Sayohatlar va kundalik foydalanish uchun qanday SPF-krem tanlash kerak?

Oʻzbekistonda quyosh yiliga 300 kundan ortiq charaqlaydi va bu shuni anglatadiki, Xivaning qadimiy meʼmorchiligini tomosha qilyapsizmi yoki shunchaki Toshkentda yumushlaringiz bilan ketyapsizmi, bundan qatʼi nazar, ultrabinafsha nurlaridan himoyalanish doimo zarur. Quyoshdan himoyalovchi vositalarsiz nafaqat teringiz kuyishi, balki sogʻligingizga ham zarar yetishi mumkin. Ultrabinafsha nurlarining ortiqcha miqdori hujayralarni parchalaydi, terining erta qarishini keltirib chiqaradi va yangi oʻsmalar paydo boʻlish xavfini oshiradi. Nurlar bulutlar va avtomobil oynalaridan osongina oʻtib, odamlarga doimiy taʼsir koʻrsatadi.

Mos keladigan vositani tanlash oson boʻlmasligi mumkin: turli xil teksturalar va murakkab tarkiblar odamni osongina chalgʻitadi. Ushbu maqolada biz SPF nimaligini hamda terini himoya qilish uchun qanday qilib mos keladigan sanskrinni tanlashni koʻrib chiqdik.

SPF qanday ishlaydi va u qanday nurlardan himoya qiladi?

Yer yuzasigacha ikki turdagi zararli nurlanish yetib keladi:

• B nurlari (UVB). Ular terining yuqori qatlamiga ta’sir qiladi, uning qizarishiga olib keladi va butun ta’tilni barbod qilishi mumkin boʻlgan kuyishlarni keltirib chiqaradi.
• A nurlari (UVA). Bular barcha ultrabinafsha nurlarining taxminan 95% ini tashkil qiladi, yil boʻyi faol boʻladi va bulutlar yoki deraza oynalaridan osongina oʻtadi. A toifasidagi nurlar dermaning chuqur qatlamlariga kirib boradi, kollagenni parchalaydi va fotoqarishni — erta ajinlar va pigment dogʻlari paydo boʻlish jarayonini boshlab beradi.

SPF abbreviaturasi Sun Protection Factor, ya’ni “quyoshdan himoya qilish omili” degan ma’noni anglatadi. U vositaning B turidagi ultrabinafsha nurlaridan (UVB) qanchalik samarali himoya qilishini koʻrsatadi. Agar vosita A turidagi nurlanishga qarshi samarali boʻlsa, qadoqqa PA (Protection Grade of UVA) belgisi qoʻyiladi. Himoya darajasi plyuslar bilan belgilanadi: abbreviatura yonida ular qanchalik koʻp boʻlsa, shunchalik yaxshi. Sayohatlar uchun eng maqbul tanlov — Broad Spectrum, ya’ni keng ta’sir doirasiga ega belgisiga ega kremdir. Bu vosita nurlarning har ikkala turidan ham himoya qilishini anglatadi.

SPF kremlar qanday ishlaydi?

Texnologiya nuqtayi nazaridan, quyoshdan himoyalovchi krem — eng murakkab kosmetik mahsulotlardan biri. Nurlanishdan himoya qiluvchi komponentlar dastlab kukun yoki kristallar koʻrinishida boʻladi. Texnologlar vosita bir tekis surtilishi uchun ularni emulsiya ichida zargarlik aniqligida eritishlariga toʻgʻri keladi. Surtilgan sanskrin toʻsiq hosil qiladi, uning samaradorligi butunlay qatlamning zichligiga bogʻliq.

Ishlash prinsipi boʻyicha filtrlar ikki turga boʻlinadi:

Fizik (mineral)

Ushbu tarkibda rux oksidi va titan dioksidi teri yuzasida qolib, koʻzgu kabi ishlaydi. Skin Cancer Foundation maʼlumotlariga koʻra, ular shunchaki ultrabinafsha nurlarini qaytaradi.

Mineral himoyaning xususiyatlari:

• dermaning chuqur qatlamlarigacha singib ketmaydi, shuning uchun sezuvchan teri uchun juda mos keladi;
• surtilganidan soʻng darhol taʼsir qila boshlaydi;
• koʻpincha yaqqol oq iz qoldiradi.

Agar bunday kremni haddan tashqari koʻp surtib yuborsangiz, Merlin Menson qiyofasiga kirib qolish xavfi bor — yuzingiz gʻayritabiiy darajada oqarib ketadi.

Kimyoviy

Organik birikmalar boshqacha ishlaydi: ular epidermisga soʻriladi, nurlarni tutib qoladi, ularni xavfsiz issiqlikka aylantiradi va tashqariga chiqaradi. 

Kimyoviy himoyaning xususiyatlari:

• teri rangi bilan toʻliq uygʻunlashadi va dogʻlar qoldirmaydi;
• filtrlar faollashishi uchun surtilgandan keyin taxminan 20 daqiqa vaqt talab etadi;
• kuchli terlaganda yuvilib ketishi mumkin.

Chimyon togʻlarida uzoq vaqt trekking qilish yoki eng jazirama chilla pallasida Chorvoq plyajida hordiq chiqarish rejalashtirilgan boʻlsa, ushbu organik vosita mutlaqo almashtirib boʻlmasdir. 

SPF 30 va SPF 50 oʻrtasida qanday farq bor?

Quyoshdan himoya qiluvchi vositalardagi raqamlar koʻpincha chalkashtiriladi: goʻyo 50 indeksi ultrabinafsha nurlardan 30 indeksiga qaraganda ikki baravar kuchliroq himoya qiladigandek tuyuladi. Aslida esa, bloklangan B turidagi (UVB) nurlar miqdoridagi farq u qadar katta emas.

MD Anderson onkologiya markazi ekspertlarining ma’lumotlariga koʻra:

• SPF 30 boʻlgan vosita UVB nurlarining taxminan 97% ini toʻsadi;
• SPF 50 boʻlgan vosita UVB nurlarining taxminan 98% ini yutadi.

Farq bor-yoʻgʻi bir foizni tashkil qiladi, biroq safarlar uchun krem tanlashda ushbu koʻrsatkich muhim rol oʻynaydi. Safarlarda odamlar kremni kerakli miqdorda kamdan-kam qoʻllashadi va koʻpincha uni notekis taqsimlashadi. Agar SPF 30 juda yupqa qatlam qilib surtilsa, osongina kuyib qolish mumkin. Bunday vaziyatda SPF 50 teriga yetarli darajadagi asosiy himoya toʻsigʻini taʼminlash ehtimoli koʻproq.

Bolalarni himoya qilish uchun ham SPF 50 ni tanlagan maʼqul. Bola organizmi endigina shakllanayotgan boʻladi, shu sababli terining tabiiy himoya va melanin ishlab chiqarish mexanizmlari hali toʻliq quvvat bilan ishlamaydi. Quyoshdan himoyalovchi kremdan tashqari, bolalarni yopiq kiyim va bosh kiyimlar yordamida ham himoya qilish kerak. JSST bolalarni eng xavfli soatlarda — 11:00 dan 16:00 gacha toʻgʻridan-toʻgʻri nurlar ostida qolishidan saqlanishni maslahat beradi.

Tanlangan turidan qat’i nazar, agar siz ochiq havoda bo‘lsangiz, JSST himoya qatlamini har ikki soatda yangilab turishni tavsiya etadi. Quloqlar, bo‘yinning orqa qismi va qo‘l panjalariga alohida e’tibor berish kerak — ular hammadan ko‘ra tezroq kuyadi. Filtrlar faollashishga ulgurishi uchun kremni ko‘chaga chiqishdan 20 daqiqa oldin surtish lozim.

Yaxshi SPFni qanday tanlash kerak?

Tarkiblarning murakkabligi va teksturalarning xilma-xilligi sababli ideal sanskrinni tanlash oson kechmaydi. Sayohatlar davomida vosita sizni ishonchli himoya qilishi va aynan teringizga mos tushishi uchun qaysi mezonlarga tayanish kerakligini tushuntirib beramiz. 

Ter turiga qarab SPFni qanday tanlash kerak?

Avvalo, teringiz turini aniqlab olishingiz kerak. Kremning kun davomida qanchalik qulay sezilishi, teshiklarni tiqib qoʻymasligi va uzoq sayrlar paytida poʻst tashlagan joylarni boʻrttirib koʻrsatmasligi toʻgʻridan-toʻgʻri shunga bogʻliq.

Teri turiga qarab SPFni qanday tanlash kerak:

• yogʻli va muammoli teri uchun: tarkibida yogʻ boʻlmagan (oil-free deb belgilangan), yaltirashni tartibga soluvchi yengil emulsiya va flyuidlar afzal hisoblanadi. Zich mineral asoslar yuzni ogʻirlashtiradi, shuning uchun zamonaviy kimyoviy filtrlarga ega mahsulotlardan, masalan, LA ROCHE-POSAY Anthelios’dan foydalangan maʼqul;
• quruq va suvsizlangan teri uchun: sanskrin toʻlaqonli namlantiruvchi vosita sifatida ishlashi kerak. D'ALBA Waterfull Essence Sun Cream essensiyasidagi kabi gialuron kislotasi, seramidlar va tabiiy moylar boʻlgan formulalarni tanlash lozim, shunda teri tortishishi va quruqlashishini his qilmaysiz;
• sezgir teri uchun: mineral (fizik) filtrlar eng maqbul tanlov boʻladi. Ular teri yuzasida ishlaydi va ichkariga kirmaydi, shu sababli kamroq qizarish va qichishishga olib keladi. Eng muhimi — agressiv spirt va xushboʻylantirgichlardan qochish kerak. Osiyo sentellasi qoʻshilgan mayin BENTON Skin Fit Mineral Sun Cream kremi mos keladi;
• kuperoz va rozatsea holatida: agar qizarish va tomirli yulduzchalarga moyillik boʻlsa, kimyoviy filtrlar toʻgʻri kelmaydi. Ular quyosh nurlarini issiqlikka aylantirib, terini qizdiradi, bu esa zaif tomirlar uchun zararlidir. Bunday holda fizik filtrlar kerak — ular koʻrinmas qalqon kabi ishlaydi, shunchaki yorugʻlikni qaytaradi va yuzni qizib ketishdan himoya qiladi.

SPFni fasl va UV-indeksiga qarab qanday tanlash kerak?

Qish yoki yozda surtish uchun quyoshdan himoyalovchi vositani tanlashda — ob-havo ma’lumotidan bilib olishingiz mumkin boʻlgan UV-indeksga tayaning. Ushbu indekslar nimani anglatadi:

• UV-indeksi 0–2. Quyoshga oʻta sezuvchanligingiz yoki shifokor koʻrsatmalari boʻlmasa, himoya talab etilmaydi. Unutmangki, baʼzi kosmetik muolajalar, masalan, parvarishda retinol va uning hosilalarini qoʻllash foto-sezuvchanlikni oshiradi. Agar kursdan oʻtayotgan boʻlsangiz, doimo, hatto indeks past boʻlganda ham, himoya faktori 30 dan kam boʻlmagan SPF dan foydalaning.
• UV-indeksi 3–5 (oʻrtacha). Koʻchaga chiqishdan oldin albatta SPF 15–30 ishlating.
• UV-indeksi 6–7 (yuqori). SPF 30–50 zarur.
• UV-indeksi 8+ (ekstremal). Maksimal himoya — SPF 50+ talab etiladi. Biroq unutmangki, ekstremal sharoitlarda quyoshdan himoyalovchi krem najotkor vosita emas. Quyosh faol boʻlgan hududlarda teringizni yengil kiyim bilan himoya qiling, soyada turishga harakat qiling va eng qizgʻin soatlarda (soat 12:00 dan 16:00 gacha) ochiq havoda boʻlishni imkon qadar kamaytiring.

Shuningdek, SPF tanlashda faslga ham e’tibor qaratish mumkin. Qishda, agar joriy UV-indeksi 0–2 darajasida saqlanib tursa, odatda shaharda quyoshdan himoyalovchi krem talab etilmaydi. Biroq tog‘ga safarlar chog‘ida himoya kremi albatta zarur. Amirsoy yoki Chimyon kabi tog‘-chang‘i kurortlarida oppoq qor oyna kabi xizmat qiladi va ultrabinafsha nurlarini intensiv aks ettiradi, shu sababli ishonchli to‘siqsiz yuzning qattiq kuyishiga yo‘liqish hech gap emas.

Bahor-yoz mavsumida esa, quyosh faollashganda, har bir kishiga SPF zarur bo‘ladi. 15–30 himoya darajasi mos keladi. Kun davomida vositani yangilab turishni unutmang. Agar suv bo‘yida hordiq chiqarayotgan bo‘lsangiz, vositani har safar cho‘milib chiqqandan keyin qayta surtgan ma’qul. Hatto suvga chidamli formulalar ham cho‘milib chiqqandan so‘ng o‘z samaradorligini yo‘qotishi mumkin. Ayniqsa, teri sochiq va kiyimga ishqalanganda. 

Rul orqasida va bino ichida — ofisda yoki mashinada — agar kun boʻyi ochiq deraza yonida oʻtirmasangiz, sunscreendan foydalanish shart emas. Oddiy deraza oynasi B turidagi nurlarni toʻsadi, ammo A turidagi nurlarni oʻtkazadi. Skin Cancer Foundation ekspertlarining ma’lumotlariga koʻra, bino ichidagi bu nurlarning intensivligi sogʻliqqa zarar yetkazish va kremni muntazam yangilab turishni talab qilish uchun juda past.

Kechasi esa quyoshdan himoyalovchi krem foydasiz. Ultrabinafsha nurlanishining ta’siri hali quyosh botmasdan oldin yoʻqoladi, shuning uchun kechasi teri mutlaqo xavfsiz holatda boʻladi va unga krem kerak emas.

Qaysi SPF formatini tanlash kerak?

An’anaviy kremlar — sayohatda himoyalanish uchun yagona variant emas. Teksturani terining xususiyatlari va sayohat formatiga qarab tanlash lozim. Masalan, yogʻli teri egalari uchun bir zumda soʻriladigan yengil flyuidlardan foydalanish ancha qulayroq.

Nozik sohalarni — burun, lablar yoki xollarni — nuqtali himoya qilish uchun ixcham stiklar juda mos keladi, masalan, ISA KNOX UV Sun Pro 365 Airy.

Spreylar — tezda surtish uchun yana bir variant, biroq ularga doimiy ravishda tayanib qolmang. Ultrobinafsha nurlardan yetarli darajada himoyalanish uchun aerozolni uzoq va koʻp sepish, soʻngra albatta qoʻl bilan ishqalab tarqatish kerak. Amerika akademiyasi dermatologlari ta’kidlashicha: hatto yengil shamolda ham vositaning sezilarli qismi teriga tushmasdan, shunchaki havoga uchib ketadi. Sprey suv boʻyida dam olish paytida himoya qatlamini tezda yangilash uchun asqotadi, biroq undan asosiy sanskrin sifatida muntazam ravishda foydalanish tavsiya etilmaydi.

SPF-kremdan qanday toʻgʻri foydalanish kerak?

Quyoshdan himoyalovchi krem tozalangan va oldindan namlangan teriga surtiladi. Bu har doim boʻyanishdan oldingi parvarishning yakuniy bosqichidir. Himoya toʻsigʻiga zarar yetkazmaslik uchun vositani massaj chiziqlari boʻylab, qattiq bosmasdan va agressiv ishqalamasdan, ehtiyotkorlik bilan taqsimlash kerak.

Surtish paytida nozik sohalarni yodda tutish muhim:

• kremni albatta quloqlarga, boʻyinning orqa qismiga va dekolte sohasiga surtish kerak;
• agar panama va kepkalar kiymasangiz, oz miqdordagi kremni soch farqiga ham surtish lozim;
• koʻz atrofidagi soha bilan ehtiyot boʻlish kerak, chunki kimyoviy filtrlar koʻpincha shilliq qavatni taʼsirlantiradi.

Koʻz atrofidagi nozik soha uchun mineral komponentlar asosidagi alohida vositalardan foydalangan maʼqul — masalan, ultrabinafsha nurlardan himoya qiluvchi va shishlarni bartaraf etishga yordam beruvchi Dr Irena Eris Eyes Zone Supreme Eye Cream kremi.

Zamonaviy quyoshdan himoya qiluvchi filtrlar teriga surtilishi bilanoq darhol faollashadi. Ammo koʻchaga chiqishdan 20–30 daqiqa oldin surtgan afzal — bu vaqt ichida krem teriga toʻliq oʻrnashib ulguradi va uni kiyim bilan tasodifan artib yuborishning iloji boʻlmaydi.

Yuzga qancha SPF-krem surtish kerak?

JSST laboratoriya testlari shuni koʻrsatadiki, ishlab chiqaruvchilar himoya samaradorligini qatʼiy meʼyorga tayanib hisoblaydilar: terining har bir sm² maydoniga ikki mg krem.

Buni qanday hisoblash mumkin:

• yuz va boʻyinni ishonchli himoya qilish uchun kamida bir ml vosita kerak boʻladi (taxminan ikki barmoq uzunligidagi hajm);
• tana aʼzolarining ochiq qismlariga ishlov berish uchun taxminan 30–35 ml parvarishlovchi vosita kerak boʻladi.

Agar krem kamroq miqdorda surtilsa, qadoqda koʻrsatilgan SPF darajasi pasayadi va bu himoyani samarasiz qilib qoʻyadi.

SPF`ni qanchalik tez-tez yangidan surtib turish kerak?

Yuzdagi himoya plyonkasi kun boʻyi turishga qodir emas. Doimiy ravishda ochiq osmon ostida boʻlganda, qatlamni har ikki soatda yangilab turish zarur. Suv havzalari yaqinida dam olayotganda, quyoshdan himoyalovchi kremni (sanskrinnni) har safar suvga tushib chiqqandan keyin qaytadan surtish kerak.

Agar siz kun boʻyi idorada ishlasangiz yoki bino ichida vaqt oʻtkazsangiz, kremni muntazam yangilab turish shart emas. Biroq quyosh faolligi yuqori boʻlgan vaqtda koʻchaga chiqishdan oldin himoya qatlamini yangilab olgan maʼqul.

SPF ustidan makiyaj qilish mumkinmi?

Himoya vositasi ustidan dekorativ kosmetikadan foydalanish mumkin. Eng muhimi — yuzda himoya toʻsigʻi shakllanishi uchun sanskrin toʻliq soʻrilishini kutish kerak. Agar tonal kremni darhol surtsangiz, quyoshdan himoya qiluvchi qatlamda boʻshliqlar paydo boʻladi.

Yuzdagi SPF-kremni nima bilan yuvish kerak?

Kun oxirida quyoshdan saqlovchi kremni tozalash — xuddi ertalab surtish kabi majburiy bosqichdir. Himoya filtrlarini tunga qoldirish mumkin emas, aks holda ular yuz terisi salomatligiga zarar yetkazishi mumkin. Himoya filtrlarining komponentlari (ayniqsa, suvga chidamli formulalar yoki quyuq mineral asoslar ishlatilganda) juda mustahkam oʻrnashadi. Agar ular yuvib tashlanmasa, tabiiy teri yogʻi va chang bilan aralashib ketadi. Bu esa muqarrar ravishda teshikchalarning tiqilib qolishiga, qora nuqtalar paydo boʻlishiga va yalligʻlanishlarga olib keladi.

Dermatologlar terining normal tiklanishi uchun, ayniqsa, chidamli kosmetik mahsulotlardan foydalangandan keyin, kechki payt yuzni yaxshilab yuvish zarurligini taʼkidlashadi.

SPFni qanday toʻgʻri yuvish kerak?

Oʻchirish usuli bevosita ertalab siz ishlatgan vositaning formulasiga bogʻliq:

• kimyoviy filtrlarga ega yengil “shahar” emulsiyalari uchun koʻpincha oddiy tozalovchi gel yoki koʻpik yetarli boʻladi;
• zich, suvga chidamli tarkiblar yoki mineral ekranli vositalar uchun ikki bosqichli yuvinish talab etiladi, chunki oddiy suv ularni eritmaydi. Avval quruq teriga yogʻda eruvchan filtrlarni parchalaydigan gidrofil moy yoki balzam surtish kerak. Moydan keyin esa, teshiklarni batamom tozalash uchun odatdagi koʻpigingiz bilan yuvining. 

FAQ: SPF haqida tez-tez beriladigan savollar

SPF filtrli kremdan foydalanish shartmi?

Ha, agar ob-havo ma’lumotidagi ultrabinafsha indeksi uch va undan yuqori darajaga koʻtarilsa. Bu terining fotoqarishini oldini olish va oʻzingizni xavfli dermatologik kasalliklardan himoya qilishning eng samarali usulidir.

Qaysi vaqtda surtmaslik mumkin?

Quyosh botganda, ultrabinafsha nurlari yerga yetib borishni toʻxtatadi. Kechki payt nurlanish intensivligi asta-sekin nolga tushadi, shuning uchun quyosh botishining aniq vaqtiga e’tibor bering va mobil ilovada UV-indeksini tekshiring.

Uyda SPF kerakmi?

Agar ochiq deraza yonida yoki oynaband ayvonda soatlab oʻtirmasangiz — yoʻq. Skin Cancer Foundation mutaxassislari oddiy deraza oynalari B turidagi nurlarni ushlab qolishi, ammo A turidagi nurlarni oʻtkazishini eslatib oʻtadilar. Biroq, yopiq xonaning ichkarisida ularning umumiy konsentratsiyasi himoya qatlamini doimiy ravishda yangilab turishni talab qilmaydigan darajada juda kamdir.

SPF ostidan namlovchi krem surtish kerakmi?

Hammasi teringizning ehtiyojlariga va mahsulotning oʻz formulasiga bogʻliq. Koʻpgina zamonaviy sanskrinlar allaqachon parvarish qiluvchi komponentlarni oʻz ichiga oladi va kunduzgi kremning oʻrnini bosadi. Agar teri juda quruq boʻlsa, yengil namlantiruvchi vosita surtish, uning toʻliq soʻrilishini kutish va shundan keyingina himoya vositasidan foydalanish mumkin. Yogʻli teri turi uchun esa matlashtiruvchi emulsiyalarni tanlash mumkin.

Tonal krem tarkibidagi SPF omili yetarlimi?

Yoʻq, bu yetarli emas. Dekorativ kosmetika yorligʻida koʻrsatilgan himoya darajasiga erishish uchun uni juda qalin qatlam qilib — odatdagidan taxminan ikki-uch barobar qalinroq surtishga toʻgʻri keladi. Har qanday tonal asoslar faqat yaxshi qoʻshimcha boʻlib xizmat qiladi, lekin toʻlaqonli sanskrinnig oʻrnini bosa olmaydi.

Sanskrin ishlatilganda teri qorayadimi?

Ha, ammo bu jarayon sezilarli darajada sekinroq kechadi. Filtr tarkibiy qismlari melanin ishlab chiqarilishini sekinlashtiradi, biroq uni 100% toʻsa olmaydi. Ushbu toʻsiq tufayli qorayish yanada tekis va hujayralar salomatligi uchun xavfsizroq sodir boʻladi, buni tadqiqotlar ham tasdiqlaydi.

Vositani koʻz atrofiga surtish mumkinmi?

Mumkin, ammo ehtiyotkorlik bilan. Ba’zi organik kimyoviy filtrlar eriganida koʻzning sezuvchan shilliq qavatini ta’sirlashi mumkin. Ushbu soha uchun mineral stiklar yoki qovoqlar uchun moʻljallangan maxsus nozik kremlardan foydalanish xavfsizroq.

Muddati oʻtgan SPFdan foydalanish mumkinmi?

Mutloqo yoʻq. Vaqt oʻtishi bilan himoya filtrlari muqarrar ravishda parchalanadi va oʻz xususiyatlarini yoʻqotadi. Yaroqlilik muddati oʻtgan mahsulotni qoʻllash terini vaʼda qilingan himoyadan mahrum qiladi, buning natijasida siz kafolatlangan kuyish xavfiga duchor boʻlasiz.

Solyariyda quyoshdan himoyalovchi krem surtish kerakmi?

Bunda hech qanday amaliy ma’no yoʻq. Sun’iy zoʻr berib qorayish (solaryum) uchun moʻljallangan uskunalar A toifasidagi nurlarni oʻta yuqori konsentratsiyada tarqatadi, klassik kremlar esa bunga shunchaki bardosh bera olmaydi. JSST esa bunday joylarga borishni umuman tavsiya etmaydi, chunki ular salomatlik uchun isbotlangan xavflarni keltirib chiqaradi. Eng yaxshi yechim — Chorvoq plyajiga borib qorayishdir.

Suvga chidamli SPF qanday ishlaydi?

Bunday vosita yuz yuzasida yanada chidamli gidrofob plyonka hosil qiladi. U suvda oʻz xususiyatlarini 40–80 daqiqa davomida saqlab qolishga qodir. Biroq bu qoplama sochiq, pareo yoki boshqa kiyim bilan har qanday aloqa qilganda osongina shikastlanadi.

Terini quyoshdan himoya qilish haqida nimalarni bilish muhim?

• Kosmetika hammasidan qutqara olmaydi. SPF — bu shunchaki qoʻshimcha toʻsiq, mutlaq yechim emas. Quyosh faolligi eng yuqori boʻlgan soatlarda, taxminan 12:00 dan 16:00 gacha, soyada yashirinish, koʻzoynak, bosh kiyimlar taqish va tana aʼzolarini keng kiyimlar bilan yopish ishonchliroqdir;
• Sayohatlar uchun universal vosita mavjud emas. Sifatli sanskrin aynan teringiz ehtiyojlariga javob berishi, zarur boʻlgan filtrlash darajasini taʼminlashi va kun davomida noqulaylik hamda taʼsirlanish chaqirmasdan osongina surtilishi kerak;
• SPF bilan qilingan makiyaj — bu illyuziya. Dekorativ kosmetika hech qachon toʻlaqonli quyoshdan himoyalovchi krem oʻrnini bosa olmaydi. Tonal krem tarkibidagi quyoshdan himoya qiluvchi omil haqiqatda ishlashi uchun, vositani yuzga qalin qatlam qilib (taxminan bir millilitr) surtishga toʻgʻri keladi, bu esa makiyajni zich niqobga aylantiradi. Nurlarni ishonchli toʻsish uchun dekorativ kosmetika ostidan har doim sanskrin surtish kerak.