Samolyotda aviarejimni yoqish nima uchun muhim

Telefonni aviarejimga o‘tkazish arzimas ish bo‘lib tuyulishi mumkin. Ammo aslida bu e’tiborsiz qoldirmaslik kerak bo‘lgan xavfsizlik va odob-axloqning muhim talabidir. Aviarejim nima uchun kerakligini, uni yoqmaslik oqibatlarini va bu mavzudagi qaysi miflarni yo‘q qilish kerakligini ko‘rib chiqamiz.

Aviarejim nima

Parvoz rejimi (yoki aviarejim) mobil tarmoqlar, Wi-Fi va Bluetooth (sozlamalarga qarab) signal uzatishini o‘chiradi. Qurilma "soqov" bo‘lib qoladi — siz qo‘ng‘iroq qila olmaysiz, chaqiruv yoki SMS qabul qila olmaysiz.

Shu bilan birga:

• Fotosuratlar, videolar, o‘yinlar, oflayn filmlar, eslatmalar va kitoblar ishlaydi;
• Parvozda Wi-Fi va Bluetooth ishlatish mumkin, lekin ekipaj ruxsatini kutish kerak — masalan, ichki multimedia tizimiga ulanish taklif qilinganda.

Aviakompaniyalar uni yoqishni nima uchun so‘raydi

Samolyot bortida mobil telefonlarni o‘chirish talabi birinchi marta 1991-yilda paydo bo‘lgan — uni Buyuk Britaniyaning Fuqaro aviatsiyasi boshqarmasi joriy etgan. O‘sha paytda uyali aloqa signallari bortdagi navigatsiya va radio uskunalarining ishlashiga xalaqit berishi mumkin, deb hisoblangan. Uchuvchilar va dispetcherlar o‘rtasidagi aloqa uzilishiga yo‘l qo‘ymaslik uchun, ayniqsa, yomon ob-havo sharoitida qo‘nish kabi muhim paytlarda, yo‘lovchilardan qurilmalarini parvoz rejimiga o‘tkazish so‘ralgan.

Texnik taraqqiyot zamonaviy avionikani shovqinlarga chidamli qildi va bort uskunalari endi tasodifiy signallardan zarar ko‘rmaydi. Ammo hali ham e’tibor berilishi kerak bo‘lgan jihatlar mavjud.

Parvoz paytida uchuvchilar deyarli hech qachon quloqchinlarini yechishmaydi. Agar salonda kimdir telefonini oddiy rejimda qoldirgan bo‘lsa, quloqchinlarda "fon" paydo bo‘lishi mumkin — uyida karnaylari bor har bir kishiga tanish bo‘lgan g‘uvillagan shovqin chiqadi. Kerakli paytda bu shovqin yerdagi xizmat yoki boshqa ekipajning xabarini eshitilmay qolishiga sabab bo‘lishi mumkin.

Hozirgi kunda parvoz rejimiga o‘tkazilmagan bitta qurilma, ehtimol, muammo keltirib chiqarmaydi. Biroq bu qoidalarga e’tiborsiz qarash mumkin degani emas. Aviarejim — bu ekipaj ishiga, boshqa yo‘lovchilarga hurmat va shunchaki ortiqcha stressdan qochish usulidir. Bitta harakat bilan parvoz tinchroq, xotirjamroq va xavfsizroq o‘tadi. Zamonaviy samolyotlar hatto chaqmoq zarbalariga ham bardoshli, ammo uchish va qo‘nish paytida uchuvchilar va dispetcherlar o‘rtasidagi aloqa uzilishlari, ayniqsa murakkab sharoitlarda: kuchli yog‘ingarchilik, past ko‘rinuvchanlik, turbulentlik va boshqalarda ekipaj uchun eng noxush holat hisoblanadi.

Bundan tashqari, aviarejim haqiqatan ham muhim bo‘lgan boshqa sabablar ham mavjud.

Tarmoq bandligi. Uchish paytida telefoningiz barcha mumkin bo‘lgan aloqa operatorlariga ulanib, tarmoqni avtomatik ravishda tutib olishga harakat qiladi. Bu yerdagi minoralarni ortiqcha yuklab, yerdagi boshqa odamlarning aloqasiga xalaqit berishi mumkin.

Akkumulyator xavfsizligi. Agar telefon tarmoqni faol qidirayotgan bo‘lsa, u tezroq qiziydi. Bosimi past va havosi quruq bo‘lgan salonda bu qurilmaning haddan tashqari qizib ketishiga sabab bo‘lishi mumkin.

Xalqaro me’yorlarga rioya qilish. Aviarejimni yoqmaganlik uchun to‘g‘ridan-to‘g‘ri jarima belgilovchi qonunlar yo‘q. Ammo ekipaj talablarini bajarmaslik ogohlantirish olishga sabab bo‘lishi mumkin. Qo‘pollik yoki rad etish ekipaj ko‘rsatmalariga bo‘ysunmaslik sifatida qaralishi mumkin, bu esa butun dunyoda huquqbuzarlik hisoblanadi — sizni jarimaga tortishlari va aviakompaniyaning qora ro‘yxatiga kiritishlari mumkin.

Aviarejim haqidagi miflar

"Mening telefonim tufayli samolyot qulab tushmasligi aniq" — bu to‘g‘ri, lekin aloqa muammolari, shovqin va ortiqcha xatar ekipajga kerak emas. Bu haqda yuqorida yozgan edik.

"Telefon shunchaki cho‘ntakda yotibdi, u hech kimga xalaqit bermayapti" — ehtimol shundaydir, lekin qurilma aviarejim yoqilmaguncha signallarni uzatishda va qabul qilishda davom etadi.

"Wi-Fi ishlayapti, demak, aviarejim shart emas" — bu unchalik to‘g‘ri emas. Bu ikki xil modul: aviarejimda Wi-Fi aloqasini ekipaj ruxsati bilan qo‘lda yoqishingiz mumkin.

Agar musiqa tinglashni yoki film ko‘rishni xohlasam-chi?

Marhamat! Faqat barcha kontentni oldindan yuklab olishni, qurilmani aviarejimga o‘tkazishni va quloqchinlardan foydalanishni unutmang — salonda tinchlik bo‘lishi kerak, bu boshqalarga hurmat masalasidir.

Samolyot bortida internetdan foydalanish mumkinmi va bu qancha turadi?

Mumkin, lekin bu xizmat barcha aviakompaniyalarda ham mavjud emas va bunday internet ancha qimmat bo‘lishi mumkin. Agar sizga aynan bortda tarmoqqa ulanish juda zarur bo‘lsa, mana O‘zbekistonda mashhur bo‘lgan aviakompaniyalarning eng arzon tariflari jadvali:

Xulosalar

Aviarejim shunchaki rasmiyatchilik emas, balki umumiy parvoz intizomining muhim qismidir. U ekipaj va yer o‘rtasidagi ishonchli aloqani ta’minlash, qurilmangiz xavfsizligini saqlash va bortdagi barcha yo‘lovchilar uchun qulaylik yaratish maqsadida zarur.

Bundan tashqari, u e’tiborni jamlashga yordam beradi. Telefon o‘chirilganda, siz bildirishnomalarga chalg‘imaysiz va ekipajning barcha muhim xabarlarini eshitishingiz mumkin. Qo‘nganingizdan so‘ng esa kutilmagan qo‘ng‘iroq tufayli o‘rindiqdagi narsalaringizni unutib qoldirmaysiz.

Uchishdan oldin aviarejimni yoqing va xotirjam parvoz qiling.