Atirni samolyotda qoʻl yukiga olish mumkinmi?

Agar aviatsiya xavfsizligi qoidalarini oldindan tushunib olsangiz, sevimli atirlaringiz bilan sayohat qilish oson kechadi. Qimmatbaho parfyumingiz tekshiruv vaqtida toʻgʻridan-toʻgʻri axlat qutisiga ketib qolmasligi uchun qoʻl yukining uchta oddiy qoidasini yodda tutish kifoya: flakon hajmi — 100 ml gacha, umumiy limit — bir litrgacha va bularning barchasi bitta shaffof zip-paketda boʻlishi kerak. Bundan kattaroq hajmdagilarning barchasini bagajga topshirishga toʻgʻri keladi, duty free`dan sotib olingan narsalarni esa parvoz oxirigacha muhrlangan holda qoldirish lozim.

Maqolada samolyotda atir olib oʻtish qoidalari, bagaj meʼyorlari va parvozdan oldingi tekshiruvdan ortiqcha bahs-munozarasiz qanday oʻtish haqida gaplashamiz. 

Parfyumni qoʻl yukida olib oʻtish mumkinmi?

Qisqa qilib aytganda — ha, mumkin. Ammo oldindan bilib olgan maʼqul boʻlgan jihatlar bor. Aeroportlarda suyuqliklarni olib oʻtish qoidalari hamma uchun bir xil. Uzbekistan Airways yoki boshqa aviakompaniyalar bilan uchishingizdan qatʼi nazar — atir, parfyum va moyli essensiyalar suyuqliklarga tenglashtiriladi. Va idish hajmi 100 ml dan oshmasligi kerak. Agar atir qimmatbaho, flakoni esa katta boʻlsa, uni yaxshisi darhol bagajga topshiring. Yoki mini-versiyasini (sayohatbop trevel-format) sotib oling — shunda ham sevimli iforingizni, ham asablaringizni asragan boʻlasiz.

Qoʻl yukida necha millilitr atir olib oʻtish mumkin?

Parvozdan oldin eslab qolish kerak boʻlgan asosiy qoida: bitta idishning hajmi 100 ml dan oshmasligi kerak. Aeroportdagi xavfsizlik xizmati inspektori doimo idish ichidagi suyuqlikning haqiqiy miqdoriga emas, balki uning zavod markirovkasiga qaraydi. Agar sevimli shisha idishingiz 150 yoki 200 ml hajmli boʻlsa-yu, uning ichida atigi bir tomchi atir qolgan boʻlsa ham — qoidalarga muvofiq u baribir musodara qilinadi. 

Shuning uchun katta flakonni hajmi 100 ml dan kam boʻlgan sayohat idishchalariga quyib olgan maʼqul. Barcha suyuqliklarning umumiy hajmi — bunga nafaqat parfyumeriya, balki kremlar, losonlar va tish pastasi ham kiradi — bir litrdan oshmasligi kerak. Batafsil maʼlumotlar va hisob-kitobning nozik jihatlari bortdagi suyuqliklar haqidagi maqolamizda jamlangan. Bu barcha flakonlarni oʻlchami taxminan 20 ga 20 sm boʻlgan bitta shaffof, yopiladigan plastik zip-paketga chiroyli qilib joylash lozim. Bitta voyaga yetgan yoʻlovchiga qatʼiy ravishda bitta shunday paket ajratiladi.

Parfyumni bagajda olib oʻtish mumkinmi?

Agar siz miniatyuralar bilan cheklanishni istamasangiz, oʻzingiz bilan bir nechta atirlarni olmoqchi boʻlsangiz yoki 150, 200 yoki 250 ml li toʻliq hajmdagi flakonlarni olib ketayotgan boʻlsangiz, ularni bagajga topshiring. Bagaj uchun qoidalar qoʻl yukiga qaraganda ancha yumshoqroq. Xavfsizlik talablariga koʻra, bir yoʻlovchi bagajga ikki litrgacha yoki ikki kilogrammgacha kosmetika va aerozollarni topshirishi mumkin. Bunda bitta flakonning hajmi 500 ml dan oshmasligi kerak.

Uchishdan oldin ortiqcha yuk bilan bogʻliq muammolar aniq yuzaga kelmasligi uchun esa, bagaj va qoʻl yukini tashish qoidalari koʻrsatilgan yoʻriqnomamizga koʻz yugurtiring. U yerda barcha dolzarb talablar, sumkalarning oʻlchamlari va jarimalar jamlangan.

Duty free’dan olingan atirni qanday olib oʻtish kerak?

Xalqaro uchib ketish zonasini dyuti-frisiz tasavvur qilish qiyin. Agar aeroportda atirlar kolleksiyangizni yangilashga qaror qilsangiz, bizda yaxshi xabar bor. Dyuti-fridan sotib olingan atir va tualet suvi uchun 100 ml hajmdagi qat’iy cheklov amal qilmaydi. Samolyot saloniga istalgan hajmdagi flakonni olishga ruxsat etiladi.

Biroq, parvozga chiqishdan oldin yoki transfer vaqtida xaridingizni olib qoʻymasliklari uchun uchta shart mavjud:

• kassir flakonni maxsus ochishdan himoyalangan shaffof paketga (STEB-paket) muhrlab qoʻyishi kerak;
• chek paket ichida boʻlishi va tashqaridan aniq koʻrinib turishi kerak;
• paketni yakuniy manzilga yetib borguncha ochish mumkin emas.

Agar transfer bilan uchayotgan boʻlsangiz, bu haqda albatta kassirni ogohlantiring. Tranzit aeroportidagi aviatsiya xavfsizligi xodimlarida savollar tugʻilmasligi uchun u paketni xalqaro standartlar boʻyicha muhrlab beradi. Xarid chekini safar oxirigacha saqlab qoʻying. Paket mustahkam muhrlangan boʻlsa ham, transferdagi xavfsizlik xodimlari chekni alohida koʻrsatishni soʻrash huquqiga ega.

Samolyotda qanday olisb chiqish mumkin:

Powerbankni

Manikyur qaychisini

Oziq-ovqatni

Dori-darmonni

Mevalarni

Suyuqlikni

Nima sababdan tekshiruvda atirni olib qoʻyishlari mumkin?

Parvozoldi tekshiruvida sevimli atringizdan ayrilib qolmaslik uchun musodara qilinishining eng koʻp uchraydigan toʻrtta sababini bilish muhimdir:

• flakon hajmi me’yordan ortiq;
• idishlar paketga sigʻmayapti — barcha suyuq vositalar osongina yopiladigan bitta shaffof zip-paketda boʻlishi kerak;
• zavod markirovkasi yoʻq — agar flakondagi raqamlar oʻchib ketgan boʻlsa va uning hajmi 100 ml dan kamligini isbotlashning iloji boʻlmasa, tekshiruvchi xodim buyumni axlat qutisiga tashlab yuborishga haqli;
• duty free`dan olingan paket muhri buzilgan — agar transfer orqali uchayotgan boʻlsangiz, muhrlangan STEB paketini yakuniy manzilga yetib borguncha ochish mumkin emas, aks holda u transfer nazoratida olib qoʻyiladi.

FAQ: atir-upa tashish boʻyicha koʻp beriladigan savollar

Bir nechta atir idishini (flakonini) olish mumkinmi?

Ha, qoʻl yukiga bir nechta mini-flakonlar olishga ruxsat beriladi. Eng muhimi, ular hajmi bir litrgacha boʻlgan bitta shaffof, yopiladigan paketga joylashishi kerak. U oson yopilishi lozim. Bunda har bir alohida flakonning hajmi 100 ml dan oshmasligi kerak — bu xavfsizlikning standart talabidir.

Agar atir flakoni 100 ml dan ortiq boʻlsa, nima qilish kerak?

Agar siz hali uyda boʻlsangiz, atirni saqlab qolishning ikkita ishonchli usuli bor:

• katta flakonni chamadonga solish va uni bagajga topshirish;

• sayohat atomayzerini (trevel-flakon) sotib olish va atirning bir qismini unga quyib olish.

Agar katta flakon allaqachon aeroportdagi tekshiruv vaqtida aniqlansa, uni qoldirib ketishga toʻgʻri keladi. Roʻyxatdan oʻtish peshtaxtasiga qaytib, uni bagajga topshirishning iloji faqat roʻyxatdan oʻtish yakunlanishiga yetarli vaqt qolgan taqdirdagina boʻladi. 

Duty-free’dan sotib olingan atirdan samolyotda foydalanish mumkinmi?

Yoʻq, atirni ochish va uni salonda sepish mumkin emas, buning ikkita sababi bor:

• xariddan mahrum boʻlish xavfi — agar siz oʻtish reysi (perelet) bilan uchayotgan boʻlsangiz, tranzit aeroportidagi tekshiruvda ichida cheki boʻlgan, ochilgan maxsus STEB paketi olib qoʻyiladi;

• boshqa yoʻlovchilar haqida qaygʻurish — yopiq makonda oʻtkir hidlar yondosh oʻrindiqlardagi odamlarda allergiya yoki astma xurujini keltirib chiqarishi mumkin. Samolyot bortida parfyumeriya purkash taqiqlanadi.

Atirni sayohat flakonida (trevel-flakon) yoki atomayzerda olib oʻtish mumkinmi?

Ha, sayohat uchun moʻljallangan ixcham atomayzer — sevimli atiringizni yoʻlga olishning eng qulay va xavfsiz usulidir. Odatda bunday flakonlar beshdan 15 millilitrgacha hajmdagi suyuqlikni sigʻdira oladi. Ular suyuqliklar uchun moʻljallangan shaffof paketga osongina joylashadi, zich yopiladi va tekshiruv vaqtida xavfsizlik xizmatida hech qanday savol tugʻdirmaydi.