Xitoy, Boku yoki Istambul? Bu yilgi kuzda o‘zbekistonliklar qayerlarga borisharkin?
Bu shahar va mamlakatlar endigi kuzda nimasi bilan qiziqarli?
Ko‘pincha kuz faslida deraza ortidagi manzarani almashtirishni istab qolamiz. Biz Aviasales.uz sahifasida oldindan band etish maʼlumotlarini o‘rgandik va ikkita asosiy trendni aniqladik. Birinchidan, odamlar ko‘proq sayohat qila boshlagan: bu borada talab 12%-ga oshgan. Ikkinchidan esa, ko‘pchilik O‘zbekistonni qayta kashf eta boshlagan — ichki parvozlar soni 36%-ga o‘sgan. Aynan xorijda dam olishni istovchilar uchun esa biz eng mashhur xalqaro yo‘nalishlar tahlilini taqdim etamiz.
Xitoy: mavsumning mutlaqo peshqadami
Ana endi asosiy yangilik. Vizasiz kirish joriy etilgach, Xitoy sayyohlarni ohanrabodek o‘ziga torta boshladi.
Chiptalar 39%-ga arzonlashdi, oldindan band qilish esa naq 46%-ga oshdi. Buyuk Xitoy devori va futuristik Shanxay har qanday zo‘r taklifdan kuchliroq ishlay boshladi.
Bu faslda Kuzning o‘rtasi bayrami (6-oktabr, 2025-yil) — xitoyliklar oila davrasida Oy shuʼlasi va «oysimon shirin kulchalar»dan huzurlanib nishonlaydigan bayramni kuzatish mumkin. Bu bayramdan keyin Milliy kunga bag‘ishlangan «Oltin hafta» (1–7-oktabr) boshlanadi va butun Xitoy aholisi bu kunlarda dam oladi, sayohatga chiqadi.
Qo‘shni mamlakatlarga sayohat: oson, arzon, maroqli
Kuzda o‘zbekistonliklar qo‘shni o‘lkalarga faol sayohat qiladilar. Bu o‘ta qulay, chunki uzoq rejalashtirilmaydi va arzon tushishi bilan yoqimli.
Qozog‘iston
Mavsumning haqiqiy peshqadami. Bu mamlakatga parvozlar soni 41%-ga o‘sgan, shu bilan birga chiptalar o‘tgan yilgi narxini saqlab turipti. Olmaota tog‘laridagi oltin kuz asosiy voqelik hisoblansa, sentyabrning uchinchi yakshanbasida anʼanaviy Shahar kuni ajoyib konsertlar va festivallar bilan nishonlanadi. Bu dam olish kunlarini mazmunli va hamyonbop tarzda o‘tkazish uchun qoyilmaqom tanlov.
Ozarbayjon
Qisqa safarlar uchun yana bir eng qulay manzil. Bokuga parvozlar ko‘lami barqaror ravishda o‘sib, 12%-gacha oshgan.
Kuzda bu yerda sayrlar uchun ajoyib ob-havo: issiq pasaygan, lekin quyosh hali yoqimli iliqlik taratadi. Geydar Aliyev nomidagi markazning futuristik arxitekturasidan zavqlanish, eski shaharning jin ko‘chalarida adashib qolguncha kezish mumkin. Madaniy tadbirlar ishqibozlari har yili oktabr oyining oxirida o‘tadigan Xalqaro jaz festivaliga kelishlari mumkin. Oktabr oxiridan noyabr boshigacha Boku yaqinidagi Go‘ychay shahida esa juda yorqin tadbir — Anor bayrami o‘tkaziladi.
Ko‘p bor sinalgan manzil: Istambul
Turkiya — bu har bir hayotiy vaziyatga mos yo‘nalish. Bu yilgi kuzda esa Istambulga uchish yana 8%-ga arzonlashdi. Bu shahar qadim ko‘chalarda sayr, yoqimli xaridlar va ajoyib yeguliklar tarafdorlari uchun ishonchli manzildir.
Bu yerda sentabr va oktabr oylarida bo‘lib o‘tadigan ko‘plab konsertlar, madaniy tadbirlar sabab Istambul katta festival maydoniga aylanadi. Masalan, Türkiye Kültür Yolu festivali doirasida butun mamlakat bo‘ylab o‘nlab konsertlar, ko‘rgazmalar, perfomanslar tashkil etiladi.
Ayrim o‘ziga xosliklarga ega yo‘nalish: BAA
Amirliklarda esa o‘zgacha vaziyat. Agar Amirliklarga chiptalar qimmatlashganini sezgan bo‘lsangiz, adashmadingiz — narxlar o‘rtacha 16%-gacha oshdi. Sabab — Wizz Air loukosterining bozorni tark etishi. Oqibatda, oldindan band qilish ko‘lami 36%-ga kamaydi. Kuzda bu mamlakatga safar qilish — Dubayning ashaddiy ishqibozi bo‘lgan va yangi narx-navolarga tayyor kishilar uchun xolos.
Mamlakatda turli tadbirlar ko‘p bo‘ladi: DP World Tour golf bo‘yicha chempionatdan tortib, sunʼiy intellektga bag‘ishlangan World AI Technology Expo nomli juda yirik ko‘rgazma va anjumangacha.
Olisdagi ufqlar: Janubiy Koreya va Tailand
Sayohat uchun talabgir mamlakatlar orasida ancha olis yo‘nalishlar ham bor.
Janubiy Koreya
Seul kuzda — yoqimli ob-havo va daraxtlarning yorqin manzarasi demakdir. Har yili 27-sentabrda o‘tadigan Gangnam Festival tadbiri sanʼat ixlosmandlari uchun ajoyib tuhfa bo‘ladi. Bundan tashqari, 4-sentabrdan 26-oktabrgacha Chxandokkun saroyida o‘tadigan oqshomgi «Oy nurida sayrlar» — podshohlar qasrini o‘zgacha muhitda tomosha qilish imkonini beradi.
Tailand
Bu yo‘nalish — o‘z yurtingda sovuq kunlar boshlanganda issiq o‘lkaga qochib ketishga mos manzil. Kuz kelib, yomg‘irlar mavsumi tugaydi va yoqimli havodagi katta sayyohlik mavsumi boshlanadi. Noyabr oyida bu yerga kelishga arziydigan eng muhim voqea — bu Loy Kratong nomli osmon fonuslarining sehrli festivali. Tungi osmon bag‘ridagi minglab mashʼalalar haqiqiy ertaknamo kayfiyatni uyg‘otadi. Bu ekzotikani sevuvchilar uchun unutilmas hordiq taassurotlarini baxsh etadigan yo‘nalishdir.
