Yaqin Sharqda bo‘lsangiz yoki u yerga borishni rejalashtirayotgan bo‘lsangiz nimalarni hisobga olish kerak?

28-fevral kuni Transport vazirligi huzuridagi Fuqaro aviatsiyasi agentligi («Oʻzaviatsiya») xavfsizlik xatarlari ortishi munosabati bilan Yaqin Sharqning qator mamlakatlariga parvozlarni cheklashni tavsiya qildi.

Yirik tranzit xablari — Dubay, Abu-Dabi, Jidda va Dohada reyslarning bir qismi bekor qilinmoqda va qoldirilmoqda. Agar siz allaqachon mintaqada boʻlsangiz yoki yaqin kunlarda uchib ketishni rejalashtirayotgan boʻlsangiz, reys holatini oldindan tekshirib koʻrish va harakatlar rejasini tayyorlab qoʻyish tavsiya etiladi.

Bunday vaziyatda qanday yoʻl tutish kerakligi va hozirda qaysi muqobil yoʻnalishlar mavjudligi haqida ma’lumot beramiz.

Yaqin kunlar uchun Yaqin Sharq davlatlariga chiptam bor. Nima qilishim kerak?

Agar reys bekor qilingan yoki koʻchirilgan boʻlsa, tashuvchi odatda yoʻlovchilarni xabardor qiladi va variantlarni taklif etadi: boshqa sanaga qayta band qilish yoki tarif qoidalari hamda amaldagi qonunchilikka muvofiq mablagʻlarni qaytarish.

Agar oʻzgarishlar allaqachon sodir boʻlgan boʻlsa, quyidagicha yoʻl tuting:

• aviakompaniya saytidagi «Bandlovni boshqarish» boʻlimida reys holatini tekshiring;
• rasmiy bildirishnoma olmaguningizcha chiptani mustaqil ravishda bekor qilmang — bunday holda rad etish ixtiyoriy deb hisoblanishi mumkin va pulni qaytarish tarif qoidalariga muvofiq hisoblanadi;
• chipta sotuvchisi bilan bogʻlaning. Agar xarid bevosita aviakompaniyadan amalga oshirilgan boʻlsa, uning qoʻllab-quvvatlash xizmatiga murojaat qiling; agar agentlik orqali boʻlsa — agentlikka yozing;
• agar chipta aviasales.uz orqali rasmiylashtirilgan boʻlsa, sotuvchining kontaktlari yoʻnalish kvitansiyasida koʻrsatilgan.

Parvozlarning ommaviy ravishda oʻzgartirilishi sababli koll-markazlar yuqori yuklama bilan ishlashi mumkin. Javob kutish odatdagidan koʻproq vaqt talab qilishi mumkin — buni rejalashtirishda hisobga oling.

Xuddi shu mavzuda ko‘proq ma'lumot

O‘zbekistonda va xorijda parvoz kechiktirilgani yoki bekor qilingani uchun pulni qanday qaytarish mumkin?

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

Hozirda aviakompaniyalar qanday choralarni koʻrishgan?

Almashtirish va qaytarish shartlari hozirda oʻzgarishi mumkin, shuning uchun aviakompaniyalarning rasmiy saytlarida dolzarb ma’lumotlarni tekshirish muhimdir. 

• Uzbekistan Airways, Centrum Air va Qanot Sharq: Dubay, Jidda va mintaqaning boshqa xablariga reyslar aviatsiya organlarining qarorlariga qarab kechikishi, koʻchirilishi yoki bekor qilinishi mumkin. Yoʻlovchilarga odatda chipta sotib olingan joyda bepul qayta bron qilish yoki mablagʻlarni qaytarish taklif etiladi. 
• Qatar Airways: 3-martgacha uchadigan reyslar uchun qaytarish toʻlovlari bekor qilingan. Dastlabki uchish sanasidan boshlab 14 kun ichida ikki marta bepul qayta bron qilishga ruxsat beriladi. 
• Flydubai: chiptani qaytarish yoki dastlabki uchish sanasidan boshlab 20 kun doirasida yangi sanalarga almashtirish imkoniyati mavjud. 
• Emirates: 5-martgacha uchadigan chiptaga ega boʻlgan yoʻlovchilar sayohatni 20-martgacha boʻlgan sanalarga bepul koʻchirishlari mumkin. 
• Turkish Airlines: BAA, Qatar, Bahrayn, Ummon va Saudiya Arabistoniga reyslar uchun (agar chiptalar 28-fevralgacha 12-martgacha boʻlgan uchish sanalariga rasmiylashtirilgan boʻlsa) 2026-yil 10-maygacha boʻlgan reyslarga bepul almashtirish yoki mablagʻlarni toʻliq qaytarish imkoniyati mavjud. 
• Air Arabia: aviakompaniya sanalarni jarimalarsiz koʻchirishni yoki chipta narxini bir yil davomida ishlatish mumkin boʻlgan ichki vaucherga oʻtkazishni taklif qiladi.

Shuni yodda tutingki, majburiy qaytarish — tezkor jarayon emas. Mablagʻlar hisob raqamiga 30 kungacha boʻlgan muddatda qaytarilishi mumkin. Agar yangi chiptalar xarid qilishni rejalashtirayotgan boʻlsangiz, buni inobatga olish muhim.

Men hozir Yaqin Sharqdaman va uyga uchib keta olmayapman. Nima qilishim kerak?

Agar reys bekor qilinsa, aviakompaniya odatda tarif qoidalari va amaldagi qonunchilikka muvofiq boshqa yoʻnalishga qayta band qilishni yoki mablagʻlarni qaytarishni taklif etadi. 

Ayrim hollarda mahalliy hokimiyat organlari yoki aviakompaniyalar reyslar bekor qilinishi sababli uchib keta olmagan yoʻlovchilarni qoʻllab-quvvatlashni tashkil etishi mumkin. Dolzarb ma’lumotlarni bevosita tashuvchidan yoki aeroportdan aniqlashtirgan ma’qul.

Aeroportda nima qilish kerak?:

• aviakompaniya peshtaxtasiga yoki uning vakolatxonasiga murojaat qilish va parvozning mumkin boʻlgan variantlarini aniqlashtirish; 
• reysning bekor qilingani yoki kechiktirilgani haqida yozma tasdiqnoma soʻrash; 
• ovqatlanish, yashash va transport uchun cheklarni saqlab qolish — agar sugʻurta kompaniyasiga murojaat qilishni rejalashtirayotgan boʻlsangiz.

Aksariyat sugʻurta polislari harbiy mojarolar oqibatlarini qoplamaydi, biroq reysning kechikishi alohida sugʻurta holati deb hisoblanishi mumkin — bu shartnoma shartlariga bogʻliq. 

Oʻzbekiston elchixonalari va konsulxonalarining kontaktlari

Oʻzbekiston Respublikasi TIV Yaqin Sharqdagi vatandoshlarni xavfsizlik choralariga rioya qilishga hamda kritik vaziyatlarda zudlik bilan diplomatik vakolatxonalar bilan bogʻlanishga chaqiradi:

• TIV (Toshkent): +998 97 136 51 51, call-markaz: 1164;
• Eron: +98 912 132 78 23 — Elbek Yoʻldoshev;
• Qatar: +974 5141 1001 — Otabek Muratov, +974 3352 0001 — Shuhrat Teshaboyev;
• BAA (Abu-Dabi): +971 54 212 18 53 — Jahongir Haitov; 
• BAA (Dubay): +971 55 986 90 40 — Jahonboy Bobonazarov, +971 55 956 41 10 — Azizbek Adilov;
• Saudiya Arabistoni (Ar-Riyod): +966 56 721 77 31 — Azimjon Qobiljonov;
• Saudiya Arabistoni (Jidda): +966 59 439 08 50;
• Quvayt: +965 9713 0270 — Iqboljon Ergashev, +965 9942 7517 — Islomxon Toirov;
• Ummon: +968 7159 5715 — Ramzbek Otabekjonov;
• Isroil: +972 54 485 13 97 — Shuhrat Abdullayev.

Agar mobil aloqa orqali bogʻlanishning imkoni boʻlmasa, koʻrsatilgan raqamlarga Telegram yoki WhatsApp orqali yozib koʻring. Tarmoqlar band boʻlganida matnli xabarlar baʼzan qoʻngʻiroqlarga qaraganda tezroq yetib boradi.

Men Yaqin Sharq mamlakatlari orqali tranzit bilan uchyapman. Qanday variantlar mavjud?

Hammasi chipta qanday rasmiylashtirilganiga bogʻliq:

• Yagona chipta. Agar butun marshrut bitta bandlov bilan rasmiylashtirilgan boʻlsa, boshqa reysga oʻtish uchun javobgarlik aviakompaniya zimmasida boʻladi. Reys bekor qilingan yoki jiddiy oʻzgartirilgan taqdirda, tashuvchi odatda boshqa xab orqali muqobil marshrutni yoki butun parvoz uchun mablagʻlarni qaytarishni taklif qiladi. Barcha masalalar aviakompaniya yoki chipta rasmiylashtirilgan agentlik orqali hal qilinadi.
• Alohida chiptalar. Agar birinchi reys bekor qilinsa, ikkinchi aviakompaniya tutashuv uchun rasman javobgar boʻlmaydi, chunki uning reysi jadval boʻyicha amalga oshirilishi mumkin. Bunday holda, har bir sotuvchiga alohida murojaat qilishga va har bir chipta boʻyicha qaytarish yoki almashtirish shartlarini aniqlashtirishga toʻgʻri keladi.

Endi oʻzbekistonliklarga qaysi davlatlar orqali uchgan ma’qul?

Agar Yaqin Sharq ustidagi havo hududi yopiq boʻlsa, Osiyo, Yevropa va AQShga parvozlar uchun muqobil yoʻnalishlarni koʻrib chiqish lozim.

Yevropaga:

• Toʻgʻridan-toʻgʻri reyslar: Toshkent va Urganchdan London, Frankfurt, Riga, Rim, Milan va Parijga reyslar amalga oshiriladi (Uzbekistan Airways);
• Turkiya orqali: Istanbul asosiy tranzit xabi boʻlib qolmoqda. Toshkent, Samarqand, Buxoro, Fargʻona va boshqa shaharlardan reyslar mavjud. U yerdan butun Yevropa osmoni ochiq;
• Kavkaz yoki Qozogʻiston orqali: Boku, Tbilisi yoki Almati (Air Astana) orqali qulay transferlar taklif etiladi.

Osiyoga:

• Xitoy yoki Janubiy Koreya orqali: Toshkentdan Pekin, Urumchi va Seulga toʻgʻridan-toʻgʻri reyslar mavjud. U yerdan — Janubi-Sharqiy Osiyo va Yaponiyaga keng parvozlar tarmogʻi bor;
• Malayziya va Hindiston orqali: Toshkentdan Kuala-Lumpur (Batik Air, Uzbekistan Airways) va Deliga (IndiGo) toʻgʻridan-toʻgʻri reyslar mavjud.

AQSh va Kanadaga: hozirgi kunda eng qulay yoʻllar — Istanbul (Turkish Airlines), Frankfurt, Riga yoki Seul orqali.

Reys jadvalda turibdi, lekin xavotirdaman. Safarni bekor qilsa boʻladimi?

Yoʻlovchilar xavfsizligi aviakompaniyalar uchun ustuvor vazifa boʻlib qolmoqda. Agar reys jadval boʻyicha amalga oshirilayotgan boʻlsa, bu yoʻnalish aviatsiya organlari bilan kelishilganini va uchib ketish vaqtida parvozga ruxsat berilganini anglatadi.

Agar siz baribir safardan voz kechishga qaror qilsangiz, masalaning huquqiy jihatini hisobga olish muhimdir. Reys tashuvchi tomonidan rasman bekor qilinmaguncha yoki koʻchirilmaguncha, parvozdan voz kechish ixtiyoriy hisoblanadi. Bunday holda, qaytarish shartlari tarif qoidalari bilan tartibga solinadi.

Chiptani bekor qilishdan oldin aviakompaniya saytida yoki sotuvchining ilovasida tarif qoidalarini tekshiring. Moslashuvchan tariflarda ba’zan qoʻshimcha toʻlov evaziga sanani koʻchirish imkoniyati mavjud — bu safardan butunlay voz kechishdan koʻra foydaliroq variant boʻlishi mumkin.