Bu sizga Hindiston emas: Goada nima qilsa boʻladi va u kimlarga mos keladi
Arzon taomlar, savdolashish imkoniyati va ko‘plab kuchuklar — bu shtatda dam olish o‘z puliga arziydimi?
Shunday qilib, Goa. Yangi, noma’lum yo‘nalish, ba’zilar uchun esa hatto qo‘rqinchli. Aslida, u yerga tasodifan borib qoldim — biz kuyovim bilan to‘y uchun joy tanlar edik va joy bir nechta kriteriylarga mos kelishi kerak edi: to‘g‘ridan-to‘g‘ri va arzon parvoz, sifatli xizmat, mo‘tadil iqlim va qulay narxlar.
Dastlab Tailandga uchmoqchi edik, ammo Pxuketga to‘g‘ridan-to‘g‘ri va arzon chiptalar sentyabr boshida yo‘qolib, may oyigacha paydo bo‘lmasligi mumkin ekan. Vyetnam, Bali va boshqa Osiyo yo‘nalishlari bilan ham xuddi shunday vaziyat. Biz bayramni boshqa vaqtga ko‘chirish haqida o‘ylayotgan paytimizda, "O‘zbekiston havo yo‘llari" yangi yo‘nalish ochayotganini e’lon qildi — kompaniya chorshanba va yakshanba kunlari Goaga parvozlarni yo‘lga qo‘ydi.
Tanlov qiyinchiligi: ikki farqli Goa
Safargacha bu shtat Hindistonda joylashgani va u yerda Arabiston dengizi borligini bilardim, xolos. Shu sababli qayerga ketayotganimizni tushunish uchun ko‘plab maqolalarni o‘qib chiqishga majbur bo‘ldik.
Asosiy ma’lumotdan boshlaymiz: Goa ikki qismga — Shimoliy va Janubiy qismlarga bo‘linadi va har bir qism talabga qarab turistning muayyan ehtiyojlarini qondirishi mumkin.
Shimoliy Goa — shovqin-suronli, ko‘ngilochar joy. Bu yerga dunyoning turli burchaklaridan yoshlar tongga qadar kayf-safo qilish, so‘ngra yoga mashg‘ulotlariga borish, yangi kun bilan quvvatlanish va vegan taomlari bilan tanani tozalash uchun yig‘ilishadi. Shtatning bu qismi arzonroq narxlari bilan ajralib turadi, bu yerda turar-joylar tanlovi keng va Rossiyadan kelgan mehmonlar juda ko‘p — hatto hamma rus tilida so‘zlashadigan butun boshli mavzelar mavjud, oshxonalar menyusida esa borsh va okroshkani uchratish mumkin.
Janubiy Goa Shimoliy Goa bilan solishtirganda "boylar makoni" desak bo‘ladi. U yerda narxlar balandroq, plyajlar toza va osoyishta, asosan o‘rta va yuqori daromadli turistlar tanlashadi. Janubiy Goaning ko‘plab plyajlarida norasmiy "komendantlik soati" amal qiladi — dam oluvchilarga xalaqit bermaslik uchun ko‘chada musiqa va shovqin-suronga faqat soat 23:00 gacha ruxsat beriladi.
Xulosa: har ikkala hududning afzallik va kamchiliklari haqidagi ko‘plab bloglarni o‘rganib chiqqach, biz Janubiy qismni tanladik.
Yo‘l: qaysi aviakompaniya bilan uchish va mehmonxonaga qanday yetib borish mumkin
Biz Goa shahriga Uzbekistan Airways’ning to‘g‘ridan-to‘g‘ri reysi bilan yetib bordik. Samolyot 4,5 soat uchadi. Fevral oyi uchun ikki tomonlama chiptalar ikki kishiga 802 dollar (10 400 000 so‘m) ga tushdi. Yozda Uzbekistan Airways Goaga to‘g‘ridan-to‘g‘ri reyslarni amalga oshirmaydi, chunki bu shtatda sayyohlik mavsumi aprel oyida tugab, oktyabr oyida boshlanadi.
Eng noqulay tomoni — aeroportdan mashhur joylargacha bo‘lgan yo‘l. Yaxshi holatda ikki soat, yomon holatda uch soat vaqt ketadi. Bu hali taksi haqida bilganim. Ehtimol, mehmonxonamizga avtobusda ham borsa bo‘lar, lekin buni tavsiya qilmayman, chunki deyarli 100 km yo‘l bosishga to‘g‘ri keladi.
Palolem plyaji yonidagi shaharcha
Panaji shahridagi portugal ko‘chalari
Taksi unchalik qimmat emas ekan — Booking orqali bron qilganimizda to‘rt kishi uchun $65 (840 000 so‘m) to‘ladik, qaytishda esa mahalliy taksi haydovchisi bilan kelishib, aeroportgacha ikki kishi uchun $40 ga (520 000 so‘m) bordik. Umuman olganda, mahalliy taksi transferdan ko‘ra qulayroq chiqdi. Goada Uber ishlamaydi, lekin Rapido degan mahalliy xizmat bor — bu mobil ilova orqali avtomobil yoki tuk-tuk (kichkina uch g‘ildirakli mototsikl) chaqirish mumkin. Yana bir usul — yo‘l chetida taksi ushlab, haydovchidan raqamini olib, keyingi safarlar uchun to‘g‘ridan-to‘g‘ri kelishib olish (ha, xuddi O‘zbekistondagidek). Narx ustida savdolashsa ham bo‘ladi.
Sehrli Goa quyoshi botishi
Palolem plyaji va har yerda uchraydigan itlar
Itlar hech qachon ko‘p bo‘lmaydi
Miau
Bir nechta plyaj doirasida eng yaxshisi tuk-tukda yurish — bu tez, arzon va qiziqarli. 2-3 km masofaga tuk-tukda borish taxminan $2-3 (40 000 so‘m) turadi. To‘lovni mahalliy valyuta — rupiyda naqd pul bilan qilish kerak.
Xulosa: Ikki kishi uchun taksi bilan qo‘shib hisoblaganda yo‘l xarajatlari jami $907 (11 700 000 so‘m) bo‘ldi.
Viza va hujjatlar
Agar siz O‘zbekiston fuqarosi bo‘lsangiz, Hindistonga borishdan oldin viza olishingiz kerak. Uni istalgan vaqtda rasmiylashtirish mumkin. Oddiy turistik viza 30 kunga beriladi va chegarani kesib o‘tgan paytdan boshlab amal qila boshlaydi. Rasmiylashtirishning ikki yo‘li bor: elchixonaga borish yoki hamma narsani sayt orqali qilish. Elektron viza qulayroq va arzonroq.
Hindiston elchixonasining saytiga kirib, "Apply here to e-visa" tugmasini bosing va anketani to‘ldiring. Buning uchun hatto yaxshi video yo‘riqnoma ham bor. Faqat uni x2 tezlikda ko‘rgan ma’qul.
Elektron viza narxi $25 (330 000 so‘m), to‘lovni istalgan Visa yoki Mastercard orqali amalga oshirish mumkin.
Agar hamma narsani to‘g‘ri bajargan bo‘lsangiz, uch kun ichida elektron pochtangizga tasdiq xati keladi. Saytga kirib, "Check your Visa status" bo‘limini tanlang, ID va xatda ko‘rsatilgan shaxsiy raqamingizni kiriting. Ushbu viza variantini saqlang — hatto chop etib qo‘ysangiz ham bo‘ladi. Shuningdek, "Print e-visa Application" bo‘limidan hujjatni chop eting — chegarada ikkalasi ham so‘ralishi mumkin.
Sizga uch kunda viza taklif qilayotgan vositachilarga pul to‘lamang. Aslida, ular ham xuddi shunday ish qilishadi, faqat sizdan ikki baravar ko‘p pul olishadi.
Xulosa: viza bir kishi uchun $25 turadi
Turar joy narxi qancha?
Butun Goa — bu turli xil plyajlar joylashgan uzun qirg‘oq chizig‘idir. Shovqinli, sokin, yovvoyi, tashlandiq, ko‘ngilochar — har qanday didga mos. Biz Palolem plyajini tanladik: menga bu ko‘ngil ochish, ovqatlanish va quyosh ostida bir maromda yotib dam olishning mukammal uyg‘unligi bo‘lib tuyuldi.
Janubiy Goa Shimoliyga qaraganda qimmatroq bo‘lishiga qaramay, mavsumda har qanday hamyonbop mehmonxonalarni topish mumkin. Biz u yerga 17 kishilik guruh bilan borgan edik, shuning uchun hamma turli xil mehmonxonalarga joylashgan edi — dengiz qirg‘og‘ida, ikkinchi, uchinchi qatorda, apartamentlarda, to‘rt yulduzli mehmonxonalarda va hatto ochiqchasiga yomonlarida ham. Shulardan bir-ikkitasi haqida gapirib beraman.
Eng qimmat mehmonxonamiz The Arc Comfort edi. Uning afzalligi shundaki, u kichik ko‘rfazda joylashgan bo‘lib, har qanday shovqindan xoli ko‘rinadigan kichik plyajga ega — kechqurunlari faqat to‘lqinlar shovullashi va tasodifiy o‘tkinchilarning sekin shivirlashlarinigina eshitasiz. Goadagi barcha plyajlar davlat mulki bo‘lgani uchun mehmonxona hududni o‘zlashtira olmaydi. Shu sababli, sivilizatsiyadan uzoqroq joylashuvi menga jozibali tuyuldi. Biroq, salbiy tomoni ham bor edi — eng yaqin do‘kongacha kamida 15 daqiqa piyoda yurish kerak edi.
The Arc Comfort mehmonxonasidagi terassimz
Palolemning balandlikdan ko‘rinishi
To‘lqinlarning kamayishi
Palolemning ko‘chalari
Xona ikki kishi uchun ikki haftaga $2 200 ga (28 500 000 so‘m) tushdi, ammo u bunga arzirdi. Asosan, vannasi tufayli.
Goada, umuman Hindistonda biz uchun juda g‘alati xususiyat bor — u yerda na vanna, na oddiy dush kabinalari mavjud. O‘rtacha narxdagi juda kam mehmonxonalar toza, to‘siqli dush kabinasi bilan maqtana oladi — sizni shunchaki devordan chiqib turgan dush, hojatxona va plastik chelak joylashgan xona kutadi. Mehmonxonangiz qancha qimmat bo‘lsa, dush xonasi shuncha yaxshi bo‘ladi.
Vannadan tashqari, The Arc Comfort’da konditsioner yaxshi ishlardi, jakuzili veranda (undan hech foydalanmadik), qulay karavot va basseyn bor edi.
Aytgancha, bu yerda doimo o'zingizga mos mehmonxona tanlashingiz mumkin!
Yana bir yaxshi tanlov — Rockit Cafe & Stay Palolem. U ham birinchi qirg‘oq chizig‘ida joylashgan, lekin plyajga to‘g‘ridan-to‘g‘ri chiqish yo‘li yo‘q. Bungalolar junglida joylashgan, ammo u yer tinch, osoyishta, har birining o‘z verandasi bor. Bu mehmonxonaning 10 kunlik narxi — $500 (6 500 000 so‘m). Taqqoslash uchun, Zomin mehmonxonalarida bir kechalik narx $70 dan (900 000 so‘mdan) boshlanadi.
Xulosa: bizning "hashamatli" mehmonxonamiz $2 200 ga tushdi. Do‘stlarimiz esa 10 kunga $500 gacha bo‘lgan mehmonxonalarni ijaraga olishdi.
Oziq-ovqat mahsulotlari
Eng yaxshi vegan nonushtalari taklif etiladigan joy
4 dollarga ostritsalar
Mahalliy kafedagi plyajga qaragan manzara
Quyosh botishida o‘tirish
Toshkent, Olmaota va Istanbuldan so‘ng (ayniqsa Yevropadan keyin) aytishim mumkinki, Goada narxlar juda arzon. Bu mubolag‘a emas, o‘zingiz ko‘ring:
- Butun kingfish (mahalliy etalon baliq) — 1700 rupiy (250 000 so‘m)
- Bir kilogramm qisqichbaqa — 500 rupiy (78 000 so‘m)
- Bir litr suv — 30 rupiy (4500 so‘m)
- Kola — 20-25 rupiy (4000 so‘m)
- Papaya — donasi 50 rupiy (7500 so‘m)
- Pivo — 0,5 l uchun 100 rupiy (16 000 so‘m)
Ovqatlanish joylaridagi narxlar:
- Dengiz mahsulotlari — 350 dan 800 rupiygacha (52 000 so‘mdan boshlab)
- Bir stakan yangi siqilgan sharbat — 150 rupiydan (24 000 so‘m)
- Vegetarian taomlari — 300 rupiydan boshlab (45 000 so‘m)
- 7 ta ustritsa — 450 rupiy (53 000 so‘m)
- Mol go‘shti — 500 rupiydan boshlab (75 000 so‘m)
- Yangi baliq — 700 dan 2000 rupiygacha (100 000 so‘mdan boshlab)
Alkogolli kokteyllar narxi 450 rupiydan (53 000 so‘m) boshlanadi, lekin ko‘pchilik kafelarda kechki soat yettigacha "baxtli soatlar" amal qiladi: bitta uchun to‘lasangiz, ikkita olasiz.
Baxtli yangi turmush qurganlar
Xotira uchun foto
Mahalliy vino
Ovqatlanish joylari orasida Kala Bahiani alohida ta’kidlab o‘tmoqchiman — bu Kolombo plyajidagi yevropacha restoran bo‘lib, u yerda to‘yimizni nishonlashga qaror qildik. Bu eng yaxshi tanlov edi — u yerdagi narxlar o‘rtachadan yuqori (masalan, taomlar 700 rupiydan, kokteyllar 500 rupiydan boshlanadi), ammo taomlar juda mazali.
Xulosa: agar maqsadingiz to‘yib ovqatlanish bo‘lsa, buni osongina amalga oshira olasiz.
Goadan nima olib kelish kerak
Goada shopingdan ma’no yo‘q — uygacha bo‘lgan masofa juda uzoq, narxlar o‘rtasidagi farq esa unchalik katta emas. Biroq, agar siz shunchaki esdalik sovg‘asi emas, balki foydali narsa xohlasangiz, albatta olib kelishga arziydigan narsalarning qisqacha ro‘yxatini keltiraman.
Kashemir. U yerda tabiiy kashemir do‘konlari juda ko‘p. Chegirmalar paytida sholro‘mol yoki palantinni 800 rupiy (125 000 so‘m) atrofida narxga sotib olish mumkin. Ammo, hamma narsani rasmiy do‘konlardan xarid qilishga harakat qiling — plyajdagi peshtaxtalar ko‘pincha aldab, aralash mato sotadi.
Ziravorlar. Goa, butun Hindiston singari, ziravor ixlosmandlari uchun jannatdir. Biz masala-choy (sovuq kunlarda sut bilan damlaganda juda mazali bo‘ladi), Himolay tuzi (oltingugurt bilan ishlov berilgani sababli o‘ziga xos hidga ega) va dengiz mahsulotlari uchun achchiq ziravorlar olib keldik. Ziravorlarning 100 grammi 150 rupiydan (24 000 so‘m) boshlanadi, lekin narxni savdolashib, ancha pasaytirish mumkin.
Pareo va yopinchiqlar. Bu yerda an’anaviy hind naqshlari tushirilgan mahalliy va arzon ipak juda ko‘p.
Xulosa: o‘zingizni uydagidek his qiling, chunki savdolashish — bizning odatimiz! Masalan, "do‘stim buni kecha 800 ga sotib olgan" degan gap bilan pareoning narxini 1500 dan 800 rupiyga tushirdik.
Ko‘ngilochar tadbirlar va ekskursiyalar
Goadagi ko‘ngilochar tadbirlar haqida ko‘p yozmayman, chunki ular bu yerda juda ko‘p, lekin eng muhimlari haqida aytib o‘taman.
Har bir kafe yoki mehmonxona oldida sizga qayiqda sayr qilish, delfinlarni tomosha qilish, kapalaklar oroli yoki toshbaqalar orolida aylanish taklif etiladi. Bularning barchasi romantik eshitiladi va butun sayohat uchun 700 rupiy so‘rashadi. Ammo aslida bu juda kulgili aldovdir — hech kim delfinlar bilan uchrashishga kafolat bermaydi, chunki ular paydo bo‘lishi ham, bo‘lmasligi ham mumkin. Ko‘pincha ularni uchratib bo‘lmaydi.
Kapalaklar orolining kapalaklarga umuman aloqasi yo‘q — shunchaki balandlikdan qaraganda u kapalakka o‘xshaydi. Toshbaqalar oroli esa qo‘shni orol bo‘lib, uning oldida toshbaqani eslatuvchi katta qoya turgani uchun shunday nomlanadi. U yerdagi plyajlar chiroyli, ammo uncha toza emas va barcha manzaralarni turistlarni kutayotgan qayiqlar to‘sib qo‘ygan. Bir marta borib ko‘rsa bo‘ladi, lekin alohida qiziqarli joyi yo‘q.
Albatta borish kerak bo‘lgan joy — bu Galjibag plyaji. U yerda qishda toshbaqalar in quradi va fevral oyining oxirida tuxumlardan yuzlab kichkina toshbaqachalar chiqadi. Plyaj davlat tomonidan qo‘riqlanadi, unda kafe va mehmonxonalar qurish taqiqlangan, shezlonglar yo‘q, lekin aql bovar qilmas go‘zallik bor — uzun qumli qirg‘oq, kuchli to‘lqinlar, atrofda yam-yashil tabiat va sukunat hukm suradi. Go‘yo butun manzara reklamadan olinganday. U yerda yangi ustritsalar yoki sousli midiyalarni tatib ko‘rish mumkin bo‘lgan ikkita sokin kafe mavjud. Plyajga kunning ikkinchi yarmida, soat 4 dan keyin borish yoki o‘zingiz bilan soyabon olib kelish tavsiya etiladi.
Tortug‘a uyalar
Goalik itlar, sizni ko‘rishdan xursand bo‘lgan
Avgustinlar ma'badining xarobalari
Ta’tilimiz ancha betashvish o‘tdi — ko‘p uxladik, mahalliy qishloqlarda sayr qildik va plyajda yotib dam oldik. Ammo faol dam olishni xohlovchilar uchun snorkling, dayving va hatto syorfing ham bor. Yo‘lbarslar, leopardlar, mangustlar va boshqa yovvoyi hayvonlar yashaydigan qo‘shni qo‘riqxonalarga sayohat qilish mumkin.
Ushbu bazilika hali ham butun dunyodan katolik ziyoratchilarini o‘ziga tortadi
Eski Goada joylashgan cherkovlardan biri
Harumon ma'bad
Portugaliya freskalari
UNESCO himoyasidagi katolik cherkovlari majmuasi joylashgan shtat markazi Eski Goa shahriga borishni tavsiya qilaman. Buning uchun bir yarim soat yo‘l bosish kerak. Avliyo Avgustin monastiri xarobalariga va Avliyo Kaetan cherkoviga albatta tashrif buyuring. Mahalliy gid yollashingiz yoki Google yordamida o‘zingiz aylanishingiz mumkin.
Eski Goadan so‘ng Goa poytaxti Panajiga borish mumkin. Bu yerda kazinolarda vaqt o‘tkazish, portugal mahallalarida sayr qilish, ibodatxonalarga tashrif buyurish yoki yopiq bozordan esdalik sovg‘alar xarid qilish mumkin.
Xulosa: Goada har qanday didga mos ko‘ngilochar narsalarni topasiz — bu juda ajoyib.
Sayohatchilar uchun maslahatlar
Goada bank kartalari bilan bog‘liq jiddiy muammolar mavjud. Yo naqd pulni darhol olib keting, yo aeroportda pul yechib oling. Shaharlarda ayirboshlash shoxobchalari bor, ammo u yerda yuqori foiz olinadi. To‘lov kartalari faqat bir nechta joyda qabul qilinadi.
U yerda sim-kartalar arzon. Ular juda zarur, chunki mehmonxonalardagi internet sifati yaxshi emas. Ikki haftalik cheksiz internet limiti bilan sim-karta 450 rupiy (70 000 so‘m) turadi, pasport bilan sotib olinadi, lekin buni darhol aeroportda qilgan ma’qul.
Albatta, kuchli quyoshdan himoya kremini (SPF) sotib oling — hatto soyada ham 15-20 daqiqada teringiz kuyib qolishi mumkin. Ikkinchi do‘stingiz — u yerda haqiqatan ham ko‘p bo‘lgan och chivinlarga qarshi sprey bo‘lishi kerak.
Goada elektron sigaretalar va tamakini qizdirish tizimlari taqiqlangan. Ularni mamlakatga olib kirishingiz mumkin, lekin olib chiqolmaysiz.
Bizni antisanitariya, axlat va infeksiyalar bilan qo‘rqitishgan edi. Ammo Goada bo‘lib, bu Hindiston emas, degan xulosaga keldim. To‘g‘ri, u yerda chiqindi bor, lekin Toshkentda ham undan kam emas.
Goaning tabiati ajoyib va maftunkor. Shtat faqat turizm hisobiga yashayotgani uchun ko‘plab xonavayron bo‘lgan mehmonxonalar va asta-sekin changalzorlarda yo‘qolib borayotgan uylarni ko‘rish mumkin. Bu sehrli ko‘rinadi — go‘yo tabiat o‘z haqini qaytarib olishga qaror qilganday, qiyomat-qoyimdan keyingi dunyo shunday ko‘rinishga ega bo‘lgan bo‘lardi.
Bu yerda iqlim juda yoqimli va mo‘tadil — fevral oyida harorat kamdan-kam hollarda 33 darajadan oshadi, kechqurunlari esa salqin shamol esib turadi.
Bu yerda hayvonlarni juda yaxshi ko‘rishadi — ko‘plab itlar, sigirlar, maymunlar, mushuklar va daraxt olmaxonlari uchraydi. Hindistonliklar ham juda ochiqko‘ngil va mehmondo‘st odamlar.
Ochig‘ini aytsam, Toshkentga qaytgim kelmay qoldi. Ehtimol, biz yana bu joyni osoyishta dam olish uchun tanlarmiz.
