Bolalar bilan qayerga borsa bo‘ladi: O‘zbekistondan 2025-yilning eng mashhur 6 ta yo‘nalishi

Aviasales.uz ma’lumotlariga ko‘ra, 2025-yil yozi uchun oilaviy bron qilishlar ulushi o‘tgan yilga nisbatan 26 foizga oshgan. Tobora ko‘proq odamlar bolalar bilan dam olish uchun qulay va yaxshi sharoitlarni ta’minlash maqsadida ta’tilni oldindan rejalashtirmoqda.

Bu mavsumda oilaviy sayyohlar orasida mashhurlik qozongan asosiy yo‘nalishlar — Istanbul, Antaliya va Batumi. Shuningdek, Boku, Olmata va Dubayga sayohatlar ham tez-tez bron qilinmoqda. Ularning har biri haqida batafsil to‘xtalamiz.

Istanbul

Shubhasiz, oilaviy sayohatlar uchun yetakchi yo‘nalish. Istanbul hamon o‘zbekistonliklar uchun eng mashhur xorijiy shahar bo‘lib qolmoqda — o‘rtacha ta’til davomiyligi taxminan 12 kunni tashkil etadi.

Shahar sharqona muhit, boy tarix va zamonaviy qulayliklarni o‘zida mujassam etgan: keng otellar, qulay infratuzilma va bolalar uchun ko‘plab ko‘ngilochar tadbirlar mavjud.

Yozdagi iliq ob-havo Istanbulni Bosfor qirg‘oqlari bo‘ylab sayr qilish, bozorlarga va bog‘larga tashrif buyurish uchun ajoyib joyga aylantiradi. Oilaviy dam olish uchun Shahzoda orollari — sokin, dengiz shabadali va shinam kafelar joylashgan hududlar juda mos keladi.

Bolalar bilan albatta ko‘rish kerak bo‘lgan joylar:

• Ayo-Sofiya — Vizantiya arxitekturasi, hayratlanarli manzaralari va boy tarixi bilan mashhur;

• Akvarium — Yevropadagi eng yirik akvariumlardan biri;

• Miniatürk bog‘i — bir joyda joylashgan kichik Turkiya, eng mashhur me’moriy yodgorliklarning nusxalari mavjud.

Antaliya

Antaliya doimiy ravishda eng mashhur yo‘nalishlar qatoriga kiradi va bu yerdagi ta’til odatda ikki hafta davom etadi. Oilalar u yerga tez-tez tashrif buyurishadi — buning sababi "all inclusive" tizimidagi kurortlar, O‘rta yer dengizi va qadimiy madaniyatning uyg‘unligidir.

Shahar o‘zining tarixi bilan faxrlana oladi: yonida qadimiy xarobalar, eski ko‘chalar, sokin plyajlar joylashgan. Shu bilan birga, xizmat ko‘rsatish oilaviy dam olishga moslashtirilgan — qulay mehmonxonalar, bolalar klublari va ko‘ngilochar tadbirlar mavjud.

Bolalar bilan albatta ko‘rish kerak bo‘lgan joylar:

• Antaliya akvariumi — Turkiyadagi eng katta akvarium bo‘lib, unda suv osti tunneli va akulalar bor;

• Eski shahar — tor ko‘chalar, rang-barang binolar va qiziqarli sayohatlar uchun ajoyib joy.

Batumi

Bron qilishlar soni bo‘yicha Batumi uchinchi o‘rinda turadi — oilalar u yerda o‘rtacha 10 kun vaqt o‘tkazadi, aviachiptalar narxi esa yil davomida 12 foizga arzonlashgani bu yo‘nalishni yanada jozibador qildi.

Shahar dengiz havosi, yam-yashil tabiat va xotirjam muhit uyg‘unligi bilan o‘ziga jalb qiladi. Bu yerda sohil bo‘ylab soatlab sayr qilish va mayin iqlimdan bahramand bo‘lish mumkin.

Bolalar bilan albatta ko‘rish kerak bo‘lgan joylar:

• Batumi botanika bog‘i — subtropik o‘simliklar to‘plami, yashil bog‘ ichida sayr qilish imkoniyati;

• Batumi plyajlari — shag‘alli qirg‘oq, toza dengiz va oilalar uchun qulay infratuzilma.

Boku

Yangi, ammo tez ommalashib borayotgan yo‘nalish. Boku birinchi marta top-5 ga kirdi: qiziqish o‘tgan yilga nisbatan 12 foizga oshdi.

Ozarbayjon poytaxti zamonaviylik va sharqona jozibani uyg‘unlashtiradi. Bolalar bilan shunchaki sayr qilish, qiziqarli va xilma-xil arxitektura bilan tanishish mumkin — zamonaviy Flame Towers va tarixiy Icheri-Sheher devorlarining uyg‘unligi qiziqarli ziddiyatlarni yaratadi.

Bolalar bilan albatta ko‘rish kerak bo‘lgan joylar:

• Gobuston bog‘i — qadimiy qoyatosh rasmlari va g‘aroyib tabiiy shakllar;

• Kristal Xoll — yorqin tomoshalar, konsertlar va madaniy tadbirlar;

• Opera teatri — go‘zal tarixiy binoda san’at bilan tanishish.

Olmaota

Qozog‘istonning janubiy poytaxti birinchi marta top-5 ga kirdi.

Olmaota qulay shahar dam olishini, yaxshi logistikani va ajoyib oilaviy mehmonxonalarni taklif etadi. U yerda tog‘larda faol dam olish ayniqsa mashhur bo‘lib, qulay va tez-tez uchuvchi reyslar hatto rejasiz sayohatni ham osonlik bilan tashkil etish imkonini beradi.

Bolalar bilan albatta ko‘rish kerak bo‘lgan joylar:

• Ko‘k-Tobe — bog‘, kanat yo‘li va shaharning ajoyib manzaralari;

• Medeu va Shimbulak — go‘zallik, tabiat, tog‘ ko‘ngilochar maskanlari;

• San’at muzeyi — qo‘shnilarimiz madaniyati bilan tanishish uchun.

Dubay

Dubay oltinchi o‘rinni egalladi — chiptalar narxi o‘tgan yilgi darajada qolgan, ammo ularga bo‘lgan qiziqish pasaymayapti. Bu yo‘nalish plyajda dam olishni rivojlangan infratuzilma: akvaparklar, yirik savdo markazlari va har qanday didga mos ko‘ngilochar tadbirlar bilan uyg‘unlashtirmoqchi bo‘lganlarga yoqadi.

Dubayda bolalar bir daqiqa ham zerikishmaydi. Agar yurishdan charchashsa, shunchaki salqin basseyn bo‘yida yotib dam olishlari mumkin.

Bolalar bilan albatta ko‘rish kerak bo‘lgan joylar:

• Dubai Aquarium & Underwater Zoo — ajoyib suv osti dunyosi bilan tanishtiradi;

• Aquaventure World — ulkan akvapark bo‘lib, u sirpanchiqlar, suzish havzalari va suv attraksionlariga ega;

• KidZania — Dubaydagi eng yirik savdo markazida joylashgan ko‘ngilochar zona.