Chamadon, viza, stadion: JCh-2026ga qanday borish mumkin?

2026-yilgi futbol bo‘yicha jahon chempionati O‘zbekiston uchun tarixiy bo‘ladi. Oʻzbekiston terma jamoasi jahon maydonida ilk bor ishtirok etadi va baʼzi muxlislar jamoani qoʻllab-quvvatlash uchun sayohat qilishni rejalashtirmoqda. Agar siz shunday muxlislardan biri bo‘lsangiz, bizning yo‘riqnomamiz aynan siz uchun.

Taqvimga  ko‘ra, O‘zbekiston terma jamoasi guruh bosqichi o‘yinlarini uchta shaharda o‘tkazadi. Dastlabki o‘yin Meksika poytaxtida boshlaydi, u yerda «Azteca» stadionida Kolumbiyaga qarshi maydonga tushadi. Keyin jamoa qolgan ikki o‘yinni o‘tkazish uchun AQShga yo‘l oladi: ikkinchi o‘yin Hyustondagi «NRG Stadium»da Portugaliyaga qarshi bo‘lib o‘tadi. O‘zbekiston guruh bosqichini Atlantadagi «Mercedes-Benz Stadium»da 1-pley-off g‘olibiga qarshi o‘yin bilan yakunlaydi (bo‘lajak raqiblar orasida — DR Kongo, Yamayka yoki Yangi Kaledoniya).

Ushbu maqolada biz mezbon mamlakatlarga vizalarni qanday olish, Toshkent va bahslar bo’lib o’tadigan shaharlar o‘rtasidagi parvozlar logistikasini qanday tashkil etish va eng muhimi, firibgarlarga uchramasdan rasmiy chiptalarni qanday sotib olish haqida batafsil ma’lumot beramiz. Keling, barchasiga oydinlik kiritaylik.

Meksika va AQShga vizani qanday olish mumkin?

Agar siz 2026-yilgi futbol bo‘yicha jahon chempionatiga borishni rejalashtirayotgan bo‘lsangiz, viza jarayonini hoziroq boshlashingiz kerak. Odatdagidek, suhbat uchun navbat, ayniqsa Amerika konsulligiga, bir necha hafta oldindan band qilib qo‘yiladi. Agar Meksika vizasi kerak bo‘lsa, hujjatlar solingan chamadonlarni yig‘ishtirib, Tehronga boring, chunki eng yaqin elchixona o‘sha yerda joylashgan.

Odatda yirik musobaqalarga chiptasi bor muxlislar uchun ko‘pincha «viza koridorlari» — FIFA PASS yaratiladi, ular vizani ustuvor tartibda rasmiylashtirish imkonini beradi (2022-yilda Qatarda bo‘lgani kabi). 

AQSh FIFA PASS intervyusi uchun ustuvor ro'yxatdan o'tish tizimini e’lon qildi. Undan futbol bo‘yicha jahon chempionati o‘yinlariga kirish chiptasiga ega, biroq hali vizasi bo‘lmagan insonlar foydalanishlari mumkin bo‘ladi. Biroq, O‘zbekistonda Amerika vizasini olishga yuqori talab va qiyinchiliklarni hisobga olgan holda, oldindan tayyorgarlik ko‘rish va umumiy tartibda viza olish maqsadga muvofiqdir.

Shuni yodda tutingki, o‘yin chiptasi, shubhasiz, suhbatda kuchli qo‘shimcha dalil sifatida asqotadi. Biroq, chiptaning o‘zi jarayonning sodda tarzda o’tishini yoki vizani avtomatik ravishda tasdiqlanishini kafolatlamaydi.

AQShda vizani qanday olish mumkin? “Fuqarolik/yashash joyi bo‘yicha” yangi qoidalar

2025-yil 6-sentyabrdan boshlab AQShga viza olish tartibi o‘zgardi. Endi barcha Non-Immigrant Visa (NIV) arizalari ariza beruvchining fuqaroligi yoki qonuniy yashash joyidagi elchixona yoki konsullikda suhbat uchun topshirilishi kerak. Ya’ni, agar siz boshqa davlatda rasman yashasangiz (qonuniy maqomga ega bo‘lsangiz), u yerda rezidentlikni (yashash guvohnomasi, ro‘yxatdan o‘tish, hisoblar va hokazo) tasdiqlay olish sharti bilan ariza topshirishingiz mumkin. Shu bilan birga, uchinchi mamlakatlarda ilgari tayinlangan intervyular o‘z kuchida qolishi mumkin.

Agar siz O‘zbekistonda yashasangiz, AQSh vizasini Toshkentdagi konsullik orqali rasmiylashtirishingiz kerak. «Intervyudan tezroq o‘tish uchun qo‘shni davlatga boramiz» sxemasi endi noqonuniy.

Qanday qilib AQShning noimmigratsion vizasini o'lish mumkin:

Yuqorida aytilganidek, AQSh FIFA PASS`ni joriy qildi. Endi suhbatdan o'tish uchun ustuvor ravishda ro'yxatga yozilish mumkin:

• Dastlab fifa.com saytida ro‘yxatdan o‘ting va ishtirok etish uchun rozilik shaklini to‘ldiring.
• AQSh Davlat departamentining rasmiy saytida DS-160 shaklini onlayn to‘ldiring. So‘rovnomani to‘ldirgandan so‘ng, tasdiqlash sahifasini (confirmation page) albatta chop eting. U sizga suhbatda kerak bo‘ladi.
• Keyingi qadam viza yig‘imini to‘lashdir. Turistik/mehmon vizasi (B1/B2) uchun to‘lov — 185 dollar (2,2 mln so‘m). Chek yoki to‘lov tasdiqnomasini saqlab qo‘ying, chunki usiz suhbatga yozilish imkonsiz.
• Yig‘imni to‘laganingizdan so‘ng, suhbatga yozilishingiz kerak. Bu rasmiy viza xizmatlari portali orqali amalga oshiriladi. Chipta mavjud bo‘lsa, to‘ldirish jarayonida «Ha» deb javob bering, shunda FIFA PASS dasturiga kirish imkoniyati ochiladi. Chiptasiz siz FIFA Pass`da ishtirok eta olmaysiz, ya’ni ushbu dastur orqali tezlashtirilgan viza suhbatiga chaqirilmaysiz. Suhbat Yunusobod tumani, Moyqoʻrgʻon koʻchasi, 3 manzilida joylashgan U.S. Embassy Tashkent`da bo‘lib o‘tmoqda. 

Suhbat uchun siz quyidagi majburiy hujjatlar to‘plamini yig’ishingiz kerak:

• AQShga rejalashtirilgan sayohatingiz davomida amal qiladigan xorijga chiqish pasporti;
• chop etilgan va to‘ldirilgan DS-160 shakli;
• viza yig‘imi uchun to‘lov cheki;
• oq fonda 5x5 sm o‘lchamdagi rangli fotosurat.

Asosiy hujjatlarga qo‘shimcha ravishda vatanga bog‘liqlikni tasdiqlovchi dalillarni (qo‘shimcha hujjatlar) ham ilova qiling: ish joyidan ma’lumotnoma, mulk huquqini tasdiqlovchi hujjatlar (ko‘chmas mulk, avtomobil), barqaror daromadni ko‘rsatuvchi bank ko‘chirmalari. Shuningdek, sayohat rejasini tuzib, uni ham taqdim eting: chipta yoki yashash joyi bron qilinganligini tasdiqlovchi hujjatlar, aniq safar yo‘nalishi, va agar allaqachon qo‘lingizda bo‘lsa, o‘yin chiptalarining o‘zini ham.

 5. Belgilangan kun va soatda AQShning Toshkentdagi elchixonasiga tashrif buyuring. Intervyuda konsullik xodimi sizga safar maqsadi, O‘zbekiston bilan aloqalaringiz, sayohat tajribangiz va qaytish rejalaringiz haqida savollar beradi. Viza berish to‘g‘risidagi qarorni bevosita ofitser qabul qiladi.

Viza tasdiqlangach, pasportingizga yopishtiriladi, pasport 2\3 kundan keyin qaytarib beriladi. Agar viza rad etilsa, viza bo‘lmaydi va sizga pasportni tegishli hujjatlar bilan qaytarib berishadi.

Jahon chempionati uchun Meksikaga vizani qanday olish mumkin?

Agar sizda AQSh, Kanada, Yaponiya, Buyuk Britaniya yoki Shengen kelishuvi mamlakatlarining amaldagi vizasi bo‘lsa, Meksikaga kirish uchun alohida Meksika vizasini rasmiylashtirishingiz shart emas.

Ammo shuni yodda tutingki, ushbu mamlakatlardan birining vizasi mavjudligi hali kirish uchun yuz foiz kafolati bermaydi: yakuniy qaror har doim chegaradagi migratsiya xodimida qoladi.

Shunga qaramay, taxmin qilish mumkinki, Jahon chempionatiga chiptalarning mavjudligi mamlakatga kirish uchun juda muhim va ishonchli sabab bo‘ladi.

Agar tavakkal qilishni istamasangiz va chempionat paytida Meksikaga viza olishni rejalashtirayotgan bo‘lsangiz, Tehron (Eron) ga borishingiz kerak bo‘ladi. Amaldagi eng yaqin konsullik aynan o‘sha yerda joylashgan bo‘lib, hujjatlarni faqat shaxsan topshirish mumkin. Albatta, bu uzoq va mashaqqatli, lekin chegarada sizni o‘tkazib yuborishlari aniq. Meksika vizasi uchun qanday hujjatlar kerakligi haqida batafsil Meksikaning Erondagi elchixonasi saytida ma’lumot keltirilgan. 

Kanadaga vizani qanday olish mumkin?

O‘zbekiston futbol terma jamoasi Kanadada o‘yin o‘tkazmayotgan bo‘lsa-da, mezbon Kanada shaharlari (Toronto, Vankuver yoki Edmonton) dagi o‘yinlarga borishni rejalashtirgan bo‘lsangiz, viza olishingiz kerak bo‘ladi. Kanada vizasi uchun hujjatlarni Toshkentdan topshirish mumkin:

 1. Canada.ca saytida onlayn so‘rovnomani to‘ldiring. 

 2. Skanerlangan pasport, foto, moliyaviy hujjatlar (bankdan mablag‘ mavjudligi haqidagi ma’lumotnoma) va marshrutni (mehmonxona va aviachiptalar bandlovi) yuklang.

 3. Viza yig‘imi uchun to‘lov qiling — 100 kanada dollari (878 ming so‘m).

 4. Taklifnomani oling va Toshkent shahri, Shota Rustaveli ko‘chasi, 56-uy manzili bo’yicha Tashkent Visa Application Centre`da biometriyadan o‘ting.

 5. Javob kelishini kuting, odatda bu bir necha hafta davom etadi, lekin mavsum davomida ko‘proq vaqt ketishi mumkin.

Keling,  bunday qilamiz: sizdan  Aviasales.uzʼga obuna bo’lish,  bizdan esa — hurmat va ehtirom

Telegram

Instagram

O‘yin chiptalari uchun “kurash”: qanday xarid qilish kerak va nimalarni hisobga olish muhim?

2026-yilgi Jahon chempionatiga chiptalarni faqat FIFA rasmiy saytidan sotib olish kerak, u yerda barcha tasdiqlangan hamkorlar ham ko‘rsatilgan. Bu muhim, chunki «tanishlar»dan, shubhali saytlardan yoki Telegramdan chipta sotib olish deyarli har doim firibgarlik va pul yo‘qotishlarga olib keladi.

Xo‘sh, FIFAdan qanday chipta sotib olish kerak?:

Chiptalar ko‘pincha «kim tezroq sotib oladi» tamoyili asosida emas, balki lotereya orqali o‘ynaladi. Yirik turnirlarda odatda Face ID yoki nomli chiptalardan foydalaniladi, shuning uchun kirishda yuz skanerlanadi. Agar chipta siz uchun rasmiylashtirilmagan bo‘lsa, bu shunchaki ish bermasligi mumkin.

Xuddi shu mavzuda ko'proq ma'lumot

Qanday qilib «Real», «Liverpul» va boshqa top-klublar matchlariga borish mumkin?

FIFA chiptalar lotereyasi qanday ishlaydi?

FIFA qur’a tashlash orqali chiptalarning birinchi partiyalarini ro‘yxatdan o‘tgan foydalanuvchilar o‘rtasida taqsimlaydi. Bu degani, siz chipta sotib olish uchun ariza topshirasiz, to‘lov kartangizni bog‘laysiz va chipta sotib olish uchun navbatingiz kelishini kutasiz.

Chiptalar o‘yinida ishtirok etish uchun arizalarni topshirishning eng yaqin davri allaqachon 11-dekabrdan boshlangan va 2026-yil 13-yanvargacha davom etadi. Arizalarni qabul qilish 21:00 (Toshkent bo‘yicha) / 19:00 (Moskva bo‘yicha) da tugaydi.

Hozirgacha FIFA lotereyasi g‘oliblarining uchta guruhi uchun uchta xarid oynasi allaqachon ochilgan: 1-oktyabr, 3-oktyabr va 6-oktyabr. Va keyinroq sotib olganlar bu qisqa vaqt ichida alohida o‘yinlar narxi allaqachon ko‘tarilganini payqashdi. Bu safar FIFA birinchi marta dinamik narxlash tizimidan foydalanmoqda. Chiptalar narxi talabga qarab o‘zgaradi, xuddi aviachiptalar yoki konsertlarda bo‘lgani kabi.

Agar siz hali ham vositachilar orqali chipta sotib olishni o‘ylayotgan bo‘lsangiz, unda faqat tasdiqlangan va akkreditatsiyadan o‘tgan platformalardan xarid qiling. Bu xavfni kamaytiradi, lekin uni butunlay istisno qilmaydi.

Chipta o‘yinga kirish uchun eng ahamiyatli ruxsatnoma hisoblanadi, ammo har doim ham stadionga kirish uchun yetarli bo‘lavermaydi. JCH-2026 tashkilotchilari qo‘shimcha ravishda Fan ID (uni faqat chipta xarid qilib, rasmiy saytda ro‘yxatdan o‘tgach va shaxsingizni tasdiqlagandan keyingina olish mumkin), raqamli QR-kod yoki boshqa identifikatsiya usulini talab qilishlari ehtimoli bor. Aniq qoidalar Chempionatga yaqin paytda e’lon qilinadi.

O‘tgan chempionatlarda Fan ID bonuslar taqdim etgan: shahar transportidan bepul foydalanish, tezkor kirish liniyalari va stadionlarda soddalashtirilgan tekshiruv. JCH-2026da format boshqacha bo‘lishi mumkin, shuning uchun muxlislar FIFA va mezbon mamlakatlardagi yangilanishlarni muntazam kuzatib borishlari kerak bo‘ladi. 

Uchrashuvlar bo‘ladigan joylarga qanday yetib borish mumkin?

Futbol bo‘yicha 2026-yilgi jahon chempionati tarixdagi eng yirik chempionat bo‘ladi. Musobaqa ilk bor bir vaqtning o‘zida uchta mamlakatda o‘tkaziladi va ishtirokchilar soni esa rekord darajadagi 104 ta o‘yin o‘tkazadigan 48 ta terma jamoagacha ko‘paytirildi.

Yangi format to‘rtta jamoadan iborat 12 ta guruhni o‘z ichiga oladi. Guruh bosqichidan so‘ng birinchi marta 1/16 final bosqichi o‘tkaziladi, unda 32 ta jamoa ishtirok etadi — birinchi va ikkinchi o‘rinlar, shuningdek, uchinchi o‘rinni egallagan eng yaxshi jamoalar ishtirok etadi.

JCH-2026 guruh bosqichi o‘yinlarining taqdim etilgan taqvimiga ko‘ra, O‘zbekiston terma jamoasi K guruhida ishtirok etmoqda.

Butun yo‘nalishni uch bosqichga bo‘lish mantiqan to‘g‘ri bo‘lib, qit’alararo parvozlarda asosiy rolni yirik xalqaro xablar o‘ynaydi.

Birinchi uchrashuvga yo‘l (Toshkent — Mexiko)

Toshkentdan (TAS) Mexikoga (MEX) qulay parvoz qilish uchun Yevropa yoki Yaqin Sharqdagi bitta tezkor transferga ega aviakompaniyalarni tanlash afzalroq. «Turkish Airlines» Istanbul orqali qulay ulanishlarni taklif qiladi, bundan tashqari, O‘zbekiston fuqarolari uchun tranzit vizasiz. 15-iyundagi Toshkent — Istanbul — Mexiko reysi taxminan 14,8 mln so‘mga tushadi (skrinshotdagi narxlar 2025-yil 15-dekabr holatiga ko‘ra ko‘rsatilgan).

«Qatar Airways» Doha orqali ham ko‘pincha yaxshi imkoniyatlar taklif qiladi. Misol tariqasida, biz Mexikoga 15-iyundan chiptalarni qidirdik Doha va Nyu-York (viza kerak buladi) orqali uchish 12,4 mln so‘mga tushadi.

Frankfurt, Parij yoki Amsterdamda parvozlarni amalga oshiradigan Yevropa aviakompaniyalari faqat amaldagi Shengen vizasiga ega bo‘lgan taqdiringizdagina mos keladi — bu tranzitni osonlashtiradi va ko‘proq yo‘nalishlarni ochadi. 2026-yil 14-iyun kungi Toshkent — Frankfurt — Mexiko reysi 15,4 mln so‘m turadi.

O‘zbekiston terma jamoasi Mexiko, Hyuston va Atlantada o‘ynashi belgilanganligi sababli, to‘g‘ridan-to‘g‘ri xalqaro parvoz chempionat shaharlari bo‘ylab sayohatingiz uchun qulay startdir.

Uchrashuvlar bo‘yicha harakatlanish (Mexiko → Xyuston → Atlanta)

Uchala o‘yinni ham tomosha qilishni istasangiz, xursand bo‘ling: O‘zbekiston terma jamoasi o‘ynaydigan shaharlar o‘rtasidagi safarlar juda qulay. Bu Shimoliy Amerikadagi mashhur yo‘nalishlar bo‘lib, ular o‘rtasidagi parvozlar muntazam ravishda amalga oshiriladi.

Mexikodan Hyustonga Aeromexico va United aviakompaniyalarida to‘g‘ridan-to‘g‘ri reyslar mavjud, parvoz taxminan uch soat davom etadi. Chipta narxi 300 dollardan boshlanadi (3,6 mln so‘mdan 15-dekabrdagi kurs asosida). 

Hyuston — Atlanta yo‘nalishi AQShdagi eng gavjum yo‘nalishlardan biri hisoblanadi. Delta, United va boshqa aviakompaniyalar ko‘plab to‘g‘ridan-to‘g‘ri reyslarni taklif qiladi va parvoz taxminan ikki soat davom etadi. Narxi 150 dollardan boshlanadi taxminan 1, 8 mln so‘mni tashkil qiladi.

Atlantadan Toshkentga qaytishda sayohat boshidagi kabi yirik markazlar: Istanbul, Doha yoki Myunxen orqali uchish mumkin.

Mexiko, Hyuston va Atlantadagi uy-joy narxi

Mexikodagi o‘yin bo‘lib o‘tadigan «Azteca» stadioni hududidagi turar joy 150 dollardan boshlanadi (taxminan 1,8 mln so‘m). Atlantada stadion yaqinidagi mehmonxona nomerlari narxi 700 dollardan (8,4 mln so’m) va undan yuqori. Jefferson Park yaqinida arzonroq joy topish mumkin, bu yerdagi narxlar 250 dollardan boshlanadi (3,02 mln so’m). Hyustondagi mehmonxonalarga kelsak, stadion yaqinidagi joy narxlari 300 dollardan boshlanadi (3,6 mln so‘m).

Muxlislar uchun chek-list: hozirdanoq nima qilish mumkin?

JCh-2026 safariga tayyorgarlik stresslarsiz o‘tishi uchun harakatni oldindan boshlagan ma’qul:

1. Avvalo, xorijga chiqish pasportining amal qilish muddatini tekshiring — u AQSh, Kanada yoki Meksikadan qaytib kelganingizdan keyin kamida olti oy amal qilishi kerak.
2. Oldindan xalqaro Visa yoki Mastercard kartasini rasmiylashtiring, internet to‘lovlarini yoqing va kerakli limitlarni o‘rnating. Bu viza yig‘imi to‘lovlarini qilish va FIFA chiptalarini sotib olish uchun muhimdir.
3. 13-yanvargacha lotereyada omadingizni sinab ko‘ring. Balki o‘yinlarga chipta yutib olarsiz.
4. AQSh va Kanada vizalari uchun suhbatga yozilish uchun mavjud sanalarni muntazam tekshirib turing — kutish jarayoni uzoq davom etishi mumkin va bo’sh kunni iloji boricha ertaroq topgan ma’qul.
5. FIFA va mezbon mamlakatlar migratsiya xizmatlari rasmiy yangiliklariga obuna bo‘ling. Faqatgina ular chiptalar sotilishi va viza qoidalaridagi ehtimoliy o‘zgarishlar haqida ishonchli va dolzarb ma’lumot beradi.

«Yo‘lovchi» jamoasi sizga yoqimli sayohat va AQSh elchixonasida mehribon konsul uchrashini, O'zbekiston terma jamoasiga esa yorqin o‘yin va muxlislarimiz tomonidan stadiondan turib kuchli qo‘llab-quvvatlashlarni tilaydi!