Menga BAA yoqmadi. Nimalar yoqmaganini (nimalar yoqqanini ham) aytib beraman
Amirliklarda nima yaxshiyu, nima yomonligi haqida Ulpan Ramazonova hikoyasi.
Bahorning boshida men Aviasales.uz-da BAA uchun odam lol qoladigan darajada arzon — bir tomonga 950 ming so'm bo‘lgan chiptalarni ko‘rib qoldim. Xabarni erimga, do‘stlarimga yubordim — kechqurun uyimizda ishdan toliqqan, Amirliklarga ketvorishga tayyor bo‘lgan beshta o‘ttiz yoshni chamalab qo‘yganlar guruhi jamlandi.
BAA — men uchun o‘ninchi mamlakat edi. Undan o‘zgacha nimanidir kutmayotgandim — men qayer bo‘lsa ham dengiz sohilidagi joyga borishni xohlardim xolos. Bundan tashqari, sayohatimiz 7-iyul — turmush qurgan sanamizga to‘g‘ri kelar ekan.
Sezishimcha, bu mamlakat menga aeroportdayoq yoqinqiramadi, sababi, qayoqqa qarasang — faqat hashamat edi. O‘ziga bino qo‘ygan, ohanjamali yurt. Go‘yoki hamma narsa: «to‘kin hayot va iste’mol zavqi dunyosiga xush kelibsiz» deya qichqirayotgandek.
Shu zahoti fikrimga aniqlik kiritay: bu o‘rinda mamlakatning aybi yo‘q, o‘zi men shunday odamman — haddan ortiq hashamatni yoqtirmayman, vintaj tarafdoriman va doimo shaklni emas, mazmunni ustun qo‘yaman.
Yoqtirganim nimalar bo‘ldi?
Hashamatli mehmonxonalar va plyajlar
BAAda mehmonxonalar chindan ham hashamatli muzeylarga o‘xshaydi. Biz Abu-Dabida Royal M Hotel by Gewan (bir kechasi o‘rtacha 200 dollar) va Waldorf Astoria Dubai Palm Jumeirah (bir kechasi 250 dollardan boshlanadi) mehmonxonalarida turdik. Bu oilaviy hordiq va ish bo‘yicha safarlarga birdek mos keladigan mehmonxonalar.
Biz hatto, men bu yerda ko‘rgan mehmonxonalarning eng hashamatlisi bo‘lgan — Emirates Palace Mandarin Oriental’ning plyajida ham bo‘ldik. U yerda do‘stimiz dam olayotgani uchun biz ham uni o‘z ko‘zimiz bilan ko‘rdik. Mehmonlarga qulaylik uchun — maxsus keltirilgan qum, o‘ta qulay kursilar va fantastika darajasidagi xizmat: hatto ko‘zoynagingizni artib qo‘yishadi, nozanin xizmatchi qizlar yaxlatilgan suv va muzqaymoqlar tarqatishadi. Hayron qoladigan joyi yo‘q, chunki bu mehmonxona shayx qarorgohi bo‘lishi kutilgan edi.
Yana nimalar yoqdi?
Juda mazali KFC. Mehmonxonaga joylashishimiz bilanoq Talabat ilovasi orqali (u tunda ham ishlaydi) KFC buyurtma qildik. Go‘sht va fri kartoshka juda mazali edi. Darvoqe, kuryer bilan aloqa uchun ko‘proq ma’lumot qoldirish kerak, chunki BAAda WhatsApp ishlamaydi.
Transport uchun qulayliklar. BAAda jazirama tufayli yayov yurib bo‘lmaydi, biz taksi va karshering xizmatidan foydalandik. Taksi bir chaqirim uchun 2 dirham (295 tanga). Biz, asosan, YanGo‘dan foydalandik, lekin mahalliy Careem, Hala Taxi, Abu-Dabida esa — Abu Dhabi Taxi servislari ham bor. Mashina ijarasi guruhimiz uchun 200 ming tangaga tushdi. Yo‘llar ikki shaharda ham qulay. Muhimi: haydovchilik guvohnomangiz xalqaro maqomga egami-yo‘qmi, albatta tekshirib oling.
Shaharlar arxitekturasi zamonaviy va qiziqarli. BAAda me’morchilik yangiliklari va minimalizm ruhi ustun. U yerda bo‘lgach, o‘zimizning me’morlarimiz qayerdan ilhom olishayotganini tushundim — o‘xshashlik yaqqol ko‘zga tashlanadi.
Men sevib qolgan ikki joy
Sea World Abu Dhabi
teamLab Phenomena Abu Dhabi
Sea World Abu Dhabi. Ulkan hudud va minglab baliq turlariga ega oceanarium. Borishingiz shart.
teamLab Phenomena Abu Dhabi. Multisensor zamonaviy san’at muzeyi. Hissiyotlaringizni junbushga keltiradigan, inson tafakkuri sehri va mo‘jizasi namoyon bo‘lgan joy.
Bu joylar Saadiyat va Yas orollarida joylashgan, lekin chiptalarni birga olish mumkin: masalan, Sea World + teamLab chiptasi 480 dirham (deyarli 71 ming tanga). Ularni ham onlayn, ham oflayn tarzda olish mumkin. Manzilgacha taksida boriladi — bu mashhur yo‘nalish bo‘lib, hududga kirish va parkovka juda qulay.
Ana endi shaxsan menga yoqmagan jihatlar haqida
Sohilda
Luvrda
Masjid
Jazirama
Biz safar uchun anchagina noqulay paytni (iyulning boshi), ya’ni harorat 38 daraja kunlarni tanlab qo‘yibmiz. Bunga bir amallab chidadik, ammo dengiz suvi — chindan qaynoq edi. Shunda ham dengizda cho‘mildim albatta, lekin BAA dengizi endi mening top-beshtaligimda emas.
Shoshma-shosharlik
Menga vaqt yetmadi. To‘rt kunda ikkita shaharni tomosha qildik — BAA uchun bu yetarlidir balki, ammo baribir hamma e’tiborga loyiq joylarni birdaniga ko‘rishga urinish kerak emas. Yugurib yuriladigan sayohat men uchun emasligini tushundim, masalan, men Luvrni ko‘proq tomosha qilgan bo‘lardim. Shoshilinchda hatto Ferrari World yoki Shayx Zayd Masjidi manzarasidan zavqlanishga ham ulgurmadim, akvaparkka esa umuman bormay qo‘ya qoldim.
Narx-navo
To‘rt kun ichida erim ikkimiz 27 mln so'm ishlatdik — bu faqat yeguliklar, taksi va birozgina xaridlar uchun. Masalan, mehmonxonadagi livan restoranida besh kishilik kechki taom bizga 8,1 mln so‘mga, Ferrari World’dagi xot-dog bilan cola esa — taxminan 245 ming so‘mga tushdi.
BAAda hamma narsa bizdagiga qaraganda 2,5 baravar qimmatligini unutmaslik va xarajatlarni shunga qarab chamalash kerak. Biroq katta savdo markazlarida chegirmalar ko‘pligi bois brend kiyimlar va poyabzallarni deyarli Qozog‘istondagidek narxda olish mumkin.
Shoping
Do‘stlarim va erimga moll — savdo pavilyonlari juda yoqdi. Yas Mall, Mall of Emirates, Dubai Outlet Village’da bo‘ldik. Sayohatimizning deyarli 40 foiz vaqtini turli savdo-ko‘ngilochar markazlarda o‘tkazdik. Men esa SMlarida buncha uzoq yurolmayman, brendlarni farqlamayman, umuman shoping ishqibozi emasman. Erim esa snikerxed va noyob krossovkalar topish ilinjida edi, ammo yakunda biz bir dona Nike shimi va bir juft «birkenshtok» oldik xolos.
Qalbsizlik
Men uchun har qanday sayohatda borgan joyimning «qalbi» muhim. BAAda, ya’ni, nisbatan sokin Abu-Dabida ham, jo‘shqin Dubayda ham shu narsani his etmadim. Manzil qalbi deganda men shu joyni anglatuvchi belgilar, shu yerlik odamlarning tabassumi, havoga singib ketgan ohanglar — aynan shu mamlakatga xos jihatlarni nazarda tutyapman.
Masalan, Armanistonga borganimizda,taksichilar bizni mahalliy shirinliklar bilan mehmon qilishgandi. Tailandda va Vyetnam aholisi esa ochiqko‘ngilligi bilan esimizda qolgan. Har bir mamlakatda men o‘sha yerlik odamlarga xos kayfiyat, hissiyotlarni eslab qolaman. BAAda bunday qilolmadim.
Xulosa o‘rnida
BAA — ajoyib, boy, taraqqiy etgan mamlakat, biroq men o‘zga qadriyatlarga mansub odamman. Do‘stlarimga bu mamlakat yoqdi, lekin menga bu sayohat tajanglik va horg‘inlik keltirdi. Ehtimol, men ko‘rish uchun boshqa manzillarni tanlaganimda, shaharda sayr uchun ko‘proq vaqt ajratolganimda, xarajatlarni kamaytirib, o‘z hissiyotlarimga ko‘proq erk berganimda, hammasi boshqacha bo‘larmidi. Agar men yana Amirliklarga qaytsam, faqat tekinga va shunda ham, bir kecha-kunduzni to‘lig‘icha teamLabs’da o‘tkazish uchun kelaman.
