O‘tkir masala: manikyur qaychisini bagajda va qo‘l yukida qanday olib yurish mumkin?
Samolyotga qaychini olib kirish mumkinmi, tekshiruvda nega asbobingizni olib qo'yishlari mumkin va manikyur to'plami bilan bog'liq muammolardan qanday qochish mumkin
Xalqaro qoidalarga ko‘ra, kichik qaychilarga (tig‘i 6 sm gacha) ruxsat beriladi, ammo haqiqat shundaki, xavfsizlik xodimi sevimli asbobingizni shunchaki xavfli tuyulgani uchun axlat qutisiga tashlab yuborishi mumkin.
Tekshiruv paytida qimmatbaho to‘plamdan mahrum bo‘lmaslik uchun, keling, aslida nimalarni salonga olib kirish mumkinligini va nimalarni darhol chamadonga joylash yaxshiroq ekanligini ko‘rib chiqamiz.
Qaychini samolyotga olib chiqish mumkinmi?
Aviatsiya xavfsizligi o‘tkir buyumlarni yoqtirmaydi. Mantiq esa oddiy: nazariy jihatdan qo‘shniga yoki ekipajga zarar yetkazishi mumkin bo‘lgan har qanday narsa xavfli hisoblanadi. Har qanday qaychi, hattoki uchlari yumaloq bo‘lgan taqdirda ham, shubha ostiga olinadi.
Biroq, XFAT (Xalqaro fuqaro aviatsiyasi tashkiloti) hujjati biroz yengillik beradi: agar tig‘ 6 sm dan qisqa bo‘lsa, uni qo‘l yukiga olish mumkin. Uzunligi vintdan to uchigacha hisoblanadi.
Ammo buning bitta katta "lekini" bor. So‘nggi so‘zni har doim muayyan aeroportdagi muayyan tekshiruv xodimi aytadi. Aviakompaniya qoidalari ham muhim: masalan, Uzbekistan Airways to‘g‘ridan-to‘g‘ri bortda sanchuvchi-qirquvchi buyumlar, jumladan, qaychi (hatto bolg‘a kabi to‘mtoq og‘ir narsalar ham) taqiqlanishini yozadi.
Qo‘l yukidagi manikyur qaychisi: tashish qoidalari
Aviakompaniya saytida "mumkin" deb yozilgan bo‘lsa ham, inson omilini hech kim hisobdan chetda qoldirmaydi. Tajriba shuni ko‘rsatadiki, bu lotereyaga o’xshaydi.
Toshkentdagi hamkasbimni kichik qaychi bilan o‘tkazishdi, chunki u Uzbekistan Airways aviakompaniyasining qat’iy taqiqiga qaramay, pichoqning 6 sm dan kalta ekanligini isbotlay oldi.
Agar faqat qo‘l yuki bilan uchayotgan bo‘lsangiz va manikyursiz yashay olmasangiz, "xavfsizroq" to‘plamlarga e’tibor beriganingiz ma’qul — masalan, qaychi o‘rniga knipserlar (tishlagichlar) olish mumkin. Xavfsizlik xizmatida ularga nisbatan deyarli savollar tug‘ilmaydi.
Qaychini qanday olib o’tish kerak?
Agar siz baribir salonga qaychi olib o’tishga jur’at etgan bo‘lsangiz:
- Uni g‘ilofga soling.
- Uni kosmetikalar qutisiga tezkor tarzda olish mumkin bo‘ladigan qilib joylashtiring.
- Ular bilan xayrlashishga ruhan tayyor bo‘ling.
Asosiy qoida: turli aviakompaniyalarda (va hatto xodimlarda) qoidalar turlicha bo‘lishi mumkin. Agar manikyur qaychilaringiz uchun kompaniyaning saytida aniq "HA" belgisi bo‘lmasa, yaxshisi ularni darhol bagajga topshiring. Esda tutingki, parvozdan oldingi tekshiruv bahsi manikyur to‘plamidan qimmatroqqa tushadi.
Qaychini bagajda olib yurish mumkinmi?
Endi yengil nafas tortsangiz bo’ladi. Ro‘yxatdan o‘tkaziladigan bagajda deyarli har qanday qurolni olib yurish mumkin: katta qaychilar, manikyur qaychilari, tirnoq tekislovchi asboblar, tishlagichlar va hatto to‘qish uchun mo’ljallangan simlarni ham. Asosiysi, chamadon og‘irligi belgilangan meyordan og‘ir bo‘lmasligi kerak.
Qaychini qanday qadoqlash kerak?
Agar siz o‘tkir narsalarni chamadonda olib ketayotgan bo‘lsangiz, ularni albatta qadoqlab qo‘ying: himoya qalpog‘ini kiygazing yoki mato bilan o‘rang. Bu shunday bo‘lishi kerakki, uning uchi chamadonning astarini teshib o‘tmasin va eng muhimi, yuk tashuvchilar yoki o‘zingiz buyumlarni qismlarga ajratayotganingizda jarohatlanmasligingiz kerak.
Tekshiruv paytida qaychi topilgan bo‘lsa, nima qilish kerak?
Agar siz baribir omadingizni sinab ko‘rishga va manikyur qaychini qo‘l yukingizda qoldirishga qaror qilgan bo‘lsangiz, tayyor bo‘ling: rentgenda ular juda yaxshi ko‘rinadi, “aldab o‘tis” deyarli imkonsiz. Nazorat paytida topilganda, qaychi shunchaki olib qo‘yilib, utilizatsiya qilinadi. Ba’zida, agar omadingiz kelsa va sizni kimdir kuzatishga kelgan bo‘lsa (va hali aeroportdan ketmagan bo‘lsa), ularni kuzatuvchiga berishingizga ruxsat berishlari mumkin. Biroq bunday variant hammaga ham yoqavermaydi.
Agar tekshiruvda bo‘lsangiz, qaychini bagajga topshirish mumkinmi?
Nazariy jihatdan — ha. Bu samolyotga kech qolishingizga olib kelishi ham mumkin. Qaychini yukxonaga topshirish uchun quyidagicha yo’l tutish kerak:
- Tekshiruv hududidan chiqish
- Registratsiya joyiga qaytish
- Ularni alohida bagaj o’rni sifatida topshirish (bu ko‘pincha pullik va qimmat).
- Yana tekshiruv uchun navbat kutish.
Faqat qaychining o’zi uchun hech kim bunday qilmaydi. Istisno holat: agar chiqish eshigi (darvoza) oldida samolyotdagi javonlarda joy yetishmasligi sababli qo‘l yukini bagaj bo‘limiga bepul topshirish taklif qilinsa. Lekin bu kamdan kam uchraydigan hodisa, bundan umid qilmasa ham bo‘ladi.
Olib qo‘yilgan buyumlarga nima bo‘ladi?
Ular utilizatsiyaga yuboriladi. Hech kim qaychilaringizni unutilgan buyumlar xonasida saqlamaydi. Ularni qaytarish deyarli imkonsiz: keyinchalik so‘rov yozsangiz ham, javob salbiy bo‘lishi ehtimoli yuqori. Aviakompaniyalar va aeroportlar xavfsizlik maqsadida tanlangan buyumlar uchun javobgar emas. Agar qaychi olib qo’yilgan bo‘lsa, uni yo‘qolgan deb hisoblang. Buni tajriba uchun badal deb hisoblaganingiz ma’qul.
Ehtimol, yashirincha olib kirishga urinib ko‘rarmiz?
Yomon fikr. Aeroportlardagi introskoplar sumka ichidagi narsalarni ko‘rib turadi, ekrandagi metall yorqin nur sochadi. Qaychini folgaga yoki sumkaning tubiga yashirishga urinish faqat shubha uyg‘otadi.
Sizni to‘liq shaxsiy tekshiruv uchun ushlab turishlari mumkin, chunki siz manikyur uskunasidan ham jiddiyroq narsani yashirishga urinyapsiz deb o‘ylashadi. Asabingiz va vaqtingiz bundan qimmatroq.
Xulosa o‘rnida: sayohatchilarga maslahatlar
- Qoidalar bilan oldindan tanishirib chiqing. Aviakompaniya va uchish aeroporti saytiga kiring.
- O‘tkir narsani salonga olib kirmang. Bir-ikki kunga uchayotgan bo’lsangiz, manikyur kutib turadi. Yoki o’sha yerning o‘zida arzon qaychi sotib oling.
- Xotirjamligingizni qadrlang. Agar bagajingiz bo‘lsa, barcha sanchuvchi narsalarni o‘sha yerga topshiring.
Tekshiruvda ortiqcha muammolarsiz va zavq bilan parvoz qilishingizni tilaymiz!
