Ermitaj, shaverma va yangi kirish qoidalari: Sankt-Peterburg bo‘ylab qo‘llanma
Birinchi marta kelganlar uchun Peterburg bo‘ylab gid.
Piterga birinchi tashrif - bu doim qiziqarli sarguzasht: Ermitajning uch million eksponatini qanday ko‘rish, Petropavlovkadagi to‘p ovozidan qulog‘ingiz bitib qolmasligi va Qon ustidagi Iso Masihning tirilish cherkovi Isaakiy cherkovidan qanday farq qilishini eslab qolish. Butun ta’tilni navbatda o‘tkazmaslik uchun, yangi kirish qoidalarini oldindan o‘rganib chiqish va eng yaxshi shaverma sotib olinadigan joylar orasidagi yo‘nalishni rejalashtirish maqsadga muvofiqdir.
- Sayohat uchun qanday hujjatlar kerak?
- Aeroportdan markazga qanday yetib borish va shahar bo‘ylab qanday harakatlanish mumkin
- Sankt-Peterburgda nimalarni ko‘rish mumkin: asosiy muzeylar va soborlar
- Pishkalar, koryushka va shaverma: Peterburgda qayerda arzon ovqatlanish mumkin
- Tez-tez so‘raladigan savollar: parvozdan oldin nimalarni bilish muhim
Sayohat uchun qanday hujjatlar kerak?
2026-yildan boshlab O‘zbekiston fuqarolari uchun qoidalar biroz zamonaviylashdi. Viza hali ham talab qilinmaydi, lekin endi parvozdan 72 soat oldin ruID ilovasida so‘rovnomani to‘ldirib, pasport nazorati uchun QR-kod olish lozim.
Muhim: Agar shaharda 7 ish kunidan ortiq qolmoqchi bo‘lsangiz, ro‘yxatdan o‘tishni unutmang.
2026-yilda Peterburgda sayyohlik solig‘i joriy etildi. «Yuqori mavsum»da (apreldan sentyabrgacha) xona narxining 2 foizini, biroq kuniga kamida 100 rubl to‘lashga tayyor turing. Qolgan vaqtda stavka 1 foizni tashkil etadi.
Aeroportdan markazga qanday yetib borish va shahar bo‘ylab qanday harakatlanish mumkin
Sankt-Peterburgda bitta aeroport mavjud - Pulkovo. Markazga ikki usulda borish mumkin: taksi yoki avtobus orqali. Avtobusni terminal chiqish joyida topishingiz mumkin. Shaharga 39 va 39E-raqamli avtobuslar («Moskovskaya» metro bekatigacha), 82E-raqamli avtobus esa «Prospekt Veteranov» bekatigacha boradi. Yo‘l haqi - 80 rubl (12 ming so‘m).
Taksi narxi yo‘l vaqti va manzilga qarab o‘zgaradi, lekin o‘rtacha 1000 rubldan (148 ming so‘m) boshlanadi. Mashinani Yandex GO ilovasi orqali buyurtma qilish maqsadga muvofiq.
Shahar bo‘ylab qanday harakatlanish mumkin?
Shaharda jamoat transporti yaxshi rivojlangan. Eng tez harakatlanish vositasi metro hisoblanadi - Peterburgda asosiy hududlarni qamrab olgan beshta yo‘nalish mavjud. Bir martalik yo‘l haqi 86 rubl (12 ming so‘m)ni tashkil etadi. Yer usti transporti - tramvay, trolleybus va avtobuslar uchun yo‘l haqi 80 rubl (11 ming so‘m).
Yo‘l xarajatlarini tejash uchun «Podorojnik» transport kartasini sotib olishingiz mumkin. Kartaning o‘zi 90 rubl (13 ming so‘m) turadi, uni aeroportda va metro kassalarida sotib olish hamda hisobini to‘ldirish mumkin. «Podorojnik» bilan har qanday transportda yurish 60 rubl (8 ming so‘m)ga tushadi. Kartani xarid qilinganidan so‘ng 45 kun ichida qaytarish va 90 rubl garov pulini olish imkoniyati mavjud.
Sankt-Peterburgda nimalarni ko‘rish mumkin: asosiy muzeylar va soborlar
Sankt-Peterburgda diqqatga sazovor joylar ko‘p. Birinchi tashrif buyurganlar uchun marshrutga kiritilishi lozim bo‘lgan joylar ro‘yxati tuzildi.
Petropavlovsk qal’asi
Kirish: qal’aning o‘ziga kirish bepul. Muzeylarga chipta (barchasi uchun bitta) 1000 rubl (148 ming so‘m)ni tashkil etadi.
Ish vaqti: har kuni soat 10:00 dan 21:00 gacha.
1703-yilda aynan shu joydan Peterburg shahri boshlanib, rivojlangan. Qal’a Quyon orolida joylashgan bo‘lib, Petropavlovsk sobori, Trubetskiy qal’asi qamoqxonasi va Tanga zarbxonasini o‘z ichiga oladi. Har kuni roppa-rosa tush paytida bu yerda an’anaga ko‘ra to‘pdan o‘q otiladi.
«Shahar uzra uch asr (Три века над городом)» ekskursiyasini tanlasangiz, Petropavlovsk ibodatxonasining kuzatuv maydoniga chiqish imkoniyatiga ega bo‘lasiz. Qal’a devorining tomiga «Neva panoramasi (Невская панорама)» ekskursiyasi bilan chiqiladi. Chipta narxi 200 rubldan (30 ming so‘mdan) boshlanadi.
Nevskiy prospekti
Shaharning bosh ko‘chasi bo‘lib, u Admirallik binosidan Aleksandr Nevskiy lavrasigacha bir necha kilometr masofaga cho‘zilgan. Shunchaki Nevskiy bo‘ylab sayr qilish orqali siz asosiy diqqatga sazovor joylarning ko‘pini ko‘rasiz: Qozon sobori, Qon ustidagi Iso Masihning tirilish cherkovi, Yekaterina bog‘i, «Kitob uyi», muzeylar va yodgorliklarni .
Ermitaj
Kirish: 500 rubl (75 ming so‘m).
Ish vaqti: chorshanba, payshanba, yakshanba - soat 11:00 dan 18:00 gacha, seshanba, juma, shanba - soat 11:00 dan 20:00 gacha.
Ermitaj to‘plamida uch milliondan ortiq eksponat mavjud, shuning uchun bu bitta muzey emas, balki bir nechta binolardan iborat butun bir majmua hisoblanadi. Eng mashhuri Qishki saroy bo‘lib, tanishuvni undan boshlash qulay. Muzey ko‘lamini tasavvur qilish uchun o‘ylang: agar har bir eksponat oldida atigi bir daqiqa to‘xtasangiz ham, butun to‘plamni ko‘rib chiqish uchun taxminan 11 yil vaqt ketadi va zallar bo‘ylab umumiy yo‘l deyarli 25 kilometrni tashkil etadi.
Muzey interyerlari san’at asarlaridan kam hayratlanarli emas. Masalan, mashhur Malaxit mehmonxonasini bezatish uchun 2 tonnaga yaqin qimmatbaho Ural toshi ishlatilgan. Imperator oilasi Nevaga tushadigan Iordan zinapoyasini va Yekaterina II buyrug‘i bilan yaratilgan, Vatikandagi Papa galereyasining aniq nusxasi bo‘lgan Rafael lojiyalarini albatta ko‘rish kerak.
«Yangi Gollandiya» oroli
Kirish: bepul.
Ish vaqti: dushanba-payshanba kunlari soat 9:00 dan 22:00 gacha, juma-yakshanba kunlari esa 23:00 gacha.
Yangi Gollandiya sun’iy oroldir. XVIII asrda bu yerda kema yog‘ochlarini saqlash uchun omborlar bo‘lgan, keyinchalik esa «Shisha» deb nomlangan dumaloq binoda dengiz qamoqxonasi joylashgan. Hozirda «Shisha»da ko‘rgazma zallari va restoranlar faoliyat yuritmoqda, atrofida esa bolalar va sport maydonchali bog‘ barpo etilgan. Yozda bu yerda maysazorda dam olishadi, qishda esa konkida uchgani kelishadi.
Vasilyevskiy oroli uchi
Bu burun Vasilyevskiy orolining sharqiy qismida, Katta va Kichik Neva daryolari oralig‘ida joylashgan. Bu yerda kichik maydonda Sankt-Peterburgning bir nechta ramziy binolari joylashgan: Birja, Kunstkamera va Rostral ustunlar. XIX asrda ustunlar portga kirayotgan kemalar uchun mayoq vazifasini bajargan. Hozir esa ularda faqat katta bayramlarda, masalan, Yangi yil kechasida chiroqlar yoqiladi.
Qozon sobori va «Kitob uyi»
Kirish: bepul.
Ish vaqti: sobor har kuni soat 9:00 dan 19:45 gacha, yakshanba kunlari esa 6:30 dan 19:45 gacha ochiq. «Kitob uyi» 9:00 dan 23:00 gacha ishlaydi.
Faoliyatdagi pravoslav sobori Griboyedov kanali qirg‘og‘ida joylashgan. Uning ro‘parasida uch qavatli «Kitob uyi» kitob do‘koni bor. Bu yerda suvenirlar, ochiqxatlar va, albatta, kitoblar xarid qilish mumkin.
Qozon soborining tomiga ekskursiya uyushtiriladi. Chipta narxi 250 rubl (37 ming so‘m). Bir paytlar bu bino Nevskiy prospektidagi eng baland inshoot bo‘lgan. «Kitob uyi» dan xiyobonning o‘zini ham, sobor ustunlarini ham qulay suratga olish mumkin.
Ichida animatorli baland qo‘g‘irchoqlar va «choy tatib ko‘rishi»dan ehtiyot bo‘ling. Bular shaharning mashhur aldov usullari: birgalikda suratga tushish yoki bir qultum ichimlik uchun keyinchalik katta pul talab qilishadi.
Isaakiy sobori
Kirish narxi: 450 rubl (66 ming so‘m), ustunlar maydoniga chiqish uchun qo‘shimcha 300 rubl (44 ming so‘m).
Ish vaqti: chorshanba kunidan tashqari har kuni soat 10:00 dan 18:00 gacha.
Isaakiy sobori shahardagi eng mashhur ibodatxonalardan biri hisoblanadi. U 40 yil davomida qurilgan bo‘lib, shu vaqt ichida uchta imperator almashgan. Uning ulug‘vorligi darhol ko‘zga tashlanadi, shuning uchun imkon bo‘lsa, avval sobor tashqaridan aylanib, haykallarni tomosha qilish, keyin esa ichkariga kirish maqsadga muvofiq. Ichki bezaklarida malaxit, lazurit va shungit bilan ishlangan uchta mehrob, Florensiya mozaikasi uslubidagi ikonalar va vitrajli derazalar mavjud. Albatta, ustunlar maydoniga chiqishni unutmang. U yerdan Peterburgning ajoyib manzarasi ko‘z oldingizda namoyon bo‘ladi.
Cherkov «Spas na krovi»
Kirish narxi: 450 rubl (66 ming so‘m).
Ish vaqti: chorshanba kunidan tashqari har kuni soat 10:00 dan 17:30 gacha.
Cherkov Griboyedov kanali bo‘yida imperator Aleksandr II xotirasiga bag‘ishlab qurilgan - aynan shu yerda 1881-yilda unga qarshi mash’um suiqasd uyushtirilgan edi. Binoning tashqi tomoni emal, rangli cherepitsa va boy bezaklar bilan bezatilgan bo‘lib, bunday miqyosdagi bezakni Peterburgning boshqa joyida uchratmaysiz. Cherkovning ichki qismi freskalar emas, balki 7000 kvadrat metrdan ortiq maydonni qoplagan ulkan mozaikadir. U devorlardan tortib gumbazlargacha hamma yerni qamrab olgan. Aytgancha, cherkovda yarador imperator yiqilgan toshli qirg‘oq bo‘lagi va kanal panjarasi saqlanib qolgan. Bu joy ustiga kulrang-binafsha yashma ustunlarga o‘rnatilgan maxsus soyabon qurilgan.
Maslahat: Muzeydan so‘ng kanal qirg‘og‘iga chiqing - u yerda suratga tushish uchun ajoyib manzara ochiladi, lekin qayiq sayrini taklif qiluvchi mahalliy kishilardan ehtiyot bo‘ling.
Pishkalar, koryushka va shaverma: Peterburgda qayerda arzon ovqatlanish mumkin
Peterburgda cheklangan byudjet bilan ham gastrotur uyushtirish mumkin. Asosiysi, nafaqat Nevskiy ko‘chasidagi sayyohlar, balki mahalliy aholi ovqatlanadigan joylarni bilish kerak.
Mahalliy taomlardan nimalarni tatib ko‘rish mumkin
Jahon durdonalaridan tashqari, Sankt-Peterburg o‘zining gastronomik afsonalari bilan ham mashhur. Mahalliy maxsus taomlardan ko‘pincha koryushka va pishkalar tatib ko‘riladi.
Koryushka - yangi bodring hidi keladigan kichkina baliq bo‘lib, odatda qarsildoq qilib qovuriladi. Uning mavsumi aprel-may oylarida boshlanadi va deyarli barcha kafelarda taqdim etiladi.
Pishkalar - shakar kukuni sepilgan issiq qovurilgan xamir bo‘lib, ma’nosi jihatidan shirin bug‘irsoqqa o‘xshaydi. Eng mashhur joy - Katta Otxona ko‘chasidagi eng qadimiy pishkaxona. Bu yerda sovet davrining ruhini, quyultirilgan sutli bakdagi qahvani va o‘n yillar davomida o‘zgarmagan retseptni saqlab qolishgan.
Peterburgning mashhur shavermasi alohida e’tiborga loyiq. Moskva shaurmasidan farqli o‘laroq, mahalliy shaverma ko‘pincha nafaqat lavashda, balki pitda ham taqdim etiladi va sousiga albatta ko‘p sarimsoqpiyoz va ziravorlar qo‘shiladi. Sevimlilardan biri -- «Vlavashe», klingikulti yoki qisqichbaqa kabi g‘ayrioddiy masalliqlarga ega zamonaviy tarmoq.
Dunyoning turli mamlakatlari oshxonalari va qahva
Gruzin taomlarini tatib ko‘rish uchun «Xachapuri va vino» restoraniga borish kerak. Bu yerda xinkali donasi 77-92 rubl turadi - bu taxminan 11-13 ming so‘m (hatto Toshkentda ham bunday narxlarni topib bo‘lmaydi!). Diametri 22 sm bo‘lgan Neapol pitssasi «22sm» restoranida tayyorlanadi. Tay oshxonasi va tom yam sho‘rvasini tatib ko‘rish uchun Chang restoraniga tashrif buyuring.
Agar biror narsani tanlashni xohlamasangiz, Vokzal 1853 sizga mos keladi. Bu sobiq Varshava vokzali binosidagi katta oziq-ovqat marketi. Ichkarida burgerlar va boulllardan tortib chuchvara va palovgacha bo‘lgan 90 ga yaqin muassasa faoliyat yuritadi.
Sayrlar orasidagi tanaffus uchun qahva iching. Maxsus qahva Moyka daryosi qirg‘og‘idagi «TChK»da, shahar markazidagi Bolshecoffeeda va «Petrogradskaya» metro bekati yaqinidagi Verle qahvaxonasida tayyorlanadi.
Tez-tez so‘raladigan savollar: parvozdan oldin nimalarni bilish muhim
2026-yilda Rossiyaga safar ilgarigiga qaraganda biroz ko‘proq tayyorgarlikni talab qiladi. Chegarada to‘xtab qolmaslik yoki aloqasiz qolmaslik uchun ushbu ro‘yxatni tekshirib chiqing.
O‘zbekistonliklar uchun Rossiya Federatsiyasiga kirish qoidalari qanday?
2025-yil yozidan boshlab qoidalar o‘zgardi: endi sayohatdan oldin ruID ilovasini yuklab olishingiz shart. U yerda ro‘yxatdan o‘tib, tashrif haqida xabarnoma yuborishingiz kerak. Aeroportda vaqtingizni behuda sarflamaslik uchun buni oldindan qiling - batafsil ma’lumotlarni alohida yo‘riqnomamizda jamlagan edik.
Rossiyaga sayohat qilishda qanday kartalarni o‘zingiz bilan olish kerak?
O‘zbekiston kartalari Rossiyada ishlamaydi. Naqd rubl olib boring (ularni Toshkentdayoq almashtirish ma’qul). Agar «Mir» kartangiz bo‘lsa, uni oling - u muammosiz ishlaydi.
Sim-kartani qanday sotib olish va aloqada bo‘lish mumkin?
Chegarani kesib o‘tganingizdan keyin dastlabki 24 soat ichida o‘zbek sim-kartangizda rouming ishlamasligiga tayyor turing - bu yangi xavfsizlik qoidalari tufayli. Endi mahalliy sim-kartani «qo‘ldan» yoki salonda tezda xarid qilish imkonsiz. Ko‘p funksiyali markazga (MFTs) murojaat qilish, SNILS olish, Davlat xizmatlarida ro‘yxatdan o‘tish va biometriya topshirish kerak. Faqat shundan keyingina aloqa salonida SIM-kartani rasmiylashtirish mumkin. Hayotni osonlashtiruvchi maslahat: «T-Mobile» sim-kartasin onlayn buyurtma qiling. Kompaniya vakili mehmonxonangizga kelib, barcha hujjatlarni joyida rasmiylashtirishga yordam beradi.
Maslahat: mehmonxonaga internetsiz yo‘l topish uchun Yandex Xaritalar yoki 2GIS ilovalaridan oflayn xaritalarni oldindan yuklab oling.
