Aviasales.uz saytida chiptalarni sotib olish orqali milyalarni qanday to‘plash va tejash mumkin

Agar siz muntazam ravishda bitta aviakompaniya xizmatlaridan foydalansangiz, vaqt o‘tishi bilan parvozlarda tejashni yoki hatto bepul uchishni boshlashingiz mumkin — buning uchun bonus milyalarni to‘plash kifoya. Lekin ularni Aviasales.uz orqali chiptalarni bron qilish paytida ham "ishlab topish" mumkin — buni qanday amalga oshirishni tushuntiramiz.

Milyalar nima uchun kerak?

Milyalar — bu aslida oddiy sodiqlik dasturi, faqat aviakompaniyalar uchun. Mohiyati oddiy: bir xil aviatashuvchi bilan qanchalik ko‘p uchsangiz, shunchalik ko‘p bonus to‘playsiz. Shartlar muayyan kompaniyaga qarab farq qilishi mumkin, shuning uchun tafsilotlarni oldindan rasmiy saytda tekshirib ko‘rgan ma’qul. Mana, odatda to‘plangan milyalarni nimalarga ayirboshlash mumkin:

• aviachipta uchun to‘lov (qisman yoki to‘liq);

• qo‘shimcha bagaj;

• ovqatlanish xizmati;

• xizmat ko‘rsatish sinfini oshirish;

• mehmonxonalarni band qilish;

• aeroportlarning biznes zallariga kirish;

• aviakompaniya hamkorlaridan tovarlar sotib olish.

Ba’zi aviakompaniyalarda birlashgan bonus dasturlari mavjud. Masalan, agar siz Lufthansa’dan milya to‘plagan bo‘lsangiz va Turkish Airlines bilan uchishni rejalashtirgan bo‘lsangiz (yoki aksincha), bonuslardan foydalanishingiz mumkin, chunki ikkala aviakompaniya ham Star Alliance alyansiga a’zo.

Loukosterlar odatda o‘z sodiqlik dasturlariga ega emas — siz faqat bankdan keshbek olishingiz mumkin. Muhim istisno — Pegasus.

Aytgancha, milyalar boshqacha nomlanishi ham mumkin. Masalan, bizning Uzbekistan Airways aviakompaniyamizning ham UzAirPlus nomli sodiqlik dasturi bor, lekin u yerdagi bonuslar "mukofot ballari" deb ataladi. Boshqa mahalliy aviakompaniyalarda esa sodiqlik dasturlari yo‘q.

Milyalarni qanday to‘plash mumkin?

Bitta aviakompaniya bilan tez-tez uchish kerak. Yirik aviatashuvchilar (masalan, o‘sha Turkish Airlines) har bir parvozdan so‘ng milya hisoblaydi — ularning soni siz sotib olgan chipta va uning tarifiga bog‘liq. Shuningdek, bunday bonus dasturlarida segmentlar qo‘shiladi — almashtirish bilan parvoz uchun siz ikkita alohida reys uchun ball olasiz.

Agar juda ko‘p uchsangiz, sizga sodiqlik dasturida "elita" maqomi berilishi mumkin. Bunday dasturlar odatda bir necha darajadan iborat bo‘lib, imtiyozlarni saqlab qolish uchun har yili ma’lum miqdordagi parvozlarni amalga oshirish orqali maqomni tasdiqlash kerak. Aniq talablar muayyan aviakompaniyaga bog‘liq — aktual ma’lumotlarni uning rasmiy saytidan izlash maqsadga muvofiq.

Odatda, milyalarning amal qilish muddati bo‘ladi — bu muddat ular hisobiga qo‘shilgan paytdan boshlab 2-3 yilni tashkil etadi. Ushbu muddat tugagach, milyalar bekor qilinishi mumkin. Biroq, ko‘plab aviakompaniyalar milyalarning amal qilish muddatini uzaytirish usullarini taklif qiladi — shuning uchun, hatto vaqtincha sayohat qilmasangiz ham, to‘plangan bonuslarni saqlab qolishingiz mumkin. Buni quyidagi usullar bilan amalga oshirish mumkin:

• to‘lov evaziga muddatni uzaytirish;

• hamkorlardan tovar yoki mahsulotlarga almashtirish;

• xayriya ishlariga o‘tkazish;

• dasturning boshqa a’zosi hisobiga o‘tkazish.

Uzbekistan Airways’ning UzAirPlus sodiqlik dasturi haqida alohida to‘xtalamiz — bu dastur sotib olingan aviachiptalar uchun ballarni to‘plash va ularni ushbu aviakompaniya xizmatlariga sarflash imkonini beradi.

Dastur a’zosi bo‘lish uchun 16 yoshdan katta bo‘lish, pasport yoki ID-karta egasi bo‘lish kifoya. Ro‘yxatdan o‘tish onlayn tarzda yoki mijozlarni qo‘llab-quvvatlash xizmati orqali amalga oshirilishi mumkin. Ro‘yxatdan o‘tganingizdan so‘ng, sizga shaxsiy raqam, parol va dastlabki Premium maqomi beriladi hamda hisobingizga 1 000 qutlov balli o‘tkaziladi.

Keyinchalik ballar to‘langan tarif uchun yevroga qayta hisoblangan holda quyidagi formula bo‘yicha hisoblanadi: tarif summasi × 10. Ballar hisoblash avtomatik tarzda (bronlashda hisob raqamini ko‘rsatgan holda) yoki qo‘lda (shaxsiy kabinet yoki elektron pochta orqali) amalga oshirilishi mumkin. Agar parvozlar dasturda ro‘yxatdan o‘tishdan oldin amalga oshirilgan bo‘lsa, ballarni oxirgi 90 kun ichidagi parvozlar uchun qo‘shish mumkin.

Ballar yordamida ekonom va biznes sinflarda bepul chiptalar, xizmat ko‘rsatish darajasini oshirish, qo‘shimcha yuk va kutish xonalariga kirish uchun to‘lovlarni amalga oshirish mumkin. Jadval saytda mavjud: O‘zbekiston ichidagi parvozlar uchun — bir tomonga 6 000 ball, biznes-apgreyd — 5 000 ball, xalqaro parvozlar — hudud va yo‘nalishga qarab 15 000 ball va undan yuqori. Shunday qilib, Toshkentdan Moskvaga taxminan 10 ta parvoz sizga bitta bepul chipta olish imkonini beradi.

Har bir to‘plangan ball parvoz sanasidan boshlab 36 oy davomida amal qiladi. Bu muddat ichida foydalanilmagan ballar avtomatik ravishda bekor qilinadi.

Aviasales.uz saytida chipta xarid qilayotganda milyalarni qanday olish mumkin?

Endi Aviasales.uz orqali aviachipta sotib olishda milya to‘plashning barcha nozik jihatlari haqida uch xil holat bo‘yicha so‘z yuritamiz. O‘zingizga mosini tanlang va xotirjam bo‘ling: bu jarayon tez kechadi.

Chiptani bevosita bizdan xarid qilganda

Aviakompaniya bonus kartasi raqamini to‘g‘ridan-to‘g‘ri yo‘lovchi ma’lumotlarini kiritish bosqichida qo‘shishingiz mumkin. Buning uchun:

1. "Aviakompaniyaning sodiqlik kartasi mavjud" tugmasini bosing (u faqat tashuvchida milya dasturi mavjud bo‘lgan taqdirdagina paydo bo‘ladi).

2. Paydo bo‘lgan maydonga karta raqamingizni kiriting.

Ha, hammasi juda oddiy. Shu bilan birga, to‘lovdan so‘ng sizga hisoblanadigan bonuslar miqdori aviakompaniya saytida chipta sotib olish bilan bir xil bo‘ladi. Tashuvchilarning saytlariga alohida kirish shart emas — milyalar avtomatik tarzda hisobga olinadi.

Aviakompaniyadan chipta sotib olinganda

Bonus karta ma’lumotlarini istalgan vaqtda, hatto chipta uchun to‘lov qilingandan keyin ham qo‘shish mumkin: bu aviakompaniyaning o‘z saytida yoki ilovasida (agar mavjud bo‘lsa) amalga oshiriladi.

U yerdagi shaxsiy kabinetga kirib, bron qilishni o‘z hisobingiz bilan bog‘lashingiz kerak: ko‘pincha buni reysga ro‘yxatdan o‘tish tugagandan so‘ng yoki hatto samolyot qo‘ngandan keyin ham qilish mumkin.

Agentlikdan chipta sotib olinganda

Sodiqlik dasturlari nafaqat aviakompaniyalar, balki Biletix yoki OneTwoTrip kabi chipta agentliklari tomonidan ham qo‘llab-quvvatlanadi. Milya olish uchun bron qilish paytida bonus karta raqamini kiritish kifoya. Milyalar xuddi aviakompaniya saytida to‘g‘ridan-to‘g‘ri chipta sotib olganingizdek — qo‘shimcha to‘lovlarsiz hisoblanadi.

Agar xarid paytida kartani ko‘rsatishni unutgan bo‘lsangiz, uni aeroportdagi ro‘yxatdan o‘tish peshtaxtasiga taqdim etib, milyalarni hisobga olishni so‘rashingiz mumkin. Bu har doim ham natija bermaydi, lekin imkoniyat bor — sinab ko‘rishga arziydi.

🎨 Maqolaga ishlangan rasmlar muallifi — Dada Kirey.