Qanday qilib uchta do‘st cho‘ntakda 800 dollar bilan Gruziyaga ketvorganimiz haqida
Sayohat haqida gurunglar ichki chatdan chetga chiqqanda. Aviasales.uz SMM xodimidan o‘ylab topilmagan hikoya.
Hammasi juma oqshomida, hamkasblar bilan ishni muhokama qilib, sayohatlarni orzulab o‘tirganimizda boshlandi. Men anchadan beri Gruziya haqida o‘ylab yurganimni aytdim. O‘sha kuni kechqurun dugonam menga: «Gruziyaga survormaymizmi?», deb yozdi. Oradan bir necha soat o‘tiboq biz mening uyimda sayohat yo‘nalishini tuzib, chipta izlashga kirishdik. Safimizga yana bir do‘stimiz qo‘shildi — shunday qilib, to‘satdan boshlangan sayohat aniq rejaga aylandi: uch kun Bokuda bo‘lib, undan esa — Gruziyaga o‘tishga qaror qildik.
Har ikki mamlakatga kirish o‘zbekistonliklar uchun vizasiz bo‘lib, sayohat xarajati ham cho‘ntakka og‘irlik qilmasdi. Ertasiga ertalab chiptalarni sotib oldik, yashash joyimizni band qildik, indiniga esa uchib ketdik. Ha, biz hammasini bir kecha-kunduzda taxt qildik. Ana endi, sayohat qanday bo‘lganini aytib beraman.
1-qism. Boku: sach, Kaspiy va juda arzon taksilar
Boku bizni jazirama bilan qarshi oldi. Ozarbayjon poytaxti bilan yaxshilab tanishish uchun bor-yo‘g‘i uch kun vaqtimiz bor edi. Rejamiz: Eski shaharni ko‘proq aylanish, imkoni boricha ko‘proq mahalliy taomlarni tatib ko‘rish va Kaspiy dengizida cho‘milish. Biz Bibi-Eybat posyolkasi yonidagi nomsiz plyajga bordik — u haqda yaxshi fikrlar o‘qigandik va o‘z tanlovimizdan afsuslanmadik. Plyaj ozoda, kirish bepul, lekin to‘g‘risi, oftobda toblanish uchun yotoq kursilar yetishmas ekan. Suv yoqimli, sohil esa chig‘anoqlarga to‘la edi.
Yeguliklar va sharob
Bokuda qilgan birinchi ishimiz milliy oshxona taomlari yeyish uchun Samik restoraniga borish bo‘ldi. Sach — maxsus tovada sabzavotlar qo‘shib qovurilgan qo‘y go‘shtini oldik. Bu men uchun o‘zga mamlakatda birinchi oqshomdayoq yeyilgan eng lazzatli kechki taom bo‘ldi. Lekin ertasi tongda eski shahardagi Sehrli Tandir kafesidagi nonushtamiz undan ham o‘tib tushdi. Tasavvur qiling: pomidorli quymoq, ozarbayjon xushbo‘y choyi, yangi pishloq, asal va zaytun.
Albatta, hamma joyda ham taomlar zo‘r bo‘lmadi. Masalan, sohil bo‘yidagi Palma Boulevard restoranidagi qiymali ugra osh juda yog‘li va bemaza edi — bu hamma narsa kutilganidek bo‘lavermasligiga bir dalil bo‘ldi. O‘rtacha olganda, uch kishi uchun yaxshigina kechki taomlanish har kuni bizga 60-70 manatdan (deyarli 420 000–490 000 so‘m) tushdi.
Uchinchi kuni, vanihoyat, mahalliy sharobni tatib ko‘rdik. Mehmonxonamizdan ikki daqiqalik joyda Kefli Local Wine & Snacks nomli bar bor ekan. Men somelye emasman, shu bois 8 manat evaziga bir qadah «Shardone» ola qoldim. Sharob ajoyib, o‘tkir ta’mli edi, ertasiga boshimni biroz og‘ritdi — buni hisobga olib qo‘ying. Yaxna gazaklar bilan qo‘shib hisoblaganda, 75 manat to‘lov qildik.
Xarajatlar va transport
Har bir kishi uchun kuniga 70-80 manat sarflandi. Do‘stlarim yetib kelishimiz bilan 100 dollardan pul almashtirishdi, men esa bor mablag‘imni Visa kartamda saqladim. To‘lov qilishda biron marta ham muammo bo‘lmadi — restoranlardan tortib kichik do‘konchalargacha, hamma joyda karta qabul qilishdi.
Harakatlanishda Bolt agregatoridan foydalandik. U yangi foydalanuvchilar uchun dastlabki uchta manzil uchun chegirma berdi va shunda biz bor-yo‘g‘i 2,5 manat to‘ladik. Har birimiz ilovani yuklab olganimiz evaziga to‘qqizta joyga juda arzon, hattoki, kulguli narxda yetib oldik.
2-qism. Gruziya: kabriolet, Batumiga eltuvchi yo‘l va xuddi o‘sha «Borjomi»
Tbilisiga parvozimiz aeroportdagi sarguzasht bilan boshlandi. Biz 15:05 da uchishimiz kerak edi, lekin reys qayta-qayta kechiktirilgani bois 19:30 da uchdik. To‘rt soatdan ortiq vaqtni uchish zonasida, ertalabki juda to‘kin nonushtadan ortgan yeguliklarni ermak qilish bilan o‘tkazdik. Aviakompaniya uzr so‘rash ma’nosida barcha yo‘lovchilarni sendvich va sharbat bilan siyladi.
Kabriolet, Batumiga eltuvchi yo‘l
Gruziyada bizni kabriolet kutardi. Biz mashinani do‘stimning tanishi orqali ijaraga oldik va Tbilisidan Batumiga qarab yo‘lga tushdik. Yo‘l-yo‘lakay Borjomiga kirib o‘tdik. Soat 9 da manzilga yetib keldik, bu yerdagi barcha joylar esa ancha kech ochilar ekan.
Do‘stlarim tunda yo‘l yurilganidan charchashdi va mashinada uxlab qolishdi, men esa yolg‘iz sayrga chiqdim. Qarshimdan «Inka» degan tamaddixona chiqdi — buloqlar yaqinidagi kamtarona bu joyda 35 lari to‘lab quymoq yedim, qahva va «Borjomi» ichdim. Borjomi muzeyiga kirdim, Gogia qal’asiga chiqdim, buloqlardan suv ichdim. Shahar juda kichkina, bu yerda go‘yo vaqt to‘xtab qolgandek. Yugur-yugur yo‘q. Bir so‘z bilan aytganda, kelishga mutlaqo arziydi.
Ijara va foydali qaydlar
Darvoqe, bizga xalqaro haydovchilik guvohnomasi kerak bo‘lmadi — o‘zimizning oddiy guvohnoma ham yetarli bo‘ldi. Bu juda muhim qulaylik. Gruziyada yo‘llar tekis va ravon. Butun kavkazliklarga xos yagona odat — odamlar mashinada musiqani juda baland eshitishadi.
Mashina ijarasi: sutkasiga 75 dollar. Ikki kun uchun 150 dollar to‘ladik.
Benzin: 100 dollar.
Depozit: 100 dollar.
Batumi
Batumiga keliboq, darhol joyimizga — yangi ta’mirlangan, uch kishi uchun sutkasiga 37 dollardan tushgan xonadonga joylashdik. 10 soatlik yo‘l yurgach, ko‘chaga chiqishga holimiz qolmaganidan shunchaki burgerga buyurtma berdik. Kechqurun Batumi tennis maydoni yaqinidagi plyajga chiqdik. Xaritada birinchi shu joyni ko‘rdigu, boraverdik. Shunday qilib, men birinchi marta dengizni ko‘rdim.
Ertasiga Botanika bog‘iga bordik (kirish — 20 lari). Bog‘ juda ajoyib va juda katta, uni aylanishga kamida 4 soat vaqt ajratish lozim. Hammasidan esda qolgani ziplayn bo‘ldi: katta bog‘, Qora dengiz sohili va shahar manzarasi uzra parvoz qilgandek bo‘lasiz.
Oqshomda Daphna restoranida ovqatlandik. Bu yerni ham do‘stimning tanishi tavsiya qildi — aslida ana shu tbilisilik do‘stimning tanishi bizga Gruziya uchun yo‘l ko‘rsatma tuzib berdi va uning sharofati bilan to‘satdan boshlangan sayohatimiz ko‘ngilli o‘tdi. Uch kishi uchun xinkali, tovuq go‘shtidan chixirtma sho‘rvasi va gruzincha limonad 130 lariga tushdi.
3-qism. Tbilisi: yolg‘izlik va andegraund ruhida
Do‘stlarim bilan sayohatimiz poyoniga yetdi, endi — mening sayohatim boshlangandi. Sheriklarimni aeroportga kuzatib, o‘zim yana bir necha kunga Tbilisida qoldim. Ruhimda yengilgina yolg‘izlik hissi uyg‘ondi, ammo u tez orada tahliliy qiziqishlarim soyasida qolib ketdi.
Men ko‘p sayr qildim, strit-art rasmlarini suratga tushirdim, kanat yo‘l orqali «Gruziya onasi» yodgorligiga chiqdim (3 lari) va ilk bor sharobdan qilingan muzqaymoq yeb ko‘rdim — mazasi noodatiy va shirin edi. Oqshomda Tbilisining andegraund ruhidagi joylarini ko‘rgani chiqdim.
- Pluto’s Records (Vashlovani ko‘chasi, 8). 7 lari to‘lab gruzin pivosini oldim, texno-musiqa tingladim va odamlar bilan muloqot qildim.
- Mutant Radio (Dmitriya Uznadze ko‘chasi, 4). Bu men ko‘rgan o‘zgacha muhitli joylarning eng ajoyibi edi. Bu yerda tashlandiq binoga musiqa uskunalari joylanib, bar va dijeylarning chiqishlari tashkil qilingan. Tbilisiga yo‘lingiz tushsa, albatta shu joyga boring — hayratda qolasiz.
Qaytishimdan bir kun oldin yegulik suvenirlar olishga bordim. Badai qandolat do‘konida turli xil churchxelalar (har biri 15 lari) oldim, 8000 Vintages do‘konida (Tabukashvili ko‘chasi, 27) esa ota-onam uchun sovg‘aga ikki xil sharob va chacha xarid qildim (113 lari).
Rostini aytsam, ba’zan shahar menga zerikarli tuyuldi. Graffiti rasmlarga qoplangan eski arxitektura — menga zavq bermadi. Aksincha, o‘zim izlab topgan sayyohlar bormaydigan joylar yaxshi taassurot qoldirdi. Boku va Batumiga esa yana jon deb borgan bo‘lardim. Shunchaki menga dengiz bo‘yidagi shaharlar ko‘proq yoqsa kerak.
Sayohat yakuni, xarajatlar va uchta muhim maslahat
Mazkur sayohat uchun har birimiz 800–850 dollardan sarfladik. Bu aviachiptalar, turar-joy, avtomobil ijarasi va barcha xarajatlarimiz uchun. Bitta gap — turar-joy tanlashda tejamkorlik qilmasdan, yaxshi sharoitli joyni tanlayverish kerak.
Xulosa o‘rnida — bizning yo‘nalish bo‘yicha sayohat qilmoqchi bo‘lganlar uchun uchta maslahat.
- Ingliz tilida so‘zlashga harakat qiling. Ozarbayjonda ham, Gruziyada ham mahalliy aholi bilan inglizchada gaplashdik. Rus tilini ko‘p joyda yoqtirishmas ekan. Ingliz tilidan biroz bo‘lsa-da ham xabardorlik sizga ancha qulaylik beradi.
- Taxminiy bo‘lsa ham rejangiz bo‘lsin. To‘satdan sayohatga ketvorish — zo‘r albatta, lekin rejasiz qiyin. Bizga bu vaziyatda do‘stimning tanishi yo‘nalish tuzib bergani foyda berdi. Agar shunday tanishingiz bo‘lmasa, albatta ko‘rishingiz kerak bo‘lgan joylarning ro‘yxatini oldindan tuzib oling. Shunda yetib borgach, qadrli vaqtingizni behuda sarflamaysiz.
- Mashinani ijaraga oling. Agar uch-to‘rt kishi bo‘lsangiz, erkin harakatlanasiz. Biz agar yo‘nalishli transportlar vaqtiga qarab yursak, Borjomiga borolmagan bo‘lardik. Bundan tashqari, xarajat o‘rtada taqsimlansa, juda arzon tushadi.
