo‘lsangiz, Mobilcard olish foydaliroq: uch kunga 30 EUR (taxminan 428 624 UZS) yoki haftasiga 45 EUR (taxminan 642 936 UZS) turadi.

Bu shaharda besh kun bo’ldim. Do‘stlarim bilan Booking.com orqali 535 EUR (taxminan 7 643 793 UZS) ga kvartira ijaraga oldik va har birimizga 134 EUR (taxminan 1 914 520 UZS) ga tushdi.

Secheda tog‘i: eng murakkab yo‘nalish va eng kuchli taassurotlar

• 
• 
• 
• 
• 
• 
• 

Bu bizning yo‘nalishdagi birinchi manzilimiz edi. Secheda tog‘ining balandligi 2518 metr. Unga borish uchun Bolsano shahridan Ortizeyagacha bo‘lgan 350-sonli avtobusga o‘tirish, so‘ngra funikulyorga chiqish kerak. Katta Chimyonga qiyin safarlarga tayyor bo‘lmaganlar uchun bu joy jannatning o‘zginasi.

Ammo biz mavsumdan tashqari vaqtda borganimiz uchun u ishlamayotgan ekan, shuning uchun butun yo‘lni piyoda bosib o‘tishga to‘g‘ri keldi. Ko‘tarilish oson bo‘lmadi, biz qanchalik yuqoriga ko‘tarilsak, so‘qmoq shunchalik tik bo‘lib borardi. Butun yo‘l ikki tomonga sakkiz soatcha vaqtni oldi.

Bu butun safar davomidagi eng murakkab marshrut edi, lekin aynan shuning uchun ham u eng ko‘p esda qoldi. Qanchalik ko‘p harakat talab qilinsa, yuqoridagi lahzalar shunchalik yaqqol sezilardi. Shuning uchun bo‘lsa kerak, Secheda Dolomit tog’laridagi eng sevimli joylarimdan biriga aylandi.

Adolf-Munkel-Veg: Odle cho‘qqilariga tinch marshrut

• 
• 
• 
• 
• 
• 

Ertasi kuni rejamiz bo‘yicha Adolf-Munkel-Veg (Adolf Munkel Weg) yo‘nalishi bor edi. Bu marshrut birinchisiga qaraganda ancha oson bo‘lib, ikki tomonga bor-yo‘g‘i besh soat vaqt ketdi.

Biz o‘rmon orqali Odle cho‘qqilari — yashil yonbag‘irlar fonida darhol ko‘zga tashlanadigan o‘tkir cho‘qqilar tomon yurdik. Marshrutning yakuniy nuqtasi Geisler Alm yaylovlari, Odle cho‘qqilari etagidagi go‘zal dala bo‘ldi. Bu yerda Dolomit tog’larining eng ta’sirli ko‘rinishlaridan birini ochadigan yog‘och arg‘imchoqlar va ziplayn mavjud.

Adolf-Munkel-Veg (Adolf Munkel Weg) yo‘nalishining boshlanishiga yetib borish uchun Bolsano shahridan Ponte Gardena (Waidbruck) stansiyasiga boradigan poyezdga chiqish kerak, yo‘l taxminan 25 daqiqa davom etadi. U yerdan 340-sonli avtobus jo‘naydi va to‘g‘ridan-to‘g‘ri so‘qmoqning boshlanish nuqtasi bo‘lgan Zanser Alm (Malga Zannes) yayloviga olib boradi. Butun sayohat taxminan bir yarim-ikki soat davom etadi. Sizni Bolsanoga olib boradigan oxirgi avtobus soat 18:30 da jo‘naydi, shuning uchun vaqtingizni oldindan hisoblab qo‘ying.

Xuddi shu mavzuda ko‘proq ma'lumot

Qanday qilib Oʻzbekistondan Qirgʻizistonga velosipedda bordim?

Brayes ko‘li: marshrutning eng suratbop joyi

• 
• 
• 
• 
• 

Uchinchi kuni biz mashhur Brayes ko‘liga (Lago di Braies) bordik. Bu joy haqiqatan ham sehrli va xuddi Pinterest’dagi rasmdagidek. Suvning rangi ko‘lning asosiy xususiyati bo‘lib, u kun davomida o‘zgarib turadi: ertalab mayin moviy, kunduzi to‘q zumrad rangda, kechqurun esa deyarli kumush rangda bo‘lishi mumkin.

Ko‘l bo‘yida kichik qayiq to‘xtash joyi mavjud — bu tarixiy yog‘och qayiqlar ushbu joyning ramziga aylangan. Ularda uchish mumkin, yarim soatlik narxi 25 EUR (taxminan 357 187 UZS). Qayiqlarni boshqarish ancha qiyin, agar siz qiz bo‘lsangiz, jismoniy tayyorgarliksiz bu qiyin bo‘ladi. Bundan tashqari, qayiqda sayr qilish uchun sovg‘a sifatida yodgorlik magnitini berishadi.

Ko‘l Tirolning shimoliy qismida joylashgan bo‘lib, u yerga borish eng qiyin edi. Yo‘l uch soat davom etdi. Dastlab Bolsanodan Brunikogacha poyezdga o‘tirdik, keyin Brunikodan Dobyakkogacha mintaqaviy poyezdda o‘tdik va Dobyakodan Lago di Braiesgacha har 30-60 daqiqada qatnaydigan 442-sonli avtobusda bordik.

Alp di Suzi tog‘lari: yakuniy nuqta va tumanli tog‘lar

• 
• 
• 
• 

Ushbu sayohatning yakuniy joyi Alpe di Suisi tog‘lari edi. Bu Yevropadagi eng katta alp platosi: bepoyon dalalar fonida cho‘qqilar qad ko‘targan. Afsuski, ob-havo tufayli biz faqat yassitog‘ning pastki qismini ko‘ra oldik, chunki tuman tog‘larni yashirib qo‘ygan edi. Lekin shunday bo‘lsa ham, juda chiroyli edi (suratni ilova qilaman).

Alpe di Suisiga borish uchun Bolsano shahridan Ortizeya shahrigacha 350-sonli avtobusga o‘tirdik, yo‘l bir soat davom etadi. Ortizeya shahrida sizni yassitog‘likka olib chiqadigan funikulyor bor. Ikki tomonlama narxi taxminan 40 EUR (taxminan 571 499 UZS).

May oyida Dolomitlarda o‘zgaruvchan ob-havo kuzatiladi: cho‘qqilarda qor, pastda yashil o‘tloqlar va kamdan-kam yomg‘irlar. Jamoat transportida harakatlanish har doim ham qulay bo‘lmasa-da, bu haqiqatga yaqin, poyezdlar va avtobuslar jadval bo‘yicha qatnaydi va yaxshi rejalashtirilsa, ko‘p narsalarni ko‘rish mumkin.

Safar har bir kishiga ovqat va shaxsiy xarajatlarni hisobga olmaganda 444 EUR (taxminan 6 343 634 UZS)ga tushdi.

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Dolomit tog’larida kuz: avtomobilda qulay sayohat

Kuzdagi sayohat juda qulay bo‘ldi, chunki men do‘stlarim bilan mashinada sayohat qildim. Avtomobilni Venetsiyadan check24.de saytida oldindan band qilib, ikki kun uchun 190 yevro to‘ladik. Aytgancha, Italiya bo‘ylab sayohat qilish uchun xalqaro haydovchilik guvohnomasi bo‘lishi shart.

Biz to‘g‘ridan-to‘g‘ri Auronzo ko‘li bo‘yida joylashgan to‘rt yulduzli Auronzo di Cadore mehmonxonasiga joylashdik. Mehmonxona juda shinam, mazali nonushta va qulay joylashuvga ega ekan. Unga ikki kecha uchun 657 EUR (taxminan 9 386 864 UZS) (bir kishi uchun 131 EUR (taxminan 1 871 658 UZS)) to‘ladik.

Sorapis ko‘li: yakunidan ko‘ra yo‘l ko‘proq esda qoldi

• 
• 
• 
• 
• 

Yo‘nalishimizning birinchi manzili Sorapis ko‘li bo‘ldi, u ko‘pincha suvning g‘ayritabiiy feruza rangi tufayli tanlanadi. Mashina bilan bor-yo‘g‘i yarim soat yo‘l bosdik. Yo‘nalish o‘rtacha murakkablik kasb etdi, ikki tomonga olti soatcha yo‘l bosdik. Afsuski, ko‘lni butun go‘zalligi bilan ko‘rishning iloji bo‘lmadi, chunki kuzda suv ketib, faqat kichik bir qismi qoladi. Ammo unga olib boradigan yo‘l shunchalik go‘zal ediki, biz baribir hayratda qoldik.

Kadini-di-Mizurina: Dolomit tog’larining panoramali ko‘rinishi

• 
• 
• 
• 
• 
• 

Ertasi kuni biz mehmonxona yaqinidagi ko‘l atrofida sayr qildik, ertalabki sokinlikdan bahramand bo‘ldik va keyingi nuqta — Cadini di Misurinaga yo‘l oldik.

Cadini di Misurina — bu tishli cho‘qqilarning ajoyib manzarasi ochiladigan kuzatuv maydonchasi bo‘lib, ayniqsa tong va quyosh botishida juda chiroyli ko‘rinadi. Kuzatuv maydonchasi avtoturargohiga kirib o‘tish uchun saytda oldindan joy band qilish lozim.

Cadini di Misurina`dan taxminan bir soatlik piyoda yurishdan so‘ng, belgilangan so‘qmoq bo‘ylab Tre Cime di Lavaredo milliy bog‘i boshlanadi, u yerda Lavaredoning mashhur Uch cho‘qqisi qad ko‘targan. Bu tog‘larning balandligi 3 000 metr.

Qaytishda avtoturargoh yonidagi italyan va avstriya taomlari sotiladigan kichik kafega kirishingiz mumkin.

Natijada bu sayohatga taxminan 215 EUR (taxminan 3 071 805 UZS) sarfladim.

Dolomit tog’lariga qaysi mashinada borgan ma’qul?

• 
• 
• 

Dolomit tog’larida jamoat transportida ham, avtomobilda ham bo‘lganimdan so‘ng, har bir usulning o‘ziga xos ijobiy va salbiy tomonlari borligini angladim.

Agar siz yolg‘iz sayohat qilsangiz yoki mashina ijaraga olishni istamasangiz, jamoat transporti juda qulay. Poyezd va avtobuslar jadval bo‘yicha qatnaydi, marshrutni tuzish oson, derazalardan ko‘rinadigan manzaralar esa trassadan ochiladigan manzaralardan aslo qolishmaydi. Kamchiligi — vaqtning cheklanganligi: oxirgi avtobus siz so‘qmoqdan tushishga ulgurmasingizdan oldin ketishi mumkin, shuning uchun kunni oldindan va shoshilmasdan rejalashtirish kerak.

Avtomobilda sayohat qilish ko‘proq erkinlik beradi: istalgan joyda to‘xtash, kuzatuv maydonchasiga tashrif buyurish yoki sayyohlar to‘dasisiz tong otishini kuzatish mumkin. Ammo pullik avtoturargohlar va yo‘llarga tayyor bo‘lish, shuningdek, mashhur joylarda avtoturargohlarni oldindan band qilish kerak.

Sayohatga o‘zingiz bilan olib ketishingiz shart bo‘lgan narsalar

Bahor va kuzda Dolomit tog’larida ob-havo taxminan bir xil, shuning uchun mening narsalar ro‘yxatim deyarli o‘zgarmasdi. Tog‘da qat-qat kiyingan ma’qul: futbolka, ustidan kofta yoki fliska, keyin esa yengil issiq kurtka. Ob-havo keskin o‘zgarishi mumkinligi sababli, shamolga qarshi kiyim yoki yomg‘irpo‘sh olish ham maqsadga muvofiqdir. Bundan tashqari, agar yuqoriroq ko‘tarilishni rejalashtirayotgan bo‘lsangiz, termal kiyimlar ham bor. Poyabzal ham muhim — qulay treking krossovkalari yoki botinkalar butun marshrutni, ayniqsa tepaliklarda, sezilarli darajada osonlashtiradi.

Yonimda kichkina ryukzak bor edi: suv, powerbank, zaryadlash moslamasi, fotoapparat va aptechka. Ovqatni oldindan olardim, odatda sendvich yoki gazak kabi oddiy narsalar. Haqiqatan ham asqotadigan yana bir narsa — choy solingan termos. Yuqorida sezilarli darajada sovuqroq va bunday paytlarda choy yordam beradi.

Oxirida shuni maslahat bermoqchimanki, hatto marshrutingiz tig‘iz bo‘lsa ham, hech bo‘lmaganda bir kunni aniq rejasiz qoldiring. Shunchaki eng yaqin vodiy yoki ko‘l tomonga boring, chunki Dolomit tog’larida har qanday joy chiroyli bo‘ladi.