Seulda shopping qilish bo‘yicha batafsil gid
Kannamdagi lyuksdan Xondedagi vintajgacha.
Minglab do‘konlar, yaltiroq peshtoqlar, ko‘pqavatli savdo markazlari va olomon. Vahimaga tushmang, siz Seuldasiz! Biz koreys do‘konlarini yaxshi biladigan uchta qiz bilan suhbatlashib, sizning vaqtingiz va pulingizni tejaydigan gidni tuzdik.
Gayni Koreyaga to‘rt yil avval ko‘chib kelgan, bo‘sh vaqtida bayer (kompaniyalar va alohida shaxslar uchun xaridlar qiluvchi) bo‘lib ishlaydi, demak, Seul do‘konlarini yaxshi biladi.
Mira va Gulnor esa shu yil bahorda Koreyaga borib kelishgan va o‘z taassurotlari hamda topilmalari haqida bizga so‘zlab berishdi.
Sizga yuzingizni artistlarnikidek qilib qo‘yadigan o‘sha krem, urf bo‘lgan krossovka yoki koreyscha uslubdagi yubka chindan ham kerakmi-yo‘qmi — biz har qanday maqsadingiz sari yo‘lni topishga yordam beramiz.
- Seulga qanday boriladi?
- Shaharda adashmasdan harakatlanish
- Savdo joylari: qayerga borish va nimalar olish mumkin?
- Go‘zallik vositalari ishqibozlari uchun gid
- Moda ishqibozlari uchun gid
- Texnogiklar uchun gid
- Mahalliy yegulikar va suvenirlar ishqibozlari uchun gid
- Yerosti savdo markazlari
- Xarid uchun soliq (Tax Free) qanday qaytariladi?
- Omadli xaridlar uchun layfxaklar
- Xulosa o‘rnida
Seulga qanday boriladi?
Asosiysidan boshlaymiz. Toshkentdan to‘ppa-to‘g‘ri Seulga uchadigan reyslar bor. Reyslarni Uzbekistan Airways va Asiana Airlines amalga oshiradi.
Seulda ikkita: Inchxon (Incheon International Airport) va Kimpxo (Gimpo International Airport) xalqaro aeroportlari bor. O‘zbekiston reyslari odatda mamlakatdagi asosiy xab — Inchxonga qo‘nadi. Kimpxo aeroporti esa ichki va yaqin magistral reyslarga xizmat ko‘rsatadi.
Inchxon aeroportidan shaharga yetib olish:
Aeroekspress (AREX). Eng tez va qulay usul. Poyezd Seul markaziy vokzaliga 45–60 daqiqada yetadi, har yarim soatda yo‘lga chiqadi. Poyezd o‘rindiqlari juda qulay, Wi-Fi bepul. All Stop Train chiptasi: 41 325 so‘m.
Avtobus-limuzin. Bu ham uzoq parvozdan keyin dam olib ketish uchun zo‘r usul. Avtobuslar juda qulay va eng muhimi, sizga kerakli mehmonxonaga eng yaqin bekatgacha boradi. Chiptani aeroport kassasida yoki haydovchidan sotib olish mumkin.
Taksi. Eng qulay, ammo eng qimmat usul. Aeroportda International Taxi va SEOUL SMART rasmiy taksi xizmatlari ishlaydi. Standart mashina ham, kattaroq guruh uchun miniven ham buyurtma qilish mumkin.
Shaharda adashmasdan harakatlanish
Seulda eng qulay transport — metro va avtobuslar. Kechayu kunduz ishlaydigan har qanday do‘konda (ular convenience store deb ataladi) yoki metro bekatidagi avtomatda T-money transport kartasini xarid qiling va uni zaruratga qarab to‘ldirib turing. Kartaning o‘zi 4 000–5 000 von (taxminan 35 000–43 500 so‘m) turadi, bu depozit emas, balki plastik kartaning narxi.
Metro yoki avtobusda bir marta yurishingiz uchun T-money kartasi orqali bazaviy tarif — 1 400 von (12 200 so‘mga yaqin). Bir marta to‘lov 10 km yurishingizga yetadi, bu markazdagi sayyohlar boradigan manzillarga yetib olish uchun yetarli bo‘ladi.
Boradigan joylaringizni belgilab olish uchun quyidagi ilovalardan birontasini yuklab olasiz:
NAVER Map. Sayohatchilar o‘rtasida eng mashhur ilova. Ilova bosh sahifasi ingliz tiliga sozlangan (jumladan, xitoy va yapon tillariga ham). Ilova istalgan manzilga jamoat transportida yetib olish yo‘nalishlarini tuzishga yordam beradi.
Kakao Map. Mahalliy aholiga juda ma’qul, lekin sayyohlar uchun kamchiligi bor: bosh sahifasi ingliz tiliga o‘tkaziladiyu, baribir ko‘p funksiya va nomlar koreys tilida qoladi. Agar tushuna olsangiz — eng aniq va tushunarli xaritalarga ega bo‘lasiz.
Google Maps. Ishlaydi, ammo har doim emas. Asosiy afzalligi — sodda interfeys va yozuvlari ingliz tilida. Biroq Google Seuldagi jamoat transporti yo‘nalishlarini ko‘rsatmaydi.
Savdo joylari: qayerga borish va nimalar olish mumkin?
Myondon (Myeongdong)
Bu asosiy turistik manzil — har qadamda kosmetika, kiyim-kechak do‘konlari, univermaglar va ko‘cha yeguliklari. Bu yerda koreys brendlaridan tortib, dunyo miqyosidagi gigantlarning mahsulotlarigacha bor. Oqshomda ko‘chalar yegulik solingan aravalarga to‘lib ketadi, barlar va klublar ochiladi. Bu yerda kechasiyu kunduzi hayot qaynaydi.
Xonde (Hongdae)
Xongik san’at universiteti sharafiga nomlangan abadiy yoshlik va ijod manzili. Kunduzi bu yerda kichik dizaynerlik do‘konlari va qo‘l ishlari sotiladigan shoxobchalarda savdo avjida bo‘ladi, oqshomda esa — ko‘cha raqqoslari va sozandalarining chiqishlari qiziydi.
Tondemun (Dongdaemun)
Baykerlar va ko‘tara savdogarlarning makoni. Bu Koreyadagi eng qadimiy va yirik bozor bo‘lib, tunu kun ishlaydi. Eng asosiy afzalligi — hamma narsani ko‘tara narxda olish mumkin. Bundan tashqari, moda namoyishlari va ko‘rgazmalar o‘tadigan futurustik uslubdagi Dongdaemun Design Plaza (DDP) nomli inshoot ham shu yerda joylashgan.
Kannam (Gangnam)
O‘sha mashhur qo‘shiqdagi joy. Seulning eng nufuzli va boy tumani. Bu yerga lyuks buyumlar olish uchun kelishadi: Louis Vuitton, Chanel, Gucci va Dior do‘konlari, oliymaqom univermaglar va plastik jarrohlik klinikalari xuddi shu yerda joylashgan.
Itevon (Itaewon)
Seulning turli madaniyatlar bir yerga yig‘ilgan eng mashhur tumani. Oldin bu yerda Amerika harbiy bazasi bo‘lgan, shu bois Itevon xorijliklar o‘rtasida mashhur. Hozir bu yerda istalgan mamlakat milliy taomlarini, asori-atiqa do‘konlarini, mahalliy dizaynerlarning shourumlari va tomda ochilgan eng zo‘r barlarni topish mumkin.
Go‘zallik vositalari ishqibozlari uchun gid
Koreyaning go‘zallik sanoati — sayyoramizda eng ilg‘ori. O‘zingiz orzu qilgan mahsulotlarni mana shu manzillardan topasiz.
Olive Young. Bu kosmetika do‘konlarining asosiy tarmog‘i, deyarli har burchakda uchraydi. Do‘konlarda hamma narsa: mashhur koreys brendlaridan tortib, xorij mass-marketigacha bor. Yuz, sochlar va badan parvarishi, vitaminlar, go‘zallik gadjetlariga soatlab mahliyo bo‘lish mumkin. Chegirmalar va sovg‘alar olish uchun ilovani yuklab oling.
Chicor. Oliymaqom vositalarni izlayotganlar, xush kelibsiz! Huxley, AHC, The History of Whoo, Hera, Laneige — eng zo‘r koreys brendlarining hammasi shu yerda. Parvarish vositalaridan tashqari, pardoz mahsulotlari va atirlar ham bor.
Lalavla. Kosmetika vositalari hamyonbop narxda sotiladigan yana bir mashhur tarmoq. Agar sizga TikTok’da ommalashgan tint, kushon, ko‘z qabog‘i uchun bo‘yoqlar kabi narsalar kerak bo‘lsa — hammasini shu yerdan topasiz.
Narxi qanchalik arzon bo‘lmasin, shubhali kichik do‘konchalar yoki ko‘cha savdogarlaridan kosmetika sotib olmang — qalbaki narsa olib qo‘yishingiz mumkin. Har bir narsaning, ayniqsa, chegirmadagi narsalarning yaroqlilik muddatini tekshirib oling.
Myondondagi brend do‘konlar. Agar siz aniq brendlar (Etude House, Innisfree, Missha, Tony Moly, Nature Republic) mahsulotini izlayotgan bo‘lsangiz, Myondonga yo‘l oling. U yerda bu markalarning do‘konlari yonma-yon joylashgan.
Moda ishqibozlari uchun gid
NYU NYU
Mimiline
Koreyscha uslubdagi kiyim-kechaklar — oversayz-futbolka, keng jinsi va qulaygina sviter olish uchun — 8Seconds, SPAO, Musinsa yoki Top10 do‘konlariga kiring. Ular hamma yirik savdo joylarida bor.
UNIQLO sifat va narx uyg‘unligi bois Koreyada sevimli brendga aylangan. Bu brendning eng katta do‘koni Myondonda joylashgan.
Krossovkalar va sport liboslari (Nike, Adidas, New Balance) olish uchun ABC-Mart yoki Folder yaxshi. Ularning multibrend do‘konlarida katta savdo markazlaridagi rasmiy maydonchalariga qaraganda ko‘proq chegirmalar bo‘lib turadi.
Aksessuarlar — kumush taqinchoqlar, bosh kiyimlar, sumkalar va ko‘zoynaklarni Tondemun atrofidagi Mimiline yoki NYU NYU’ning uch qavatli do‘konlaridan topasiz. Ular tonggi 5 gacha ishlaydi, demak, shoshmasdan bemalol tanlash mumkin.
Ayollar poyabzali (barcha rang va fasondagi baletkalar, tufli, botilyonlar) — Sappun’ga bo‘ladi. Bu tarmoqda «uchinchi jufti sovg‘aga» kabi aksiyalar ko‘p bo‘ladi. Do‘konlar Xonde, Myondon va Kannamda joylashgan.
Xayking va faol hordiq uchun kiyim-kechaklarni San San Gear va CAYL nomli koreys brendlari taklif etadi. Ularning mahsulotlari yaxshi o‘ylangan dizayni va qulayligi uchun qadrlanadi. Univermaglar va multibrend do‘konlarda sotiladi.
Umuman olganda, kiyim-kechak va poyabzalni autletlarda arzonga olish mumkin. Albatta, ular o‘tgan yilgi kolleksiyadan bo‘ladi, lekin juda yaxshi chegirmada olasiz. Men Tondemundagi Lotte Outlets’ga ko‘p boraman: u yerda har qanday uslubdagi kiyim-kechaklarni topish mumkin. Bu yerga begim kunlari, ertalabdan kelgan yaxshiroq, boshqa payt odam juda ko‘p bo‘ladi.
Texnogiklar uchun gid
TechnoMart yoki ElectroMart (Emart gipermarketlari ichida joylashgan) — ushbu ko‘pqavatli savdo markazlarida istalgan texnikani topasiz: smartfonlar, kameralar, noutbuklar, uy-ro‘zg‘or uchun gadjetlar. Sotuvchilar odatda ingliz tilida gapira olishadi, soliq to‘lovi (Tax Free)ni esa shu joyning o‘zida rasmiylashtirish mumkin.
Yongsan Electronics Market. Bu eng mashhur elektronika bozori, aytishlaricha, unda texnikalar do‘konlardagidan 15–50% arzonroq. Biroq sayyohlar bu yerda ehtiyot bo‘lishlari kerak: firibgarlar ko‘p, narxlar yozib qo‘yilmaydi (chet ellik odamga qimmatroq aytish uchun bo‘lsa kerak), ingliz tilida gapiradiganlar deyarli yo‘q. Bu yerga nima olishingizni aniq bilsangiz va savdolasha olishga ishonchingiz komil bo‘lsagina borsangiz bo‘ladi.
Texnikani xarid qilishda albatta uning ishlashini tekshiring va kafolat qog‘ozini so‘rang. Buyumni qaytarish va kafolat xizmati tartiblarini ham yaxshilab bilib oling.
Mahalliy yegulikar va suvenirlar ishqibozlari uchun gid
Koreyscha yeguliklar — ugra, kimchi, snek va qaylalar olish uchun — Lotte Mart yoki Emart yirik supermarketlar tarmog‘i yaxshi. Ularning do‘konlarida mahsulot turi rang-barang, hammasi qulay va pishiq qadoqlangan va odatda yozuvlari ingliz tilida bo‘ladi.
An’anaviy koreyscha shirinliklar, quritilgan dengiz ne’matlari, jenshen va quruq choy olish uchun Seulning eng qadimiy Namdaemun Market bozoriga borsangiz bo‘ladi. Boshqa joylarda uchramaydigan ko‘cha yeguliklarini tatib ko‘rmoqchi bo‘lsangiz, Gwangjang Market bozoriga kirib o‘ting.
G‘aroyib va yesa bo‘ladigan suvenirlar (masalan, premium-klass shirinliklar) Shinsegae Food Market yoki The Hyundai Seoul univermaglarining fud-xollarida sotiladi.
Probiyotiklar, kollagen va vitaminlarni Olive Young, Namdaemun bozori va dorixonalarda topish mumkin.
Yerosti savdo markazlari
Seulda ko‘plab metro bekatlari ulkan yerosti savdo markazlariga ulanib ketgan. Ularda yozda salqin, qishda issiq, narx-navolar ham yer ustidagi savdo joylariga qaraganda arzonroq bo‘ladi.
Goto Mall. Yer ostidagi eng uzun moll (600 tadan ortiq do‘konlar bor) Express Bus Terminal bekatida joylashgan. Bu yerda savdolashish ham mumkin, naqd puldagi to‘lov uchun qo‘shimcha chegirmalar ham bor.
COEX Mall. Kannamdagi ulkan zamonaviy moll. Bu yerda do‘konlardan tashqari, kinoteatr, okeanarium bor, eng qizig‘i, kitob tokchalari tomgacha yetgan mashhur kutubxona ham shu yerda.
Myeongdong Underground Shopping Center. Xuddi shu nomli joyda, faqat, yer ostida joylashgan savdo markazi va yuqoridagi do‘konlar narx-navosi bilan solishtirish uchun qulay. Unda suvenirlarning million xilini topasiz.
Xarid uchun soliq (Tax Free) qanday qaytariladi?
Agar siz soliqni qaytarish amaliyotini do‘konning o‘zida rasmiylashtirsangiz, xarid cheklarini saqlab qo‘ying. Yirik univermaglarda (Lotte Department Store, Shinsegae Department Store, Hyundai Department Store) maxsus Tax Free peshtaxtalari bo‘lib, ularda soliq summasini qaytarib olishingiz mumkin. Sizdagi oxirgi imkon — Inchxon aeroportida parvoz oldidan bo‘ladi, bu yerda ham soliqni qaytarish punktlari mavjud.
Omadli xaridlar uchun layfxaklar
- Avvalo ro‘yxat tuzing. Seulda o‘ziga jalb qiluvchi narsalar juda ko‘p, boshingiz aylanib, kerakli narsa o‘rniga mutlaqo foydasiz xarid qilib qo‘yishingiz ham mumkin.
- O‘zingiz bilan bo‘sh jomadon yoki katta shopper sumka oling. Shunda qo‘lingizni og‘ritib, og‘ir ko‘tarib yurmaysiz.
- Doimo pasportingiz yoningizda bo‘lsin. Ko‘pchilik do‘konlarda 30 000 vondan boshlangan xaridlar uchun soliqni shu zahoti qaytarish amaliyoti (Tax Free)ni ramiylashtirish mumkin.
- Safarga chiqishda ko‘p kiyimlar olmang. Chunki Seuldan jomadoningizni to‘ldirib kiyim-kechak olib ketasiz.
Xulosa o‘rnida
Seulda shopping — bu shunchaki xaridlar emas, balki sayohatdan kutilgan sarguzashtning bir qismi. Do‘konlarni kezishdan ortib, ko‘cha yeguliklarini tatib ko‘rish, futuristik binolarni va mahalliy “modnik”larni tomosha qilishga ulgursangiz bo‘ldi. Qulay poyabzal kiyib, ko‘p piyoda yurishga tayyor turing — bu shahar sizni hayratga solishi aniq.
