2025-yilda Qora dengiz sohili: qayerda dam olish mumkin va bu qanchaga tushadi

Nihoyat kutganimiz kelganga o‘xshaydi — chilla boshlanmoqda. Undan omon qolishning eng yaxshi usuli esa ta’til olish, arzon aviachiptalar xarid qilish va dengiz tomon yo‘l olishdir. Plyajda yotib, sayr qilib, telefonni o‘chirib qo‘yib, bemalol dam olish.

Agar O‘rta yer dengizi sizni zeriktirgan, Qizil dengiz jalb qilmayotgan, Janubi-Sharqiy Osiyoda esa sayyohlar ko‘pligidan tirbandlik bo‘lsa, Qora dengiz yordamga keladi. Bugun e’tibor qaratishga arziydigan uchta kurort haqida so‘z yuritamiz.

Batumi, Gruziya

Gruziya o‘zbekistonliklar uchun Qora dengizdagi eng mashhur va arzon dam olish joylaridan biridir. U yerga Centrum Air, FlyKhiva charter reyslarida yoki Uzbekistan Airways aviakompaniyasining to‘g‘ridan-to‘g‘ri reyslarida uchish mumkin.

Batumiga parvoz narxi bir tomonga 1,5 million so‘mdan boshlanadi, samolyotlar deyarli har kuni uchadi. Turistik agentlik orqali bir haftalik sayohat bir kishi uchun o‘rtacha $600 (7 600 000 so‘m) ga tushadi.

Batumida qayerda joylashish mumkin

Batumi Qora dengiz bo‘ylab cho‘zilgan kurort shahridir. Batumining istalgan hududidan sohilga tez yetib olish mumkin — piyoda, jamoat transportida yoki taksida.

Eski shahar — XIX asrda qurilgan, tor ko‘chalari va Qora dengizga yaqinligi bilan eng mashhur hudud. U Batumining shimolida, qirg‘oqdan bir necha daqiqalik masofada joylashgan. Bu yerda siz kichik apartamentlarda — $180 dan (2 300 000 so‘m), yoki mehmonxonalarda — 5 kecha uchun $160 dan (2 000 000 so‘m) turishingiz mumkin. Eski shahar qadimiy arxitektura va tarix ixlosmandlariga mos keladi: shahar bo‘ylab sayohatlar aynan shu yerdan boshlanadi.

Yangi bulvar — dengiz va Sherif Ximshiashvili ko‘chasi bo‘ylab plyajlarga chiqadigan ixcham hudud. Eng arzon apartamentlar narxi 5 kecha uchun $130 ga (1 650 000 so‘m) tushadi, mehmonxonadagi xona esa bir kishi uchun o‘rtacha $500 ga (6 350 000 so‘m) tushadi. Ammo bu yerdan savdo markazlari va qumli plyajlarga borish qulay.

Batumi aeroporti — arzon hudud bo‘lib, apartamentlar, xostellar va mehmonxonalarning keng tanlovi mavjud. Bu yerdan Yangi bulvardagi plyajga tezda borish, samolyotlarni kuzatish maydoniga tashrif buyurish yoki kartingda sayr qilish mumkin. Apartamentlar narxi qulaylik darajasiga qarab 1$50 dan $800 gacha (1 900 000 so‘mdan 10 150 000 so‘mgacha) o‘zgaradi.
 

Batumi plyajlari

Shahardagi plyajlarning aksariyati bepul, ammo qulayliklar uchun pul to‘lash kerak bo‘ladi. O‘rtacha hisobda, 2024-yilda sayyohlar uchun shezlong ijarasi narxi $3 (40 000 so‘m), ko‘ngilochar tadbirlar esa yaxta sayohati uchun $36 dan (460 000 so‘m) boshlangan.

Qaysi plyajni tanlash kerak:

• Markaziy plyaj — Batumi qirg‘og‘ining katta qismi bo‘ylab, Yangi bulvar bo‘ylab cho‘zilgan. Bu mayda toshli sohil bo‘lib, ba’zi joylarda yirik qum ham mavjud. O‘zingiz bilan albatta plyaj poyabzalini oling.
  
  Afzalliklari: kafe, restoran va attraksionlarning keng tanlovi.
  Kamchiliklari: mavsumda odam ko‘p bo‘ladi.
   
• Polo Beach — Batumi aeroporti yaqinidagi yirik shag‘alli yovvoyi plyaj. Bu yerga uchib o‘tayotgan samolyotlar fonida chiroyli suratlar olish uchun borish tavsiya etiladi.
  
  Afzalliklari: tinch va xilvat joy.
  Kamchiliklari: markazdan uzoqligi, kuchli to‘lqinlar (bolalar bilan dam olish uchun mos emas).
   
• Ureki yoki "Magnetiti" — Batumidan bir soatlik masofada joylashgan magnitli qora qumli plyaj. U yerga taksida yoki Tbilisi yoki Poti yo‘nalishidagi istalgan jamoat transportida borish mumkin. Plyaj shifobaxsh hisoblanadi — mahalliy aholi og‘riq qoldiruvchi va yallig‘lanishga qarshi ta’sir ko‘rsatishi uchun qumga ko‘milishni maslahat beradi.
  
  Afzalliklari: uzun qumli qirg‘oq, bolalar bilan dam olish uchun qulay.
  Kamchiliklari: Batumidan uzoqligi, yaqin atrofda turar joy tanlash imkoniyatining cheklanganligi.
   
• Mtsvan-Konsxi plyaji — Batumi botanika bog‘i yonidagi kichik shag‘alli plyaj. Batumidan taksida borgan ma’qul, ammo plyajgacha bo‘lgan yo‘lning bir qismini piyoda bosib o‘tishga to‘g‘ri keladi.
  
  Afzalliklari: toza suv, odam kam, botanika bog‘iga tashrif buyurish bilan birlashtirish imkoniyati.
  Kamchiliklari: ijaraga olinadigan shezlonglar kam, eski bandargoh yonida tashlandiq beton plitalar bor.
   

Batumida qayerga borish va nimalarni tomosha qilish mumkin

Batumining diqqatga sazovor joylari faqat plyajlar bilan cheklanib qolmaydi — shaharda boshqa ko‘ngilochar tadbirlarni ham topish mumkin.

• Batumi Euro Park akvaparki. Akvapark 1000 kishiga mo‘ljallangan. Ichkarida beshta basseyn, bolalar uchun suv tog‘lari, restoran va bungalolar mavjud.
  
  Kirish narxi: bir kunga 40 lari (190 000 so‘m)
  Ish vaqti: 10:00 dan 20:00 gacha
   
• Batumi botanika bog‘i. Dunyoning turli burchaklaridan keltirilgan o‘simliklarning 21 ta hududi va baliqlar hamda toshbaqalar yashaydigan kichik ko‘lga ega ulkan dendropark. Ichkarida elektrokarda sayr qilish, piknik uyushtirish yoki kemping maydonida tunab qolish mumkin.
  
  Kirish narxi: 20 lari (93 000 so‘m).
   

Xuddi shu mavzuda ko'proq ma'lumot

Birinchi sayohat uchun eng yaxshi yo‘nalishlar

Trabzon, Turkiya

Trabzon Turkiya Qora dengiz sohilining shimoli-sharqida, Kolat-Dag etaklarida joylashgan. Toshkentdan Trabzonga Istanbul yoki Boku orqali yetib borish mumkin — borish-kelish chiptasi narxi $400 dan (5 200 000 so‘mdan) boshlanadi.

Trabzonda qayerda joylashish mumkin

Trabzonning ko‘plab ko‘ngilochar maskanlari qirg‘oq bo‘ylab joylashgan — bu yerda plyajlarga yaqin arzon mehmonxonalarni topish mumkin.

Trabzon Merkez — shaharning dengiz bo‘yidagi markaziy qismi. Bu yerda Trabzonning eng mashhur mehmonxonalari, Iskandar Posho masjidi va shahar muzeyi joylashgan. Bir kishi uchun mehmonxonada 5 kecha-kunduz yashash narxi $300 dan $1900 gacha (3 800 000 so‘mdan 24 000 000 so‘mgacha).

Akçaabat — Trabzon markazidan uzoqroqda joylashgan, oilaviy dam olish uchun qulay hudud. Bu yerda kichik villalar yoki apartamentlarni ijaraga olish mumkin — besh kecha uchun narxi $250 dan (3 200 000 so‘mdan) boshlanadi.

Yalıncak — markazdan sharqda, aeroportga yaqin joylashgan kichik sayyohlik hududi. Plyajlarning aksariyati mehmonxonalarning yopiq hududlarida joylashgan. Bu yerdagi narxlar Trabzonning boshqa hududlariga qaraganda yuqoriroq: o‘rtacha 5 kecha uchun $500 dan $1500 gacha (6 300 000 so‘mdan 19 000 000 so‘mgacha).
 

Trabzon plyajlari

Batumi plyajlaridan farqli o‘laroq, Trabzonda jamoat qirg‘oq hududlarining aksariyati qumli. Plyajlarga kirish bepul, biroq yotoq va soyabonlarni ijaraga olish uchun to‘lov talab etiladi. Trabzon plyajlarida sayyohlarga ko‘pincha yotoq va soyabon to‘plami taklif qilinadi. Naqd pul g‘amlab qo‘yish maqsadga muvofiq, chunki kartalar hamma joyda ham qabul qilinmaydi.

Qaysi plyajni tanlash kerak:

• Kaşüstü Zulu plyaji — Trabzonning eng sara plyajlaridan biri. Toza qum, uzun qirg‘oq, voleybol maydoni va uncha ko‘p bo‘lmagan sayyohlar. Soyabon va yotoq ijarasi — $5 (64 000 so‘m).
• Yoroz Plajı — Akçaabat yaqinidagi tepalikda joylashgan kichik tabiiy toshli plyaj. Bu yerda ko‘ngilochar joylar va kafelar kam, shuning uchun o‘zingiz bilan ovqat va suv olib kelganingiz ma’qul.
• Albatros Plajı — Akçakale’dagi shag‘al va qora qumli plyaj. Mahalliy aholi orasida mashhur. Yotoq ijaraga olish yoki qirg‘oqdan biroz nariroqdagi stollarda o‘tirish mumkin.
   

Trabzonning diqqatga sazovor joylari

Trabzonda Vizantiya davriga oid ko‘plab tarixiy yodgorliklar saqlanib qolgan.

• Avliyo Anna cherkovi — VI—VII asrlarga oid Vizantiya ziyoratgohi. Yaqinda asl freskalar va ustunlarni saqlab qolgan holda qayta ta’mirlandi. Kirish bepul.
• Trabzondagi Ayosofya masjidi — hozirgi Trabzon hududidagi yunon-pravoslav davlati Trapezundning sobiq sobori. Istanbuldagi shu nomdagi ibodatxona kabi, bu sobor ham masjidga aylantirilgan. Kirish bepul.
• Trabzon muzeyi — sobiq yunon bankirining saroyida joylashgan etnografik va arxeologik muzey. Turkiya mustaqillik urushi paytida bino harbiy shtab sifatida foydalanilgan. Bilet narxi — 3,5 dollardan (45 000 so‘m) boshlanadi.
  
   

Xuddi shu mavzuda ko'proq ma'lumot

Turkiyada kurort tanlaymiz: 2025-yildagi yo‘nalishlar va narxlar

Varna, Bolgariya

Varna — Bolgariyaning Qora dengiz g‘arbiy sohilidagi kurort shahri. O‘zbekistondan u yerga borish Gruziya yoki Turkiyaga nisbatan murakkabroq, chunki vizasini rasmiylashtirish zarur — buning uchun Toshkentdagi Bolgariya Respublikasi elchixonasiga murojaat qilishga to‘g‘ri keladi.

Toshkentdan Varnaga to‘g‘ridan-to‘g‘ri parvozlar yo‘q — Istanbulda almashish kerak bo‘ladi. Borish-kelish chiptalarining o‘rtacha narxi taxminan 10,7 million so‘mni tashkil etadi.

Xuddi shu mavzuda ko'proq ma'lumot

O’zbekistonliklar uchun 2025-yilda kashf etilishi kerak bo’lgan eng noodatiy va qiziqarli mamlakatlar

Varnada qayerda joylashish mumkin

Ko‘plab kurortlar kabi, Varna ham Qora dengiz sohili bo‘ylab cho‘zilgan, shuning uchun shaharning istalgan qismidan plyajlarga yetib borish mumkin.

Odessos — Varnaning markaziy tumani bo‘lib, unda ko‘rfaz, port va arxitektura yodgorliklari mavjud. O‘rtacha bir haftalik yashash mehmonxona xonasi uchun $350-450 (5 700 000 so‘m) atrofida bo‘ladi.

Zlatni pyastsi — "Oltin qumlar" deb nomlanuvchi tuman, Varnaning plyaj mehmonxonalari joylashgan eng yirik kurortlaridan biri. Bu yerdagi narxlar boshqa hududlarga nisbatan yuqoriroq: mavsumga, sharoitga va dengizga yaqinligiga qarab besh kun uchun $400 dan $1000 gacha (5 000 000 so‘mdan 12 600 000 so‘mgacha) turadi.

Asparuxovo — Varna ko‘lining qarama-qarshi tomonida, Odessosga ro‘para joylashgan tuman. Bu yerda uzoq muddatli turar joy topish osonroq va yaxshi jamoat plyaji mavjud. 5 kunlik xostellar narxi $100-150 (1 900 000 so‘m) atrofida, mehmonxonalar esa $250 dan (3 200 000 so‘mdan) boshlanadi.

Varna plyajlari

Varna shahar plyajlari bepul, shezlonglar ijarasi esa arzon narxlarda. Biroq bolalar bilan dam olish uchun joy tanlashda ehtiyotkor bo‘lish lozim: ba’zi joylarda nudistlar zonalari uchrashi mumkin.

• Asparuxovo plyaji — shu nomdagi tumandagi jamoat qumli plyaji. Yotoq va soyabon narxi $2,5 (32 000 so‘m) turadi, ammo dush xonalari yetishmovchiligi mavjud.
• Varna Beach — Odessos tumanidagi shahar plyaji, qirg‘oq bo‘ylab barlar va restoranlar joylashgan. Kuchli shamol paytida cho‘milishni cheklaydigan qutqaruvchilar faoliyat yuritadi.
• Rappongi Beach — ovqat va ichimliklar narxi Varna Beach’ga qaraganda yuqoriroq, biroq bepul Wi-Fi va alohida pulli zona mavjud.
• Sahara plyaji — Varna yaqinidagi Avliyo Konstantin va Yelena hududidagi sokin yarim qumli plyaj. Bolalar va keksalar bilan dam olish uchun qulay.
   

Varnada nimalarni tomosha qilsa bo‘ladi

Varna tarixiy tusga ega diqqatga sazovor joylarga boy. Bu yerda monastirlarga sayohat qilish yoki muzeylarga tashrif buyurish mumkin.

• Varna arxeologiya muzeyi — 1887-yilda aka-uka Shkorpillar tomonidan asos solingan. Kolleksiyada: eneolit davriga oid oltin buyumlar, ellinistik va Rim davri eksponatlari, Bolgariya podsholigining tosh bitiklari, qadimiy ikonalar mavjud.
  
  Kirish narxi: $5,5 (70 000 so‘m)
  Ish vaqti: soat 10:00 dan 17:00 gacha (yoz mavsumida)
   
• Rim hammomlarining arxeologik majmuasi — Yevropadagi eng yirik Rim hammomlaridan biri (milodiy II asrga oid). Arxeologiya muzeyi chiptasi orqali tashrif buyurish mumkin.
  
  Narxi: $2,5 (32 000 so‘m)
  Ish vaqti: yakshanbadan tashqari kunlari soat 10:00 dan 17:00 gacha
   
• Sea Garden Varna — qirg‘oq bo‘ylab joylashgan, suv attraksionlari, delfinariy, akvarium va dengiz muzeyi mavjud sayr bog‘i.
  
  Parkka kirish: bepul
  Pulli hududlarga chiptalar: $3 (38 000 so‘m)
  Ish tartibi: kun-u tun